Proverbs 27

Shan

← Chapter 26 Jump to: Chapter 28 →

1ယႃႇပေဢိင်ပိုင်ႈဝၼ်းမိူဝ်ႈၽုၵ်ႈသေလႄႈဢုပ်ႇဢၢတ်ႇ။ မႂ်းဢမ်ႇႁူႉလွင်ႈဢၼ်ၼႂ်းဝၼ်းၼိုင်ႈၵူၺ်း တၵ်းပဵၼ်မႃးၸိူဝ်ႉၼင်ႇႁိုဝ်ၼၼ်ႉလႆႈ။-

2ႁႂ်ႈပိူၼ်ႈယွင်ႈယေႃးမႂ်းသေၵမ်းလူၺ်ႈ။ သူပ်းမႂ်းယႃႇပေယွင်ႈယေႃးတူဝ်မႂ်း။ သီႇသူပ်းမႂ်းယင်းဢမ်ႇယွင်ႈယေႃးမႂ်းလႄႈ ႁႂ်ႈပိူၼ်ႈ ဢၼ်ဢမ်ႇၸၢပ်ႈဢမ်ႇသႅင်ႇၵၼ်တင်းမႂ်းၼၼ်ႉ ယွင်ႈယေႃးမႂ်းသေၵမ်းလူၺ်ႈ။-

3မၢၵ်ႇႁိၼ်ပဵၼ်ဢၼ်ၼၵ်းလႄႈ သၢႆးပဵၼ်ဢၼ်ၸင်ႈႁိဝ်ႈၼၵ်းၼႃႇဢေႃႈ။ တေႃးသႃႉၵေႃႉဢၼ်မိူၵ်ႈၼၼ်ႉၸမ်ႉ၊ ယဵင်ႈၶႅၼ်းၼၵ်းၼႃႇသေသွင်ၸိူဝ်ႉသွင်ပိူင်ၼၼ်ႉဢေႃႈ။-

4မႃႇၼႃႉမီးသၽေႃးဢၼ်ၵျၢမ်းလိူင်းၼႃႇလႄႈ တေႃးသႃႉၸၢင်ႈႁၢဝ်ႈၵျၢမ်းၼႃႇဢေႃႈ။ ၸႂ်ဢၼ်သီႈၵေႉႁေႈတႃၸမ်ႉ၊ ၽူႈလႂ်တၵ်းၸုၵ်းၶၢမ်ႇလႆႈ။-

5တၢင်းဢၼ်သုင်းမႃႉတၢင်ႇဢပႅတ်ႈထၢင်ႇထၢင်ႇသႃးသႃးၼၼ်ႉ ယဵင်ႈၶႅၼ်းလီၼႃႇသေ တၢင်းဢၼ်တဵတ်ႇတဵတ်ႇႁၵ်ႉပႅင်းၼၼ်ႉဢေႃႈ။-

6ႁွႆးၸဵပ်းႁွႆးတၢမ်ႇဢၼ်ၵေႃႉသေႈပၼ်ၼၼ်ႉ ၸၢင်ႈပႂ်ႉသဵတ်ႈၸႃႇယူႇလႄႈ တၢင်းၸုပ်ႇတၢင်းၼူမ်ဢၼ်ရၢၼ်ႇသူႇပဵၼ်ၼၼ်ႉ ၸၢင်ႈပဵၼ်ယူႇၶိူဝ်းၶိူဝ်းယႂ်းယႂ်းဢေႃႈ။-

7ႁူဝ်ၸႂ်ဢၼ်ၵိၼ်လႄႈဢိမ်ႇယဝ်ႉၼၼ်ႉ ၸၢင်ႈမိူဝ်ႇၸၢၼ်ႈႁူဝ်ၼမ်ႉႁူင်းၽိုင်ႈလႄႈ ၵေႃႉဢၼ်တွင်ႉမႆႈသႆႈလိူတ်ႇၸမ်ႉ၊ ၸၢင်ႈထၢင်ႇၶိူင်ႈပိူင်ဢၼ်ၶူမ်ၵႃႈမီးၼၼ်ႉ ဝၢၼ်ဢေႃႈ။-

8ၵေႃႉဢၼ်ၸုၼ်ႉပႅတ်ႈတီႈယူႇမၼ်းသေလႄႈ လႄႇၵႂႃႇၼၼ်ႉ ပဵၼ်မိူၼ်ၸိူဝ်ႉၼင်ႇၼူၵ်ႉဢၼ်ၸုၼ်ႉပႅတ်ႈႁင်းမၼ်းသေလႄႈ လႄႇၵႂႃႇၼၼ်ႉဢေႃႈ။-

9ၸိူဝ်ႉၼင်ႇဢၼ်ၼမ်ႉမၼ်းႁွမ် ဢိၵ်ႇတင်းၼၢမ်ႇသႃႇ ႁႂ်ႈႁူဝ်ၸႂ်ၸူမ်းသိူဝ်းၼၼ်ႉ တၢင်းဢၼ်ၵေႃႉသေႈႁၵ်ႉႁူမ်ၸူမ်းတွၼ်ႈလႄႈ ပၼ်တၢင်းၵျၢမ်ႇတၢင်းပွင်ၼၼ်ႉ ၸၢင်ႈႁႂ်ႈၸူမ်းသိူဝ်းဢေႃႈ။-

10ယႃႇပေၸုၼ်ႉပေပႅတ်ႈၵေႃႉသေႈမႂ်း ဢိၵ်ႇတင်းၵေႃႉသေႈပေႃႈမႂ်း။ ၼႂ်းၶိင်ႇမိူဝ်ႈဢၼ်ဢမူႉႁွတ်ႈထိုင်တီႈမႂ်းၼၼ်ႉ၊ မႂ်းယႃႇပေၶဝ်ႈၵႃႈၼႂ်းႁိူၼ်းပီႈႁိူၼ်းၼွင်ႉမႂ်း။ ၵူၼ်းႁိူၼ်းၸမ်ၵၼ်ဢၼ်မီးၸမ်မႂ်းၼၼ်ႉ ယဵင်ႈၶႅၼ်းလီၼႃႇသေ ပီႈၼွင်ႉဢၼ်မီးၵႆၵၼ်တင်းမႂ်းၼၼ်ႉဢေႃႈ။-

11လုၵ်ႈၸၢႆးၵဝ်ဢိူၺ်း၊ မီးပိင်ႇၺႃႇတႃႉ။ ႁႂ်ႈၸႂ်ၵဝ်မီးတၢင်းဢၼ်ၸူမ်းဢၼ်သိူဝ်း ထၼ်ႈပေႃးႁႂ်ႈၵဝ်ၵႄႈလိတ်ႈၵႂၢမ်း ၵေႃႉဢၼ်သႄႉသွမ်းၵဝ်ၼၼ်ႉလႆႈတႃႉ။-

12ၵေႃႉဢၼ်မီးသမ်ႇမႃႇသတီႉၼၼ်ႉ ႁူႉႁၼ်ဢမူႉလႄႈ ၸၢင်ႈတဵတ်ႇမႅပ်ႉယူႇဢေႃႈ။ ၵေႃႉဢၼ်ငိူဝ်ႈဢၼ်ငႃႉၼၼ်ႉၸမ်ႉ၊ ၸၢင်ႈၵႂႃႇ ၵႃႈၼင်ႇဢၼ်ၵႂႃႇၼၼ်ႉယူႇလႄႈ ထူပ်းဢမူႉဢေႃႈ။-

13သိမ်းဢဝ်ၽႃႈမႆ ၵေႃႉဢၼ်ၸၢင်ႈႁပ်ႉတုင်းဢဝ် ပုၼ်ႈၵေႃႉဢၼ်မၼ်းဢမ်ႇႁူႉၸၵ်းၼၼ်ႉတႃႉ။ ႁဵတ်းပႄႉႁဵတ်းၼႅင်ႇဢဝ်ဢုၵ်ႉၸႃႇ ၵေႃႉဢၼ်ႁပ်ႉတုင်းဢဝ် ပုၼ်ႈမႄႈယိင်းလေႃၼၼ်ႉတႃႉ။-

14ၵေႃႉဢၼ်လုၵ်ႉၵၢင်ၼႂ်ၸဝ်ႉၸဝ်ႉသေလႄႈ ဢဝ်တင်းသဵင်ဢၼ်ယႂ်ႇၼႃႇ ပၼ်တၢင်းလီတီႈၵေႃႉသေႈမၼ်းၼၼ်ႉ ႁွတ်ႈထိုင်တီႈဢၼ်မၢတ်ႈမၼ်း ႁဵတ်းတၢင်းဢၼ်ၵိၼ်ႇဢၼ်ဝႃႈဢေႃႈ။-

15တၢင်းဢၼ်မဵတ်ႉၽူၼ်ယွတ်ႇႁူဝ်ႈတူၵ်းယူႇၸိၵ်းၸိၵ်း ၼႂ်းဝၼ်းဢၼ်ၽူၼ်သိင်းၼႃႇၼၼ်ႉ မိူၼ်ၵၼ်တင်းမႄႈယိင်း ဢၼ်ၸၢင်ႈႁဵတ်းတၢင်းဢၼ်ၽိတ်းၵၼ်ၼၼ်ႉဢေႃႈ။-

16ၵေႃႉဢၼ်ႁၢမ်ႈတၢပ်ႈႁႄႉၶႅၼ်မၼ်းၼၼ်ႉ ႁၢမ်ႈတၢပ်ႈႁႄႉၶႅၼ်လူမ်းလႄႈ မိုဝ်းၶွၼ်ၶႂႃမၼ်းၼၼ်ႉ ယိပ်းၼမ်ႉမၼ်းဝႆႉဢေႃႈ။-

17ၸိူဝ်ႉၼင်ႇဢၼ်လဵၵ်းႁႂ်ႈလဵၵ်းၽၢႆလီလႅမ်လီၼၼ်ႉ၊ ၵူၼ်းၸၢင်ႈႁႂ်ႈၼႃႈၵေႃႉမၼ်းသေႈမၼ်း ၽၢႆလီလႅမ်လီဢေႃႈ။-

18ၵေႃႉဢၼ်ပႂ်ႉတူၼ်ႈမၢၵ်ႇလိူဝ်ႇသၢင်းၽေႃးယူႇၼၼ်ႉ လႆႈၵိၼ်မၢၵ်ႇတူၼ်ႈၼၼ်ႉလႄႈ ၵေႃႉဢၼ်ႁဵတ်းပွင်ဢမူႉၸဝ်ႈမၼ်းယူႇၼၼ်ႉ ၸၢင်ႈလႆႈမုၼ်သရေႇဢေႃႈ။-

19ၸိူဝ်ႉၼင်ႇဢၼ်ၼႃႈၵူၼ်း မိူၼ်ၵၼ်ဝႆႉၵႃႈၼႂ်းၼမ်ႉၼၼ်ႉ၊ ၵူၼ်းၵေႃႉၼိုင်ႈလႄႈၵေႃႉၼိုင်ႈ ၸႂ်သၽေႃးမိူၼ်ၵၼ်ဢေႃႈ။-

20ၸိူဝ်ႉၼင်ႇဢၼ်မိူင်းမရၼႃႉ ဢိၵ်ႇတင်းမိူင်းတၢင်းလူႉတၢင်းလႅဝ် ဢမ်ႇဢိမ်ႇၸႂ်ၼၼ်ႉ မၢၵ်ႇတႃၵူၼ်းဢမ်ႇၸၢင်ႈဢိမ်ႇၸႂ်။-

21မိူင်ႈ ပဵၼ်ပုၼ်ႈဢၼ်တၵ်းၸႅတ်ႈငိုၼ်းၶႃႇငိုၼ်းလႄႈ မုၵ်ႉၽႆး ပဵၼ်ပုၼ်ႈဢၼ်တၵ်းၸႅတ်ႈၶမ်းၶႃႇၶမ်းဢေႃႈ။ ၵူၼ်းၶၢမ်ႇတၢင်းဢၼ်ၸႅတ်ႈထၢမ်ၸႅတ်ႈတူၺ်း လူၺ်ႈတၢင်းဢၼ်ပိူၼ်ႈယွင်ႈယေႃးၼၼ်ႉဢေႃႈ။-

22ပိၵ်ႉသမ်ႉဢဝ်ၵေႃႉဢၼ်မိူၵ်ႈၼၼ်ႉ သႂ်ႇၵႃႈၼႂ်းၶူၵ်ႉ ဢဝ်သၢၵ်ႇတမ်လူၺ်ႈၵၼ်တင်းၶဝ်ႈပိူၵ်ႇသေၵေႃႈ၊ သၽေႃးတၢင်းဢၼ်မိူၵ်ႈမၼ်းၼၼ်ႉ ဢမ်ႇၸၢင်ႈဢွၵ်ႇသေၵႃႈတီႈမၼ်း။

23ၵႆႉၵျူဝ်းၸႃးႁႂ်ႈလႆႈႁူႉလွင်ႈၽုင်သူဝ်းမႂ်းတႃႉ။ ၽုင်ဝူဝ်းမႂ်းၸိူဝ်းၼၼ်ႉၵေႃႈ လူတူၺ်းၸေးၸေးၸွတ်ႇၸွတ်ႇတႃႉ။-

24ၸေးၸိမ်ႇဢမ်ႇၸၢင်ႈတႄႇယူႇတႃႇသေႇ။ ပၢၼ်းၵုမ်းသရၽူႇၵေႃႈ ဢမ်ႇၸၢင်ႈတႄႇယူႇ တီႈၵူႈၸူဝ်ႈၵူႈပၢၼ်သိုပ်ႇသိုပ်ႇတၢမ်းတၢမ်း။-

25ယိူဝ်ႈၵႄႇယႃႈၵႄႇ ၸၢင်ႈႁၢႆလၢႆၵႂႃႇလႄႈ ယိူဝ်ႈၼုမ်ႇၵိင်ႇၼုမ်ႇၸၢင်ႈပေႃႇပဵၼ်မႃးဢေႃႈ။ တူၼ်ႈလဵၵ်ႉတူၼ်ႈဢွၼ်ႇ ၵႃႈၼိူဝ်လွႆၼိူဝ်ၵုင်းၵေႃႈ လႆႈသိမ်းဝႆႉဢေႃႈ။-

26သူဝ်းဢွၼ်ႇတင်းလၢႆ ပဵၼ်ပုၼ်ႈတၢင်းၼုင်ႈတၢင်းမႆမႂ်းလႄႈ၊ ပႄႉတင်းလၢႆၵေႃႈ ပဵၼ်ပုၼ်ႈဢၼ်တၵ်းၽေႇၵႃႈၶၼ်ၵႂၢၵ်ႈလိၼ်ဢေႃႈ။-

27ၼမ်ႉၼူမ်းပႄႉတၵ်းပေႃးတၵ်းၵုမ်ႇ ပုၼ်ႈဢၼ်မႂ်းတၵ်းၵိၼ် ပုၼ်ႈဢၼ်ၵူၼ်းႁိူၼ်းၵူၼ်းယေးမႂ်းတၵ်းၵိၼ်၊ ပုၼ်ႈဢၼ်တၵ်းလဵင်ႉလူ ၶႃႈမႄႈယိင်းမႂ်းၸိူဝ်းၼၼ်ႉယူႇဢေႃႈ။

← Chapter 26 Jump to: Chapter 28 →