Numbers 1 — Sukuma 2019

1Aho balī ng'witogolo lya Sinai mu ng'waka gwabo gwa kabīlī kūfuma ikanza lya kwīnga Misili, lūshikū lwa kwandya ng'weji gwa kabīlī, ū SEEBA ūlūngalūnga nū Musa ng'wiheema lya kwibilingīla, ūng'wīla gīkī,

2“Babalage pye a Baisilaeli kūlenganīla nū mumo jilī ī ng'anda jabo, nī numba jabo; būlī munhū ūng'wandīke mu lina lyakwe wei ng'wenekīlī.

3Ū bebe nū Alooni mukūbabala pye a Baisilaeli a bagosha mu mabità gabo, abo bashikile kūja kū būlūgū, kwandīja ba myaka makūmi abīlī na kūja kwigūlya.

4Būlī lūganda ilonge mo ngosha ūmò wa kūmugunanha, na būlī ng'wene abize ntongeeji ū mu numba ya ng'wawe.

5A mina ga banhū abo bakūmugunanha gaya: ‘Ū mu lūganda lwa ng'wa Lubeni akūbiza Elizuli ng'wana Shedeuli.

6Ū lwa ng'wa Simioni, Shelumieli ng'wana Zulishadai;

7Ū lwa ng'wa Yuda, Nashoni ng'wana Aminadabu;

8Ū lwa ng'wa Isakaali, Netaneli ng'wana Zuali;

9Ū lwa ng'wa Zabuloni, Eliabu ng'wana Heloni;

10Ū mu bitūnja ba ng'wa Yosefu, ū kūfuma ū mu lūganda lwa ng'wa Efulaimu, Elishama ng'wana Amihudi; Ū lwa ng'wa Manase, Gamalieli ng'wana Pedazuli;

11Ū mu lūganda lwa ng'wa Benajamini, Abidani ng'wana Gidioni;

12Ū mulī Dani, Ahiezeli ng'wana Amishadai;

13Ū mulī Asheli, Pagieli ng'wana Okilani;

14Ū mulī Gadi, Eliasafu ng'wana Deūli;

15Ū mulī Nafutali, Ahila ng'wana Enani.’”

16A benaba h'abo bakasolwa kūfuma ū ng'wibità ī lyose; hū bene abo baalī batongeeji ba ng'anda ja bakūlūgenji babo, batongeeji ū mu ndūgū ja bakūlūgenji babo.

17Ū Musa nū Alooni būbasola a banhū benabo, abo mina gabo gakahayiwa.

18Hūna ū mu lūshikū lo kwandya lwenūlo ū mu ng'weji gwa kabīlī, būbitana pye a banhū bikuminga. A banhū boolechaga ī shibyalīlwe shabo mu nzīla ya ndūgū jabo, na mu kwihela kwa mina ga bakūlūgenji babo. A bagosha ba kwandīja ha myaka makūmi abīlī na kūja kū būtongi, a bene bandīkwa būlī ng'wene lina lyakwe,

19gīt'ūmo SEEBA walī wanagīīlīla ū Musa; hūna lūūlū ūbabala ū ng'witogolo lya Sinai.

20Ū kūfuma ū mu shibyalīlwe sha ng'wa Lubeni ū ng'witūnja wa kwandya kūbyalwa na Isilaeli: A bagosha pye, kwandīja a ba myaka makūmi abīlī na kūja kwigūlya, abo baalī badūgije kūja kū būlūgū bakandīkwa, būlī ng'wene lina lyakwe; kūlenganīla nī ndūgū ja bakūlūgenji babo, na a bataale ba ng'anda jabo.

21Ūbūkūmi wabo ū mu lūganda lwa ng'wa Lubeni: Baalī shihūmbī makūmi anè na shitandatū, na magana atanò.

22Ū kūfuma ū mu shibyalīlwe sha ng'wa Simioni: A bagosha pye, kwandīja a ba myaka makūmi abīlī na kūja kwigūlya, abo baalī badūgije kūja kū būlūgū bakandīkwa būlī ng'wene lina lyakwe; kūlenganīla nī numba ja bakūlūgenji babo, na a bataale ba ng'anda jabo.

23Ūbūkūmi wabo ū mu lūganda lwa ng'wa Simioni: Baalī shihūmbī makūmi atanò na kenda na magana adatū.

24Ū kūfuma ū mu shibyalīlwe sha ng'wa Gadi: A bagosha pye, kwandīja a ba myaka makūmi abīlī na kūja kwigūlya, abo baalī badūgije kūja kū būlūgū bakandīkwa būlī ng'wene lina lyakwe; kūlenganīla nī numba ja bakūlūgenji babo, na a bataale ba ng'anda jabo.

25Ūbūkūmi wabo ū mu lūganda lwa ng'wa Gadi Baalī shihūmbī makūmi anè na shitanò, na magana atandatū na makūmi atanò.

26Ū kūfuma ū mu shibyalīlwe sha ng'wa Yuda: A bagosha pye, kwandīja a ba myaka makūmi abīlī na kūja kwigūlya, abo baalī badūgije kūja kū būlūgū bakandīkwa būlī ng'wene lina lyakwe; kūlenganīla nī numba ja bakūlūgenji babo, na a bataale ba ng'anda jabo.

27Ūbūkūmi wabo ū mu lūganda lwa ng'wa Yuda: Baalī shihūmbī makūmi mpungatī na shinè, na magana atandatū.

28Ū kūfuma ū mu shibyalīlwe sha ng'wa Isakaali: A bagosha pye, kwandīja a ba myaka makūmi abīlī na kūja kwigūlya, abo baalī badūgije kūja kū būlūgū bakandīkwa būlī ng'wene lina lyakwe; kūlenganīla nī numba ja bakūlūgenji babo, na a bataale ba ng'anda jabo.

29Ūbūkūmi wabo ū mu lūganda lwa ng'wa Isakaali: Baalī shihūmbī makūmi atanò na shinè, na magana anè.

30Ū kūfuma ū mu shibyalīlwe sha ng'wa Zabuloni: A bagosha pye, kwandīja a ba myaka makūmi abīlī na kūja kwigūlya, abo baalī badūgije kūja kū būlūgū, bakandīkwa būlī ng'wene lina lyakwe; kūlenganīla nī numba ja bakūlūgenji babo, na a bataale ba ng'anda jabo.

31Ūbūkūmi wabo ū mu lūganda lwa ng'wa Zabuloni: Baalī shihūmbī makūmi atanò na mpungatī, na magana anè.

32Ū kūfuma ū mu bitūnja ba ng'wa Yosefu, ū kūfuma ū mu shibyalīlwe sha ng'wa Efulaimu: A bagosha pye, kwandīja a ba myaka makūmi abīlī na kūja kwigūlya, abo baalī badūgije kūja kū būlūgū bakandīkwa būlī ng'wene lina lyakwe; kūlenganīla nī numba ja bakūlūgenji babo, na a bataale ba ng'anda jabo.

33Ūbūkūmi wabo ū mu lūganda lwa ng'wa Efulaimu: Baalī shihūmbī makūmi anè, na magana atanò.

34Ū kūfuma ū mu shibyalīlwe sha ng'wa Manase: A bagosha pye, kwandīja a ba myaka makūmi abīlī na kūja kwigūlya, abo baalī badūgije kūja kū būlūgū bakandīkwa būlī ng'wene lina lyakwe; kūlenganīla nī numba ja bakūlūgenji babo, na a bataale ba ng'anda jabo.

35Ūbūkūmi wabo ū mu lūganda lwa ng'wa Manase: Baalī shihūmbī makūmi adatū na shibīlī, na magana abīlī.

36Ū kūfuma ū mu shibyalīlwe sha ng'wa Benjamini: A bagosha pye, kwandīja a ba myaka makūmi abīlī na kūja kwigūlya, abo baalī badūgije kūja kū būlūgū bakandīkwa būlī ng'wene lina lyakwe; kūlenganīla nī numba ja bakūlūgenji babo, na a bataale ba ng'anda jabo.

37Ūbūkūmi wabo ū mu lūganda lwa ng'wa Benjamini: Baalī shihūmbī makūmi adatū na shitanò, na magana anè.

38Ū kūfuma ū mu shibyalīlwe sha ng'wa Dani: A bagosha pye, kwandīja a ba myaka makūmi abīlī na kūja kwigūlya, abo baalī badūgije kūja kū būlūgū bakandīkwa būlī ng'wene lina lyakwe; kūlenganīla nī numba ja bakūlūgenji babo, na a bataale ba ng'anda jabo.

39Ūbūkūmi wabo ū mu lūganda lwa ng'wa Dani: Baalī shihūmbī makūmi atandatū na shibīlī, na magana mpungatī.

40Ū kūfuma ū mu shibyalīlwe sha ng'wa Asheli: A bagosha pye, kwandīja a ba myaka makūmi abīlī na kūja kwigūlya, abo baalī badūgije kūja kū būlūgū bakandīkwa būlī ng'wene lina lyakwe; kūlenganīla nī numba ja bakūlūgenji babo, na a bataale ba ng'anda jabo.

41Ūbūkūmi wabo ū mu lūganda lwa ng'wa Asheli: Baalī shihūmbī makūmi anè na shimò, na magana atanò.

42Ū kūfuma ū mu shibyalīlwe sha ng'wa Nafutali: A bagosha pye, kwandīja a ba myaka makūmi abīlī na kūja kwigūlya, abo baalī badūgije kūja kū būlūgū bakandīkwa būlī ng'wene lina lyakwe; kūlenganīla nī numba ja bakūlūgenji babo, na a bataale ba ng'anda jabo.

43Ūbūkūmi wabo ū mu lūganda lwa ng'wa Nafutali: Baalī shihūmbī makūmi atanò na shidatū, na magana anè.

44A benaba h'a bagosha abo bakabalwa na Musa na Alooni, hamò na batongeeji Ikūmi na babīlī ba Baisilaeli, būlī ng'wene kūfuma mu lūganda lwakwe.

45Pye a Baisilaeli: Kwandīja ba myaka makūmi abīlī na kūja kwigūlya, abo baalī badūgije kūlwa būlūgū bakabalwa, būlī ng'wene mu lūganda lo ng'wawe.

46Ūbūkūmi wabo abose būkashika shihūmbī magana atandatū na shidatū, na magana atanò na makūmi atanò.

47Gwike ī numba ja Balawī jitabalilwe aho balībalwa a bangī.

48Nguno ū SEEBA walī wang'wīla ū Musa gīkī,

49“Yaya ū kūbabala a ba numba ya ng'wa Lawī, nūūlū kūbasangīja ū mu kūbalwa kwa Baisilaeli a bangī.

50Alīyo a Balawī batūūlage ha nīmo gwa kūlīlang'hana ī liheema, īlo līlī wikalo w'isandīko lya būkaanīji; bayūshilang'hana pyī ī shiseme shalyo, nī shikolo shaamo ī shingī. A benabo bakūyūlībūūcha ī liheema, nī shiseme shalyo pyī ī shose; a boi hū bakūbiza balang'hani baalyo, nī ng'hambī jabo bakūjiyūtūūla kūlīpīndīlīja.

51Būl'ikanza ūlū līlīsaamiwa ī liheema, a Balawī hū a babūūcha baalyo, nūūlū līlīīmīlīchiwa, a benabo hū bene a ba kūlyīmīlīcha. Ūngī ose ose ūyo wegeela ho akūbūlagwa.

52A Baisilaeli bakūyūjitūūla ī ng'hambī jabo kūkūūbīlīja ng'anda jabo. Būlī bene na ng'hambī yabo, na lūbembeela lwabo.

53Alīyo a Balawī a bene bakūyūtūūla ī ng'hambī jabo kūlīpīndīlīja ī liheema, īlo līlī wikalo wa isandīko lya būkaanīji. Ū mu kwīta gīko, ī libita lya Baisilaeli lītūgwīlwa nsango. A Balawī hū bene abo bakūbiza balang'hani b'iheema, īlo līlī wikalo w'isandīko lya būkaanīji.”

54A Baisilaeli bakīīta pyī ī yose gīt'ūmo SEEBA walī wanagīīla Musa.