bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Sukuma
/
Sukuma 2019
/
2 Samuel 6
2 Samuel 6
Sukuma 2019
← Chapter 5
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 7 →
1
Ū Daūdi ūbabilinga hangī a banhū abo baalī basanyiwe no no no ū mu Isilaeli ī yose; ī lisaabu lyabo a bose būshika shihūmbī makūmi adatū.
2
Hūna ū wei na banhū bakwe būbūūka bajile Baale-yuda kūjūlyenha kūfuma koi ī lisandīko lya ng'wa Mulungu, īlo līkitanagwa mu Lina lyenīlo, ī lina lya ng'wa SEEBA wa Būdūla bose, ūyo isumbī lyakwe lya būtemi līlī ha gatī gatī ya makelubi ayo galī h'isandīko.
3
Na lūūlū ī lisandīko lya ng'wa Mulungu būlītūūla h'igogoteni ipya, hūna būlīfunya ū mu numba ya ng'wa Abinadabu, īyo yalī ha ngūlya. Uza na Ahiyo, bitūnja bakwe ū Abinadabu hū abo baalītongeelaga ī ligogoteni ī lipya lyenīlo,
4
Īlo lyalī nī lisandīko lya ng'wa Mulungu a higūlya yalyo; ū Ahiyo washimīzaga ū kū būtongi walyo.
5
Ū Daūdi nī numba ya Isilaeli ī yose baalī bayega no ū kū būtongi bo ng'wa SEEBA, babinaga na ngunzu jabo jose, kūnū bakwīmbaga na kūtūla ndono, malimba, shitumba, nzege, na mabbaadi ga kūkūbanya.
6
Bahayūshika ha lūbūūga lwa kūtūlīla lwa ha ng'wa Nakoni, ī ng'ombe jiguumha; ū Uza ūgoloola nkono ūlīdima ī lisandīko lya ng'wa Mulungu.
7
A henaho ū būpelanu bo ng'wa SEEBA būmpembekela ū Uza kūlwa kūgwīta ū mhayo gwenūyo, ūntūla ūchīla a h'isandīko lya ng'wa Mulungu.
8
Ū Daūdi ūsaaya nguno ū būpelanu bo ng'wa SEEBA būkanseesekela ū Uza; ī lipandī lyenīlo ūlitana Pelezi-uza.
9
Ū lūshikū lwenūlo ū Daūdi ūng'ogoha ū SEEBA; ūhaya, “Līdūgije kinehe ū kwiza a ha ng'wane ī lisandīko lya ng'wa SEEBA?”
10
Na lūūlū ū Daūdi ūlemeelwa ū kūlīshikīlīja ī lisandīko lya ng'wa SEEBA ū mu nzengo go ng'wa Daūdi, ūkūjiikala nalyo. Ūlīlija ha ng'wa Obedi-edomu, ūmò wa Bagītī.
11
Ī lisandīko lya ng'wa SEEBA likala ū mu numba ya ng'wa Obedi-edomu ū Ngītī ikanza lya myeji idatū, ū SEEBA ūng'wīlūkīla ningī no ū munhū ng'wenūyo nī kaya yakwe.
12
Ū Daūdi ūwīlwa, “Ū SEEBA wayīlūkīlile ningī no ī kaya ya ng'wa Obedi-edomu, nī shose īsho alī nasho, nguno y'isandīko lya ng'wa Mulungu.” Na lūūlū ū Daūdi wika koi kūjūlyenha ī lisandīko lya ng'wa Mulungu kūfuma ū mu numba ya ng'wa Obedi-edomu ūlīshikīlīja ū mu nzengo go ng'wa Daūdi mu būyegi būtaale.
13
Abo baalī balībūkije ī lisandīko lya ng'wa SEEBA aho bashimīza shidanda shitandatū, ū Daūdi ūsīnza nzagamba na mūūga ya ng'ombe ng'īnu, ūshifunya kūbiza shitambò.
14
Ī likanza lyenīlo ū Daūdi walī azwalile ng'hanjo ya nyagabīji ya kitaani, wabinaga no na nguzu jakwe jose kū būtongi bo ng'wa SEEBA.
15
Na lūūlū ū Daūdi nī numba ya Isilaeli ī yose, būlīlinhya balyenhile ī lisandīko lya ng'wa SEEBA, bakūtūlaga mhūndū na kūng'ang'aaja nhaaninga nīyo kīngī nasho!
16
Ī lisandīko lya ng'wa SEEBA aho līlīshikīīla ū mu nzengo go ng'wa Daūdi, ū Mikali ū nshīke o ng'wa Saulo walolelaga ng'widilisha. Aho wamona ū Daūdi akūbinaga na kwikīndagūka kū būtongi bo ng'wa SEEBA, ūndalaha no ū mu ng'holò yakwe.
17
Hūna lūūlū būlīshikīlīja ī lisandīko lya ng'wa SEEBA, būlītūūla a ha wikalo ūbo lyalī lyalonja longejiwa, ū ng'wiheema īlo walī walībeegeja ū Daūdi. Hanuma ya henaho ū Daūdi ūfunya shitambò sha kūpemvwa na shakwinha sha būsangī kū būtongi bo ng'wa SEEBA.
18
Aho wamala ū kūfunya ī shitambò sha kūpemvwa nī shakwinha sha būsangī, ūbalombela a banhū mu lina lya ng'wa SEEBA ū Ndūji wa shose.
19
Hūna pye a banhū ū ng'wibità lya Baisilaeli, bagosha na bakīma, būlī ng'wene winhwa nū Daūdi shipande sha ngatī, keki ya nhende, na keki ya mizabibu. Na lūūlū a banhū būsambaala kūja kaya, būlī ng'wene kū ng'wakwe.
20
Ū Daūdi aho washoka kaya gīkī abalombele na a banhū ba ha ng'wakwe, ū Mikali ū nshīke o ng'wa Saulo ūfuma kūnsūng'wanha; ūng'wīla, “Mm lelo īyī, lekaga na kūyomba nīyo; ū ntemi wa Isilaeli walī na kigūngūhīje kangī nako! Walifunangūlaga na kwigoola kū būtongi wa basese ba batūmami bakwe, gīt'ūmo bakīītīlaga dūhū a basaji!”
21
Nang'hwe ū Daūdi ūshosha alīhaya, “Ū nene naalītaga ī yenīyo kū būtongi bo ng'wa SEEBA ūyo akanisola, ūneka ū so nūūlū ūngī ose ose wa kūfuma ū mu numba ya ng'wawe; ūnīta ū nene kūbiza ntongeeji wa banhū ba ng'wa SEEBA a Baisilaeli, na lūūlū shiniigelile nabine ng'hana ū kū būtongi wakwe ū SEEBA.
22
Hama nakongeja kūbiza ndalahwa kūtinda ūmo nalī ī haha; nīyo ū mu miso gane ū nene ng'wenekīlī nakongeja kwika sīlīlī. Alīyo ū kū bakīma a basese abo ūlībahaya benaba, nakūbiza nalī n'ikūjo itaale no.”
23
Ū Mikali, ū nshīke o ng'wa Saulo, atabyalile baana kūshisha lūshikū lwa kūcha kwakwe.
← Chapter 5
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 7 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24