bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Sukuma
/
Sukuma 2019
/
2 Samuel 16
2 Samuel 16
Sukuma 2019
← Chapter 15
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 17 →
1
Ū Daūdi aho wegeela kūbīta a ha gatī gatī ya lūgūlū, būng'wipumūkīja Ziba, ū nang'hani wa kaya ya ng'wa Mefi-boshesi; walī wabīīma nzīla na nzobe jakwe jilī na myendya ya kwigasīja a ha migongo, hama jabbakīlījiagwa migatī magana abīlī, na keki igana ja mizabibu, na keki jingī igana ja tiini, na shisaabo sha divai.
2
Ū ntemi ūmūja ū Ziba, “Ni sha kinehe ī shose shenīshi?” Ū Ziba ūshosha, “Ī nzobe jilī ja kūdamhīla banhū ba ng'wikūlū, ī migatī na a matwajo sha kūlya a banhū benaba, ī divai ī yene ya kūyūng'wa a banhū ūlū bageehelwa nguzu ū kwikūngū.”
3
Hūna ū ntemi ūbūūja, “Alī halī ū ng'wizūkūlū o ng'wa so būgonzo?” Ū Ziba ūng'wīla, “Ū ng'wene wikalaga Yelusalemu, nguno aliganika gīkī, ‘Ī lelo ī numba ya Isilaeli īkūnishokeja ū būtemi ūbo walī o ng'wa gūkū.’”
4
Hūna ū ntemi ūng'wīla ū Ziba, “Kūfuma haha ī shose ī sha ng'wa Mefi-boshesi shabizaga shako.” Ū Ziba ūhaya, “Ni nanukūlagwe ū mu makono ga ng'wa baba būgonzo ū ntemi.”
5
Ū Daūdi aho wegeela Bahulimu, munhū nebe wa lūdūgū lūmò nī kaya ya ng'wa Saulo ūbasanga. Ī lina lyakwe walī Shimei, ng'witūnja o ng'wa Gela; aho aliza gīko wandya kūdūkana.
6
Ūyūmponda na mawe ū Daūdi na a batūmami ba ntemi, nūūlū īkī a bashilikale a balang'hani bakwe ū ntemi baalī bantingatile ha gatī, ū kū būlyo nū kū lūmoso.
7
Ū Shimei aho alīdūkana wahayaga, “Jaga nīyo wīnge gete bebe ibūlagi lya banhū, nū gwa kūpya ūtī nago!
8
Ū SEEBA wakūlīpaga kūlwa mininga ayo wagiita mu numba ya ng'wa Saulo, numba īyo wasola būsugi wayo. Ū SEEBA wang'winhaga ū būsugi ng'witūnja wako Abusalomu. Ī ngelelo yako yashikaga nguno ūl'ibūlagi!”
9
Ū Abishai ūng'wīla ū ntemi, “Ni kinehe ī mvwa īyo īchile īyī īkwikalaga yūndondomela ū baba būgonzo ū ntemi? Nizunīlījage naje nakagūtīne ū ntwe gwakwe!”
10
Alīyo ū ntemi ūshosha alīhaya, “Bing'we ba ng'wana Seluya, mulī na mhayo kī shi ū kūlī nene? Ī gīsī ū ng'wenūyū ūlū ūbiza akūnidūkaga gīko īkī wawīlagwa na SEEBA gīkī, ‘Ndūkage ū Daūdi,’ numho nani ūyo akūbūūja gīkī, ‘Nibūlī ūlīta gīko?’”
11
Hūna ū Daūdi ūng'wīla ū Abishai na a batūmami bakwe a bangī, “Ū ng'witūnja wane, ū wa kūfuma mu mīlī gwane gete alīkooba kūnīngīja būpanga wane. Sumvwa nū munhū wa lūganda lwa Benjamini ūyū! Nekagi gīt'ūmo alī; nekagi adūkane ūmo atogelilwe, nguno ū SEEBA wang'wīlaga kwīta gīko.
12
Hamo ū mu gīko ū SEEBA akūbūbona ū wiboneelwa wane, anilīpe yawiza a ha ng'wanya gwa shidūki īsho nalanukūla lelo īyī.”
13
Na lūūlū ū Daūdi na a banhū bakwe būja nalo ū lūgendo lwabo ū ng'wikūūwa īlo babītīlaga. Ū Shimei nang'hwe walīko ū kū ntambūko, ū kū ntulumenho gwa lūgūlū, akūbapondanga mawe, na kūbalulumīja malindo.
14
Nose ū ntemi na a banhū abo baalī hamò nang'hwe būshika ūko bajaga, alīyo baalī banoga kīngī nasho; ūlembeela hoi wifuula.
15
Ū ng'wikanza lyenīlo ū Abusalomu na a Baisilaeli a bose būbiza bashikaga ī Yelusalemu; nū Ahisofeeli walī hamò nabo.
16
Hūna ū Hushai ū nwani ng'wiye o ng'wa Daūdi ūja a halī Abusalomu ūūkashikīla kūngīsha alīhaya, “Kūlaga ūhangame baba ntemi! Hangamaga baba ntemi!”
17
Ū Abusalomu ūmūja ū Hushai, “Bebe ī yenīyī hū yene ī mbika ya koolecha būtogwa kūlī nwani ng'wiyo? Nibūlī ūtajile nang'hwe ū nwani ng'wiyo?”
18
Ū Hushai ūnshokeja, “Mm yaya baba, ū nene nakūbiza nang'hwe dūhū ū nsolwa o ng'wa SEEBA; ūyo bansolile a banhū aba, na a Baisilaeli a bose, ū ng'wenūyo hū ūyo nakūdimana nang'hwe ū nene!
19
Hama nīyo a higūlya ya henaho, nani ūyo shiniigelile kūntūmamīla? Ītaniigeleelilwe kūntūmamīla ū ng'witūnja? Ū nene nakūkūtūmamīla ū bebe gīt'ūmo nantūmamīlaga dūhū ū so.”
20
Hūna ū Abusalomu ūng'wīla ū Ahisofeeli, “Alitwinhage lūūlū a maganiko gako. Twīte kī ī haha?”
21
Ū Ahisofeeli ūng'wīla ū Abusalomu, “Bingīlage a bake ba ng'wa so a bado, abo wabalekaga kūlwa kūlang'hana ikūlū; babize bake bako. A henaho a Baisilaeli bakwigwa gīkī ī haha ū bebe wanung'haga inyema lyabūbi ū kūlī so, ūlī kūle nang'hwe gete; a henaho a makono ga banhū abo balī hamò nang'ho gakūguzuhiwa.”
22
Na ng'hana būkoma iheema higūlya ya numba, ū Abusalomu ūlaala na a bake ba ng'wa ise mu būtongi wa Baisilaeli bose.
23
Alilūūlū ū mu shikū jenījo, ū būganikīji ūlū būfunyiwa na Ahisofeeli boolī gītī bofunyiagwa na munhū obūūjaga kūlī Mulungu. Ū Daūdi nū Abusalomu baalī bawitegelegije gīko ū būganikīji bo ng'wa Ahisofeeli.
← Chapter 15
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 17 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24