Proverbs 22

Shan

← Chapter 21 Jump to: Chapter 23 →

1သရေႇဢၼ်လီဢၼ်ငၢမ်းၼၼ်ႉ ယဵင်ႈၶႅၼ်းလီမျၢတ်ႈၼႃႇသေ ဢုၵ်ႉၸႃႇဢၼ်ၼမ်ၼႃႇၼၼ်ႉလႄႈ ၵျေးၸူးတၢင်းဢၼ်ႁၵ်ႉပႅင်းပိူၼ်ႈၼၼ်ႉ ယဵင်ႈၶႅၼ်းလီၼႃႇသေငိုၼ်းၶမ်းဢေႃႈ။-

2ၵေႃႉဢၼ်ၸၢင်ႈမၢၵ်ႈၸၢင်ႈမီး ဢိၵ်ႇတင်း ၵေႃႉဢၼ်ယၢၵ်ႈဢၼ်ၽၢၼ်ၼၼ်ႉ ႁူပ်ႉၵၼ်ထူပ်းၵၼ်လႄႈ ထႃႇဝရႃႉၽြႃး ပဵၼ်ၸဝ်ႈဢၼ်ႁဵတ်းပဵၼ်ၶဝ် တင်းသဵင်ႈတင်းလူင်ဢေႃႈ။-

3ၵေႃႉဢၼ်မီးသမ်ႇမႃႇသတီႉၼၼ်ႉ ၸၢင်ႈႁူႉႁၼ်ဢမူႉလႄႈ တဵတ်ႇမႅပ်ႉယူႇဢေႃႈ။ ၵေႃႉဢၼ်ငိူဝ်ႈငႃႉၼၼ်ႉၸမ်ႉ၊ ၸၢင်ႈၵႂႃႇၵႃႈၼင်ႇဢၼ်ၵႂႃႇၼၼ်ႉယူႇလႄႈ ထူပ်းတင်းဢမူႉဢေႃႈ။-

4ဢၵျူဝ်းတၢင်းဢၼ်ႁူဝ်ၸႂ်ၶျႃးတႅမ်ႇဢိၵ်ႇတင်း တၢင်းဢၼ်ၵူဝ်ႁႄထႃႇဝရႃႉၽြႃးၼၼ်ႉ ပဵၼ်ၸေးၸိမ်ႇမုၼ်သရေႇ တင်းဢသၢၵ်ႈဢေႃႈ။-

5တူၼ်ႈၼၢမ်ယုမ်းၼၢမ် ဢိၵ်ႇတင်းတူင်ႇႁႅဝ်ႉတူင်ႇၶိုမ်း ၸၢင်ႈမီးယူႇၵႃႈၼႂ်းသဵၼ်ႈတၢင်း ၵေႃႉဢၼ်ၸႂ်ၵူတ်ႉၸႂ်ငေႃးၼၼ်ႉလႄႈ ၵေႃႉဢၼ်ပႂ်ႉၸႂ်ဝီႉၺိၺ်ႇမၼ်းယူႇၼၼ်ႉၸမ်ႉ၊ ၸၢင်ႈဝႄႈပႅတ်ႈသေတီႈၶဝ်ၼၼ်ႉၵႂႃႇၵႆၵႆဢေႃႈ။-

6သင်ႇသွၼ်သုင်းမႃႉပၼ်တီႈလုၵ်ႈဢွၼ်ႇ ၸွမ်းလူၺ်ႈသဵၼ်ႈတၢင်းဢၼ် မၼ်းထုၵ်ႇလီၵႂႃႇၼၼ်ႉတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ မိူဝ်ႈဢၼ်မၼ်းၵႄႇမၼ်းထဝ်ႈၼၼ်ႉ၊ မၼ်းယင်းဢမ်ႇဝႄႈဢမ်ႇပိူင်ႈသေသဵၼ်ႈတၢင်းၼၼ်ႉလႄႈ တၵ်းၸွမ်းၵႂႃႇဢေႃႈ။-

7ၵေႃႉဢၼ်ၸၢင်ႈမၢၵ်ႈၸၢင်ႈမီးၼၼ်ႉ လႆႈဢုပ်ႉပိူင်ႇၵေႃႉဢၼ်ယၢၵ်ႈဢၼ်ၽၢၼ်လႄႈ ၵေႃႉဢၼ်ၵူႈယိမ်ဢဝ်ၼၼ်ႉ ပဵၼ်ၶႃႈတီႈၵေႃႉဢၼ် ပၼ်ၵူႈပၼ်ယိမ်ၼၼ်ႉဢေႃႈ။-

8ၵေႃႉဢၼ်ဝၢၼ်ႇၸိူဝ်ႉဝၢၼ်ႇၽၼ်းတူႉၸရိူၵ်ႈၼၼ်ႉ တၵ်းလႆႈပၢတ်ႇၶဝ်ႈတုၵ်ႉၶႃႉလႄႈ ၶွၼ်ႉဝၢႆတေႃးသႃႉၸႂ်မႆႈမၼ်းၼၼ်ႉၵေႃႈ၊ တၵ်းႁၢႆဢေႃႈ။-

9ၵေႃႉဢၼ်မီးမၢၵ်ႇတႃၵရူႉၼႃႇၼၼ်ႉ မီးမင်ႇၵလႃႇ ၵွပ်ႈပိူဝ်ႈဢၼ် မၼ်းဢဝ်ၶဝ်ႈမုၼ်းမၼ်းလဵင်ႉလူ ၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၼၼ်ႉဢေႃႈ။-

10ႁေႃႈၵေႃႉဢၼ်ႁဵတ်းဢမ်ႇပေႃးၼင်ႇႁိုဝ်ယူႇၼၼ်ႉ ဢွၵ်ႇပႅတ်ႈသေတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ တၢင်းဢၼ်ႁဵတ်းရၢၼ်ႇသူႇတၵ်းဢွၵ်ႇၵႂႃႇလႄႈ တၢင်းဢၼ်ၽိတ်းၵၼ် ဢိၵ်ႇတင်း တၢင်းဢၼ်သႄႉသွမ်းၼၼ်ႉ တၵ်းထၢတ်ႇယဵၼ်ၵႂႃႇဢေႃႈ။-

11ၵေႃႉဢၼ်ထုၵ်ႇၸႂ်ၵျိူၵ်ႈၸႂ်တၢင်းဢၼ်ႁူဝ်ၸႂ်ၶၢဝ်ၸၢင်ႇၼၼ်ႉ ၸၢင်ႈလၢတ်ႈၵႂၢမ်းဢၼ်ၼိမ်သိမ်ႇဢူၼ်ႈဢွၼ်ႇလႄႈ ၸၢင်ႈလႆႈပဵၼ်ၵေႃႉပဵၼ်သေႈ ၶုၼ်ႁေႃၶမ်းဢေႃႈ။-

12မၢၵ်ႇတႃထႃႇဝရႃႉၽြႃး ပႂ်ႉပိင်ႇၺႃႇတၢင်းဢၼ်ႁူႉဢၼ်ၸႅင်ႈၼၼ်ႉယူႇလႄႈ ၵႂၢမ်းၵေႃႉဢၼ် ၸၢင်ႈပႅတ်ႉၸၢင်ႈလႅၼ်ၼၼ်ႉၸမ်ႉ၊ မၼ်းၸဝ်ႈတၵ်းဢဝ်လူမ်ႉပၵ်းၶိတ်းတူၵ်းပႅတ်ႈဢေႃႈ။-

13ၵေႃႉဢၼ်ၶၢၼ်ႉဢၼ်ဢိူၼ်ၼၼ်ႉ ၸၢင်ႈလၢတ်ႈလႄႈဝႃႈ၊ သၢင်ႇသီႈမီးယူႇၵႃႈၼွၵ်ႈပုၼ်ႉဢေႃႈ။ ၵဝ်တၵ်းလႆႈၶၢမ်ႇတၢင်းဢၼ်တၢႆ ၵႃႈၼႂ်းတႃႈၼႂ်းတၢင်းၼၼ်ႉဢေႃႈ၊ ဝႃႈၼင်ႇၼႆဢေႃႈ။-

14သူပ်းမႄႈယိင်းလေႃၼၼ်ႉ ပဵၼ်ၶုမ်ပဵၼ်လုၵ်းဢၼ်လိုၵ်ႉၼႃႇလႄႈ၊ ၵေႃႉဢၼ်ထႃႇဝရႃႉၽြႃးလီႁင်ႈဢဵတ်ႇသဵတ်ႇၼၼ်ႉ တၵ်းတူၵ်းသႂ်ႇၵႃႈၼႂ်းၶုမ်ၼႂ်းလုၵ်းၼၼ်ႉဢေႃႈ။-

15သၽေႃးဢၼ်မိူၵ်ႈၼၼ်ႉ ပူၵ်ႉႁေႃႇမီးဝႆႉယူႇ ၵႃႈၼႂ်းႁူဝ်ၸႂ်လုၵ်ႈဢွၼ်ႇလႄႈ ၵူၺ်းၵႃႈ ၶွၼ်ႉဝၢႆဢၼ်သင်ႇသွၼ်သုင်းမႃႉပၼ်ၼၼ်ႉ ၸၢင်ႈႁေႃႈသၽေႃးၼၼ်ႉ ဢွၵ်ႇပႅတ်ႈသေၵႆၵႆဢေႃႈ။-

16ၵေႃႉဢၼ်ၼိၵ်ႈၸၢၵ်ႈငႅၼ်းသႄးၵူၼ်းယၢၵ်ႈၵူၼ်းၽၢၼ် ႁႂ်ႈပဵၼ်ပုၼ်ႈၸီးပႂႃးမၼ်း ဢိၵ်ႇတင်း ၵေႃႉဢၼ်ပၼ်တီႈၵူၼ်းမၢၵ်ႈၵူၼ်းမီးၼၼ်ႉ တၵ်းလႆႈႁွတ်ႈထိုင်တၢင်းယၢၵ်ႈတၢင်းၽၢၼ် ဢမၢၼ်ႇၶၼ်ပဵၼ်ဢေႃႈ။

17ႁေႈႁူမႂ်းသေလႄႈ ထွမ်ႇဢဝ်ၵႂၢမ်းၶဝ်ၸိူဝ်းဢၼ်မီးပိင်ႇၺႃႇၼၼ်ႉတႃႉ။ တီႈပိင်ႇၺႃႇတၢင်းဢၼ်ၵဝ်လႆႈႁူႉလႆႈၸႅင်ႈၼၼ်ႉၵေႃႈ ဢဝ်ႁူဝ်ၸႂ်မႂ်းၸပ်းၸွႆးယူႇတႃႉ။-

18ပေႃးဢဝ်သႂၢင်းသႂ်ႇဝႆႉ ၵႃႈၼႂ်းႁူဝ်ၸႂ်မႂ်းၸိုင်၊ တၵ်းပဵၼ်တၢင်းဢၼ်သႃႇယႃႇလီငၢမ်းလႄႈ ၵႃႈၼႂ်းသူပ်းမႂ်းၵေႃႈ တၵ်းမီးတၢင်းဢၼ်ထုၵ်ႇဢၼ်လီယူႇတႃႇသေႇဢေႃႈ။-

19လွင်ႈၼင်ႇႁိုဝ် မႂ်းတၵ်းဢိင်ပိုင်ႈထႃႇဝရႃႉၽြႃးယူႇၸိုင် ၵဝ်ဢဝ်သင်ႇသွၼ်ပၼ်တီႈတူဝ်မႂ်းဝၼ်းမိူဝ်ႈၼႆႉဢေႃႈ။-

20ၵဝ်တႅမ်ႈလွင်ႈတၢင်းဢၼ်ပၼ်သတီႉ ဢိၵ်ႇတင်းလွင်ႈပိင်ႇၺႃႇ တၢင်းဢၼ်ႁူႉဢၼ်ၸႅင်ႈၼၼ်ႉယူႇမိူဝ်ႈဢွၼ်တၢင်းၼၼ်ႉ တီႈမႂ်း၊-

21ႁႂ်ႈမႂ်းလႆႈႁူႉၵႂၢမ်းသဵတ်ႈၸႃႇတြႃးၸႅတ်ႈၸႅတ်ႈ ဢိၵ်ႇတင်း ႁႂ်ႈမႂ်းလႆႈၶိုၼ်းလၢတ်ႈပၼ်ၵႂၢမ်းသမ်ႇမႃႇ တီႈၶဝ်ၸိူဝ်းဢၼ်ပွႆႇၸႂ်ႉမႂ်းၼၼ်ႉဢမ်ႇၸႂ်ႈႁိုဝ်။-

22ထွၵ်ႈလူၺ်ႈတၢင်းယၢၵ်ႈတၢင်းၽၢၼ် ၵေႃႉဢၼ်ယၢၵ်ႈဢၼ်ၽၢၼ်ၼၼ်ႉသေလႄႈ ယႃႇပေႁိမ်ပေႁူင်ႇဢဝ်ဢုၵ်ႉၸႃႇမၼ်း။ ယႃႇပေၼိၵ်ႈၸၢၵ်ႈငႅၼ်းသႄး ၵေႃႉဢၼ်မီးတုၵ်ႉၶႃႉၼၼ်ႉ ၵႃႈတီႈၼႂ်းႁူးၽၵ်းတူဝဵင်း။-

23လွင်ႈမၼ်းၸမ်ႉ ထႃႇဝရႃႉၽြႃးတၵ်းပႂ်ႉဢမူႉၶဝ်ယူႇလႄႈ ႁိမ်ဢဝ်ႁူင်ႇဢဝ်ဢသၢၵ်ႈၶဝ်ၸိူဝ်းဢၼ် ႁိမ်ဢဝ်ႁူင်ႇဢဝ်ဢုၵ်ႉၸႃႇၶဝ်ၼၼ်ႉဢေႃႈ။-

24ယႃႇပေႁဵတ်းၵေႃႉႁဵတ်းသေႈ လူၺ်ႈၵၼ်တင်းၵေႃႉဢၼ်ၸႂ်ပွတ်းၸႂ်လွတ်းၼၼ်ႉ။ ယႃႇပေၸွမ်းလူၺ်ႈၵၼ်တင်းၵေႃႉဢၼ်ၸႂ်လမ်သႆႈၵမ်ႇၼႃႇၼၼ်ႉ။-

25ၵူဝ်မႂ်းတၵ်းသွၼ်ဢဝ် ထုင်းၸၢမ်ႇထုင်းၽိင်ႈမၼ်းၸိူဝ်းၼၼ်ႉလႄႈ တၵ်းပဵၼ်တူင်ႇႁႅဝ်ႉတူင်ႇၶိုမ်း တီႈၸႂ်ဝီႉၺိၺ်ႇမႂ်းဢေႃႈ။-

26ယႃႇပေၶဝ်ႈပႃး ၼႂ်းမုၵ်ႉၼႂ်းၸိူဝ်းၶဝ်ၸိူဝ်းဢၼ်တူပ်းမိုဝ်းၵၼ် ဢိၵ်ႇတင်းမုၵ်ႉၸိူဝ်းၶဝ်ၸိူဝ်းဢၼ် ႁပ်ႉတုင်းဢဝ်ၼီႈပိူၼ်ႈၼၼ်ႉ။-

27ပေႃးမႂ်းဢမ်ႇမီးဢၼ်တၵ်းပၼ်ၸိုင်၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မၼ်းတၵ်းလႆႈဢဝ်တီႈၼွၼ်းမႂ်း ဢၼ်မီးယူႇၵႃႈတႂ်ႈမႂ်းၼၼ်ႉၵႂႃႇၼင်ႇႁိုဝ်။-

28ယႃႇပေၶၢႆႉသဝ်လၵ်းဢၼ်မၢတ်ႈတွင်းၵႂၢၵ်ႈလိၼ် ဢၼ်ပူႇမႂ်းမွၼ်ႇမႂ်းပၵ်းဝႆႉၼၼ်ႉသေၵမ်း။-

29မႂ်းႁၼ်ၵေႃႉဢၼ်ၵႆႉၵျူဝ်းၸႃး လူၺ်ႈတၢင်းႁဵတ်းတၢင်းသၢင်ႈမၼ်းၼၼ်ႉႁိုဝ်။ ၵေႃႉၼၼ်ႉ တၵ်းလႆႈၸုၵ်းယူႇၵႃႈတီႈၽၢႆႇၼႃႈၶုၼ်ႁေႃၶမ်းလႄႈ ဢမ်ႇလႆႈၸုၵ်းယူႇၵႃႈတီႈၽၢႆႇၼႃႈၵူၼ်းပၢၼ်ၵၢင်တင်းလၢႆ။

← Chapter 21 Jump to: Chapter 23 →