Proverbs 28

Shan

← Chapter 27 Jump to: Chapter 29 →

1ၵေႃႉဢၼ်ဢမ်ႇတြႃးၼၼ်ႉ ပိၵ်ႉသမ်ႉၵေႃႉဢၼ်လိုပ်ႈၸွမ်းလမ်းၸွမ်း ဢမ်ႇမီးသေၵေႃႈ၊ တၵ်းပၢႆႈလႄႈ ၵေႃႉဢၼ်သိုဝ်ႈတေႃႇၸမ်ႉ၊ ၸၢင်ႈႁတ်းႁၢၼ်ၸိူဝ်ႉၼင်ႇသၢင်ႇသီႈဢေႃႈ။-

2ၵွပ်ႈပိူဝ်ႈဢပႅတ်ႈၵူၼ်းဝၢၼ်ႈၵူၼ်းမိူင်းလႄႈ ၶုၼ်ၸၢင်ႈမီးၼမ်ၼႃႇဢေႃႈ။ ၵွပ်ႈပိူဝ်ႈၵေႃႉဢၼ်ပျေႉၸုမ်ႇတင်းၺၢၼ်ႇ ဢိၵ်ႇတင်းပိင်ႇၺႃႇ တၢင်းဢၼ်ႁူႉဢၼ်ၸႅင်ႈၼၼ်ႉလႄႈ ဢသၢၵ်ႈမိူင်းၸၢင်ႈယၢဝ်းယိုၼ်းဢေႃႈ။-

3ၵေႃႉဢၼ်ၸုတ်ႈဢၼ်လုတ်ႈ ဢၼ်ၼိၵ်ႈၸၢၵ်ႈငႅၼ်းသႄးၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၼၼ်ႉ ပဵၼ်မိူၼ်ၸိူဝ်ႉၼင်ႇၼမ်ႉၽူၼ်ၶူမ် ဢၼ်ယင်းဢမ်ႇႁႂ်ႈတၢင်းၵိၼ်ၵိုတ်းၵျၢၼ်ႇဝႆႉလႃးလႃးလႄႈ ၽဵဝ်ႈပႅတ်ႈမူတ်းမူတ်းသဵင်ႈသဵင်ႈၼၼ်ႉဢေႃႈ။-

4ၶဝ်ၸိူဝ်းဢၼ်ၸုၼ်ႉပႅတ်ႈတြႃးၼၼ်ႉ ၸၢင်ႈယွင်ႈယေႃးၶဝ်ၸိူဝ်းဢၼ်ဢမ်ႇတြႃးလႄႈ ၶဝ်ၸိူဝ်းဢၼ်ပႂ်ႉၸွမ်းတြႃးယူႇၼၼ်ႉၸမ်ႉ၊ ၸၢင်ႈႁဵတ်းၶတ်းၵၼ်တင်းၶဝ်ၼၼ်ႉဢေႃႈ။-

5ၶဝ်ၸိူဝ်းဢၼ်ဢမ်ႇတြႃးၼၼ်ႉ ဢမ်ႇၸၢင်ႈႁူႉတၢင်းဢၼ်ၸီႇယၢင်ႇၸွမ်းၼင်ႇတြႃး။ ၶဝ်ၸိူဝ်းဢၼ်ႁႃဢဝ်ထႃႇဝရႃႉၽြႃးၼၼ်ႉၸမ်ႉ၊ ၸၢင်ႈႁူႉတၢင်းဢၼ်ၸီႇယၢင်ႇၵူႈၸိူဝ်ႉၵူႈပိူင်ဢေႃႈ။-

6ၵေႃႉဢၼ်ယၢၵ်ႈဢၼ်ၽၢၼ် ဢၼ်ၸွမ်းသဵၼ်ႈတၢင်း တၢင်းဢၼ်ၸေးၸုမ်ႇမၼ်းယူႇၼၼ်ႉ ယဵင်ႈၶႅၼ်းမျၢတ်ႈၼႃႇသေ ၵေႃႉဢၼ်ၸၢင်ႈမၢၵ်ႈၸၢင်ႈမီးသေၵေႃႈ ၸွမ်းသဵၼ်ႈတၢင်းဢၼ်ၵူတ်ႉဢၼ်ငေႃးယူႇၼၼ်ႉဢေႃႈ။-

7ၵေႃႉဢၼ်ပႂ်ႉတြႃးယူႇၼၼ်ႉ ပဵၼ်လုၵ်ႈၸၢႆးဢၼ်မီးပိင်ႇၺႃႇလႄႈ ၵေႃႉဢၼ်ႁဵတ်းၵေႃႉႁဵတ်းသေႈလူၺ်ႈၵၼ်တင်းၶဝ် ၸိူဝ်းဢၼ် ၵိၼ်ပူၼ်ႉၵိၼ်လိူဝ်ၼၼ်ႉၸမ်ႉ၊ ၸၢင်ႈႁႂ်ႈပေႃႈမၼ်းဢူၵ်းဢၢႆဢေႃႈ။-

8ၵေႃႉဢၼ်ဢဝ်ဢတူဝ်းဢမျၢတ်ႈ ၶီႈငိုၼ်းဢၼ်ဢမ်ႇတြႃး ႁႂ်ႈဢုၵ်ႉၸႃႇယႂ်ႇၽႄႈတူဝ်းတွၼ်းမႃးၼၼ်ႉ ၸၢင်ႈၸူႉႁွမ်ဝႆႉ ပုၼ်ႈၵေႃႉဢၼ်ဢဵတ်းလူ ၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၼၼ်ႉဢေႃႈ။-

9ၵေႃႉဢၼ်ဝၢႆႇႁူမၼ်းပႅတ်ႈသေတြႃးၼၼ်ႉ ပိၵ်ႉသမ်ႉမၼ်းသူးတွင်းသေၵေႃႈ၊ ၵႂၢမ်းပထၼႃႇမၼ်းၼၼ်ႉ ပဵၼ်ဢၼ်လီႁင်ႈဢဵတ်ႇသဵတ်ႇဢေႃႈ။-

10ၵေႃႉဢၼ်ႁႂ်ႈၶဝ်ၸိူဝ်းဢၼ်သိုဝ်ႈလီယူဝ်းလီၼၼ်ႉ ဝႄႈပိူင်ႈၵႂႃႇၸွမ်းသဵၼ်ႈတၢင်း ဢၼ်ဢမ်ႇလီၼၼ်ႉ တၵ်းတူၵ်းသႂ်ႇၵႃႈၼႂ်းၶုမ်ၼႂ်းလုၵ်း ဢၼ်မၼ်းၶုတ်းၼၼ်ႉဢေႃႈ။ ၶဝ်ၸိူဝ်းဢၼ်သၽေႃးၸေးၸုမ်ႇၼၼ်ႉၸမ်ႉ၊ တၵ်းလႆႈၶၢမ်ႇဢမူၺ်ႇလွင်ႈတၢင်းဢၼ်လီဢေႃႈ။-

11ၵေႃႉဢၼ်ၸၢင်ႈမၢၵ်ႈၸၢင်ႈမီးၼၼ်ႉ ၸၢင်ႈထၢင်ႇမၼ်းမီးပိင်ႇၺႃႇ သိုဝ်ႈၼႃႈတႂ်ႈတႃမၼ်းလႄႈ ၵေႃႉဢၼ်ယၢၵ်ႈဢၼ်ၽၢၼ်ဢၼ်ၺၢၼ်ႇလီၼၼ်ႉၸမ်ႉ၊ ၸၢင်ႈၸႅတ်ႈထၢမ်ၸႅတ်ႈတူၺ်းမၼ်းၼၼ်ႉဢေႃႈ။-

12မိူဝ်ႈဢၼ်ၶဝ်ၸိူဝ်းဢၼ်သိုဝ်ႈတေႃႇၼၼ်ႉ လႆႈသႂၢင်ႇၸႂ်သိူဝ်းၸႂ်ၼၼ်ႉၸိုင်၊ ၸၢင်ႈမီးမုၼ်မီးၽုင်းၼမ်ၼႃႇလႄႈ မိူဝ်ႈဢၼ်ၶဝ်ၸိူဝ်းဢၼ်ဢမ်ႇတြႃးၼၼ်ႉ ႁွတ်ႈထိုင်တၢင်းဢၼ်ယုၵ်ႉယွင်ႈၼၼ်ႉၸမ်ႉ၊ ၵူၼ်းတင်းလၢႆ ၸၢင်ႈလႆႈတဵတ်ႇယူႇမႅပ်ႉယူႇဢေႃႈ။-

13ၵေႃႉဢၼ်သိူင်ႇမႅပ်ႉဢပႅတ်ႈမၼ်းဝႆႉၼၼ်ႉ ဢမ်ႇလႆႈလီလႆႈပဵၼ်လႄႈ ၵေႃႉဢၼ်ၽုၺ်ႇဢွၵ်ႇၼႄပျႃးဢပႅတ်ႈမၼ်းလႄႈ ၸုၼ်ႉပႅတ်ႈၼၼ်ႉၸမ်ႉ၊ တၵ်းလႆႈၶၢမ်ႇၵရူႉၼႃႇၸဝ်ႈဢေႃႈ။-

14ၵေႃႉဢၼ်ၵူဝ်ႁႄယူႇတႃႇသေႇဢမ်ႇထၢတ်ႇၼၼ်ႉ မီးမင်ႇၵလႃႇလႄႈ၊ ၵေႃႉဢၼ်ႁႂ်ႈႁူဝ်ၸႂ်မၼ်းၵႅၼ်ႇၶႅင်ၼၼ်ႉၸမ်ႉ၊ တၵ်းထူပ်းၽေးဢူႉပၢတ်ႈဢေႃႈ။-

15ၶုၼ်ဢႃႉထမ်ႇမႃႉဢၼ်ဢုပ်ႉပိူင်ႇၵူၼ်းမိူင်း ဢၼ်ယၢၵ်ႈဢၼ်ၽၢၼ်ၸိူဝ်းၼၼ်ႉၼၼ်ႉ ပဵၼ်မိူၼ်ၸိူဝ်ႉၼင်ႇသၢင်ႇသီႈ ဢၼ်ႁွင်ႉၶၢင်း ဢိၵ်ႇတင်းမီဢၼ်လႄႇၵႂႃႇယူႇၼၼ်ႉဢေႃႈ။-

16ၶုၼ်ဢၼ်ဢမ်ႇမီးၺၢၼ်ႇၼၼ်ႉ ပဵၼ်ၵေႃႉဢၼ် ၸၢင်ႈၼိၵ်ႈၸၢၵ်ႈငႅၼ်းသႄးၼႃႇလူင်လၢင်လႄႈ ၶုၼ်ဢၼ်ၸင်းလေႃးၽႃႉၼၼ်ႉၸမ်ႉ၊ ၸူဝ်ႈဢသၢၵ်ႈမၼ်းတၵ်းယၢဝ်းယိုၼ်းဢေႃႈ။-

17ၵေႃႉဢၼ်ႁၢပ်ႇဢပႅတ်ႈလိူတ်ႈပိူၼ်ႈၼၼ်ႉ တၵ်းလႆႈၶုၼ်ႇလႅၼ်ႈၸူး ၶုမ်ပႃႇႁဵဝ်ႈဢေႃႈ။ ၽူႈလႂ်ယႃႇပေႁႄႉပေၶႅၼ်မၼ်း။

18ၵေႃႉဢၼ်ၸွမ်းသဵၼ်ႈတၢင်း ဢၼ်သိုဝ်ႈလီယူဝ်းလီၼၼ်ႉ တၵ်းလွတ်ႈၽေးလႄႈ ၵေႃႉဢၼ်ၸႂ်ၵူတ်ႉၸႂ်ငေႃးလႄႈ ၸွမ်းသဵၼ်ႈတၢင်း တင်းသွင်သဵၼ်ႈၼၼ်ႉၸမ်ႉ၊ တၵ်းလႆႈလူမ်ႉတူၵ်းသႂ်ႇ ၵႃႈၼႂ်းသဵၼ်ႈတၢင်းၼၼ်ႉသေသဵၼ်ႈသဵၼ်ႈဢေႃႈ။-

19ၵေႃႉဢၼ်ႁဵတ်းႁႆႊႁဵတ်းၼႃးၼၼ်ႉ တၵ်းမီးတၢင်းၵိၼ်တၢင်းၶူပ်းလိူင်ႇၼႃႇလႄႈ ၵေႃႉဢၼ်ၸွမ်းလင်ၶဝ်ၸိူဝ်းဢၼ် လၢႆလၢႆဢမ်ႇပွင်ႇလွင်ႈၵႃႈသင်ၼၼ်ႉၸမ်ႉ၊ တၵ်းဢိမ်ႇတဵမ်ဝႆႉတင်း တၢင်းဢၼ်ယၢၵ်ႈဢၼ်ၽၢၼ်ဢေႃႈ။-

20ၵေႃႉဢၼ်ပႂ်ႉသဵတ်ႈၸႃႇယူႇၼႃႇလူင်လၢင်ၼၼ်ႉ တၵ်းမၢၵ်ႈမီးလိူင်ႇတဵမ်ဝႆႉတင်း တၢင်းလီမင်ႇၵလႃႇလႄႈ ၵေႃႉဢၼ်ႁိပ်ႈၼႅတ်ႈႁဵတ်းႁႂ်ႈၸၢင်ႈမၢၵ်ႈၸၢင်ႈမီးၼၼ်ႉၸမ်ႉ၊ ဢမ်ႇလႆႈၵၢင်းလွတ်ႈတင်းတၢမ်ႇဢပႅတ်ႈ။-

21တၢင်းဢၼ်ထွၵ်ႈလူၺ်ႈၼႃႈၵူၼ်း ဢမ်ႇထုၵ်ႇဢမ်ႇလီ။ လွင်ႈမၼ်းၸမ်ႉ ၵူၼ်းၸၢင်ႈႁဵတ်းတူႉၸရိူၵ်ႈ ႁႂ်ႈလႆႈၶဝ်ႈမုၼ်းဢွၼ်ႇ သေၽၢၵ်ႇသေပွတ်းဢေႃႈ။-

22ၵေႃႉဢၼ်ႁိပ်ႈၼႅတ်ႈ ႁဵတ်းႁႂ်ႈၸၢင်ႈမၢၵ်ႈၸၢင်ႈမီးၼၼ်ႉ ၸၢင်ႈမီးတႃဢၼ်ႁၢႆႉဢၼ်မိူၵ်ႈလႄႈ ဢမ်ႇၸၢင်ႈႁူႉလွင်ႈဢၼ်ၵမ်းလိုၼ်း တၵ်းႁွတ်ႈထိုင်တၢင်းဢၼ်ယၢၵ်ႈဢၼ်ၽၢၼ်ၼၼ်ႉဢေႃႈ။-

23ၵေႃႉဢၼ်သုင်းမႃႉတၢင်ႇဢပႅတ်ႈၼၼ်ႉ၊ ၵမ်းလိုၼ်းယဵင်ႈၶႅၼ်းတၵ်းလႆႈၶၢမ်ႇ ၵျေးၸူး ၼႃႇသေၵေႃႉဢၼ်ဢဝ်လိၼ်ႉမၼ်းၶျေႃးဝွၼ်းဢဝ်ၼၼ်ႉဢေႃႈ။-

24ၵေႃႉဢၼ်ႁိမ်ဢဝ်ႁူင်ႇဢဝ် ဢုၵ်ႉၸႃႇပေႃႈမႄႈမၼ်းလႄႈဝႃႈ၊ ဢမ်ႇမီးဢပႅတ်ႈၵူၺ်ႉ၊ ဝႃႈၼင်ႇၼႆၼၼ်ႉ ပဵၼ်ၵေႃႉပဵၼ်သေႈၵၼ်တင်းၵေႃႉဢၼ်ယႃႉၽဵဝ်ႈပႅတ်ႈၼၼ်ႉဢေႃႈ။

25ၵေႃႉဢၼ်ၸႂ်သုင်ၼၼ်ႉ ၸၢင်ႈတိုၵ်းယူင်းတၢင်းဢၼ်ၽိတ်းၵၼ်လႄႈ ၵေႃႉဢၼ်ဢိင်ပိုင်ႈထႃႇဝရႃႉၽြႃးယူႇၸမ်ႉ၊ ၸၢင်ႈပျေႉၸုမ်ႇလိူင်ႇၸႂ်ဢေႃႈ။-

26ၵေႃႉဢၼ်ဢိင်ပိုင်ႈႁူဝ်ၸႂ်တူဝ်ၸဝ်ႈၵဝ်ႇယူႇၼၼ်ႉ ပဵၼ်ၵေႃႉဢၼ်မိူၵ်ႈလႄႈ ၵေႃႉဢၼ်ပႃးတင်းပိင်ႇၺႃႇသတီႉ ၵမ်ၵျၢင်ႉၼၼ်ႉၸမ်ႉ၊ ၸၢင်ႈလွတ်ႈၽေးဢေႃႈ။-

27ၵေႃႉဢၼ်ၽႄၸွၼ်းယိုၼ်ႈမႅင်ႇ တီႈၵူၼ်းယၢၵ်ႈၵူၼ်းၽၢၼ်ၼၼ်ႉ တၵ်းဢမ်ႇလူဝ်ႇထႅင်ႈသေၸိူဝ်ႉသေပိူင်။ ၵေႃႉဢၼ်ဝၢႆႇၼႃႈဝႄႈပိူင်ႈသေၼၼ်ႉၸမ်ႉ၊ တၵ်းလႆႈၶၢမ်ႇတၢင်းဢၼ်ၵိၼ်ႇဢၼ်ဝႃႈၼမ်ၼႃႇဢေႃႈ။-

28မိူဝ်ႈဢၼ်ၶဝ်ၸိူဝ်းဢၼ်ဢမ်ႇတြႃးၼၼ်ႉ ႁွတ်ႈထိုင် တၢင်းဢၼ်ယုၵ်ႉယွင်ႈၼၼ်ႉၸိုင်၊ ၵူၼ်းတင်းလၢႆ ၸၢင်ႈလႆႈတဵတ်ႇယူႇမႅပ်ႉယူႇလႄႈ မိူဝ်ႈဢၼ်ၶဝ်ႁွတ်ႈထိုင်တၢင်းဢၼ်လူႉလႅဝ်ၼၼ်ႉၸမ်ႉ၊ ၶဝ်ၸိူဝ်းဢၼ်သိုဝ်ႈတေႃႇၼၼ်ႉ ၸၢင်ႈယႂ်ႇၽႄႈၼမ်ၵိုၼ်းမႃးဢေႃႈ။

← Chapter 27 Jump to: Chapter 29 →