Numbers 29

Sukuma 2019

← Chapter 28 Jump to: Chapter 30 →

1Ū mu lūshikū lwa kwandya mu ng'weji gwa mpungatī, bizagi na kwibilinga kwela, nī milīmo ying'we ī ya būlī lūshikū yaya ū kūtūmama. Ū lūshikū lwenūlo lūlī lwing'we lwa kūfuula mhembe.

2Mukūfunya nzagamba īmò songi, na ng'ondi nhaale īmò, hamò na ng'ondi songi mpungatī jitī na shilingo, būlī yene ya ng'waka gūmò; jibize shitambò sha kūpemva kūlwa kwenha ng'waso gwawiza kūlī SEEBA.

3Ī nzagamba mukwīfunya hamò na kilo idatū ja shakwinha sha būsu būnogu būsangije maguta; ī ng'ondi ī nhaale hamò na kilo ibīlī.

4Ī ng'ondi ī songi ījo mpungatī būlī yene īkūfunyiwa hamò na kilo īmò.

5Mukūfunya na ngulyati ya mbūli kūbiza shitambò sha būkenaagūji, kūbeja isangī kūlwa nguno ying'we.

6Ī shitambò shenīshi shikūfunyiwa hamò nī shakwinha sha kūpemva īsho shihelilwe kūfunyiwa būlī ng'weji na būlī lūshikū, nī shakwinha shaho ī sha būsu, nī sha kūng'wiwa, gīt'ūmo īhelelilwe. Ī shoi shilī shitambò sha kūpemva kūlwa kwenha ng'waso gwawiza kūlī SEEBA.

7Nū mu lūshikū lw'ikūmi ū ng'weji gwa mpungatī gwenūyo, mukūbiza na kwibilinga kwela. Ū mu lūshikū lwenūūlo mukwilecha ī shawiza ī sha kūyeja mīlī, nī milīmo ying'we ī ya būlī lūshikū yaya ū kūtūmama.

8Mukūfunya nzagamba īmò songi, na ng'ondi nhaale īmò, hamò na ng'ondi songi mpungatī jitī na shilingo, būlī yene ya ng'waka gūmò; jibize shitambò sha kūpemva kūlwa kwenha ng'waso gwawiza kūlī SEEBA.

9Ī nzagamba mukwīfunya hamò na kilo idatū ja shakwinha sha būsu būnogu, būsangije maguta; ī ng'ondi ī nhaale hamò na kilo ibīlī.

10Ī ng'ondi ī songi īji mpungatī, būlī yene mukwīfunya hamò na kilo īmò.

11Mukūfunya na ngulyati ya mbūli ya shitambò sha būkenaagūji, kūbeeja isangī kūlwa nguno ying'we; īkūfunyiwa hamò nī shitambò sha būkenaagūji īsho shikafunyiagwa kūlwa kūbeja isangī, nī shitambò sha kūpemva īsho shikafunyiagwa būlī lūshikū, hamò nī shakwinha sha būsu, nī sha kūng'wiwa īsho shikafunyiagwa ū ng'wikanza lyenīlo.

12Ū mu lūshikū lw'ikūmi n'itanò ū ng'weji gwenūyo, mukūbiza na kwibilinga kwela, nī milīmo ying'we ī ya būlī lūshikū yaya ū kūtūmama. Mukūbiza na shigukulu sha shikū mpungatī kū būtongi bo ng'wa SEEBA.

13Ū SEEBA mukūng'wenhela shitambò sha kūpemva, kūlwa kwenha ng'waso gwawiza. Ī shitambò sha kūpemva shing'we shikūbiza sha nzagamba songi ikūmi na idatū, na ng'ondi nhaale ibīlī, hamò na ng'ondi songi ikūmi n'inè jitī na shilingo, būlī yene ya ng'waka gūmò.

14Ī nzagamba ī jose ījo ikūmi na idatū, būlī yenī mukwīfunya hamò na kilo idatū ja shakwinha sha būsu būnogu, būsangije maguta; ī ng'ondi ī nhaale būlī yene īfunyiwe hamò na kilo ibīlī.

15Ī ng'ondi ī songi ījo mpungatī, būlī yene hamò na kilo īmò.

16Mukūfunya na ngulyati ya mbūli ya shitambò sha būkenaagūji; īkūfunyiwa hamò nī shitambò sha kūpemva īsho shikafunyiagwa būlī lūshikū, hamò nī shakwinha sha būsu, nī sha kūng'wiwa īsho shikafunyiagwa ū ng'wikanza lyenīlo.

17Ū mu lūshikū lwa kabīlī ū ng'wikanza lyenīlo, mukūfunya nzagamba songi ikūmi n'ibīlī, ng'ondi nhaale ibīlī, hamò na ng'ondi songi ikūmi n'inè jitī na shilingo, būlī yene ya ng'waka gūmò.

18Ī nzagamba ī jose, nī ng'ondi ī nhaale, nī ng'ondi ī songi; būlī yene mukwīfunya hamò nī shakwinha sha būsu, nī sha kūng'wiwa; gīītī mo buli ūbūkūmi wajo.

19Mukūfunya na ngulyati ya mbūli ya shitambò sha būkenaagūji; īkūfunyiwa hamò nī shitambò sha kūpemva īsho shikafunyiagwa būlī lūshikū, hamò nī shakwinha sha būsu, nī sha kūng'wiwa īsho shikafunyiagwa ū ng'wikanza lyenīlo.

20Ū mu lūshikū lwa kadatū ū ng'wikanza lyenīlo, mukūfunya nzagamba songi ikūmi n'īmò, na ng'ondi nhaale ibīlī, hamò na ng'ondi songi ikūmi n'inè jitī na shilingo, būlī yene ya ng'waka gūmò.

21Ī nzagamba ī jose, nī ng'ondi ī nhaale, nī ng'ondi ī songi; būlī yene mukwīfunya hamò nī shakwinha sha būsu, nī sha kūng'wiwa;gīītī mo buli ūbūkūmi wajo

22Mukūfunya na ngulyati ya mbūli ya shitambò sha būkenaagūji; īkūfunyiwa hamò nī shitambò sha kūpemva īsho shikafunyiagwa būlī lūshikū, hamò nī shakwinha sha būsu, nī sha kūng'wiwa īsho shikafunyiagwa ū ng'wikanza lyenīlo.

23Ū mu lūshikū lwa kanè ū ng'wikanza lyenīlo, mukūfunya nzagamba songi ikūmi, na ng'ondi nhaale ibīlī, hamò na ng'ondi songi ikūmi n'inè jitī na shilingo, būlī yene ya ng'waka gūmò.

24Ī nzagamba ī jose, nī ng'ondi ī nhaale, nī ng'ondi ī songi; būlī yene mukwīfunya hamò nī shakwinha sha būsu, nī sha kūng'wiwa, gīītī mo buli ūbūkūmi wajo.

25Mukūfunya na ngulyati ya mbūli ya shitambò sha būkenaagūji; īkūfunyiwa hamò nī shitambò sha kūpemva īsho shikafunyiagwa būlī lūshikū, hamò nī shakwinha sha būsu, nī sha kūng'wiwa īsho shikafunyiagwa ū ng'wikanza lyenīlo.

26Ū mu lūshikū lwa katanò ū ng'wikanza lyenīlo, mukūfunya nzagamba songi kenda, na ng'ondi nhaale ibīlī, hamò na ng'ondi songi ikūmi n'inè jitī na shilingo, būlī yene ya ng'waka gūmò.

27Ī nzagamba ī jose, nī ng'ondi ī nhaale, nī ng'ondi ī songi, būlī yene mukwīfunya hamò nī shakwinha sha būsu, nī sha kūng'wiwa;gīītī mo buli ūbūkūmi wajo.

28Mukūfunya na ngulyati ya mbūli ya shitambò sha būkenaagūji; īkūfunyiwa hamò nī shitambò sha kūpemva īsho shikafunyiagwa būlī lūshikū, hamò nī shakwinha sha būsu, nī sha kūng'wiwa īsho shikafunyiagwa ū ng'wikanza lyenīlo.

29Ū mu lūshikū lwa katandatū ū ng'wikanza lyenīlo, mukūfunya nzagamba songi inaane, na ng'ondi nhaale ibīlī, hamò na ng'ondi songi ikūmi n'inè jitī na shilingo, būlī yene ya ng'waka gūmò.

30Ī nzagamba ī jose, nī ng'ondi ī nhaale, nī ng'ondi ī songi, būlī yene mukwīfunya hamò nī shakwinha sha būsu, nī sha kūng'wiwa; gīītī mo buli ūbūkūmi wajo.

31Mukūfunya na ngulyati ya mbūli ya shitambò sha būkenaagūji; īkūfunyiwa hamò nī shitambò sha kūpemva īsho shikafunyiagwa būlī lūshikū, hamò nī shakwinha sha būsu, nī sha kūng'wiwa īsho shikafunyiagwa ū ng'wikanza lyenīlo.

32Ū mu lūshikū lwa mpungatī ū ng'wikanza lyenīlo, mukūfunya nzagamba songi mpungatī, na ng'ondi nhaale ibīlī, hamò na ng'ondi songi ikūmi n'inè jitī na shilingo, būlī yene ya ng'waka gūmò.

33Ī nzagamba ī jose, nī ng'ondi ī nhaale, nī ng'ondi ī songi, būlī yene mukwīfunya hamò nī shakwinha sha būsu, nī sha kūng'wiwa; gīītī mo buli ūbūkūmi wajo.

34Mukūfunya na ngulyati ya mbūli ya shitambò sha būkenaagūji; īkūfunyiwa hamò nī shitambò sha kūpemva īsho shikafunyiagwa būlī lūshikū, hamò nī shakwinha sha būsu, nī sha kūng'wiwa īsho shikafunyiagwa ū ng'wikanza lyenīlo.

35Ū mu lūshikū lwa kanaane mukūbiza na kwibilinga kwela, hama yaya ū kūtūmama ī milimo īyo mukatūmamaga na kale.

36Mukūfunya shitambò sha kūpemva kūlwa kwenha ng'waso gwawiza kūlī SEEBA, nzagamba īmò, ng'ondi nhaale īmò, na ng'ondi songi mpungatī jitī na shilingo, būlī yene ya ng'waka gūmò.

37Ī nzagamba nī ng'ondi ī nhaale, nī ng'ondi ī songi, būlī yene mukwīfunya hamò nī shakwinha sha būsu, nī sha kūng'wiwa;gīītī mo buli ūbūkūmi wajo.

38Mukūfunya na ngulyati ya mbūli ya shitambò sha būkenaagūji; īkūfunyiwa hamò nī shitambò sha kūpemva īsho shikafunyiagwa būlī lūshikū, hamò nī shakwinha sha būsu, nī sha kūng'wiwa īsho shikafunyiagwa ū ng'wikanza lyenīlo.

39Ī shakwinha īsho shikafunyiagwa kūlwa kūlahīla nī sha wiyaabī, shiigeleelilwe kūfunyiwa. Alīyo ū mu shikū ja shigukulu shing'we īsho muhelelilwe, mukūmfunīja ū SEEBA nī shakwinha īshi, shitambò sha kūpemva, shakwinha sha būsu, shakwinha sha kūng'wiwa, nī shitambò sha būsangī.

40Ū Musa ūbawīla a Baisilaeli pyī īyo SEEBA akanagīīla.

← Chapter 28 Jump to: Chapter 30 →