2 Samuel 21

Sukuma 2019

← Chapter 20 Jump to: Chapter 22 →

1Ū mu shikū ja būsugi wakwe ū Daūdi, īkagwa nzala yūbakoya ikanza lya myaka idatū; nose ū Daūdi ūkooba kūmana kūfuma kūlī SEEBA. Ū SEEBA ūng'wīla, “Ī yenīyī īlīmukoya kūlwa nguno ya ng'wa Saulo na kaya yakwe; nguno ya mininga ayo wagiita kūlwa kūbabūlaga Bagibeoni.”

2Hūna ū Daūdi ūbitana a Bagibeoni ūhooya nabo. (A Bagibeoni benebo baalī batī Baisilaeli, baalī basaagīīla kūfuma ng'wihanga lya Baamooli; a Baisilaeli baalī babilahīlīla gīkī batūbayagaja babamale, alīyo ū Saulo kulwa kūtogwa kūbayeja a Baisilaeli na a banhū ba Yuda, ūbeeja mbika ya kūbabūlaga pye a Bagibeoni bashile gete.)

3Na lūūlū ū Daūdi ūbabūūja a Bagibeoni benabo, “Namubeegeje mhayo kī? Mhayo kī ūyo nang'wītīle gūmuyeje mubūlombele ū wingīji wa banhū ba ng'wa SEEBA?”

4A Bagibeoni būshosha balīhaya, “A bise tūtūkoobaga feza nūūlū zahabu kūfuma kūlī Saulo nūūlū kūfuma mu kaya yakwe, nīyo a bise tūtī na būdūla wa kūmūlaga munhū ose ose ū mu Isilaeli.” Ū Daūdi ūbabūūja hangī, “Mulītogwa nang'wītīle mhayo kī lūūlū ī gīsī?”

5Būnshokeja ū ntemi balīhaya, “Ū munhū ū nkenaagūji ūyo walī na ng'hūmbū ja kūtūyagaja nose tūmalwa gīkī, kūshisha ī haha tūtī n'ipandī hose hose ū mu sī ya Isilaeli,

6ū munhū ng'wenūyo tūtogilwe twinhwe bagosha mpungatī ba shibyalīlwe shakwe tūkababūlagīle Gibea ya ng'wa Saulo ū nsolwa o ng'wa SEEBA, hūna tūbatendegese kū būtongi bo ng'wa SEEBA.”

7Ū ntemi ūnang'hana ū Mefi-boshesi ū ng'witūnja o ng'wa Yonasani ng'witūnja o ng'wa Saulo, ū ng'wenūyo ūneka ikale mpanga kūlwa nguno ū Daūdi nū Yonasani ū ng'witūnja o ng'wa Saulo baalī biyilahīlīla kū būtongi bo ng'wa SEEBA.

8Alīyo ūbasola ba Alimoni na Mefi-boshesi, bitūnja ba ng'wa Aiya nshīke o ng'wa Lisipa; a basūmba benabo walī wamyalīla Saulo. Ū ntemi ūbasola na bitūnja batanò ba ng'wa Melabu, walī wamyalīla Adilieli ng'witūnja o ng'wa Bazilai muna Mehola.

9Ū ntemi ūbafunya a banhū benabo, ūbinha a Bagibeoni būbabūlaga hūna būbatendegesa mu lūgūlū kū būtongi bo ng'wa SEEBA. Bose mpungatī būcha lūshikū lūmò; būbūlagwa mu shikū ja wandījo wa makanza ga magesa, aho gakandījaga magesa ga būsīga.

10Ū Lisipa ū nshīke o ng'wa Aiya ūsola magūnīla wamba hiwe, ga kūyūlaalīla. Atīngile hoi kūfuma ikanza lya kwandya magesa kūshisha yūtūlwa mbula ī mibimba; wikalaga henaho pye a makanza akūlang'hanaga, ī līīmi wajipuuga ī noni jitizūgwa hoi, nī būjikū wajilang'hanaga ī shiinu.

11Ū Daūdi aho wawīlwa ūmo wītīlaga ū nshīke o ng'wa Aiya ū Lisipa, ūyo walī nke ndo o ng'wa Saulo,

12ūja ū kū banhū ba Yabeshi-gileadi ūūkageenha a maguha ga ng'wa Saulo na a ga ng'wa Yonasani. (A banhū benabo baalī bīyīnja ī mibimba ī Beeti-shani, bīsola mu wiba wiba ū kwīnga ū mu gwalugwa ya mu nzengo, ūko baalī bīnungeleja a Bafilisiti aho bamūlaga ū Saulo ī Giliboa.)

13Na lūūlū ū Daūdi ūgīnja koi a maguha ga ng'wa Saulo na a ga ng'witūnja wakwe ū Yonasani; na a ga banhū abo baalī babūlagwa hūna būtendegeswa ha ng'wape benabo, gūkumingwa nago.

14A maguha ga ng'wa Saulo na a ga ng'witūnja wakwe ū Yonasani būūkagajīkīla Zeelà mu sī ya Benjamini, mu shigila sha ng'wa Kishi ise o ng'wa Saulo; bīīta yose gīt'ūmo akabalagīīla ū ntemi. Hanuma ya henaho ū SEEBA hū wigwa ū kūlomba kwa banhū bakwe aho bakwīlombelaga ī sī yabo.

15Kwimanīla wabūūka būlūgū hangī a ha gatī ya Bafilisiti na a Baisilaeli. Ū Daūdi ūtulumenha ajile na a banhū bakwe, ūūkandya kūlwa nabo a Bafilisiti; ū Daūdi ūnoga no.

16Lyalīho idaaji ū mu Bafilisiti litanagwa lī Ishi-benobu, lya kūfuma mu būbyīle bo ng'wa Lafa; ī chūma sha h'ichimu lyalyo shalī na būdito bo kilo idatū na nusu, hama lyalī na lī lūshū ipya. Ī ling'wana lyenīlo līkangwakwabīla ū Daūdi, lyūsangwa lyahaya kūmūlaga.

17Alīyo wangūhīlwa na Abishai ng'wana Seluya hū ūnguna ng'wenūyo, ūlītūla ī Līfilisiti lyenīlo ūlībūlaga. Na lūūlū a banhū bakwe ū Daūdi būng'wīla, nīyo būng'wilahīlīla, “Ū bebe yaya lūūlū ū kūfuma hamò nise hangī kūja kū būlūgū, ītizūjimiwa ī tala ya mu Isilaeli.”

18Shikū jitabītile ningī būgwa būlūgū hangī a ha gatī ya Bafilisiti na a Baisilaeli ipandī lya Gobu. Ī likanza lyenīlo Sibeka muna Hushai ūlībūlaga lī Safu, nalyo lyalī lya kūfuma mu būbyīle bo ng'wa Lafa.

19Ikanza līngī hangī balwaaga na a Bafilisiti kūko Gobu kwenūko, Elihanani ng'witūnja o ng'wa Yaale-olegimu muna Betelehemu ūlībūlaga lī Goliati lya Gaasi, īlo mpīni gw'ichimu lyalyo lyalī līnang'ha itaale no, hangī igīnu gītī ng'wīsī.

20Mu būlūgū būngī balwīlaga Gaasi, lyalīho idaaji lya nzwaala itandatū tandatū, ū kū makono nū kū mhambala, ī jose jalī nzwaala makūmi abīlī n'inè; nalyo lyalī lya kūfuma mu būbyīle bo ng'wa Lafa.

21Lyandya kūbasondagūla a Baisilaeli; ūlisanga Yonasani ng'witūnja o ng'wa Shimea, nkūlūye o ng'wa Daūdi, ūlībūlaga.

22A madaaji būnè wago genaya gaalī ma muna Gaasi, gaalī ga kūfuma mu būbyīle bo ng'wa Lafa; a gose gakabūlagwa ha sīlīlī ya nkono go ng'wa Daūdi, na banhū bakwe.

← Chapter 20 Jump to: Chapter 22 →