Proverbs 13

Shan

← Chapter 12 Jump to: Chapter 14 →

1လုၵ်ႈၸၢႆးဢၼ်မီးပိင်ႇၺႃႇၼၼ်ႉ ၸၢင်ႈထွမ်ႇတၢင်းဢၼ်ပေႃႈမၼ်း သင်ႇသွၼ်ပၼ်ၼၼ်ႉလႄႈ လုၵ်ႈၸၢႆးဢၼ်ႁဵတ်းဢမ်ႇပေႃးၼင်ႇႁိုဝ်ယူႇၼၼ်ႉၸမ်ႉ၊ ဢမ်ႇၸၢင်ႈထွမ်ႇၸၢင်ႈဢဝ်တၢင်းဢၼ်တၢင်ႇဢပႅတ်ႈၼၼ်ႉ။-

2ၵူၼ်းတၵ်းလႆႈၵိၼ်မၢၵ်ႇသူပ်းမၼ်းဢၼ်ဝႃႈ လွင်ႈတၢင်းဢၼ်လီဢၼ်ငၢမ်းၼၼ်ႉလႄႈ ႁူဝ်ၸႂ်ၵေႃႉဢၼ်ၸၢင်ႈပႅတ်ႉၸၢင်ႈလႅၼ်ၼၼ်ႉၸမ်ႉ၊ တၵ်းလႆႈၵိၼ်မၢၵ်ႇဢပႅတ်ႈ တၢင်းဢၼ်သႄႉဢၼ်သွမ်းဢေႃႈ။-

3ၵေႃႉဢၼ်ပႂ်ႉသူပ်းမၼ်းယူႇၼၼ်ႉ ပႂ်ႉဢသၢၵ်ႈမၼ်းယူႇလႄႈ ၵေႃႉဢၼ်ပိုတ်ႇသူပ်းမၼ်းၵႂၢင်ႈၵႂၢင်ႈၼၼ်ႉၸမ်ႉ၊ ၸၢင်ႈႁွတ်ႈထိုင်တၢင်းလူႉတၢင်းလႅဝ်ဢေႃႈ။-

4ႁူဝ်ၸႂ်ၵေႃႉဢၼ်ၶၢၼ်ႉဢၼ်ဢိူၼ်ၼၼ်ႉ တူၵ်းဢၢင်ႈၶႂ်ႈလႆႈလႄႈ ဢမ်ႇၸၢင်ႈလႆႈ။ ႁူဝ်ၸႂ်ၵေႃႉဢၼ်ဝီႉရီႉယႃႉၵႆႉၶၵ်းၼၼ်ႉၸမ်ႉ၊ ဢလူဝ်ႇသၼ်ႇတႃႉမၼ်း တၵ်းပျေႉၸုမ်ႇဢေႃႈ။-

5ၵေႃႉဢၼ်သိုဝ်ႈတေႃႇၼၼ်ႉ ၸၢင်ႈငိၼ်းၸင်းၵႂၢမ်းမူႉသႃႇလႄႈ ၵေႃႉဢၼ်ဢမ်ႇတြႃးၼၼ်ႉၸမ်ႉ၊ ၸၢင်ႈပဵၼ်တီႈဢၼ်လီႁင်ႈဢဵတ်ႇသဵတ်ႇလႄႈ ႁႂ်ႈပိူၼ်ႈဢူၵ်းဢၢႆဢေႃႈ။-

6တြႃးတၢင်းဢၼ်သိုဝ်ႈတေႃႇၼၼ်ႉ ၸၢင်ႈပႂ်ႉၵေႃႉဢၼ်ၸွမ်းသဵၼ်ႈတၢင်း သိုဝ်ႈသိုဝ်ႈယူဝ်းယူဝ်းၼၼ်ႉလႄႈ တြႃးတူႉၸရိူၵ်ႈၸမ်ႉ၊ ၸၢင်ႈဢဝ်ၵေႃႉဢၼ်မီးဢပႅတ်ႈၼၼ်ႉလူမ်ႉဢေႃႈ။-

7ၵေႃႉဢၼ်ႁဵတ်းၼင်ႇႁၢင်ႈၸၢင်ႈလႆႈလႄႈ ယၢၵ်ႈၽၢၼ်ၼႃႇလူင်လၢင်ၼၼ်ႉမီးဢေႃႈ။ ၵေႃႉဢၼ်ႁဵတ်းၼင်ႇႁၢင်ႈယၢၵ်ႈၽၢၼ်လႄႈ ၸၢင်ႈလႆႈၼႃႇလူင်လၢင်ၼၼ်ႉၵေႃႈမီးဢေႃႈ။-

8ၸေးၸိမ်ႇပဵၼ်ပုၼ်ႈဢၼ် တၵ်းထုတ်ႇဢဝ်ဢသၢၵ်ႈ ၵေႃႉဢၼ်ၸၢင်ႈမၢၵ်ႈၸၢင်ႈမီးၼၼ်ႉလႄႈ ၵေႃႉဢၼ်ယၢၵ်ႈဢၼ်ၽၢၼ်ၸမ်ႉ၊ ယင်းဢမ်ႇလႆႈငိၼ်းၵႂၢမ်းဢၼ်တၢင်ႇဢပႅတ်ႈလႄႈယူႇဢေႃႈ။-

9ဢၼ်လႅင်းၵေႃႉဢၼ်သိုဝ်ႈတေႃႇၼၼ်ႉ ၸူမ်းသိူဝ်းလႄႈ ဝၢၼ်ႇၽႆးတဵၼ်းၵေႃႉဢၼ်ဢမ်ႇတြႃးၼၼ်ႉၸမ်ႉ၊ တၵ်းလႆႈၶၢမ်ႇတၢင်းဢၼ်မွတ်ႇပႅတ်ႈဢေႃႈ။-

10ၸၢင်ႈပဵၼ်တၢင်းဢၼ်ၽိတ်းၵၼ် ၵွပ်ႈပိူဝ်ႈမႃႇၼႃႉၵူၺ်းလႄႈ ၵေႃႉဢၼ်ထွမ်ႇတုင်းဢဝ်ၵႂၢမ်းဢၼ်ပၼ်သတီႉၼၼ်ႉၸမ်ႉ၊ မီးပိင်ႇၺႃႇဢေႃႈ။-

11ဢုၵ်ႉၸႃႇဢၼ်ႁဵတ်းၸေႃႉၸႄႉမဝ်မၢင်လႄႈလႆႈၼၼ်ႉ ၸၢင်ႈသုတ်ႈၸၢင်ႈယွမ်းၵႂႃႇလႄႈ ၵေႃႉဢၼ်ၵျူဝ်းၸႃး ၵဵပ်းႁွမ်တွမ်ဝႆႉၼၼ်ႉၸမ်ႉ၊ ၸၢင်ႈႁႂ်ႈယႂ်ႇၽႄႈတူဝ်းတွၼ်းမႃးဢေႃႈ။-

12တၢင်းဢၼ်မုင်ႈထႃႈမွင်းထႃႈလႄႈ ပဵၼ်ဢၼ်ထိူင်းဢၼ်ၼၢၼ်းၼၼ်ႉ ၸၢင်ႈႁႂ်ႈႁူဝ်ၸႂ်မႆႈႁွၼ်ႉလႄႈ ဢလူဝ်ႇဢၼ်ပျေႉၸုမ်ႇၼၼ်ႉၸမ်ႉ၊ ပဵၼ်တူၼ်ႈဢသၢၵ်ႈဢေႃႈ။

13ၵေႃႉဢၼ်ႁဵတ်းဢမ်ႇပေႃးၼင်ႇႁိုဝ် တီႈၼုၵ်ႈၵပၢတ်ႈၸဝ်ႈယူႇၼၼ်ႉ တၵ်းႁႂ်ႈတၢင်းလူႉတၢင်းလႅဝ်ႁွတ်ႈထိုင်ၵႃႈၼိူဝ်မၼ်းလႄႈ ၵေႃႉဢၼ်ၵူဝ်ယမ်ပိင်းၺၢပ်ႈတြႃးၸဝ်ႈယူႇၼၼ်ႉၸမ်ႉ၊ တၵ်းလႆႈၵတ်းယဵၼ်ၶျၢမ်းသႃႇဢေႃႈ။-

14တြႃးၵေႃႉဢၼ်မီးပိင်ႇၺႃႇၼၼ်ႉ ပဵၼ်ၼမ်ႉဢွၵ်ႇႁူးဢသၢၵ်ႈ ဢၼ်ဝႄႈပိူင်ႈ သေတူင်ႇႁႅဝ်ႉတူင်ႇၶိုမ်းတၢင်းတၢႆဢေႃႈ။-

15ၺၢၼ်ႇဢၼ်လီၼၼ်ႉ ၸၢင်ႈႁႂ်ႈလႆႈၼႃႈလႆႈတႃလႄႈ သဵၼ်ႈတၢင်းၵေႃႉဢၼ်ၸၢင်ႈပႅတ်ႉၸၢင်ႈလႅၼ်ၼၼ်ႉၸမ်ႉ၊ ပဵၼ်ဢၼ်ယၢပ်ႇဢၼ်ၽိုတ်ႇဢေႃႈ။-

16ၶဝ်ၸိူဝ်းဢၼ်မီးသမ်ႇမႃႇသတီႉ တင်းသဵင်ႈတင်းလူင်ၼၼ်ႉ ၸၢင်ႈဢဝ်တၢင်းဢၼ်ႁူႉဢၼ်ၸႅင်ႈႁဵတ်းလႄႈ၊ ၵေႃႉဢၼ်မိူၵ်ႈၸမ်ႉ၊ ၸၢင်ႈႁႂ်ႈတၢင်းဢၼ်တူဝ်ၵဝ်ႇမိူၵ်ႈၼၼ်ႉ ထၢင်ႇသႃးဢေႃႈ။-

17ၵူၼ်းၸႂ်ႉၵူၼ်းသွႆဢၼ်ဢမ်ႇတြႃးၼၼ်ႉ ၸၢင်ႈလူမ်ႉတူၵ်းႁွတ်ႈ ၵႃႈၼႂ်းလွင်ႈတၢင်းဢၼ်ဢမ်ႇလီဢမ်ႇငၢမ်းလႄႈ၊ သၢၼ်ႇတမၢၼ်ႇဢၼ်မီးသဵတ်ႈၸႃႇၼၼ်ႉၸမ်ႉ၊ ပဵၼ်လွင်ႈတၢင်းဢၼ်ယူႇလီၵိၼ်ဝၢၼ်ဢေႃႈ။-

18ၵေႃႉဢၼ်ထဵင်ပႅတ်ႈတၢင်းဢၼ်သင်ႇသွၼ်ပၼ်ၼၼ်ႉ တၵ်းႁွတ်ႈထိုင်တၢင်းဢၼ်ယၢၵ်ႈဢၼ်ၽၢၼ် ဢိၵ်ႇတင်းတၢင်းဢၼ်လီဢူၵ်းလီဢၢႆလႄႈ ၵေႃႉဢၼ်ထွမ်ႇဢဝ်ၵႂၢမ်းဢၼ်သုင်းမႃႉပၼ်ၼၼ်ႉၸမ်ႉ၊ တၵ်းလႆႈမုၼ်သရေႇဢေႃႈ။-

19တၢင်းဢၼ်ဢလူဝ်ႇသၼ်ႇတႃႉပျေႉၸုမ်ႇၼၼ်ႉ ပဵၼ်ဢၼ်ဝၢၼ်ဢၼ်မၼ်း တီႈႁူဝ်ၸႂ်လႄႈ၊ တၢင်းဢၼ်ဝႄႈပႅတ်ႈတူႉၸရိူၵ်ႈၼၼ်ႉၸမ်ႉ၊ ပဵၼ်လွင်ႈဢၼ်ၵူၼ်းမိူၵ်ႈတင်းလၢႆ လီႁင်ႈဢဵတ်ႇသဵတ်ႇဢေႃႈ။-

20ၵေႃႉဢၼ်ၵႂႃႇမႃး လူၺ်ႈၵၼ်တင်းၶဝ်ၸိူဝ်းဢၼ်မီးပိင်ႇၺႃႇၼၼ်ႉ ၸၢင်ႈမီးပိင်ႇၺႃႇလႄႈ ၵေႃႉဢၼ်ႁဵတ်းၵေႃႉႁဵတ်းသေႈ လူၺ်ႈၵၼ် တင်းၶဝ်ၸိူဝ်းဢၼ်မိူၵ်ႈၼၼ်ႉၸမ်ႉ၊ ၼႄပျႃးလွင်ႈဢၼ်မၼ်း ပဵၼ်ဢၼ်ဢမ်ႇလီၼၼ်ႉဢေႃႈ။-

21ၽေးၸၢင်ႈလိုပ်ႈၸွမ်းလမ်းၸွမ်းၶဝ်ၸိူဝ်းဢၼ်မီးဢပႅတ်ႈၼၼ်ႉလႄႈ ၶဝ်ၸိူဝ်းဢၼ်သိုဝ်ႈတေႃႇၼၼ်ႉၸမ်ႉ၊ တၵ်းလႆႈၶၢမ်ႇဢၵျူဝ်းဢၼ်လီဢေႃႈ။-

22ၵေႃႉဢၼ်လီဢၼ်ငၢမ်းၼၼ်ႉ ၸၢင်ႈဝႆႉၵိုတ်းဢမူၺ်ႇဢုၵ်ႉၸႃႇ ပုၼ်ႈလုၵ်ႈမၼ်းလၢၼ်မၼ်းလႄႈ ၸေးၸိမ်ႇၵေႃႉဢၼ်မီးဢပႅတ်ႈၼၼ်ႉၸမ်ႉ၊ သိမ်းဝႆႉမီးယူႇ ပုၼ်ႈၶဝ်ၸိူဝ်းဢၼ်သိုဝ်ႈတေႃႇဢေႃႈ။-

23တၢင်းၵိၼ်တၢင်းၶူပ်းလိူင်ႇၼမ် ၵွပ်ႈပိူဝ်ႈ တၢင်းဢၼ်ၶဝ်ၸိူဝ်းဢၼ်ယၢၵ်ႈဢၼ်ၽၢၼ် ႁဵတ်းႁႆႊႁဵတ်းၼႃးၼၼ်ႉလႄႈ ၵူၺ်းၵႃႈ မီးၶဝ်ၸိူဝ်းဢၼ်ၸၢင်ႈႁွတ်ႈတၢင်းလူႉတၢင်းလႅဝ် ၵွပ်ႈပိူဝ်ႈတၢင်းဢၼ်ဢမ်ႇတြႃးဢေႃႈ။-

24ၵေႃႉဢၼ်ဢမ်ႇသုင်းဢမ်ႇသွင်ႇၶွၼ်ႉဝၢႆၼၼ်ႉ ၸင်းလုၵ်ႈမၼ်းလႄႈ ၵေႃႉဢၼ်ႁၵ်ႉလုၵ်ႈမၼ်းၸမ်ႉ၊ ၸၢင်ႈၵျူဝ်းၸႃးသင်ႇသွၼ်သုင်းမႃႉပၼ်ဢေႃႈ။-

25ၵေႃႉဢၼ်သိုဝ်ႈတေႃႇၼၼ်ႉ မီးဢၶႂၢင်ႉဢၼ်လႆႈၵိၼ်ဢိမ်ႇၵိၼ်တဵမ်လႄႈ တွင်ႉၵေႃႉဢၼ်ဢမ်ႇတြႃးၼၼ်ႉၸမ်ႉ၊ တၵ်းလႆႈၶၢမ်ႇတၢင်းဢၼ်ဢိုပ်းဢၼ်ယၢၵ်ႈဢေႃႈ။

← Chapter 12 Jump to: Chapter 14 →