Proverbs 26

Shan

← Chapter 25 Jump to: Chapter 27 →

1ၸိူဝ်ႉၼင်ႇမူၺ်ႁႃႇ ၼႂ်းၶိင်ႇမႆႈၼၼ်ႉ ဢိၵ်ႇတင်းၸိူဝ်ႉၼင်ႇၼမ်ႉၽူၼ်ၼႂ်းၶိင်ႇဢၼ်ပၢတ်ႇၶဝ်ႈၼၼ်ႉလႄႈ ၵေႃႉဢၼ်မိူၵ်ႈၼၼ်ႉ ဢမ်ႇထုၵ်ႇၶၢမ်ႇဢဝ်မုၼ်သရေႇ။-

2ၸိူဝ်ႉၼင်ႇဢၼ်ၼူၵ်ႉၸွၵ်ႇ လႄႇၵႂႃႇၵူႈတီႈၵူႈလႅၼ်ယူႇ၊ ၼူၵ်ႉၵဵဝ်ႇၵေႃႈမိၼ်ၵႂႃႇယူႇၼၼ်ႉ၊ တၢင်းဢၼ်ယင်းဢမ်ႇမီးလွင်ႈမၼ်းလႄႈ ၵိၼ်ႇဝႃႈၼၼ်ႉ ဢမ်ႇၸၢင်ႈႁွတ်ႈၸၢင်ႈထိုင်။-

3ၶွၼ်ႉႁေႃႈထုၵ်ႇလီပုၼ်ႈမႃႉ၊ သၢႆၵၵ်ႉထုၵ်ႇလီပုၼ်ႈလီႈ၊ ၶွၼ်ႉဝၢႆထုၵ်ႇလီပုၼ်ႈပႄလင်ၵေႃႉဢၼ်မိူၵ်ႈၼၼ်ႉဢေႃႈ။-

4ယႃႇပေၸွမ်းသၽေႃး ၵေႃႉဢၼ်မိူၵ်ႈၼၼ်ႉသေလႄႈ ၶိုၼ်းၵႄႈၶိုၼ်းလိတ်ႈၵႂၢမ်းမၼ်း။ ၵူဝ်မႂ်းတၵ်းမိူၼ်ၵၼ်တင်းမၼ်းဢေႃႈ။-

5ၸွမ်းသၽေႃးၵေႃႉဢၼ်မိူၵ်ႈၼၼ်ႉသေလႄႈ ၵႄႈလိတ်ႈၵႂၢမ်းမၼ်းတႃႉ။ ၵူဝ်မၼ်းတၵ်းထၢင်ႇမၼ်း မီးပိင်ႇၺႃႇသိုဝ်ႈၼႃႈတႂ်ႈတႃမၼ်းဢေႃႈ။-

6ၵေႃႉဢၼ်ဢဝ်ၵႂၢမ်းဢၼ်သင်ႇ ဢၼ်ဢၢပ်ႈပၼ်ၵႂႃႇ ၵႃႈၼႂ်းမိုဝ်းၵေႃႉဢၼ်မိူၵ်ႈၼၼ်ႉ တႅပ်းတိၼ်မၼ်းပႅတ်ႈလႄႈ ၸုပ်ႇၵိၼ်တၢင်းဢၼ်ဢၵျူဝ်းလူႉဢေႃႈ။-

7တၢင်းဢၼ်ၵူၼ်းမိူၵ်ႈလၢတ်ႈၵႂၢမ်းသုၵ်ႉတၢမ်ႇၼၼ်ႉ ပဵၼ်ၸိူဝ်ႉၼင်ႇ တၢင်းဢၼ်ယုၵ်ႉတိၼ်ၵေႃႉဢၼ်တိၼ်ၵႅင်ႉတိၼ်ၵုၵ်ႈၼၼ်ႉ ပႅတ်ႈၼၼ်ႉဢေႃႈ။-

8တၢင်းဢၼ်ပၼ်မုၼ်သရေႇ တီႈၵေႃႉဢၼ်မိူၵ်ႈၼၼ်ႉ ပဵၼ်ၸိူဝ်ႉၼင်ႇ မၢၵ်ႇႁိၼ်ဢၼ်မတ်ႉၽုၵ်ႇသႂ်ႇဝႆႉ ၵႃႈၼႂ်းယူင်ႉဢၼ်ထိမ်ႈၼၼ်ႉဢေႃႈ။-

9သုၵ်ႉတၢမ်ႇဢၼ်မီးၵႃႈၼႂ်းသူပ်းၵေႃႉဢၼ်မိူၵ်ႈၼၼ်ႉ ပဵၼ်ၸိူဝ်ႉၼင်ႇၼၢမ် ဢၼ်ၸူၵ်ႉမိုဝ်းၵူၼ်းမဝ်းလဝ်ႈၼၼ်ႉဢေႃႈ။-

10ၵေႃႉဢၼ်ၸၢင်ႈဢဝ်ငႃဢဝ်ၵူၼ်းမိူၵ်ႈ ဢိၵ်ႇတင်းၵူၼ်းလႄႇၵူၼ်းလၢဝ်းတင်းလၢႆၼၼ်ႉၼၼ်ႉ ပဵၼ်ၸိူဝ်ႉၼင်ႇၸဝ်ႈၵၢင်ႇၸဝ်ႈၵူင် ဢၼ်ပိုတ်းယိုဝ်းတိူဝ်ႉမၢတ်ႇသႂ်ႇ ၵူၼ်းတင်းသဵင်ႈတင်းလူင်ၼၼ်ႉဢေႃႈ။-

11ၸိူဝ်ႉၼင်ႇဢၼ်မႃ ၸၢင်ႈၶိုၼ်းၵိၼ်ႁၢၵ်ႈမၼ်းၼၼ်ႉ၊ ၵေႃႉဢၼ်မိူၵ်ႈၼၼ်ႉ ၸၢင်ႈၶိုၼ်းၵမ်ၵျၢင်ႉတၢင်းၵမ်တၢင်းၵျၢင်ႉဢၼ်မိူၵ်ႈဢေႃႈ။-

12ပေႃးမီးသေၵေႃႉသေၵူၼ်းထၢင်ႇမၼ်းမီးပိင်ႇၺႃႇၸိုင်၊ ဢၶႂၢင်ႉဢၼ်လီမုင်ႈထႃႈမွင်းထႃႈ လူၺ်ႈၵေႃႉဢၼ်မိူၵ်ႈၼၼ်ႉ ယဵင်ႈၶႅၼ်းမီးၼႃႇသေ ဢၶႂၢင်ႉဢၼ်လီမုင်ႈထႃႈမွင်းထႃႈလူၺ်ႈၵေႃႉၼၼ်ႉဢေႃႈ။-

13ၵေႃႉဢၼ်ၶၢၼ်ႉဢၼ်ဢိူၼ်ၼၼ်ႉ ၸၢင်ႈလၢတ်ႈလႄႈဝႃႈ၊ သၢင်ႇသီႈမီးၵႃႈၼွၵ်ႈပုၼ်ႉဢေႃႈ။ သၢင်ႇသီႈမီးၵႃႈၼႂ်းတႃႈၼႂ်းတၢင်းတင်းလၢႆဢေႃႈ၊ ဝႃႈၼင်ႇၼႆဢေႃႈ။-

14ၸိူဝ်ႉၼင်ႇဢၼ်မႂ်ၽၵ်းတူ ပၼ်ႇယူႇၵႃႈၼႂ်းတီႈဢၼ် တူင်ႇသႂ်ႇတိၼ်မၼ်းၼၼ်ႉ ၵေႃႉဢၼ်ၶၢၼ်ႉဢၼ်ဢိူၼ်ၼၼ်ႉ ၸၢင်ႈပၼ်ႇယူႇၵႃႈၼိူဝ်တီႈၼွၼ်းမၼ်းဢေႃႈ။

15ၵေႃႉဢၼ်ၶၢၼ်ႉဢၼ်ဢိူၼ်ၼၼ်ႉ ဢဝ်မိုဝ်းမၼ်းၸူၵ်းၶဝ်ႈၵႃႈၼႂ်းမေႃႈလႄႈ ပေႃးသမ်ႉလႆႈၶိုၼ်းဢဝ်ဢွၵ်ႇလႄႈ ပွၼ်ႈသႂ်ႇၵႃႈၼႂ်းသူပ်းမၼ်းၸိုင်၊ မၼ်းငိၼ်းပဵၼ်ဢၼ်ယၢပ်ႇၸႂ်ၽိုတ်ႇၸႂ်ဢေႃႈ။-

16ၵေႃႉဢၼ်ၶၢၼ်ႉဢၼ်ဢိူၼ်ၼၼ်ႉ ၸၢင်ႈထၢင်ႇမၼ်းမီးပိင်ႇၺႃႇ လိူဝ်တွၼ်းၼႃႇသေၵူၼ်းၸဵတ်းၵေႃႉ ဢၼ်ၸၢင်ႈၽုၺ်ႇဢွၵ်ႇၼႄပျႃး လွင်ႈမၼ်းတၢင်းမၼ်းလႆႈၼၼ်ႉဢေႃႈ။-

17ၵေႃႉဢၼ်ပႆၸွမ်းတၢင်းၵႂႃႇလႄႈ လေႃးလႄးလူၺ်ႈၵၼ်တင်းဢမူႉ ဢၼ်ဢမ်ႇၸၢပ်ႈသႅင်ႇၵၼ်တင်းမၼ်းၼၼ်ႉ ပဵၼ်မိူၼ်ၸိူဝ်ႉၼင်ႇ ၵေႃႉဢၼ်ၵမ်တိုတ်ႉမႂ်ႁူမႃၼၼ်ႉဢေႃႈ။-

18ၵေႃႉဢၼ်ပႅတ်ႉလႅၼ်ၵူၼ်းႁိူၼ်းၸမ်ၵၼ်တင်းမၼ်းလႄႈဝႃႈ၊ ၵဝ်ယဝ်ႉယွၵ်ႇလဵၼ်ႈၵူၺ်းဢမ်ႇၸႂ်ႈႁိုဝ် ဝႃႈၼင်ႇၼႆၼၼ်ႉ၊-

19ပဵၼ်မိူၼ်ၸိူဝ်ႉၼင်ႇၵူၼ်းယွင်ႇ ဢၼ်ၸၢင်ႈယိုဝ်းလိမ်ႈၽႆးလႂ်၊ ပိုၼ်ၵၢင်ႇလႂ်၊ ၽေးဢၼ်ၸၢင်ႈတၢႆလႂ်ၼၼ်ႉဢေႃႈ။-

20ၸိူဝ်ႉၼင်ႇဢၼ်ပေႃးဢမ်ႇမီးၽိုၼ်းၸိုင်၊ ၽႆးၸၢင်ႈတၢႆၼၼ်ႉ၊ ပေႃးဢမ်ႇမီးၵေႃႉဢၼ် သႄႇယူင်းပူင်ၸႃႉၸိုင်၊ တၢင်းဢၼ်ၽိတ်းၵၼ် ၸၢင်ႈထၢတ်ႇယဵၼ်ဢေႃႈ။-

21ၸိူဝ်ႉၼင်ႇဢၼ် ထၢၼ်ႇမီႈပွင်ႁဵတ်းထၢၼ်ႇၽႆး ဢိၵ်ႇတင်းၸိူဝ်ႉၼင်ႇဢၼ် ၽိုၼ်းပွင်ႁဵတ်းၽႆးၼၼ်ႉ၊ ၵေႃႉဢၼ်ၸၢင်ႈႁဵတ်းတၢင်းဢၼ်ၽိတ်းၵၼ်ၼၼ်ႉ ၸၢင်ႈပွင်ၸၢင်ႈႁဵတ်းတၢင်းဢၼ်ၽိတ်းၵၼ်ဢေႃႈ။-

22ၵႂၢမ်းၵေႃႉဢၼ်သႄႇယူင်းပူင်ၸႃႉၼၼ်ႉ ပဵၼ်ၸိူဝ်ႉၼင်ႇတၢင်းၵိၼ်ယွႆႈ ဢၼ်ဝၢၼ်ဢၼ်မၼ်းလႄႈ ၸၢင်ႈၶဝ်ႈၵႂႃႇၵႃႈၼႂ်းတွင်ႉၼႂ်းပုမ်ဢေႃႈ။-

23သူပ်းဢၼ်ႁၵ်ႉၼႃႇလူင်လၢင် ဢၼ်ပႃးတင်းႁူဝ်ၸႂ်ဢၼ်ႁၢႆႉမိူၵ်ႈၼၼ်ႉ ပဵၼ်မိူၼ်ၸိူဝ်ႉၼင်ႇၽၢၵ်ႇမေႃႈ ဢၼ်ဢဝ်ၶျေႃႇငိုၼ်းဢုမ်ႇဝႆႉဢေႃႈ။-

24ၵေႃႉဢၼ်ဝႆႉတၢင်းၽိတ်းၼၼ်ႉ ၸၢင်ႈဢဝ်သူပ်းမၼ်းထိမ်ႇဝႆႉဢမ်ဝႆႉလႄႈ ၸၢင်ႈဢဝ်သၽေႃးဢၼ်ပႅတ်ႉဢၼ်လႅၼ် သိူင်ႇမႅပ်ႉဝႆႉၵႃႈၼႂ်းမၼ်းဢေႃႈ။-

25ၵႂၢမ်းၵေႃႉၸိူဝ်ႉၼင်ႇၼၼ်ၼၼ်ႉ ပိၵ်ႉသမ်ႉဝၢၼ်သေၵေႃႈ၊ ယႃႇပေယုမ်ႇ။ ၵႃႈၼႂ်းႁူဝ်ၸႂ်မၼ်းၼၼ်ႉ မီးလွင်ႈတၢင်းဢၼ်လီႁင်ႈဢဵတ်ႇသဵတ်ႇၸဵတ်းပႃးဢေႃႈ။-

26တၢင်းဢၼ်ၸင်းပိူၼ်ႈၼၼ်ႉ ၸၢင်ႈဢဝ်တၢင်းဢၼ်ပႅတ်ႉဢၼ်လႅၼ်သိူင်ႇမႅပ်ႉဝႆႉလႄႈ၊ ဢပႅတ်ႈတူႉၸရိူၵ်ႈမၼ်းၼၼ်ႉ တၵ်းလႆႈၶၢမ်ႇ တၢင်းဢၼ်ၽုၺ်ႇဢွၵ်ႇၼႄပျႃး ၵႃႈတီႈၽၢႆႇၼႃႈပရဵၵ်ႈသၢတ်ႈဢေႃႈ။-

27ၵေႃႉဢၼ်ၶုတ်းၶုမ်ၶုတ်းလုၵ်းၼၼ်ႉ တၵ်းတူၵ်းသႂ်ႇၵႃႈၼႂ်းမၼ်းလႄႈ၊ ၵႃႈၼိူဝ်ၵေႃႉဢၼ်ၵိင်ႈမၢၵ်ႇႁိၼ်ၼၼ်ႉၵေႃႈ၊ မၢၵ်ႇႁိၼ်တၵ်းၶိုၼ်းၵိင်ႈသႂ်ႇဢေႃႈ။-

28လိၼ်ႉဢၼ်ၸၢင်ႈလၢတ်ႈမူႉသႃႇၼၼ်ႉ ၸၢင်ႈငိၼ်းၸင်းၶဝ်ၸိူဝ်းဢၼ် မၼ်းၼိၵ်ႈၸၢၵ်ႈငႅၼ်းသႄးၼၼ်ႉလႄႈ၊ သူပ်းဢၼ်ၸၢင်ႈၶျေႃးဝွၼ်းၼၼ်ႉၵေႃႈ ၸၢင်ႈယႃႉၽဵဝ်ႈပႅတ်ႈဢေႃႈ။

← Chapter 25 Jump to: Chapter 27 →