2 Samuel 4

Sukuma 2019

← Chapter 3 Jump to: Chapter 5 →

1Ū Ishi-boshesi ng'witūnja o ng'wa Saulo aho wigwa gīkī ū Abuneeli wabūlagīlagwa Hebuloni, akacha idedebaji; nīyo pye a Baisilaeli būzwangana kīngī nasho.

2Ū wei ū ng'witūnja o ng'wa Saulo ng'wenūyo walī na bagosha babīlī batongeeji ba mabità mado mado ga bashilikale. A mina gabo, ū ūmò witanagwa Baana, ū ng'wiye Lekabu; baalī bitūnja ba ng'wa Limoni muna Beeloti munhū wa lūganda lwa Benjamini; ī Beeloti īkisaabīlagwa kū banhū ba lūganda lwa Benjamini.

3A banhū ba Beeloti bakapeelela Gitaimu, būūkabiza bikaji ba kwenūko gītī balobeji kūshisha lelo.

4(Ū ng'witūnja o ng'wa Saulo ū Yonasani, walī na ng'witūnja nemehazu ū mu magūlū, lina lyakwe walī Mefi-boshesi. Ī mhola ja ng'wa Saulo nū Yonasani aho jiliza kūfuma ī Yezileeli, ū nyanda ng'wenūyo walī na myaka ītanò. Walī na neji wakwe, ūnsola ūpeela nang'hwe wangū wangū, alīyo aho aliyangūhīlīja kūpeela, ūgwa ū nīgīnī ūlemehala ū mu magūlū.)

5Na lūūlū lūshikū lūmò a bitūnja ba ng'wa Limoni ū muna Beeloti, a ba Lekabu nū Baana, bakaja ū kū numba ya ng'wa Ishi-boshesi; būshika a ha ng'wakwe makanza ga līīmi lyasebaga, būnsanga alī mu numba wigoloolaga.

6Bingīla ū mu numba, kolobe kūja kū chūmba sha mu gatī, gītī balīkasola ngano; būshika būnchima lūshū mu nda; būnyeenyeeka a basūmba ba shikūlū na shizuna benabo, ū Lekabu nū Baana būtoloka būjimīīla.

7A ha kizīle kabo bansanga alī kū chumba shakwe sha kūlaala wigoloolaga. Aho banchima lūshū ūcha, būgūtīna ū ntwe gwakwe būja nago, būbītīla nzīla ya kwitogolo lya Alaba, būshimīza būjikū pe bagūbūūkije.

8Ū ntwe go ng'wa Ishi-boshesi būgūtwaala Hebuloni kūlī Daūdi būūkashikīla kūng'wīla ū ntemi, “Baba twakwenhela gūūyū ntwe go ng'wa Ishi-boshesi ng'witūnja o ng'wa Saulo, ūyo walī ng'wanishi wako na wakoobaga kūkwīngīja būpanga wako. Ī lelo ū SEEBA waamalīlaga shiilī ū baba būgonzo ū ntemi, ū kūlī Saulo nī shibyalīlwe shakwe.”

9Ū Daūdi ūbashokeja a ba Lekabu nū ng'wana wa ng'wawe ū Baana, a bitūnja ba ng'wa Limoni muna Beeloti; ūbawīla, “Nalīng'wilahīlīla mu lina lya ng'wa SEEBA mpanga ūyo wanipīja kūfuma mu makoye ga mbika jose; gīkī

10munhū akiza Zikilagi kūniwīla, ‘Ū Saulo wachaaga,’ kūnū akwiganikaga alīninha mhola nsoga, nakandima nūmūlaga. Ī lyenīlo hū lyūbiza inong'ho lya kūng'winha ū ng'wenūyo.

11Al'a banhū babūbi ba kūmūlaga munhū wa mhola alaalile ha būlīīlī mu kaya yakwe, natūgalomba a mininga gakwe kūfuma mu nkono gwing'we, namuyagaje ī haha yenīyī nīyīngīje ī sī ū būsoso wenūbū?”

12Hūna ū Daūdi ūbalagīla basūmba ba ha ng'wakwe būbabūlaga a banhū benabo. Būbatīna a makono nī mhambala jabo, ī mibimba yabo bīnungeleja bbihī n'ilambo lya Hebuloni. Ū ntwe go ng'wa Ishi-boshesi būgūsola būgūjīkīla Hebuloni ng'wenūmo, mu shigila sha ng'wa Abuneeli.

← Chapter 3 Jump to: Chapter 5 →