Proverbs 6

Shan

← Chapter 5 Jump to: Chapter 7 →

1လုၵ်ႈၸၢႆးၵဝ်ဢိူၺ်း၊ ပေႃးမႂ်းလႆႈၶၢမ်ႇဢဝ်တုင်းဢဝ် ပုၼ်ႈၵေႃႉသေႈမႂ်းမႅၼ်ႈ၊ ပေႃးမႂ်းလႆႈတူပ်းမိုဝ်းၵၼ် ပုၼ်ႈပိူၼ်ႈတၢင်ႇၵေႃႉမႅၼ်ႈၸိုင်၊-

2မႂ်းထုၵ်ႇၶဵၼ်ႈမႅၼ်ႈ ၵွပ်ႈပိူဝ်ႈၵႂၢမ်းဢၼ်ဢွၵ်ႇသူပ်းမႂ်းၼၼ်ႉယဝ်ႉ။ မႂ်းႁွတ်ႈထိုင်ဢမူႉ ၵွပ်ႈပိူဝ်ႈၵႂၢမ်းဢၼ်မႂ်းလၢတ်ႈၼၼ်ႉယဝ်ႉ။-

3လုၵ်ႈၸၢႆးၵဝ်ဢိူၺ်း၊ ၵွပ်ႈပိူဝ်ႈဢၼ်မႂ်းတူၵ်းႁွတ်ႈ ၵႃႈၼႂ်းမိုဝ်းၵေႃႉသေႈမႂ်းၼၼ်ႉယဝ်ႉလႄႈ၊ တၵ်းလႆႈႁဵတ်းၸိူဝ်ႉၼင်ႇႁိုဝ် ႁႂ်ႈလႆႈၵႄႇသႄႇ ၼုၵ်ႈဢဝ်တူဝ်မႂ်းဝႃႈၼႆၸမ်ႉ၊ ၵႂႃႇလႄႈၶျႃးတႅမ်ႇတူဝ်ၸဝ်ႈၵဝ်ႇသေလႄႈ တွင်းပၢၼ်ႇၸူဝ်းဢဝ်ၵေႃႉသေႈမႂ်းၼၼ်ႉတႃႉ။-

4ယႃႇပေပၼ်ႁႂ်ႈမၢၵ်ႇတႃမႂ်းၼွၼ်းလပ်း။ ယႃႇပေပၼ်ႁႂ်ႈႁိမ်းတႃမႂ်းၶွႆႈၵၼ်လႄႈငဝ်ယူႇ။-

5ၵႄႇသႄႇၼုၵ်ႈဢဝ်တူဝ်မႂ်း ၸိူဝ်ႉၼင်ႇဢၼ်ၼုၵ်ႈဢဝ်ၵႂၢင် ဢိၵ်ႇတင်းၼူၵ်ႉၵႃႈၼႂ်းမိုဝ်းမူးသိူဝ်းၼၼ်ႉတႃႉ။

6ၵူၼ်းၶၢၼ်ႉၵူၼ်းဢိူၼ်ဢိူၺ်း၊ ၵႂႃႇၸူးၵႃႈတီႈမူတ်ႉသေလႄႈ ၶႆႈၸႂ်တူၺ်း တၢင်းႁဵတ်းတၢင်းသၢင်ႈမၼ်းၼၼ်ႉလႄႈ မီးပိင်ႇၺႃႇတႃႉ။-

7မၼ်းဢမ်ႇမီးသြႃႇ၊ ဢမ်ႇမီးၵေႃႉဢၼ်ပဵၼ်ၵႄႇပဵၼ်ႁူဝ်၊ ဢမ်ႇမီးၶုၼ်။-

8မၼ်းၸၢင်ႈဢဝ်တၢင်းၵိၼ်တၢင်းၶူပ်းမၼ်းဝႆႉ မိူဝ်ႈၶိင်ႇမႆႈၼၼ်ႉလႄႈ မၼ်းၸၢင်ႈႁႃဢဝ်သိမ်းဢဝ် တၢင်းၵိၼ်တၢင်းယႅမ်ႉမၼ်းဝႆႉ ၼႂ်းၶိင်ႇဢၼ်ပၢတ်ႇၶဝ်ႈၼၼ်ႉဢေႃႈ။-

9ၵူၼ်းၶၢၼ်ႉၵူၼ်းဢိူၼ်ဢိူၺ်း၊ မႂ်းတၵ်းၼွၼ်းယူႇႁိုင်ၵႃႈႁိုဝ်။ မႂ်းတၵ်းတိုၼ်ႇမႃးမိူဝ်ႈလႂ်။-

10ပေႃးမႂ်းဝႃႈ၊ ၼွၼ်းၵမ်းဢွၼ်ႇၼိုင်ႈလူးၵွၼ်ႇ၊ လပ်းၵမ်းဢွၼ်ႇၼိုင်ႈလူးၵွၼ်ႇ၊ ဢဝ်မိုဝ်းၼင်ႇၵၼ်ၵၼ် ၵွတ်ႇၵၼ်ၵမ်းဢွၼ်ႇၼိုင်ႈ ႁႂ်ႈလႆႈၼွၼ်းလပ်းလူးၵွၼ်ႇ၊ ဝႃႈၼင်ႇၼႆၸိုင်၊-

11တၢင်းယၢၵ်ႈတၢင်းၽၢၼ်မႂ်းၼၼ်ႉ တၵ်းႁွတ်ႈမႃးမိူၼ်ၸိူဝ်ႉၼင်ႇ ၵေႃႉဢၼ်ၵႂႃႇတၢင်းပႆတၢင်းၼၼ်ႉ ဢိၵ်ႇတင်းတၢင်းဢၼ်ဢုၵ်ႉၸႃႇမႂ်း သုမ်းၸွမ်းၼၼ်ႉ တၵ်းႁွတ်ႈမႃးမိူၼ်ၸိူဝ်ႉၼင်ႇၵူၼ်းသိုၵ်းၼၼ်ႉဢေႃႈ။

12ၵေႃႉဢၼ်ႁၢႆႉယုတ်ႈ၊ ၵေႃႉဢၼ်ဢမ်ႇတြႃးၼၼ်ႉ ၸၢင်ႈၵႂႃႇမႃးယူႇ ၵႃႈၼႂ်းသူပ်းၵႂၢမ်းဢၼ်ၵူတ်ႉဢၼ်ငွၵ်းၼၼ်ႉဢေႃႈ။-

13မၼ်းၸၢင်ႈၽႅပ်ႉတႃမၼ်းၼႄယူႇ၊ ၸၢင်ႈဢဝ်တင်းတိၼ်မၼ်းၼႄယူႇ၊ ၸၢင်ႈဢဝ်ၼိဝ်ႉမိုဝ်းမၼ်း သင်ႇသွၼ်ပၼ်ယူႇဢေႃႈ။-

14သၽေႃးတၢင်းဢၼ်ၵူတ်ႉဢၼ်ငေႃးၼၼ်ႉ မီးယူႇၵႃႈၼႂ်းႁူဝ်ၸႂ်မၼ်းလႄႈ မၼ်းၵျၢမ်ႇပွင်တၢင်းၵျၢမ်ႇတၢင်းပွင် ဢၼ်ဢမ်ႇလီဢမ်ႇငၢမ်းယူႇသေႇသေႇဢေႃႈ။ မၼ်းၸၢင်ႈႁဵတ်းႁႂ်ႈပိူၼ်ႈၽိတ်းၵၼ်ဢေႃႈ။-

15ပိူဝ်ႈၼႆလႄႈ ဢမူႉတၵ်းၵိုင်ႉၵၢင်ႉႁွတ်ႈထိုင်မၼ်းလႄႈ ယင်းဢမ်ႇမီးတီႈပိုင်ႈတီႈဢိင်လႄႈ၊ တၵ်းလႆႈၶၢမ်ႇတၢင်းဢၼ် ႁၵ်းႁဵၵ်းလူႉလႅဝ်ၵႂႃႇၵမ်းလဵဝ်ဢေႃႈ။

16လွင်ႈတၢင်းဢၼ် ထႃႇဝရႃႉၽြႃးၸင်းႁူၵ်းပႃးဢမ်ႇၵႃး၊ လွင်ႈတၢင်းဢၼ်မၼ်းၸဝ်ႈလီႁင်ႈဢဵတ်ႇသဵတ်ႇၸဵတ်းပႃးၸမ်ႉ၊-

17ပဵၼ်မၢၵ်ႇတႃဢၼ်ပူၵ်းပႅၼ်ၽႅၼ်သုင်ၼၼ်ႉပႃးၼိုင်ႈ၊ လိၼ်ႉဢၼ်ၸၢင်ႈသုင်းမူႉသႃႇၼၼ်ႉပႃးၼိုင်ႈ၊ မိုဝ်းဢၼ်ၸၢင်ႈထွၵ်ႇပႅတ်ႈလိူတ်ႈ ၵေႃႉဢၼ်ဢမ်ႇမီးဢပႅတ်ႈၼၼ်ႉပႃးၼိုင်ႈ၊-

18ႁူဝ်ၸႂ်ဢၼ်ၵျၢမ်ႇပွင် တၢင်းၵျၢမ်ႇတၢင်းပွင်ဢၼ်ဢမ်ႇလီဢမ်ႇငၢမ်းၼၼ်ႉပႃးၼိုင်ႈ၊ တိၼ်ဢၼ်ၸၢင်ႈၶုၼ်ႇလႅၼ်ႈၶၼ်ၶၼ်ၽႂ်းၽႂ်း ၸူးၵႃႈတီႈဢၼ်ႁဵတ်းဢပႅတ်ႈၼၼ်ႉပႃးၼိုင်ႈ၊-

19ၵေႃႉဢၼ်ၶၢမ်ႇသၢၵ်ႈသေႇ ဢၼ်ဢမ်ႇမၢၼ်ႇဢမ်ႇမႅၼ်ႈလႄႈ လၢတ်ႈၵႂၢမ်းမူႉသႃႇၼၼ်ႉပႃးၼိုင်ႈ၊ ၵေႃႉဢၼ်ၸၢင်ႈႁဵတ်းႁႂ်ႈပီႈၼွင်ႉ ၽိတ်းၵၼ်ၼၼ်ႉပႃးၼိုင်ႈ ဢေႃႈ။

20လုၵ်ႈၸၢႆးၵဝ်ဢိူၺ်း၊ ထွမ်ႇဢဝ်ၵႂၢမ်းပိင်းၺၢပ်ႈပေႃႈမႂ်းတႃႉ။ ယႃႇပေၸုၼ်ႉပႅတ်ႈ တြႃးဢၼ်မႄႈမႂ်းပၼ်ၼၼ်ႉ။-

21ဢဝ်မတ်ႉၽုၵ်ႇဝႆႉ ၵႃႈၼိူဝ်ႁူဝ်ၸႂ်မႂ်းတႃႇသေႇလႄႈ ဢဝ်ႁွႆႈဝႆႉၵႃႈတီႈၶေႃးမႂ်းတႃႉ။-

22မိူဝ်ႈဢၼ်မႂ်းၵႂႃႇမႂ်းပႆၼၼ်ႉၸိုင်၊ ၸိူဝ်းၼၼ်ႉတၵ်းဢဝ်မႂ်းသူင်ႇဢေႃႈ။ မိူဝ်ႈဢၼ်မႂ်းၼွၼ်းၸိုင်၊ တၵ်းပႂ်ႉမႂ်းယူႇဢေႃႈ။ မိူဝ်ႈဢၼ်မႂ်းတိုၼ်ႇမႃးၼၼ်ႉၸိုင်၊ တၵ်းလၢတ်ႈတေႃႇၵၼ်တင်းမႂ်းဢေႃႈ။-

23လွင်ႈမၼ်းၸမ်ႉ ပိင်းၺၢပ်ႈၸဝ်ႈပဵၼ်ဝၢၼ်ႇၽႆးတဵၼ်းလႄႈ တြႃးၸဝ်ႈပဵၼ်ဢၼ်လႅင်းဢေႃႈ။ ၵႂၢမ်းဢေႃးဝႃႇတႃႉ ဢၼ်ၸၢင်ႈၼႄပျႃးဢပႅတ်ႈၼၼ်ႉ ပဵၼ်သဵၼ်ႈတၢင်းဢသၢၵ်ႈဢေႃႈ။-

24ပဵၼ်ပုၼ်ႈဢၼ်တၵ်းပႂ်ႉမႂ်းယူႇ ႁႂ်ႈမႂ်းလႆႈၵၢင်းလွတ်ႈတင်းမႄႈယိင်းဢၼ်ႁၢႆႉ ဢိၵ်ႇတင်း သူပ်းဢၼ်မႄႈယိင်းလေႃ ၸၢင်ႈၶျေႃးဝွၼ်းၼၼ်ႉဢေႃႈ။-

25ပိၵ်ႉသမ်ႉမၼ်းႁၢင်ႈလီသေၵေႃႈ၊ ယႃႇပေမီးၸႂ်ဢၼ်ၸပ်းဢၼ်ၸွႆးမၼ်း။ ယႃႇပေႁႂ်ႈမၼ်းလႆႈဢဝ်တင်း လၢႆႇတႃႁိမ်းတႃမၼ်းၵၢင်လႆႈမႂ်း။-

26လွင်ႈမၼ်းၸမ်ႉ ၵွပ်ႈပိူဝ်ႈမႄႈမွၵ်ႇယႃႈလႄႈ ၵူၼ်းၸၢႆးယၢၵ်ႈၵႂႃႇၽၢၼ်ၵႂႃႇတေႃႇထိုင်ႁွတ်ႈ ထၼ်ႈပေႃးမီးၶဝ်ႈမုၼ်းၽၢၵ်ႇလဵဝ်ၵူၺ်းဢေႃႈ။ မႄႈယိင်းဢၼ်မီးၽူဝ်ယူႇလႄႈ ၸၢင်ႈလဵၼ်ႈၸူႉၼၼ်ႉၵေႃႈ ၸၢင်ႈႁႃဢဝ်တီႉဢဝ် ဢသၢၵ်ႈဢၼ်မျၢတ်ႈဢေႃႈ။-

27ၵူၼ်းၸိုင် ယင်းဢမ်ႇႁႂ်ႈၶူဝ်းၼုင်ႈမၼ်းမႆႈလႄႈ ႁွပ်ႇဢုမ်ႈဢဝ်ၽႆး ဝႆႉၵႃႈၼႂ်းႁူဝ်ဢူၵ်းလႆႈႁိုဝ်။-

28ယင်းဢမ်ႇႁႂ်ႈတိၼ်မၼ်းမႆႈလႄႈ ယဵပ်ႇပႆၵႂႃႇၵႃႈၼိူဝ်ထၢၼ်ႇၽႆးလႆႈႁိုဝ်။-

29ၵေႃႉဢၼ်ၶဝ်ႈၸူးတီႈမေးပိူၼ်ႈၼၼ်ႉ မိူၼ်ၸိူဝ်ႉၼင်ႇၼၼ်ဢေႃႈ။ ၵေႃႉဢၼ်ၽိတ်းပိူင်ႈမၼ်းၼၼ်ႉၸမ်ႉ၊ ဢမ်ႇၵၢင်းလွတ်ႈတင်းဢပႅတ်ႈလႆႈ။-

30ၵူၼ်းဢမ်ႇပေႃးဝႆႉၸႂ်တီႈၽူႈလၵ်ႉဢၼ်တွင်ႉမႆႈလႄႈ လၵ်ႉဢဝ် ႁႂ်ႈလႆႈပေႇတၢင်းဢၼ်မၼ်းတွင်ႉမႆႈၼၼ်ႉ။-

31ၵူၺ်းၵႃႈ မိူဝ်ႈဢၼ်ထူပ်းမႅၼ်ႈမၼ်းၼၼ်ႉၸိုင်၊ မၼ်းတၵ်းလႆႈၶိုၼ်းတႅၼ်းပၼ် ၸဵတ်းပုၼ်ႈဢေႃႈ။ မၼ်းတၵ်းလႆႈဢဝ်ဢုၵ်ႉၸႃႇ ၵႃႈဢၼ်မီး ၵႃႈတီႈႁိူၼ်းမၼ်းၼၼ်ႉယေႃႇသေဢေႃႈ။-

32ၵေႃႉဢၼ်ၽိတ်းပိူင်ႈမေးပိူၼ်ႈၼၼ်ႉၸမ်ႉ၊ ဢမ်ႇမီးၺၢၼ်ႇ။ ၵေႃႉဢၼ်ႁဵတ်းၸိူဝ်ႉၼင်ႇၼၼ်ၼၼ်ႉ ၸၢင်ႈယႃႉၽဵဝ်ႈဢသၢၵ်ႈတူဝ်ၸဝ်ႈၵဝ်ႇပႅတ်ႈဢေႃႈ။-

33မၼ်းတၵ်းလႆႈၶၢမ်ႇဢဝ် တၢင်းဢၼ်တိူဝ်ႉဢၼ်မၢတ်ႇ ဢၼ်ၸဵပ်းသႅပ်ႇၼႃႇ ဢိၵ်ႇတင်းတၢင်းဢၼ်သရေႇလူႉဢေႃႈ။ တၢင်းဢၼ်လီဢူၵ်းလီဢၢႆမၼ်းၼၼ်ႉ ဢမ်ႇမွတ်ႇဢမ်ႇႁၢႆလႆႈ။-

34လွင်ႈမၼ်းၸမ်ႉ တၢင်းဢၼ်ၵူၼ်းၸၢႆးမီးၸႂ်ဢၼ် ဢမ်ႇယုမ်ႇမေးမၼ်းၼၼ်ႉ ပဵၼ်တၢင်းၸႂ်မႆႈၶႆႈၸႃႉဢၼ်ယႂ်ႇၼႃႇလႄႈ မၼ်းဢမ်ႇၸၢင်ႈမီးတၢင်းဢၼ်ဢဵတ်းလူ ၼႂ်းမိုဝ်ႉဝၼ်းဢၼ်ပၼ်ဢပႅတ်ႈၼၼ်ႉ။-

35မၼ်းၸၢင်ႈႁဵတ်းဢမ်ႇပေႃးၼင်ႇႁိုဝ် တီႈငိုၼ်း ဢၼ်ယေႃႇဢၼ်သေဢပႅတ်ႈၼၼ်ႉ ၵႃႈႁိုဝ်ၼၼ်ႉလႄႈ၊ ပိၵ်ႉသမ်ႉမႂ်းပၼ်လၢၵ်ႈသွင်ႇၼမ်ၼႃႇသေၵေႃႈ၊ မၼ်းဢမ်ႇၸၢင်ႈပေႇၸႂ်။

← Chapter 5 Jump to: Chapter 7 →