bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Sukuma
/
Sukuma 2019
/
2 Samuel 12
2 Samuel 12
Sukuma 2019
← Chapter 11
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 13 →
1
Ū SEEBA ūntūma Nasani aje ū kūlī Daūdi, aho washika ūlūngalūnga nang'hwe; hūna ūng'wīla, “Mu nzengo nebe baalīmo banhū babīlī, ūmò nsabi, ūngī ng'habī.
2
Ū nsabi walī na madaale mataale ga ng'holo na ng'ombe.
3
Ū ng'habī walī atī na kīnhū, ūlū ītī kaana ka ng'holo kamò dūhū kakīma, ako walī wagūla gīkī nang'hwe apandīke. Walī akalang'hanile chiza no, kūshisha nose kūkūla hamò na a baana bakwe; yūbiza ng'holo yakwe. Nī shilīwa īsho walyaga ū wei nayo yalyaga; nū mu shikombe shakwe sha kūng'wela yang'welaga mo nayo; nose yītaga yalaala na mu makono gakwe. Nīyo ū kūlī we yalī yabiza gītī nshīke wakwe.
4
Lwise lūmò ū nsabi ūpandīka ngeni, alīyo ūlemeelwa ū kūmeegeja ikūbī ū ngeni ūyo akangeniha ng'wenūyo ū kūfuma ū mu madaale gakwe a ga ng'holo nūūlū a ga ng'ombe. Ūja ūūkīsola ī ng'holo ya ng'habī wīsīnza ūmeegeja ī likūbī ū ngeni ūyo walī wangeniha wei.”
5
Ū Daūdi ūbaka na būpelanu wa kūmpelanīla ū munhū ng'wenūyo; ūng'wīla ū Nasani, “Nalīkwilahīlīla mu lina lya ng'wa SEEBA mpanga, gīkī ū munhū ūyo wagwītile ū mhayo gwenūyo igeleelilwe kūcha!
6
Hama shing'wigeleelilwe wīlīpe ng'hangala inè ī ng'holo yenīyo, nguno wītile mhayo gwa wiboneeji būtaale no, ūbo būtī na shigongo!”
7
Hūna ū Nasani ūng'wīla ū Daūdi, “Ū munhū ng'wenūyo hū ūlī bebe! Ū SEEBA Mulungu wa Baisilaeli alīhaya gīkī, ‘Nakakwitīīla maguta ūbize ntemi wa Baisilaeli, nūkūpīja nū mu nkono go ng'wa Saulo.
8
Hama nī kaya ya ng'wa so būgonzo nūkwinha bebe, na a bake ba ng'wa so būgonzo balī mu makono gako. Ī numba ya Isilaeli nī ya Yuda nī jene nakwinha bebe. Nīyo nūūlū ni shakīja ū kūkwigela ī shose shenīshi, ni nakwinha na shingī a higūlya yaho.
9
Hama nibūlī lūūlū wagūdalahile ū mhayo go ng'wa SEEBA, wīta ya malofu gīko ū mu miso gakwe? Nguno ū Ulia ū Ng'hītī wamūlagile bo līlūshū, hūna ū nke wakwe ūnsola abize wako; ū wei ūmūlaga bo līlūshū lya Baamoni!
10
Alilūūlū, ū lūshū lūtīnga yaya ū mu kaya yako; nguno wanidalahile, ūnsola ū nke o ng'wa Ulia ū Ng'hītī gīkī abize nke wako.’”
11
Ū SEEBA alīhaya, “Nakūkūgulumūkīja būbi būtaale no kūfuma ū mu kaya yako bebe ng'wenekīlī. A bake bako nakūbasola nang'winhe munhū ūngī, ūyo alī bbihī nang'ho no no no; akūlaala nabo a bake bako hape bo līīmi nyage.
12
Ū bebe wagwītile ū mhayo gwenūyū mu mbisīla, alīyo ū nene nakūkwītīla ū bebe bo hape kū būtongi wa Baisilaeli bose.”
13
Ū Daūdi ūng'wīla ū Nasani, “Nang'hūbile ū SEEBA.” Nang'hwe ū Nasani ūg'wīla ū Daūdi, “Ū SEEBA wawīnjaga ū būhūbi wako, ūtūcha.
14
Alīyo īkī ū mu yenīyo wīyītile wabalugūlīlile nyango gwa kūdalaha a banishi ba ng'wa SEEBA, ū ng'wana ūyo wabyalīlilwe akūcha.”
15
Hūna ū Nasani wīnga ūja kaya. Hūna ū SEEBA ūntūmīla būsaatu ū ng'wana ūyo nke o ng'wa Ulia akamyalīla ū Daūdi; ūsaata no.
16
Ū Daūdi wingīla mu kaya yakwe kūnombela ū ng'wana kūlī Mulungu, mu kūfunga na kūkeyula būjikū pe alaalile hasī.
17
A bana ng'oma ba h'ikūlū būng'wegeela bīmīīla bbihī nang'hwe kūng'wikūmbīlīja abūūke, alīyo ūlema, nī shilīwa ūlema ū kūlya hamò nabo.
18
Aho lwashika lūshikū lwa mpungatī ūcha ū ng'wana! A batūmami bakwe ū Daūdi bogoha ū kūng'wīla ī gīkī ū ng'wana wachaaga; biganika, “Ū ng'wana aho walī ataalī mpanga twalūgemaga ū kūyomba nang'hwe ū Daūdi, alīyo walī atūtūdegelekaga. Al'ī haha tūkūdūla kinehe ū kūng'wīla ī gīkī ū ng'wana wachaaga? A henaho lūūlū angū mmho ashikile nūūlū kwiyītīla mhayo gwabūbi gete!”
19
Alīyo ū Daūdi aho wababona a batūmami bakwe bakwiyombyaga mu kwihwehwetela, ūdeeba gīkī ū ng'wana wachaaga. Ūbabūūja, “Wachaaga ū ng'wana?” Būnshokeja, “Yaja chene, wazumalīka ng'hana!”
20
Hūna ū Daūdi ūbūūka ī hasī aho waalī. Wahayūmala kooga, wibila maguta ūgalūcha nī shizwalo, ūja mu numba ya ng'wa SEEBA kūjūlamya. Hanuma ya henaho ūshoka kū ng'wakwe ūlomba shilīwa būng'winha ūlya.
21
A batūmami bakwe būmūūja, “Nibūlī ūlīta mihayo īlī gīko? Ū ng'wana aho walī ataalī mpanga walūfungaga na kūlīla, alīyo ī haha aho waacha wabūūka waalya na shilīwa!”
22
Ūshosha ūhaya, “Ū ng'wana aho walī ataalī mpanga nalūfungaga na kūlīla nguno naliganikaga, ‘Nani amanile? Hamo ū SEEBA adūgije kūnichīla shigongo ūneka ū ng'wana ikale mpanga.’
23
Alīyo ī haha īkī wachaaga, nafunge kūlwa nguno kī? Angū, nadūgije kūnshosha anishokele? Ū nene hū nakūja ū kūlī we, ū wei atūnishokela ū nene.”
24
Hanuma ya henaho ū Daūdi ūhooya nū nke wakwe mihayo yawiza gūzalabana ū moyo gwakwe, aho yika ī ng'holò ūlaala nang'hwe; ūbūūcha nda; ūbyala ng'wana ngosha būng'wilīka ī lina Solomoni. Ū SEEBA ūntogwa,
25
ūtūma nhūng'wa mu nzīla ya ng'wa Nasani, gīkī ī lina lyakwe itanwe Yedidia.
26
Ū ng'wikanza lyose lyenīlo ū Yoabu wilwishaga būlūgū na nzengo gwa Laba mu sī ya Baamoni, nose ūgūdima ū nzengo gwa h'ikūlū.
27
Hūna ū Yoabu ūtūma nhūng'wa ū kūlī Daūdi alīhaya, “Naalwile nago ū nzengo gwa Laba, naalīdimile ī lipandī īlo bakapandīkīlaga minzī.
28
Alilūūlū, gakumingage a mabità ayo gaasaagile ūje ūkagūtangate ū nzengo ūgūdumīle ūgūdime. Nguno ūlū nūgūdima nene gūkwitanīlwa lina lyane.”
29
Na lūūlū ū Daūdi ūgasola pye a mabità ūja nago ī Laba ūūkagūdumīla ūgūdima.
30
Wīyīnja ī ngikili ya ntemi wabo a ha ntwe gwakwe; ūtūūlīlwa kū ntwe gwakwe ū Daūdi. Ū būdito wayo walī kilo makūmi adatū n'inè, na yalī na būlenji bo mawe ga mpango ntaale. Nīyo ū kūfuma ū mu nzengo gwenūyo ū Daūdi akasola shikolo shingī no.
31
A banhū ba mu nzengo gwenūyo ūbafunya moi, ūbatūūla būtūmami wa milīmo; būyūtūmamīla misumeno, mbasa na sūlūlū, na kūbeeja na milīmo ya kūbūmba madafaali. Ī mizengo ya Baamoni ī yose akayītīla gīko; hanuma ya henaho ū Daūdi na a banhū bakwe būshoka Yelusalemu.
← Chapter 11
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 13 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24