bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Sukuma
/
Sukuma 2019
/
Numbers 16
Numbers 16
Sukuma 2019
← Chapter 15
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 17 →
1
Mu shikū jenījo Koola ng'witūnja o ng'wa Iziha, wa mu kaya ya ng'wa Kohati, lūganda lo Lawī, ūdimana na banhū balebe ba numba ya ng'wa Lubeni, ba Dasani na Abilamu bitūnja ba ng'wa Eliabu; na Oni ng'witūnja o ng'wa Peleti.
2
A banhū benabo bitūla shikuba kwilwisha nū Musa; baalī hamò na Baisiaeli bangī magana abīlī na makūmi atanò, abo baalī bakumūkile, nīyo nabo baalī bamò ba bataale ba ng'wibanza īlo lyalī lyasolwa.
3
A banhū benabo bakikuminga ibità būnsanga ū Musa nū Alooni kūbahoogagūja mihayo balīhaya, “Ng'wajile no ning'we; a banhū a bose aba balī beela, pye a bose ūmo bagelelile, nū SEEBA alī hamò nabo. Hama nibūla a bing'we mukwigūngūhyaga gīko, na kwitūūla kūbiza bataale baalyo pyī ī libità lya ng'wa SEEBA?”
4
Ū Musa aho wīyigwa ī yenīyo ūgwa hasī achimīgije ū būshū.
5
Hūna ūng'wīla ū Koola na a biye, “Ī ntondo ī dilū ū SEEBA akoolecha hape nani ūyo alī wakwe, na nani ūyo alī ng'wela. Ū munhū ng'wenūyo h'ūyo akūng'weegeleja kūlī we; hū ng'wene ūyo akūnsola ang'wītane wegeele kūlī we.
6
Na lūūlū ū bebe Koola na a banwani biyo ītagi gūūyū mhayo, solagi mazuukījo ga būbbani,
7
hūna ī ntondo mutūūle mo moto na būbbani, muzuukīje kū būtongi bo ng'wa SEEBA. Ū munhū ūyo SEEBA alansole hū ng'wene ūyo akūbiza ng'wela. A bing'we bitūnja ba ng'wa Lawī, ū widūndūgaja wing'we bookīlanījaga!”
8
Ū Musa ūng'wīla ū Koola na, “Alilūūlū bitūnja ba ng'wa Lawī, degelekagi.
9
A bing'we, mutaalī dūhū ū kūfula nūūlū mulībona gīkī ū Mulungu wa Baisilaeli wamukomanya kwīnga ū ng'wibità lya Baisilaeli, ūng'wegeleja hihī nang'hwe, gīkī muyūbeeja nīmo mu numba ya ng'wa SEEBA, na kwīmīīla kū būtongi wa banhū bose na kūtūmama milīmo ya kūbagunanha?
10
A bing'we hamò na a Balawī biching'wi, ū Seba ang'wegelegije mung'wegeele; ī haha mulīhaya kūgūgwīlīīla nū nīmo gwa būgabīji!
11
Ū bebe na a balondeeji bako pye a bose ng'walyaga gwīnda ya kwilwisha na SEEBA. Ū Alooni nani, nose mundugumīle?”
12
Hanuma ya henaho ū Musa ūbitana a ba Dasani nū Abilamu, a bitūnja ba ng'wa Eliabu; alīyo būlema balīhaya, “Yaya a bise ū kwiza ū kwenūko!
13
Ū bebe ūkatwīnja Misili ū kū sī ya būhondo, ūtwenha kwitogolo kūūnū kwiza kūtūmala; gashi ūtaalī dūhū ū kwigeja, nose ī haha ūtogilwe na kūtūsuga?
14
A higūlya ya yose yenīyo, ū kū sī ya būhondo ūtaalī kūtūshisha, nū gwa kūtwinha malaale ga wingīji wise nago gwakūlemeelile, ndūhū dūhū nūūlū migūnda ya mizabibu. Ū bebe ūlītogwa kūgabbokuja a miso ga banhū benaba; yaya a bise ūkwiza ū kwenūko!”
15
A henaho ū Musa ūpelana no, ūng'wīla ū SEEBA, “Ūtizūshanukūla ī shakwinha shabo; ū nene nataalī kūdaatya nūūlū nzobe ya munhū ose ose, nūūlū kūnkenya munhū mubo nataalī gete.”
16
Hūna ū Musa ūng'wīla ū Koola, “Ī ntondo nzūgū na a balondeeji bako; ū bebe na a boi hamò nū Alooni mulize kwiyoolecha kū būtongi bo ng'wa SEEBA.
17
Būlī munhū wize n'izuukījo lya būbbani, mutūūle mo nū būbbani, ng'wize nago kū būtongi bo ng'wa SEEBA; a gose gabize mazuukījo magana abīlī na makūmi atanò.”
18
Na ng'hana būsola, būlī ng'wene izuukījo lyakwe lya būbbani, būtūūla mo nū būbbani, hūna bīmīīla a ha nyango gwa kwingīla ng'wiheema, nū Musa ūbiza ho hamò nū Alooni.
19
Ū Koola walī wabakuminga ha nyango gwiheema pye a balondeeji bakwe, kwiza kūbalemeja ī yabo a ba Musa nū Alooni. Alīyo kwimanīla ī likūjo lya ng'wa SEEBA lyiyoolecha ū kū banhū pye a bose.
20
Ū SEEBA ūng'wīla ū Musa nū Alooni gīkī,
21
“Ikomanyagi a bing'we ng'wīnge ū ng'wibità lyenīlī, nabamale pyī ī haha yenīyī.”
22
Alīyo a ba Musa nū Alooni būgwa bachimīgije hasī ū būshū wabo būlīla balīhaya, “Mulungu bebe ūyo ūlī Mulungu wa myoyo ya banhū bose, ūkūlīpelanīla pyī ī libità alīyo ū nkenaagūji alī ūmò dūhū?”
23
Hūna ū SEEBA ūng'wīla ū Musa,
24
“Bawīlage a banhū gīkī, ‘Gasegenelagi a maheema ga ba Koola nū Dasani nū Abilamu.’”
25
Hūna ū Musa ūbūūka, ūja aho walī Dasani na Abilamu, na a banamhala ba Baisilaeli būnondeela.
26
Ūbahūgūla a banhū alīhaya, “Īngagi mugasegenele a maheema ga banhū benaba, nguno babūbi no; yaya nūūlū kūkuumya shikolo shabo shose shose, mutizūjaananījiwa mu būkenaagūji wabo.”
27
Na ng'hana būgasegenela a maheema ga ba Koola, Dasani, nū Abilamu; ū Dasani nu Abilamu baalī baafuma ū mu maheema gabo, bīīmīīla ha milyango hamò na a bake babo na a bitūnja babo, pye na a banīgīnī a bado bado.
28
Hūna ū Musa ūhaya, “Ū mhayo ūyū hū gūkūng'olekeja gīkī ū SEEBA hū ng'wene ūyo anitūmile ū kwīta pyī ī yenīyī, mukūdeeba gīkī ī lyenīlī lītī iganiko lyane lya ng'wenekīlī.
29
A banhū benaba ūlū balache lūfu ūlo banhū bose bakachaaga, bagwīlwe mhayo gītī īyo īkabagwīlaga banhū bose dūhū, numho ū SEEBA atanitūmile.
30
Alīyo ū SEEBA ūlū alenhe shikolo shingī nasho gete, īsho shitaalī kwilonga na ikanza līngī hangī, ī sī yūkundūka na kūbamila, nī shose īsho balī nasho, būbiza baajīīkwa mu shigila balī bapanga gīko, a henaho hū mukūdeeba gīkī a banhū benaba bandalahaga ū SEEBA.”
31
Aho wakalīcha dūhū ū kūhaya ī yenīyo, haho na haho ī sī yūlekaana aho baalī bīmīīla,
32
yūkundūka yūbamila nī kaya jabo, pye nū Koola na a banhū bakwe, nī sabo jabo jose.
33
Bika mu shigila bataalī bapanga gīko, pye nī shikolo shabo ī shose; ī sī yilugala na kwilugala; būbiza bayagaala, bīnga ū ng'wibità lya banhū.
34
Aho balīīlīla, pye a Baisilaeli abo baalī bbihī nabo būpeela balīīlīla bakūhayaga, “Na a bise īkūtūmila ī sī!”
35
Na moto gwika kūfuma kūlī SEEBA gūūbayagaja abo magana abīlī na makūmi atanò abo baazuukījaga būbbani.
36
Ū SEEBA ūng'wīla ū Musa gīkī,
37
“Ng'wīlage ū Elieza ū ng'witūnja wa ngabīji Alooni agīnje a mazuukījo ga būbbani ū mu moto ūyo gūlīzuukīīla, na a makala agasalang'hanye gasambaale. Nguno a mazuukījo ga būbbani genayo gabizaga meela,
38
ayo baalī nago a banhū abo bīītaga mihayo ya kūbakenaagūja būpanga wabo boi benekīlī. A mazuukījo ga būbbani genayo gapondagūlage ūgasule ūbeeje ibbaadi lya kūkundīkīja ha ng'walīlo. A genayo galī meela nguno gaalī gafunyiagwa kūlī SEEBA; na lūūlū gakūbiza lūmeeng'ho ū kū Baisilaeli.”
39
Na ng'hana ū Elieza ūgakuminga a mazuukījo ga būbbani ga shaba ayo baalī baagenha abo bakapya moto būcha; gūpondagūlwa, lyūbeejiwa ikundīkījo lya ha ng'walīlo,
40
gīt'ūmo SEEBA walī wanagīīlīīla ū Elieza mu nzīla ya ng'wa Musa. Ū mhayo gwenūyū gwalī gwa kūbizūkīja gīkī atīho ūngī ū wa kwegeela kūzuukīja būbbani kū būtongi bo ng'wa SEEBA, ūlū atī wa shibyalīlwe sha ng'wa Alooni; ūlū wīta gīko akūng'wikola Koola na balondeeji bakwe.
41
A ha ntodo yaho ī libità lya Baisilaeli lyūbadugumīla a ba Musa nū Alooni līlīhaya, “A bing'we ng'wababūlagile a banhū ba ng'wa SEEBA!”
42
Alīyo a banhū abo baalī ng'wibità īlo lyalī libilinga kwiza kūbalemeja ī yabo a ba Musa nū Alooni, aho balola ū kwiheema lya kwibilingīla, būlībona ī lilunde lyalīkundīkīja ī liheema, nī likūjo lya ng'wa SEEBA lilonga ho.
43
Hūna a ba Musa nū Alooni beegeela a ha būtongi wiheema lya kwibilingīla.
44
Ū SEEBA ūng'wīla ū Musa gīkī,
45
“Īngagi a bing'we ū ng'wibità lyenīlī nalīyagaje ī haha īyī.” Būūgwa hangī bachimīgije hasī ū būshū.
46
Ī likanza lyenīlo ū Musa ūng'wīla ū Alooni, “Solaga wangū ī lizuukījo lyako lya būbbani, ūtūūle mo būbbani na moto gwa kūfuma ha ng'walīlo, ūpeele ū kū banhū ūkababeegeje isangī; lyandyaga ikūla nguno wikaga būpelanu kūfuma kūlī SEEBA.”
47
Ng'hana ū Alooni wīta ūmo akawīlīlwa na Musa, ūspeela ajile ū kū banhū ūkiguulanya mu gatī gatī yabo. Ī likūla lyalī lyamala kwandya, alīyo ū Alooni ūpemba ū būbbani ūbīītīla isangī;
48
wīmīīla a ha gatī ya babo baalī baamala kūcha na a bapanga, ī likūla lyooya.
49
Alīyo a banhū abo bakacha kūlwa nguno y'ikūla bakashika shihūmbī ikūmi na shinè na magana mpungatī, kūleka abo baalī baacha kūlwa nguno ya ng'wa Koola.
50
Aho lyooya ī likūla, ū Alooni ūshoka ū kūlī Musa, ū kū nyango gwiheema lya kwibilingīla.
← Chapter 15
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 17 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36