Proverbs 31

Shan

← Chapter 30 Jump to:

1ၵႂၢမ်းၶုၼ်လူင် လေႇမူၺ်ႇလႃႉ ဢၼ်ဝႃႈပျႃႇတိၵ်ႈ ဢၼ်မႄႈမၼ်းၸဝ်ႈ သင်ႇသွၼ်ပၼ်တီႈမၼ်းၸဝ်ႈၼၼ်ႉၸမ်ႉ၊-

2လုၵ်ႈၸၢႆးၵဝ်ဢိူၺ်း၊ ပဵၼ်ၸိူဝ်ႉၼင်ႇႁိုဝ်။ လုၵ်ႈၸၢႆးဢၼ်ၵဝ်ၵိူတ်ႇလဵင်ႉမႃးဢိူၺ်း၊ ပဵၼ်ၸိူဝ်ႉၼင်ႇႁိုဝ်။ လုၵ်ႈၸၢႆးၵဝ်ဢၼ်ၸၢပ်ႈသႅင်ႇၵၼ်တင်းၵတီႉသဵတ်ႈၸႃႇၵဝ်ဢိူၺ်း၊ ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ၊-

3ယႃႇပေဢဝ်ဢဵၼ်ႁႅင်းမႂ်း ပၼ်တီႈမႄႈယိင်းတင်းလၢႆ။ ယႃႇပေဢဝ်လွင်ႈတၢင်းဢၼ် မႂ်းၵျၢမ်ႇပွင်သၢင်ႈႁဵတ်းၼၼ်ႉ ဢၢပ်ႈပၼ်တီႈလွင်ႈတၢင်းဢၼ် ယႃႉၶုၼ်ႁေႃၶမ်းတင်းလၢႆပႅတ်ႈၼၼ်ႉ။-

4တီႈၶုၼ်ႁေႃၶမ်းတင်းလၢႆ၊ လေႇမူၺ်ႇလႃႉ ဢိူၺ်း၊ တီႈၶုၼ်ႁေႃၶမ်းတင်းလၢႆၸိုင်၊ တင်းဢၼ်ၵိၼ်ၼမ်ႉၸပိတ်ႈ၊ တီႈလုၵ်ႈၸၢႆးၶုၼ်တင်းလၢႆၸိုင် တၢင်းဢၼ်သူတ်ႉၼမ်ႉလဝ်ႈၼၼ်ႉ ဢမ်ႇထုၵ်ႇဢမ်ႇလီ။-

5ၵူဝ်ၶဝ်တၵ်းၵိၼ်လႄႈ လူင်လိုမ်းတြႃးၸဝ်ႈသေလႄႈ တႅပ်းတတ်းဢမူႉၶဝ်ၸိူဝ်းဢၼ်ယၢၵ်ႈဢၼ်ၽၢၼ်တင်းလၢႆ ဢမ်ႇမႅၼ်ႈၸွမ်းၼင်ႇတြႃးဢေႃႈ။-

6ဢဝ်ၼမ်ႉလဝ်ႈပၼ်တီႈၵေႃႉဢၼ် ၸမ်တၵ်းသုမ်းတၵ်းၸွမ်းၼၼ်ႉလႄႈ ဢဝ်ၼမ်ႉၸပိတ်ႈပၼ်တီႈၵေႃႉဢၼ်ၶီၸႂ်ၶူမ်ၸႂ်ၼၼ်ႉတႃႉ။-

7ႁႂ်ႈမၼ်းၼၼ်ႉၵိၼ်လႄႈ ယင်းဢမ်ႇၶုၵ်းၸႂ်လႆႈၶႆႈၸႂ်ထူပ်းတုၵ်ႉၶႃႉမၼ်းလႄႈ လူင်လိုမ်းတၢင်းယၢၵ်ႈတၢင်းၽၢၼ်မၼ်းယူႇတႃႉ။-

8ယူႇၽၢႆႇၵေႃႉဢၼ်ဢႃႉၼၼ်ႉ ပိုတ်ႇပၢၵ်ႇမႂ်းလႄႈ ပႂ်ႉဢမူႉၶဝ်ၸိူဝ်းဢၼ်ၽၢၼ်ပေႃႈၽၢၼ်မႄႈ ၵႃႈမီးၼၼ်ႉယူႇတႃႉ။-

9ပိုတ်ႇပၢၵ်ႇသေလႄႈ ၸီႇယၢင်ႇၸွမ်းၼင်ႇတြႃးလႄႈ ပႂ်ႉဢမူႉၶဝ်ၸိူဝ်းဢၼ်ယၢၵ်ႈဢၼ်ၽၢၼ် ဢိၵ်ႇတင်း ၶဝ်ၸိူဝ်းဢၼ်ၸုတ်ႈဢၼ်လုတ်ႈၼၼ်ႉယူႇတႃႉ။

10ၽူႈလႂ်လႆႈထူပ်းလႆႈႁၼ်မႄႈယိင်း ဢၼ်ပျေႉၸုမ်ႇဝႆႉတင်းသီႇလႃႉၼၼ်ႉ။ မႄႈယိင်းၸိူဝ်ႉၼင်ႇၼၼ်ၼၼ်ႉၸိုင် ယဵင်ႈၶႅၼ်းထိူၵ်ႈၵႃႈထိူၵ်ႈၶၼ်ၼႃႇသေ သႅင်လႅင်ပတ်ႈတမျႃးၼၼ်ႉၼႃႇလူင်လၢင်ဢေႃႈ။-

11ႁူဝ်ၸႂ်ၽူဝ်မၼ်းတၵ်းယုမ်ႇမၢတ်ႈမၼ်းလႄႈ တၵ်းပဵၼ်တိုၼ်းပဵၼ်ႁွၼ်းဢေႃႈ။-

12မၼ်းယင်းဢမ်ႇယႃႉဢၵျူဝ်းၽူဝ်မၼ်းလႄႈ ၸၢင်ႈပွင်ႁဵတ်းယူႇၸူဝ်ႈဢသၢၵ်ႈမၼ်းဢေႃႈ။-

13မၼ်းၸၢင်ႈႁႃဢဝ်ၶူၼ်သူဝ်းဢိၵ်ႇတင်းၵုၺ်လႄႈ ပႃးၸႂ်ပႃးၶေႃးဢဝ်မိုဝ်းမၼ်းႁဵတ်းဢေႃႈ။-

14မၼ်းပဵၼ်ၸိူဝ်ႉၼင်ႇႁိူဝ်းသၢင်းၽေႃး ၸဝ်ႈၵုၼ်ႇၸဝ်ႈသိၼ်ၼၼ်ႉလႄႈ ၸၢင်ႈဢဝ်တၢင်းၵိၼ်တၢင်းၶူပ်း ၵႃႈတီႈဢၼ်ၵႆမႃးဢေႃႈ။-

15မၼ်းၸၢင်ႈလုၵ်ႉၸဵမ်မိူဝ်ႈဢၼ် မိူင်းဢမ်ႇပႆႇလႅင်းၼၼ်ႉသေလႄႈ ဢဝ်တၢင်းၵိၼ်တၢင်းၶူပ်း ၽႄမႅင်ႇပၼ် တီႈၵူၼ်းႁိူၼ်းၵူၼ်းယေးမၼ်းတင်းလၢႆ၊ ဢဝ်ပုၼ်ႈဢဝ်တႃႇ ၶႃႈမႄႈယိင်းမၼ်းတင်းလၢႆ ၽႄမႅင်ႇပၼ်တီႈၶဝ်ဢေႃႈ။-

16မၼ်းၸၢင်ႈၶႆႈၸႂ်လီလီငၢမ်းငၢမ်းသေလႄႈ သိုဝ်ႉဢဝ်တူင်ႈႁႆႊတူင်ႈၼႃးလႄႈ ဢဝ်ငိုၼ်းဢၼ်မၼ်းႁဵတ်းလႄႈလႆႈၼၼ်ႉ ပွင်ႁဵတ်းသူၼ်ဢူးယဵၼ်ႇၸပိတ်ႈဢေႃႈ။-

17မၼ်းၸၢင်ႈဢဝ်ဢဵၼ်ဢဝ်ႁႅင်း ႁတ်ႉဢႅဝ်မၼ်းဝႆႉလႄႈ ႁႂ်ႈၶႅၼ်မၼ်းၵႅၼ်ႇၶႅင်ၶၼ်ၽႂ်းဢေႃႈ။-

18မၼ်းၸၢင်ႈႁူႉႁၼ်လွင်ႈဢၼ် ဢုၵ်ႉၸႃႇဢၼ်မၼ်းႁဵတ်းၼၼ်ႉ ပဵၼ်ဢၼ်လီၼၼ်ႉလႄႈ ၶိင်ႇၵၢင်ၶိုၼ်း ဝၢၼ်ႇၽႆးတဵၼ်းမၼ်း ဢမ်ႇၸၢင်ႈမွတ်ႇၸၢင်ႈတၢႆ။-

19မၼ်းၸၢင်ႈဢဝ်မိုဝ်းမၼ်းယိပ်းၵမ် ႁၢင်ၵုၺ်သေလႄႈ ဢဝ်တင်းၼိဝ်ႉမိုဝ်းမၼ်းပၼ်ႇယုမ်းၵူင်းဢေႃႈ။-

20မၼ်းၸၢင်ႈၽုၺ်ႇၵီႈမိုဝ်းမၼ်း တီႈၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၼၼ်ႉလႄႈ ယဵတ်ႇၶႅၼ်ယဵတ်ႇမိုဝ်းမၼ်း တီႈၶဝ်ၸိူဝ်းဢၼ်ၸုတ်ႈဢၼ်လုတ်ႈၼၼ်ႉဢေႃႈ။-

21ပိၵ်ႉသမ်ႉမူၺ်ႁႃႇတူၵ်းသေၵေႃႈ၊ မၼ်းဢမ်ႇမႆႈၸႂ် ပုၼ်ႈၵူၼ်းႁိူၼ်းၵူၼ်းယေးမၼ်း။ ၵူၼ်းႁိူၼ်းၵူၼ်းယေးမၼ်း ၵႃႈမီးတင်းသဵင်ႈတင်းလူင် လႆႈၼုင်ႈမႆၶူဝ်းဢၼ်လႅင်ၸွင်းႁွင်းၼၼ်ႉဢေႃႈ။-

22မၼ်းၸၢင်ႈတေႃးၽႃႈၸွင်ႇၽႃႈမႆပုၼ်ႈမၼ်းလႄႈ ၼုင်ႈမႆပိၵ်ႈၶျေႃး ဢိၵ်ႇတင်းၶူဝ်းဢၼ်လႅင်ၵမ်ႇၼၼ်ႉဢေႃႈ။-

23ၽူဝ်မၼ်းပဵၼ်ၵေႃႉဢၼ်ၸွတ်ႇသႃႈႁူင်ႁၢင်း ၵႃႈၼႂ်းၽၵ်းတူဝဵင်း ၵွပ်ႈပိူဝ်ႈဢၼ်မၼ်းလႆႈၼင်ႈယူႇလူၺ်ႈၵၼ် တင်းၵူၼ်းမိူင်းဢၼ်ဢသၢၵ်ႈယႂ်ႇ ၸိူဝ်းၼၼ်ႉဢေႃႈ။-

24မၼ်းၸၢင်ႈတေႃးၶူဝ်းၼုင်ႈတၢင်းမႆပိၵ်ႈၶျေႃးသေလႄႈ ၶၢႆဢေႃႈ။ သၢႆႁတ်ႉဢႅဝ်ၵေႃႈ၊ မၼ်းၸၢင်ႈဢဝ်ၶျႃးပၼ် တီႈၸဝ်ႈၵုၼ်ႇၸဝ်ႈသိၼ်ၶဝ်ဢေႃႈ။-

25ၶူဝ်းၼုင်ႈတၢင်းမႆဢၼ်မၼ်းႁဵတ်းၼၼ်ႉ မၼ်ႈလီၶိူင်ႇလီ ပျေႉၸုမ်ႇဝႆႉတင်းႁၢင်ႈၽၢင် ဢၼ်ႁၢင်ႈလီႁၢင်ႈငၢမ်းလႄႈ မၼ်းယုမ်ႉထႃႈၶူဝ်ထႃႈ ၶိင်ႇၵႃႇလႃႉဢၼ်တၵ်းပဵၼ်မႃးၵမ်းလိုၼ်းၼၼ်ႉဢေႃႈ။-

26မၼ်းၸၢင်ႈဢဝ်ၵႂၢမ်းပိင်ႇၺႃႇ ၽုၺ်ႇပိုတ်ႇသူပ်းမၼ်းလႄႈ ၸၢင်ႈဢဝ်တြႃးမႅတ်ႈတႃႇဝႃႈဢွၵ်ႇသူပ်းမၼ်းဢေႃႈ။-

27မၼ်းၸၢင်ႈလူၸၢင်ႈတူၺ်း ၵႃႈဢၼ်ၵူၼ်းႁိူၼ်းၵူၼ်းယေးမၼ်း ႁဵတ်းပွင်ၼၼ်ႉလႄႈ မၼ်းဢမ်ႇၸၢင်ႈၵိၼ်တၢင်းၵိၼ်တၢင်းၶူပ်း ဢၼ်ၸၢပ်ႈသႅင်ႇလူၺ်ႈတၢင်းဢၼ်ၶၢၼ်ႉဢၼ်ဢိူၼ်ၼၼ်ႉ။-

28လုၵ်ႈမၼ်းလၢင်းမၼ်း ၸၢင်ႈဢွၼ်ၵၼ်လုၵ်ႉပၼ်တၢင်းလီတီႈမၼ်းလႄႈ ၽူဝ်မၼ်းၵေႃႈ ၸၢင်ႈယွင်ႈယေႃးမၼ်းလႄႈဝႃႈ၊-

29လုၵ်ႈယိင်းပိူၼ်ႈၼမ်ၼႃႇ ႁဵတ်းလီလီငၢမ်းငၢမ်းယူႇယဝ်ႉ။ ၵူၺ်းၵႃႈ မႂ်းၼႆႉ လိူဝ်တွၼ်းသေၶဝ်တင်းသဵင်ႈတင်းလူင်ၼၼ်ႉယဝ်ႉ၊ ဝႃႈၼင်ႇၼႆဢေႃႈ။-

30တၢင်းဢၼ်ႁၢင်ႈယဵၼ်ႇသေႇၶျႃႇၼၼ်ႉ ပဵၼ်တၢင်းဢၼ်ပႅတ်ႉဢၼ်လႅၼ်လႄႈ တၢင်းဢၼ်ႁၢင်ႈလီႁၢင်ႈငၢမ်းၼၼ်ႉၵေႃႈ၊ ပဵၼ်ဢၼ်လၢႆလၢႆဢမ်ႇပွင်ႇလွင်ႈၵႃႈသင်ဢေႃႈ။ မႄႈယိင်းဢၼ်ၵူဝ်ႁႄထႃႇဝရႃႉၽြႃးၼၼ်ႉၸမ်ႉ၊ တၵ်းလႆႈၶၢမ်ႇတၢင်းဢၼ်ယွင်ႈယေႃးဢေႃႈ။-

31ပၼ်ဢၵျူဝ်းၸွမ်းၵႃႈၼင်ႇဢၼ် မၼ်းၵမ်ၵျၢင်ႉၼၼ်ႉတီႈမၼ်းတႃႉ။ ႁႂ်ႈလွင်ႈတၢင်းဢၼ်မၼ်းသၢင်ႈႁဵတ်းၼၼ်ႉ ယွင်ႈယေႃးမုၼ်သရေႇမၼ်း ၵႃႈတီႈၼႂ်းၽၵ်းတူဝဵင်းတင်းလၢႆသေၵမ်းလူၺ်ႈ။ ၵျၢမ်းသုၵ်ႉတၢမ်ႇယဝ်ႉယဝ်ႉဢေႃႈ။

← Chapter 30 Jump to: