Proverbs 29

Shan

← Chapter 28 Jump to: Chapter 30 →

1ၵေႃႉဢၼ်လႆႈၶၢမ်ႇတၢင်းဢၼ် သင်ႇသွၼ်သုင်းမႃႉယူႇၶိူဝ်းၶိူဝ်းယႂ်းယႂ်းလႄႈ ႁႂ်ႈၶေႃးမၼ်းၵႅၼ်ႇၶႅင်ယူႇၼၼ်ႉ ယင်းဢမ်ႇမီးတီႈဢိင်တီႈပိုင်ႈလႄႈ တၵ်းၶၢမ်ႇတၢင်းဢၼ်ႁၵ်းႁဵၵ်းလူႉလႅဝ်ၵမ်းလဵဝ်ဢေႃႈ။-

2မိူဝ်ႈဢၼ်ၶဝ်ၸိူဝ်းဢၼ်သိုဝ်ႈတေႃႇၼၼ်ႉ လႆႈဢၶႂၢင်ႉၸိုင် ၵူၼ်းဝၢၼ်ႈၵူၼ်းမိူင်းတင်းလၢႆ ၸၢင်ႈၸူမ်းသိူဝ်းလႄႈ မိူဝ်ႈဢၼ်ၶဝ်ၸိူဝ်းဢၼ်ဢမ်ႇတြႃးၼၼ်ႉ ဢုပ်ႉပိူင်ႇၼၼ်ႉၸမ်ႉ၊ ၵူၼ်းဝၢၼ်ႈၵူၼ်းမိူင်းတင်းလၢႆ ၸၢင်ႈမႆႈၸႂ်ယၢပ်ႇၸႂ်ဢေႃႈ။-

3ၵေႃႉဢၼ်ထုၵ်ႇၸႂ်ၵျိူၵ်ႈၸႂ်ပိင်ႇၺႃႇတြႃးၼၼ်ႉ ၸၢင်ႈႁႂ်ႈပေႃႈမၼ်းၸူမ်းသိူဝ်းလႄႈ ၵေႃႉဢၼ်ႁဵတ်းၵေႃႉႁဵတ်းသေႈလူၺ်ႈၵၼ် တင်းမႄႈမွၵ်ႇယႃႈၼၼ်ႉၸမ်ႉ၊ ၸၢင်ႈႁႂ်ႈဢုၵ်ႉၸႃႇသဵင်ႈမူတ်းဢေႃႈ။-

4ၶုၼ်ႁေႃၶမ်း ဢၼ်ၸီႇယၢင်ႇၸွမ်းၼင်ႇတြႃးၼၼ်ႉ ၸၢင်ႈႁႂ်ႈဝၢၼ်ႈမိူင်းတႄႇယူႇလႄႈ ၶုၼ်ႁေႃၶမ်းဢၼ်ၵိၼ်လၢၵ်ႈသွင်ႇၼၼ်ႉၸမ်ႉ၊ ၸၢင်ႈပိၼ်ႈၶႂမ်ႈဝၢၼ်ႈမိူင်းပႅတ်ႈဢေႃႈ။-

5ၵေႃႉဢၼ်ၶျေႃးလႅၼ် ၵူၼ်းႁိူၼ်းၸမ်ၵၼ်တင်းမၼ်းၼၼ်ႉ ဢဝ်ၶႄၵီႈၽႄႇဝႆႉပုၼ်ႈတိၼ်မၼ်းဢေႃႈ။-

6ၼႂ်းတၢင်းဢၼ် ၵူၼ်းႁုၵ်းၵူၼ်းႁၢႆႉၽိတ်းပိူင်ႈၼၼ်ႉ၊ မီးတၢင်းဢၼ်ၵၢင်တူင်ႇႁႅဝ်ႉဝႆႉယူႇလႄႈ ၵေႃႉဢၼ်သိုဝ်ႈတေႃႇၼၼ်ႉၸမ်ႉ၊ ၸၢင်ႈႁဵတ်းၵႂၢမ်းဢၼ် သႂၢင်ႇသိူဝ်းၼႃႇလူင်လၢင်ၼၼ်ႉဢေႃႈ။-

7ၵေႃႉဢၼ်သိုဝ်ႈတေႃႇၼၼ်ႉ ၸၢင်ႈၶႆႈၸႂ်ဝူၼ်ႉၸႂ်လူၺ်ႈ ဢမူႉၶဝ်ၸိူဝ်းဢၼ်ယၢၵ်ႈဢၼ်ၽၢၼ်လႄႈ ၵေႃႉဢၼ်ဢမ်ႇတြႃးၼၼ်ႉၸမ်ႉ၊ ဢမ်ႇၸၢင်ႈႁႃဢဝ်တၢင်းဢၼ်ႁူႉဢၼ်ၸႅင်ႈ လွင်ႈမၼ်းတၢင်းမၼ်း။-

8ၶဝ်ၸိူဝ်းဢၼ်ႁဵတ်းဢမ်ႇပေႃးၼင်ႇႁိုဝ်ယူႇၼၼ်ႉ ၸၢင်ႈဢဝ်ၽႆးတုတ်ႇဝဵင်းလႄႈ ၶဝ်ၸိူဝ်းဢၼ်မီးပိင်ႇၺႃႇၼၼ်ႉၸမ်ႉ၊ ၸၢင်ႈသၢႆႇတေႃးသႃႉတၢင်းၸႂ်မႆႈၶႆႈၸႃႉပႅတ်ႈဢေႃႈ။-

9ပေႃးၵေႃႉဢၼ်မီးပိင်ႇၺႃႇၼၼ်ႉ ပဵၼ်ဢမူႉၵၼ် တင်းၵေႃႉဢၼ်မိူၵ်ႈၸိုင်၊ မၼ်းၸႂ်မႆႈၶႆႈၸႃႉသေဢမ်ႇဝႃႈ၊ မၼ်းယုမ်ႉၶူဝ်သေဢမ်ႇဝႃႈ၊ ဢမ်ႇမီးတီႈဢၼ်တၵ်းထၢတ်ႇတၵ်းယဵၼ်။-

10ၶဝ်ၸိူဝ်းဢၼ်ၸၢင်ႈထွၵ်ႇလိူတ်ႈၵူၼ်းပႅတ်ႈၼၼ်ႉ ၸၢင်ႈငိၼ်းၸင်းၵေႃႉဢၼ်ၸေးၸုမ်ႇလႄႈ ၶဝ်ၸိူဝ်းဢၼ် သိုဝ်ႈလီယူဝ်းလီၼၼ်ႉၸမ်ႉ၊ ၸၢင်ႈႁႃၸွႆႈႁႃထႅမ်ဢသၢၵ်ႈပိူၼ်ႈဢေႃႈ။-

11ၵေႃႉဢၼ်မိူၵ်ႈၼၼ်ႉ ၸၢင်ႈဢဝ်တေႃးသႃႉတၢင်းၸႂ်မႆႈမၼ်းၵႃႈမီးၼၼ်ႉ ၽုၺ်ႇဢွၵ်ႇၼႄပျႃးလႄႈ ၵေႃႉဢၼ်မီးပိင်ႇၺႃႇၼၼ်ႉၸမ်ႉ၊ ၸၢင်ႈဢဝ်သိူင်ႇဝႆႉသိမ်းဝႆႉလႄႈ ႁႂ်ႈမၼ်းထၢတ်ႇမၼ်းယဵၼ်ဢေႃႈ။-

12ပေႃးၶုၼ်ထွမ်ႇဢဝ်ၵႂၢမ်းမူႉသႃႇၸိုင်၊ ၶႃႈမၼ်းၵူၼ်းမၼ်းတင်းသဵင်ႈတင်းလူင် ပဵၼ်ၵူၼ်းႁၢႆႉၵူၼ်းမိူၵ်ႈဢေႃႈ။-

13ၵေႃႉဢၼ်ယၢၵ်ႈဢၼ်ၽၢၼ် ဢိၵ်ႇတင်းၵေႃႉဢၼ်ၼိၵ်ႈၸၢၵ်ႈငႅၼ်းသႄးၼၼ်ႉ ႁူပ်ႉထူပ်းၵၼ်လႄႈ ထႃႇဝရႃႉၽြႃးဢဵတ်းလူပၼ် ဢၼ်လႅင်းတီႈမၢၵ်ႇတႃသွင်ၶႃၼၼ်ႉဢေႃႈ။-

14ရႃႇၸႃႉပလၢင်ႇၶုၼ်ႁေႃၶမ်း ဢၼ်ၸီႇယၢင်ႇၸွမ်းၼင်ႇတြႃး တီႈၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၼၼ်ႉ ၸၢင်ႈတႄႇယူႇတႃႇသေႇဢမ်ႇထၢတ်ႇဢေႃႈ။

15ၶွၼ်ႉဝၢႆ ဢိၵ်ႇတင်းတၢင်းဢၼ်ဢဝ်သူပ်းသင်ႇသွၼ်သုင်းမႃႉပၼ်ၼၼ်ႉ ၸၢင်ႈႁႂ်ႈပိင်ႇၺႃႇယႂ်ႇၽႄႈၼမ်ၵိုၼ်းမႃးလႄႈ လုၵ်ႈဢွၼ်ႇဢၼ်ယူႇၵမ်ႈၸႂ်မၼ်းၼၼ်ႉ ၸၢင်ႈႁႂ်ႈမႄႈမၼ်းလႆႈဢူၵ်းလႆႈဢၢႆဢေႃႈ။-

16မိူဝ်ႈဢၼ်ၶဝ်ၸိူဝ်းဢၼ်ဢမ်ႇတြႃးၼၼ်ႉ ယႂ်ႇၽႄႈၼမ်ၵိုၼ်းမႃးၼၼ်ႉၸိုင်၊ ဢပႅတ်ႈတၢင်းဢၼ်ပူၼ်ႉလိူဝ် ၸၢင်ႈယႂ်ႇၽႄႈၼမ်ၵိုၼ်းမႃးလႄႈ ၵူၺ်းၵႃႈ ၶဝ်ၸိူဝ်းဢၼ်သိုဝ်ႈတေႃႇၼၼ်ႉ တၵ်းလႆႈႁၼ်တၢင်းဢၼ် ၶဝ်လူမ်ႉတူၵ်းၼၼ်ႉဢေႃႈ။-

17သင်ႇသွၼ်သုင်းမႃႉလုၵ်ႈၸၢႆးမႂ်းတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင် မၼ်းတၵ်းပၼ်ၵတ်းယဵၼ်ၶျၢမ်းသႃႇတီႈမႂ်းဢေႃႈ။ လိူဝ်သေၼၼ်ႉဢမ်ႇၵႃး မၼ်းတၵ်းပၼ်ဢၶႂၢင်ႉ ဢၼ်ၸႂ်လီသႂၢင်ႇလီသိူဝ်းၼၼ်ႉဢေႃႈ။-

18ပေႃးပျႃႇတိၵ်ႈၸဝ်ႈဢမ်ႇမီးၸိုင်၊ ၵူၼ်းတင်းလၢႆႁဵတ်းၵမ်ႈၸႂ်ၶဝ်ယူႇလႄႈ ၵေႃႉဢၼ်ပႂ်ႉၸွမ်းတြႃးၸဝ်ႈယူႇၼၼ်ႉၸမ်ႉ၊ မီးမင်ႇၵလႃႇဢေႃႈ။-

19ဢဝ်တင်းၵႂၢမ်းၵူၺ်းသင်ႇသွၼ်သုင်းမႃႉၶႃႈလႄႈ ဢမ်ႇပႄႉၼႅင်ႇလႆႈ။ မၼ်းၼၼ်ႉပိၵ်ႉသမ်ႉႁူႉၸႅင်ႈသေၵေႃႈ ယင်းဢမ်ႇထွမ်ႇဢဝ်လႄႈ တၵ်းယူႇဢေႃႈ။-

20ပေႃးမီးၵေႃႉဢၼ်ယင်းဢမ်ႇမီးသတီႉလႄႈ သူပ်းၽႂ်းၵႂၢမ်းၽႂ်းၼၼ်ႉၸိုင်၊ ဢၶႂၢင်ႉတၢင်းဢၼ်မုင်ႈထႃႈမွင်းထႃႈ လူၺ်ႈၵူၼ်းဢၼ်မိူၵ်ႈၼၼ်ႉ ယဵင်ႈၶႅၼ်းမီးၼႃႇသေ ဢၶႂၢင်ႉတၢင်းဢၼ်မုင်ႈထႃႈမွင်းထႃႈ လူၺ်ႈၵေႃႉၼၼ်ႉဢေႃႈ။-

21ၶႃႈဢၼ်လႆႈၶၢမ်ႇတၢင်းလဵင်ႉတၢင်းလူ ထၼ်ႈပေႃးႁႂ်ႈဢူၼ်ႈလီဢွၼ်ႇလီ ၸႃႉၸဵမ်မိူဝ်ႈဢၼ်ယင်းလဵၵ်ႉၼၼ်ႉ ၵမ်းလိုၼ်း တၵ်းလႆႈဢရႃႇလုၵ်ႈၸၢႆးဢေႃႈ။-

22ၵေႃႉဢၼ်ၸၢင်ႈၸႂ်မႆႈၶႆႈၸႃႉၼၼ်ႉ ၸၢင်ႈတိုၵ်းယူင်း တၢင်းဢၼ်ၽိတ်းၵၼ်လႄႈ ၵေႃႉဢၼ်တေႃးသႃႉဢွၵ်ႇၼၼ်ႉၵေႃႈ ပျေႉၸုမ်ႇတဵမ်ဝႆႉတင်းတၢင်းဢၼ်ပူၼ်ႉဢၼ်လိူဝ်ၼမ်ၼႃႇဢေႃႈ။-

23မႃႇၼႃႉတူဝ်ၸဝ်ႈၵဝ်ႇ တၵ်းၶျႃးတူဝ်ၸဝ်ႈၵဝ်ႇတူၵ်းတီႈတႅမ်ႇလႄႈ၊ ၵေႃႉဢၼ်ႁူဝ်ၸႂ်ၶျႃးတႅမ်ႇၼၼ်ႉၸမ်ႉ၊ တၵ်းလႆႈမုၼ်သရေႇဢေႃႈ။-

24ၵေႃႉဢၼ်ၽႄမႅင်ႇဢုၵ်ႉၸႃႇ လူၺ်ႈၵၼ်တင်းၽူႈလၵ်ႉၼၼ်ႉ ၸၢင်ႈၸင်းဢသၢၵ်ႈတူဝ်ၸဝ်ႈၵဝ်ႇလႄႈ ပိၵ်ႉသမ်ႉမၼ်းငိၼ်းၵႂၢမ်း တၢင်းဢၼ်တိူင်ႇဝႃႈ ၵိၼ်ႇဝႃႈၼၼ်ႉသေၵေႃႈ၊ မၼ်းဢမ်ႇၽုၺ်ႇဢွၵ်ႇၼႄပျႃး။-

25တၢင်းဢၼ်ၵူဝ်ႁႄၵူၼ်းၼၼ်ႉ ၸၢင်ႈၵၢင်တူင်ႇႁႅဝ်ႉဝႆႉလႄႈ ၵေႃႉဢၼ်ဢိင်ပိုင်ႈထႃႇဝရႃႉၽြႃးယူႇၼၼ်ႉၸမ်ႉ၊ တၵ်းၵၢင်းလွတ်ႈတင်းၽေးဢေႃႈ။-

26ၵူၼ်းၼမ်ၼႃႇ ၸၢင်ႈၵျူဝ်းၸႃးႁႃဢဝ်ၵျေးၸူးတၢင်းဢၼ် ၶုၼ်ႁဵတ်းလႄႈ ၵူၺ်းၵႃႈ ထႃႇဝရႃႉၽြႃးၸီႇယၢင်ႇဢမူႉ ၵူၼ်းတင်းလၢႆဢေႃႈ။-

27ၵေႃႉဢၼ်ဢမ်ႇၸွမ်းတြႃးၼၼ်ႉ ပဵၼ်တီႈဢၼ်ၵေႃႉဢၼ်ၸွမ်းတြႃး ၸၢင်ႈလီႁင်ႈဢဵတ်ႇသဵတ်ႇလႄႈ ၵေႃႉဢၼ်ၸွမ်းသဵၼ်ႈတၢင်းသိုဝ်ႈသိုဝ်ႈယူဝ်းယူဝ်းၼၼ်ႉၵေႃႈ၊ ပဵၼ်တီႈဢၼ်ၵေႃႉဢၼ်ဢမ်ႇၸွမ်းတြႃးၼၼ်ႉ ၸၢင်ႈလီႁင်ႈဢဵတ်ႇသဵတ်ႇဢေႃႈ။

← Chapter 28 Jump to: Chapter 30 →