Proverbs 3

Shan

← Chapter 2 Jump to: Chapter 4 →

1လုၵ်ႈၸၢႆးၵဝ်ဢိူၺ်း၊ ယႃႇပေလူင်ပေလိုမ်း တြႃးဢၼ်ၵဝ်ပၼ်ၼၼ်ႉ။ ႁႂ်ႈႁူဝ်ၸႂ်မႂ်းပႂ်ႉၸွမ်းပိင်းၺၢပ်ႈၵဝ်ၸိူဝ်းၼၼ်ႉယူႇသေၵမ်း။-

2လွင်ႈမၼ်းၸမ်ႉ ၸိူဝ်းၼၼ်ႉတၵ်းထၢပ်ႈထႅင်ႈလႄႈ ပၼ်မိုဝ်ႉဝၼ်းဢၼ်ယၢဝ်းဢၼ်ယိုၼ်း၊ ၶူပ်ႇပီႊဢသၢၵ်ႈဢိၵ်ႇတင်းတၢင်းဢၼ်ၼိမ်ဢၼ်လီၼၼ်ႉတီႈမႂ်းဢေႃႈ။-

3ယႃႇပေႁႂ်ႈၵရူႉၼႃႇတင်းသဵတ်ႈၸႃႇ ၽၢတ်ႇယၢၼ်ၵၼ်တင်းမႂ်း။ ဢဝ်ၸိူဝ်းၼၼ်ႉ ႁွႆႈဝႆႉပႃးဝႆႉၵႃႈတီႈၶေႃးမႂ်းတႃႉ။ ဢဝ်တႅမ်ႈသႂ်ႇဝႆႉ ၵႃႈၼႂ်းၸရၢင်းဢၢင်းႁူဝ်ၸႂ်မႂ်းတႃႉ။-

4ပေႃးႁဵတ်းၸိူဝ်ႉၼင်ႇၼၼ်ၸိုင်၊ မႂ်းတၵ်းလႆႈၼႃႈလႆႈတႃလႄႈ ၶၢမ်ႇၵျေးၸူးသိုဝ်ႈၼႃႈတႂ်ႈတႃၽြႃးပဵၼ်ၸဝ်ႈ တင်းၵူၼ်းတင်းလၢႆဢေႃႈ။

5ပႃးတင်းႁူဝ်ၸႂ်သဵင်ႈသဵင်ႈ ဢိင်ပိုင်ႈထႃႇဝရႃႉၽြႃးတႃႉ။ ယႃႇပေၸႂ်လီလူၺ်ႈၺၢၼ်ႇတူဝ်ၸဝ်ႈၵဝ်ႇ။-

6ၼႂ်းသဵၼ်ႈတၢင်းၵႃႈဢၼ်မႂ်းၵႂႃႇမႃးၼၼ်ႉ ႁဵတ်းသိုဝ်ႈၼႃႈတႂ်ႈတႃမၼ်းၸဝ်ႈတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ မၼ်းၸဝ်ႈတၵ်းႁႂ်ႈသဵၼ်ႈတၢင်းမႂ်းၸိူဝ်းၼၼ်ႉသိုဝ်ႈလီဢေႃႈ။-

7ယႃႇပေပဵၼ်ၵေႃႉဢၼ်မီးပိင်ႇၺႃႇ သိုဝ်ႈၼႃႈတႂ်ႈတႃတူဝ်ၸဝ်ႈၵဝ်ႇ။ ၵူဝ်ႁႄထႃႇဝရႃႉၽြႃးလႄႈ ဝႄႈပႅတ်ႈတူႉၸရိူၵ်ႈတႃႉ။-

8ပေႃးႁဵတ်းၸိူဝ်ႉၼင်ႇၼၼ်ၸိုင်၊ တၵ်းပဵၼ်တၢင်းဢၼ်ယူႇလီပီးမၼ်း တီႈသၢႆလီမႂ်းလႄႈ ပဵၼ်ဢွၵ်းလုပ်ႇမၼ်းလုပ်ႇ တီႈလုပ်ႇမႂ်းဢေႃႈ။-

9ဢဝ်ဢုၵ်ႉၸႃႇမႂ်း ဢိၵ်ႇတင်းမၢၵ်ႇႁူင်းဢၼ်မၢၵ်ႇဢွၼ်တၢင်း ၼႂ်းၵႃႈဢၼ်မၢၵ်ႇမႃးတီႈမႂ်းၼၼ်ႉ ပုၵ်ႈၸေႃႇတီႈထႃႇဝရႃႉၽြႃးတႃႉ။-

10ပေႃးႁဵတ်းၸိူဝ်ႉၼင်ႇၼၼ်ၸိုင်၊ ယေးၶဝ်ႈယွင်ၶဝ်ႈမႂ်းၸိူဝ်းၼၼ်ႉ တၵ်းသတ်ႉတဵမ်ဝႆႉတင်းမၢၵ်ႇတင်းႁူင်းလႄႈ၊ ၶိူင်ႈတီႈဢၼ်မႂ်းၼူတ်ႈမၢၵ်ႇၸပိတ်ႈၸိူဝ်းၼၼ်ႉ တၵ်းလူၼ်ႉတဵမ်ဝႆႉ တင်းၼမ်ႉၸပိတ်ႈဢၼ်မႂ်ႇဢေႃႈ။

11လုၵ်ႈၸၢႆးၵဝ်ဢိူၺ်း၊ ယင်းဢမ်ႇမၢတ်ႈဢမ်ႇတွင်း တၢင်းဢၼ်ထႃႇဝရႃႉၽြႃးသင်ႇသွၼ်သုင်းမႃႉပၼ်ၼၼ်ႉလႄႈ ယႃႇပေယူႇ။ မိူဝ်ႈဢၼ်မၼ်းၸဝ်ႈၸႅတ်ႈထၢမ်ဢပႅတ်ႈမႂ်းၼၼ်ႉၸိုင် ယႃႇပေၸႂ်လူႉ။-

12လွင်ႈမၼ်းၸမ်ႉ ထႃႇဝရႃႉၽြႃးၸၢင်ႈသင်ႇသွၼ်သုင်းမႃႉ ၵေႃႉဢၼ်မၼ်းၸဝ်ႈႁၵ်ႉၼၼ်ႉ မိူၼ်ၸိူဝ်ႉၼင်ႇဢၼ် ပေႃႈပၼ်တၢမ်ႇတီႈလုၵ်ႈလၢင်း ဢၼ်မၼ်းထုၵ်ႇၸႂ်ၵျိူၵ်ႈၸႂ်ၼၼ်ႉဢေႃႈ။

13ၵေႃႉဢၼ်ထူပ်းပိင်ႇၺႃႇ၊ ၵေႃႉဢၼ်လႆႈၺၢၼ်ႇၼၼ်ႉ မီးမင်ႇၵလႃႇဢေႃႈ။-

14လွင်ႈမၼ်းၸမ်ႉ တၢင်းဢၼ်ၵႃႉဢၼ်ၶၢႆၵုၼ်ႇသိၼ်ပိင်ႇၺႃႇၼၼ်ႉ ယဵင်ႈၶႅၼ်းလီတွၼ်းၼႃႇသေ တၢင်းဢၼ်ၵႃႉဢၼ်ၶၢႆၵုၼ်ႇသိၼ်ငိုၼ်းဢေႃႈ။ ဢမျၢတ်ႈမၼ်းဢၼ်လႆႈၼၼ်ႉၵေႃႈ၊ ယဵင်ႈၶႅၼ်းလီတွၼ်းၼႃႇသေၶမ်းလွတ်ႈငၢၼ်ႇဢေႃႈ။-

15မၼ်းယဵင်ႈၶႅၼ်း မီးတၢင်းဢၼ်ထိူၵ်ႈၵႃႈထိူၵ်ႈၶၼ် ၼႃႇသေသႅင်လႅင်ဢေႃႈ။ ၶိူင်ႈပိူင်ဢၼ်မႂ်းလီထုၵ်ႇၸႂ်ၵျိူၵ်ႈၸႂ်ၵႃႈမီးၼၼ်ႉ ဢမ်ႇဢဝ်တႅၵ်ႈၵၼ်တၢၼ်ႇၵၼ်တင်းမၼ်းလႆႈ။-

16ၵႃႈၼႂ်းမိုဝ်းၶွၼ်ၶႂႃမၼ်းၼၼ်ႉ မီးမိုဝ်ႉဝၼ်းဢၼ်ယၢဝ်းဢၼ်ယိုၼ်းလႄႈ ၵႃႈၼႂ်းမိုဝ်းၶွၼ်သၢႆႉမၼ်းၼၼ်ႉ မီးၸေးၸိမ်ႇ ဢိၵ်ႇတင်းမုၼ်သရေႇဢေႃႈ။-

17သဵၼ်ႈတၢင်းမၼ်းၸိူဝ်းၼၼ်ႉ ပဵၼ်သဵၼ်ႈတၢင်းဢၼ်သႃႇယႃႇလီငၢမ်းလႄႈ ႁွႆးတၢင်းမၼ်းၵႃႈမီးၼၼ်ႉ မီးတၢင်းဢၼ်ၼိမ်ဢၼ်လီဢေႃႈ။-

18မၼ်းပဵၼ်တူၼ်ႈဢသၢၵ်ႈ တီႈၶဝ်ၸိူဝ်းဢၼ်ယိပ်းၵမ်မၼ်းယူႇၼၼ်ႉလႄႈ ၵေႃႉဢၼ်ဢမ်ႇပွႆႇပႅတ်ႈၽႃႈပႅတ်ႈၼၼ်ႉ မီးမင်ႇၵလႃႇဢေႃႈ။-

19ထႃႇဝရႃႉၽြႃး ဢဝ်ပိင်ႇၺႃႇတႄႇဝႆႉလိၼ်မိူင်းလႄႈ ဢဝ်ၺၢၼ်ႇပွင်ႁဵတ်းၽႃႉၵၢင်ႁၢဝ်ယဝ်ႉ။-

20ၵွပ်ႈပိူဝ်ႈတၢင်းဢၼ်မၼ်းၸဝ်ႈ ၸၢင်ႈႁူႉၸၢင်ႈၸႅင်ႈၼၼ်ႉလႄႈ တီႈဢၼ်လိုၵ်ႉဢၼ်လမ်ႇတင်းလၢႆတႅၵ်ႇဢႃႈလႄႈ ၽႃႈၽူၼ်ယွတ်ႇဢွၵ်ႇ ၼမ်ႉၼၢႆးတူၵ်းလူင်းဢေႃႈ။

21လုၵ်ႈၸၢႆးၵဝ်ဢိူၺ်း၊ ယင်းဢမ်ႇႁႂ်ႈတၢင်းႁူႉတၢင်းၸၢင်ႈ ဢိၵ်ႇတင်းသမ်ႇမႃႇသတီႉ လႆႈၽၢတ်ႇယၢၼ်သေ သိုဝ်ႈၼႃႈတႂ်ႈတႃမႂ်းလႄႈ ပႂ်ႉၵမ်ပႂ်ႉၸွမ်းယူႇတႃႇသေႇတႃႉ။-

22ပေႃးႁဵတ်းၸိူဝ်ႉၼင်ႇၼၼ်ၸိုင်၊ ၶဝ်တၵ်းပဵၼ်ဢသၢၵ်ႈတီႈဝီႉၺိၺ်ႇမႂ်း ဢိၵ်ႇတင်းမုၼ်သရေႇတီႈၶေႃးမႂ်းဢေႃႈ။-

23ၵမ်းၼၼ်ႉ မႂ်းတၵ်းၵၢင်းလွတ်ႈၽေးလွတ်ႈရၢၼ်ႇသေလႄႈ ၵႂႃႇမႃးၵႃႈၼႂ်းသဵၼ်ႈတၢင်းမႂ်း၊ တိၼ်မႂ်းယင်းဢမ်ႇၶီႈလိုတ်းၶီႈလႅင်ႉလႄႈ တၵ်းၵႂႃႇဢေႃႈ။-

24မိူဝ်ႈဢၼ်မႂ်းၼွၼ်းၼၼ်ႉၸိုင် မႂ်းတၵ်းဢမ်ႇမီးတီႈဢၼ်လီၵူဝ်လီႁႄ။ ၸႂ်ႈတႄႉတႄႉယဝ်ႉ။ မိူဝ်ႈဢၼ်မႂ်းၼွၼ်းၼၼ်ႉ၊ မႂ်းတၵ်းလႆႈၼွၼ်းလပ်းလီလီငၢမ်းငၢမ်းဢေႃႈ။-

25ယႃႇပေၵူဝ်ပေႁႄၽေးဢၼ်ၶၼ်ဢၼ်ၽႂ်း ဢိၵ်ႇတင်းၽေးတၢင်းဢၼ် ၶဝ်ၸိူဝ်းဢၼ်ႁၢႆႉဢၼ်ႁုၵ်းလူႉလႅဝ်ၼၼ်ႉ ၼႂ်းမိူဝ်ႈဢၼ်မၼ်းႁွတ်ႈမႃးၼၼ်ႉ။-

26လွင်ႈမၼ်းၸမ်ႉ ထႃႇဝရႃႉၽြႃးတၵ်းပဵၼ်တၢင်းဢၼ်မႂ်း ယုမ်ႇမၢတ်ႈဢိင်ပိုင်ႈလႄႈ မၼ်းၸဝ်ႈတၵ်းႁၢမ်ႈတၢပ်ႈႁႄႉၶႅၼ်တိၼ်မႂ်း ႁႂ်ႈဢမ်ႇလႆႈထုၵ်ႇၶဵၼ်းမႅၼ်ႈဢေႃႈ။

27ပေႃးမီးဢၶႂၢင်ႉ ဢၼ်လႆႈႁဵတ်းၵျေးၸူးတီႈၶဝ် ၸိူဝ်းဢၼ်ထုၵ်ႇၶၢမ်ႇဢဝ်ၵျေးၸူးၼၼ်ႉၸိုင်၊ ယင်းဢမ်ႇႁဵတ်းလႄႈ ယႃႇပေယူႇ။-

28မိူဝ်ႈဢၼ်မႂ်းမီးဢၼ်တၵ်းပၼ်ယူႇၼၼ်ႉၸိုင်၊ ယႃႇပေလၢတ်ႈတီႈၵူၼ်းႁိူၼ်းၸမ်ၵၼ်လႄႈဝႃႈ၊ ၵႂႃႇလႄႈသမ်ႉၶိုၼ်းမႃးထႅင်ႈလူးၵွၼ်ႇတႃႉ။ မိူဝ်ႈၽုၵ်ႈၵဝ်ၸင်ႇပၼ်တီႈမႂ်းဢေႃႈ၊ ဝႃႈၼင်ႇၼႆၼၼ်ႉ၊-

29မိူဝ်ႈဢၼ်မၼ်းယင်းဢမ်ႇမီးတၢင်းဢၼ် မႆႈၸႂ်ၶီၸႂ်လႄႈ ယူႇၵႃႈတီႈႁိမ်းမႂ်းယူႇၼၼ်ႉၸိုင်၊ ယႃႇပေၵျၢမ်ႇပွင်တၢင်းၵျၢမ်ႇတၢင်းပွင် ဢၼ်ဢမ်ႇလီသႂ်ႇတီႈၵူၼ်းႁိူၼ်းၸမ်ၵၼ်ၼၼ်ႉ။-

30ပေႃးၵူၼ်းၵေႃႉၼိုင်ႈ ဢမ်ႇႁဵတ်းဢပႅတ်ႈသႂ်ႇတီႈမႂ်းၸိုင်၊ လွင်ႈမၼ်းယင်းဢမ်ႇမီးလႄႈ ယႃႇပေၽိတ်းၵၼ်တင်းမၼ်း။

31ယႃႇပေၶွႆၵေႃႉဢၼ်ၸၢင်ႈႁဵတ်းဢႃႉထမ်ႇမႃႉၼၼ်ႉ။ ယႃႇပေလိူၵ်ႈၵဵပ်းဢဝ်သဵၼ်ႈတၢင်း ဢၼ်မၼ်းၵႂႃႇၼၼ်ႉ သေသဵၼ်ႈသေတၢင်း။-

32လွင်ႈမၼ်းၸမ်ႉ ၶဝ်ၸိူဝ်းဢၼ်ၸႂ်ၵူတ်ႉၸႂ်ငေႃးၼၼ်ႉ ပဵၼ်တီႈဢၼ်ထႃႇဝရႃႉၽြႃး လီႁင်ႈဢဵတ်ႇသဵတ်ႇလႄႈ ဢၶႂၢင်ႉဢၼ်လႆႈႁဵတ်းမိၵ်ႉသႃႇႁႃယႃႉ တၢင်းဢၼ်ထုၵ်ႇၵၼ်တင်းမၼ်းၸဝ်ႈၼၼ်ႉ မီးတီႈၶဝ်ၸိူဝ်းဢၼ် သိုဝ်ႈလီယူဝ်းလီၼၼ်ႉဢေႃႈ။-

33တၢင်းဢၼ်ထႃႇဝရႃႉၽြႃးၵိၼ်ႇဝႃႈၼၼ်ႉ မီးတီႈႁိူၼ်းၵေႃႉဢၼ်ဢမ်ႇတြႃးၼၼ်ႉလႄႈ တီႈတီႈယူႇၵေႃႉဢၼ်တြႃးၼၼ်ႉၸမ်ႉ၊ မၼ်းၸဝ်ႈၸၢင်ႈပၼ်တၢင်းလီဢေႃႈ။-

34မိူဝ်ႈဢၼ်မၼ်းၸဝ်ႈသႄႉသွမ်း ၶဝ်ၸိူဝ်းဢၼ် ၸၢင်ႈသႄႉၸၢင်ႈသွမ်းၼၼ်ႉလႄႈ ႁဵတ်းၵျေးၸူးတီႈၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၼၼ်ႉၸိုင်၊-

35ၶဝ်ၸိူဝ်းဢၼ်မီးပိင်ႇၺႃႇၼၼ်ႉ လႆႈၶၢမ်ႇဢဝ်ဢမူၺ်ႇမုၼ်သရေႇလႄႈ၊ ၶဝ်ၸိူဝ်းဢၼ်မိူၵ်ႈၼၼ်ႉၸမ်ႉ၊ တၵ်းလႆႈႁပ်ႉဢဝ် တၢင်းဢၼ်ဢူၵ်းဢၼ်ဢၢႆၵႂႃႇဢေႃႈ။

← Chapter 2 Jump to: Chapter 4 →