bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Sukuma
/
Sukuma 2019
/
Numbers 31
Numbers 31
Sukuma 2019
← Chapter 30
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 32 →
1
Ū SEEBA ūng'wīla ū Musa gīkī,
2
“A Bamidiani ūkūbamalīla shiilī kūlwa nguno ya Baisilaeli, hanuma ya henaho ūkūtwalwa kū banhū bako.”
3
Na lūūlū ū Musa ūbawīla a banhū, “Bamò bing'we zwalīlagi shilanga muje kū būlūgū, kwilwisha na Bamidiani; mukabamalīle shiilī kūlwa ng'wa SEEBA.
4
Tūmagi banhū shihūmbī shimò kūfuma mu būlī lūganda lwa Baisilaeli.”
5
Būūsolwa banhū shihūmbī ikūmi na shibīlī kūūfuma ū mu shihūmbī shose ī sha Baisilaeli; banhū shihūmbī shimò būbūūcha shilanga kūfuma mu būlī lūganda.
6
Ū Musa ūbatūma a banhū benabo, abo shihūmbī shimò kūfuma mu būlī lūganda; būja ū kū būlūgū hamò nū Finehasi, ū ng'witūnja wa ngabīji Elieza. Ū wei akasola na shikolo shimò na shimò sha ng'wipandī lyeela, hamò na mhembe ja kūfuula ū kū būlūgū.
7
Bakalwa na a Bamidiani, gīt'ūmo SEEBA walī wanagīīlīla ū Musa; būbabūlaga pye a bagosha.
8
Ū mu banhū abo bakababūlaga, baalīmo na batemi batanò ba Midiani, ba Evi, Lekemu, Huuli na Leba. Nū Balaamu ū ng'witūnja o ng'wa Beoli būmūlaga bo līlūshū.
9
A Baisilaeli būbasola a bakīīma ba Bamidiani na a bana, būbīīta kūbiza ding'wa jabo; na a madaale ga ng'ombe na a ga ng'holo būkuminga, pye būjana; hamò nī shikolo ī shingī īsho bakashibona.
10
Bīīpemba moto pyī ī mizengo ya Bamidiani nī ng'hambī jabo.
11
Būūtwala kaya pyī ī shikolo īsho bakashisola, nī mitugo; hamò na a banhū abo bakabadima.
12
Ī shikolo īsho bakashisola shenīsho, na a banhū abo bakabadima aho bapyena ū mu būlūgū, bakeenha kūlī Musa na ngabīji Elieza, na a Baisilaeli a bangī pye a bose. Baalī kū ng'hambī mu mbūga ya Moabu, hihī na mongo gwa Yolodani; h'ūko baalī bapangile bilola na nzengo gwa Yeliko, gwalī ū kū nkīlo gwa mongo.
13
Ū Musa nū Elieza, na a batongeeji ba banhū būja kūbasūng'wanha hanze ya ng'hambī.
14
Gwike aho bashoka ū kūfuma ū ka būlūgū, ū Musa akabapelanīla no a batongeeji; abo baalī bataale ba mabità ga bashilikale shihūmbī shihūmbī, na a ba mabità ga bashilikale igana igana.
15
Ūbabūūja, “Ni kinehe ng'wabalekaga pye a bakīma bikale bapanga?
16
Nguno a benaba hū bene abo Balaamu akabanga masala gabūbi ga kūbaduta Baisilaeli; kūshisha bingī būngomela SEEBA gīt'ūmo ng'wīmanīlile ī mihayo ya Peoli, aho banhū ba ng'wa SEEBA bakamalwa ikūla!
17
Na lūūlū babūlagagi pye a bayanda, na a bakīma abo baamala kūsanja na bagosha.
18
A banhya abo bataalī kūsanja na bagosha a bene balekeelagi babize bing'we.
19
Gwike pye abo ng'wabūlagile banhū, nūūlū kūkuumya mimba gose gose, shiigelile ng'wikale hanze ya ng'hambī ikanza lya shikū mpungatī. Ū mu lūshikū lwa kadatū nū lwa mpungatī mukwiyeeja a bing'we na a babo ng'wabadimile kūfuma kū būlūgū.
20
Ī shizwalo shing'we ī shose sheejagi, nī shikolo pyī ī sha kūbeeji kūfuma mu ndīlī, nī sha booya wa mbūli, nī sha mantī.”
21
Hūna ū Elieza ūyomba nabo a bashilikale abo baalī baja kū būlūgū; ūbawīa, Ī shilagīlo īsho SEEBA wang'winha Musa shihayile gīkī,
22
“Ī zahabu, feza, shaba, chūūma, shisīnza, na chūūma sha masaasī,
23
nī shingī pyī īsho shitūdūla kūjiga mu moto, shiigelile sheejiwe mu nzīla ya kūbītiwa mu moto. Alīyo na a minzī a ga kweegeja shiigelile gatūmamīlwe ū kūsheeja. Na būlī shikolo īsho shidūgije kūpya moto shikwejiwa na minzī genayo.
24
Ū mu lūshikū lwa mpungatī mukūfula ī shizwalo shing'we hū ng'ūbiza ng'wela. Ī likanza lyenīlo hū mudūgije ū kūshikīīla ū mu ng'hambī.”
25
Ū SEEBA ūng'wīla ū Musa gīkī,
26
“Ū bebe nū Elieza, hamò na a bataale ba numba ja bakūlūgenji babo, babalagi pye a banhū abo benhilwe kūfuma kū būlūgū, nī mitugo ī nding'wa ījo jenhilwe.
27
Ī nding'wa jigabanhyage pyī ī jose; a bashilikale abo baalī baajile ū kūbūlūgū bapandīke, na a banhū a bangī a bose.
28
Ū kūfuma ū mu sabo jenījo, mukūtīna ibudīka kūlwa nguno ya ng'wa SEEBA; ū mu shikolo īsho shilaaje kū bashilikale, mukūyūsolooja shikolo magana atanò, ng'wīnja mo shikolo shimò. Mukwīta gīko ū kū banhū abo benhilwe, nī ng'ombe, nzobe, ng'holo, pye nī mbūli.
29
Īsho mulasole kūfuma ū kwibudīka lya kūja kū bashilikale, mukūshitūūla mu nkono gwa ngabīji Elieza, kūbiza shakwinha kūlī SEEBA.
30
Ū kūfuma ū ng'wibudīka īlo līlīībagwīla Baisilaeli a bangī, mukūyūsolooja shikolo makūmi atanò, ng'wīnja mo shikolo shimò. Mukwīta gīko ū kū banhū abo benhilwe, nī ng'ombe, nzobe, ng'holo, pye nī mbūli; nūūlū shingī shose shose īsho shenhilwe kūfuma kū būlūgū. Ī shenīsho mukūbinha Balawī, abo bakalang'hanaga ipandī lya kwikala lya ng'wa SEEBA.”
31
Na ng'hana ū Musa nū Elieza ū ngabīji bīīta gīt'ūmo SEEBA akanagīīlīlī ū Musa.
32
Ū mu shose īsho shalī sheenhwa kūfuma kū būlūgū, ī libūdīka lya kwanukūla bashilikale lyalī, ng'holo shihūmbī magana atandatū na makūmi mpungatī na shitanò.
33
Ī ng'ombe shihūmbī makūmi mpungatī na shibīlī;
34
Ī nzobe shihūmbī makūmi atandatū na shimò.
35
A bakīma abo baalī bataalī kūsanja na bagosha baalī shihūmbī makūmi adatū na shibīlī.
36
Ī nusu y'ibudīka lya kwanukūla bashilikale līkabiza, ng'holo shihūmbī magana adatū na makūmi adatū na mpungatī, na magana atanò.
37
Ī shakwinha sha kūja kūlī SEEBA jūbiza ng'holo magana atandatū na makūmi mpungatī n'itanò.
38
Ī ng'ombe jalī shihūmbī makūmi adatū na shitandatū; ī shakwinha sha kūja kūlī SEEBA jūbiza ng'ombe makūmi mpungatī n'ibīlī.
39
Ī nzobe jalī shihūmbī makūmi adatū na magana atanò, ī shakwinha sha kūja kūlī SEEBA jūbiza nzobe makūmi atandatū n'īmò.
40
A banhū bakabiza shihūmbī ikūmi na shitandatū, a ba kūja kūlī SEEBA būbiza makūmi adatū na babīlī.
41
Ū Musa ūng'winha Elieza ī shakwinha shenīsho, gīt'ūmo SEEBA walī wanagīīlīla, gīkī ī lyenīlo līkūbiza ibudīka lya ng'wa SEEBA.
42
Ī libudīka īlo Musa akalīlekanya nī lya bashilikale, ūlīsunda ha mhelo gīkī lībize lya Baisilaeli,
43
Ī nusu īyo īkabagwīla a banhū a bose, jalī ng'holo shihūmbī magana adatū na makūmi adatū na mpungatī, na magana atanò.
44
Ī ng'ombe jalī shihūmbī makūmi adatū na shitandatū.
45
Ī nzobe jalī shihūmbī makūmi adatū na magana atanò.
46
A banhū bakabiza shihūmbī ikūmi na shitandatū.
47
Ū kūfuma ū mu nusu ya kūja kū banhū, ū Musa akasola munhū ūmò kūfuma mu būlī makūmi atanò, na ntugo gūmò kūfuma mu būlī mitugo makūmi atanò, gīt'ūmo SEEBA walī wanagīīlīla. Ī shenīsho akabinha Balawī abo bakatūmamaga na kūlīlang'hana ī lipandī lya kwikala lya ng'wa SEEBA.
48
Hūna a batongeeji ba bashilikale, abo baalī bataale ba mabità ga bashilikale shihūmbī shihūmbī, na a ba mabità ga bashilikale igana igana, būja ū kūlī Musa;
49
būng'wīla, “A bise batūmami bako twahayū babala a bashilikale abo balī ha sīlīlī ya būlang'hani wise tūūbona gīkī atajimīīlile nūūlū ūmò.
50
Na lūūlū ī shikolo sha zahabu īsho būlī ūmò wise wapandīkile, twasheenha shibize shakwinha kūlī SEEBA, kūtūūla isangī kūlwa nguno yise; tūli na bangili ja mu nkono, matendele ga mu nkono, sīīlī ja kū nzwala, sīīlī ja kū matū, na migufu ya mu nhingo.”
51
Ū Musa nū ngabīji Elieza būjanukūla ī zahabu jenījo, ījo jalī jabeejiwa ī shikolo shenīsho kūfuma ū kū banhū benabo.
52
Ī Zahabu ī yose kūfuma ū kū bataale ba mabità ga bashilikale shihūmbī shihūmbī, na a ba mabità ga bashilikale igana igana, īyo Musa na Elieza bakītūūla kūlī SEEBA kūbiza shakwinha, yalī na būdito wa kūkīla ha kilo igana na makūmi anaane.
53
A bashilikale benabo baalī baashisola ī shikolo shenīsho aho baatinda ū būlūgū; yalī sabo yabo gete.
54
Alīyo ū Musa nū Elieza būshanukūla ī shikolo shenīsho ū kūfuma ū kū batongeeji benabo, a bataale ba mabità ga bashilikale shihūmbī shihūmbī, na a ba mabità ga bashilikale igana igana, būshenha ū ng'wiheema lya kwibilingīla, būshitūūla ng'wenūmo, kūbiza shizūkījo kūlwa Baisilaeli kū būtongi bo ng'wa SEEBA.
← Chapter 30
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 32 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36