bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Sukuma
/
Sukuma 2019
/
2 Samuel 15
2 Samuel 15
Sukuma 2019
← Chapter 14
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 16 →
1
Ū mu shikū jenījo ū Abusalomu ūlagīja lyūbeejiwa igogoteni, jiigele na falasa ja kūlīduta, na banhū makūmi atanò ba kūyūja bakūpeelaga ū kū būtongi wakwe.
2
Būlī lūshikū ī dilū ū Abusalomu ūyūbiza ūlū wamisha waja kwīmīīla kw'ikūūwa lya kwingīla mu nzengo. Hūna ūlū munhū wiza alī na ng'hūmbū ja kūshika kūlī ntemi gīkī mihayo yakwe īkalamulwe, ū Abusalomu wamūja, “Ū bebe ūfumile nzengo gūlī?” Ū munhū ng'wenūyo washoshaga gīt'ūmo īlī;, “Ū ntūmami wako afumile kū sī ya lūganda lūlebe ū mu Isilaeli.”
3
A henaho ū Abusalomu wanshokejaga, “Ī mihayo yako ū bebe ya ng'hana no, gwike dūhū a makoye ayo galīho galī gīkī, ū ntemi atī na ngunanhi wa kwīdegeleka ī mihayo yako!”
4
Hanuma ū Abusalomu ongejaga hangī na, “Nīyo gīt'ūlū ninasolwa nene ū kūbiza namuji ū mu sī īyī, būlī ng'wene ūyo alī na mhayo gwa kwibūūla ni wabiza na wiyaabī wa kūnenhela nene ī mihayo yakwe nīdegeleka, hama nīyo būlī munhū ni wayītīlwa mihayo ītūngīlīgije no.”
5
Hama atagelelile henaho dūhū ū Abusalomu, alīyo būlī ng'wene ūyo wizaga ūlū ūng'wegeela hūna winama ū kū būtongi wakwe kūngīsha, ū Abusalomu wagoloolaga nkono wandima wambipa.
6
Ū Abusalomu wabīītīlaga gīko pye a Baisilaeli abo bizaga kūlī ntemi kūlwa kūgoloolelwa mihayo yabo; ūbiza wajiduta mu gīko pye gete ī ng'holò ja Baisilaeli, būngalūkīla we.
7
Aho yabīta myaka īnè, ū Abusalomu ūng'wīla ū ntemi, “Nalīlomba ūnizunīlīje naje Hebuloni nakashikīlīje mhayo nebe nakanahīlīla SEEBA.
8
Nguno ū nene ntūmami wako aho nalī Geshuli ya Alamu, nakalahīla gīkī, ‘Ū SEEBA ūlū ūnishosha hangī Yelusalemu, nakūja Hebuloni nakanamye ū SEEBA.’”
9
Ū ntemi ūng'wīla, “Jaga mhola.” Ng'hana ūbūūka ūja ī Hebuloni.
10
Alīyo ū Abusalomu walī wamala kūtūma nhūng'wa mu mbisīla, jūja pye a hose ū mu ng'anda ja Isilaeli kūbawīla, “Ūlū ng'wigwa mhembe jalīla, ī likanza lyenīlo hamukagi mulīhaya gīkī, ‘Ū Abusalomu ntemi ī haha, alī Hebuloni.’”
11
Ū kūfuma ī Yelusalemu banhū magana abīlī baalī baanondeela ū Abusalomu. Baalī beegelejiwa ū kū shigukulu gītī bageni, baaja balī gīko dūhū batamanile yīngī yose yose.
12
Ū Abusalomu aho ataalī ūfunya shitambò ī Hebuloni, ūtūma banhū būja Gilo kū ng'wa Ahisofeeli būūkang'wenha kūfuma koi; ū ng'wenūyo hū walī ngunanhi ntaale o ng'wa Daūdi ū mu kahelele ka myanya. Ī likanza lyenīlo ū būgomi būbiza wapandīka nguzu; nīyo a balondeeji ba ng'wa Abusalomu būkwīla no.
13
Kwimanīla munhū waja ū kūlī Daūdi ūūkang'wīla, “Baba ntemi, ī ng'holò ja Baisilaeli ī haha jangalūkīlaga Abusalomu.”
14
Haho na haho ū Daūdi ūbawīla a batūmami bakwe abo baalī hamò nang'hwe ū mu Yelusalemu, “Tūpeelagi nguno ūlū ītī chene tūtūpūlūgūka ū kūlī Abusalomu. Nīyo shiigelile twīnge wangū, atizūtūkūūbīja akatūpandīkīla mu nzīla; nguno akūtūyagaja, nū nzengo agūkenaagūle na būūgī bo līlūshū.”
15
A batūmami bakwe ū ntemi būnshokeja būhaya, “A batūmami bako bamalīīlile kwīta mhayo gose gose ūyo alagūsole ū sīswe būgonzo ū ntemi.”
16
Na ng'hana ū ntemi wandya lūgendo, nī kaya yakwe yūnkūūbīja pyī ī yose; alīyo ūbalekeela bakīma ikūmi abo baalī bake bakwe bado, kūlwa kūlīlang'hana ī likūlū.
17
Hūna lūūlū ū ntemi ūja na a banhū a bose bakūnkūūbījaga, aho basegenela ho hado bīma kakanza.
18
Pye a banhū bakwe būyūbīta bajile, ū wei wīmīīlaga henaho; būbīta Bakeleeti, na Bapeleeti, na a Bagītī magana atandatū, a bose abo baalī banondeela kūfuma Gaasi, pyī būbīta ū kū būtongi wa ntemi.
19
Ū ntemi ūng'wīla ū Itai ū Ngītī, “Nū bebe ūlītūkūbīja a bise? Ni washoka ūkikale nū ntemi Abusalomu; nguno nīyo ū bebe ūlī ngeni ū ng'wenūmu, wapeelile kūfuma kū sī ya ng'wing'we haha īyī;
20
wizile igolo goolo dūhū, hūna ī lelo nakwenheleje kūja ūkūyeela yeelaga hamò nise, alīyo natamanile nū kūko najile? Shokaga ūbashoshe a badūgū bako; ī shigongo sha ng'wa SEEBA nū būshikaanu wakwe shibize hamò nang'ho.”
21
Alīyo ū Itai ūnshokeja ū ntemi alīhaya, “Nalīkwilahīlīla mu lina lya ng'wa SEEBA mpanga, na gīt'ūmo būlī ū būpanga bo ng'wa baba būgonzo ū ntemi, hose hose ūko alaaje ū baba būgonzo ū ntemi, nūūlū ni mu būpanga nūūlū mu kūcha, nū nsese wako akūbiza ko.”
22
Ū Daūdi ūng'wīla ū Itai, “Bītaga lūūlū ūje.” Ū Itai ū Ngītī ūbīta ajile na a banhū bakwe pye a bose, nī kaya ījo jalī hamò nang'hwe.
23
Pye a banhū baalīlaga ng'hūngū aho bajile; na lūūlū ū ntemi ūlūkīla ū longa lwenūlo hamò na banhū pye a bose, būshimīza bajile kū masaka ga kwitogolo.
24
Ū Sadoki walīko, nū Abiasali wiza hamò na a Balawī abo baalī balībūkije ī lisandīko lya būlagane bo ng'wa Mulungu; būshika būlītūūla hasī ī lisandīko lya ng'wa Mulungu kūshisha būbīta pye a banhū abo bafumaga ū mu nzengo.
25
Hūna ū ntemi ūng'wīla ū Sadoki, “Līshoshage mu nzengo ī lisandīko lya ng'wa Mulungu. Ū SEEBA ūlū gūnyeja ū gwa kūnenha, akūnenha nize nalībone hangī nī lipandī lyakwe lya kwikala.
26
Alīyo ūlū ūhaya gīkī, ‘Ū bebe ūtūniyejaga ī haha;’ ū nene ng'wene nalīho namalīīlile, ni ītage gīt'ūmo atogelilwe we.”
27
Nīyo ū ntemi ūng'wīla ū Sadoki na, “Bebe ūtī ng'hangi? Shokaga mu mhola ū kū nzengo, hamò nū ng'witūnja wako ū Ahimaazi, nū Yonasani ū ng'witūnja o ng'wa Abiasali. Ū bebe nū Abiasali jagi ko na a bitūnja bing'we.
28
Ū nene ūlū nalashike a ha būkīlīlo wa mongo ū ng'wikūngū, nakūlindīīla kūshisha nigwe kūfuma kū bing'we ū mhayo ūyo mulīniwīla.”
29
Na ng'hana ū Sadoki nū Abiasaali būlīsola ī lisandīko lya ng'wa Mulungu būshoka nalyo Yelusalemu būūkikala kwenūko.
30
Ū Daūdi ū ng'wene ongeja kūkolobela ajile akūlinhaga kū lūgūlū lwa mizeituni, kūnū akūlīlaga ūlū ajile. Waja wikundīkījaga ū kū ntwe, nū kū mhambala walī atī na shilatū shose shose. Na a banhū abo baalī hamò nang'hwe baja bikundīkījaga ū kū mitwe, kūnū bakūlīlaga nzīla ngima aho balīlinha ū mu lūgūlū.
31
Ū Daūdi ūwīlwa, “Nū Ahisofeeli alī ū kwipandī lya banhū abo baagomaga hamò na Abusalomu.” A henaho ū Daūdi ūlomba alīhaya, “Ee SEEBA, būgalūchage ū witegeleja bo ng'wa Ahisofeeli ū mu kahelele ka mihayo būbize būchilū.”
32
Ū Daūdi aho washika ū kwigūlya ya lūgūlū ūko banhū baalī bamanīīlile kūjūnamya Mulungu, būnsanga Hushai muna Aliki, walī wabīma nzīla, na shizwalo shakwe shitandagūkile, nū kū ntwe wisaamagūlīlaga lūbuubu.
33
Ū Daūdi ūng'wīla, “Ū bebe ūlū ūlaje hamò nise ūkūbiza nigo ū kūlī nene.”
34
Alīyo ūlū ūshoka ū mu nzengo ūkūng'wīla ū Abusalomu, “Nakūbiza ntūmami wako baba ntemi, ī kwandya ng'hana naalī ntūmami o ng'wa so, alīyo ī haha nagalūkaga, nabizaga ntūmami wako, ūlū wīta gīko ūkūnigunanha mu nzīla ya kūnkenaagūja ū Ahisofeeli ī mihayo īyo akwīhelaga.
35
Na a bagabīji ū Sadoki nū Abiasaali bakūbiza koi; na lūūlū ūkūyūbawīla būlī mhayo ūyo ūkūgwigwa ū ng'wikūlū lya ntemi.
36
Na a bitūnja babo balīko koi; ū Ahimaazi ng'witūnja o ng'wa Sadoki, nū Yonasani ū ng'witūnja o ng'wa Abiasali; a benabo h'abo mukūyūbatūma ū kūnenhela yose yose īyo ūkūyigwaga.”
37
Na lūūlū ū nwani ng'wiye o ng'wa Daūdi ū Hushai ūshoka ū kū nzengo, aho alīshika koi nū Abusalomu hū ūshika ū mu Yelusalemu.
← Chapter 14
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 16 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24