2 Kings 12

Tswana (BAEBELE e e Boitshepo) 1992

← Chapter 11 Jump to: Chapter 13 →

1Joaše a simolola go busa ka ngwaga wa bosupa wa ga Jehu; a busa ka dinyaga di le 40 mo Jerusalema; leina la ga mmaagwe e ne e le Sibia wa Beerešeba.

2Joaše a dira se se molemo mo matlhong a ga Jehofa ka metlha yotlhe ya gagwe e Joiata o ne a ntse a mo ruta ka yone.

3Le fa go ntse jalo mafelo a a tlotlometseng ga a ka a tlosiwa; batho ba ne ba sa ntse ba isa tlhabelo ba fisa maswalo mo mafelong a tlotlometseng.

4Joaše a raya baperesiti a re: “Madi otlhe a theko ya dilo tse di itshepileng a a isiwang mo ntlong ya ga Jehofa, e le madi a go dumalanyweng ka one, madi a batho ba mongwe le mongwe wa bone o fetelang mo palong, gongwe o sekaseketsweng tlhwatlhwa, le madi otlhe a pelo ya motho mongwe e ratang go isa mo ntlong ya ga Jehofa,

5a baperesiti ba a tseye, motho mongwe le mongwe mo go ba o itsanyeng nabo; mme ba tla mamatlelela dithubego tsa ntlo gongwe le gongwe kwa thubego e tlaa fitlhelwang gone.”

6Ga dirala e rile ka ngwaga wa 23 wa kgosi Joaše baperesiti ba bo ba ise ba mamatlelele dithubego tsa ntlo.

7Foo kgosi Joaše a bitsa Joiata moperesiti le baperesiti ba bangwe a ba raya a re: “Ga lo siamisetseng dithubego tsa ntlo? Jaana lo se ka lwa tlhola lo tsaya madi mo go ba lo itsanyeng nabo lo a ntshetse dithubego tsa ntlo.”

8Baperesiti ba dumalana fa ba se ketla ba tlhola ba tsaya madi mo bathong le fa e le go mamatlelela dithubego tsa ntlo.

9Joiata moperesiti a tsaya letlole a phunya letshoba mo sekhurumelong sa lone, a le baya fa sebesong ka fa ntlheng ya letsogo le legolo fa motho a tsena mo ntlong ya ga Jehofa; baperesiti ba ba lebelang kgoro ba tsenya mo go lone madi otlhe a a isiwang mo ntlong ya ga Jehofa.

10Mme go dirale, fa ba bona go na le madi a le mantsi mo letloleng, mokwaledi wa kgosi le moperesiti yo mogolo ba tle, ba a tsenye mo dikgetsing, ba bale madi a ba a fitlhelang mo ntlong ya ga Jehofa.

11Madi a a lekantsweng bokete, ba a tsenye mo diatleng tsa ba ba dirang tiro, ba ba lebelang ntlo ya ga Jehofa; bone ba a neye babetli le baagi ba ba dirang mo ntlong ya ga Jehofa,

12le baagi ba dimota, le babetli ba maje, le go reka dikgong le maje a a betlilweng a go mamatlelela dithubego tsa ntlo ya ga Jehofa, le tsotlhe tse di ntshediwang ntlo go e mamatlelela.

13Mme go se ka ga direlwa ntlo ya ga Jehofa dinwelo tsa selefera, dipoma, le megotšana le dinaka, le fa e le dilwana tsa gouta, le fa e le dilwana tsa selefera, ka madi a a isiwang mo ntlong ya ga Jehofa;

14gonne ao ba ne ba a naya ba ba dirang tiro, ba mamatlelela ka one ntlo ya ga Jehofa.

15Gape ba ne ba sa bale le banna ba madi a ba a tsenyang mo diatleng tsa bone, go tla ba a naya ba ba dirang tiro; gonne ba dira ka boikanngo.

16Madi a ditshupelelo tsa molato, le madi a ditshupelelo tsa boleo, a ne a sa isiwe mo ntlong ya ga Jehofa; e ne e le a baperesiti.

17Foo Hasaele kgosi ya Siria a ya a tlhasela kwa Gathe, mme a o gapa: Hasaele a leba kwa Jerusalema.

18Joaše kgosi ya Juta a tsaya dilo tse di itshepileng tsotlhe tse Jehošafate le Jehorame le Ahasia, borraagwe, dikgosi tsa Juta, ba na ba di tshwaetse Modimo, le dilo tse di itshepileng tse e leng tsa gagwe le gouta yotlhe e e fitlhelwang mo dikhumong tsa ntlo ya ga Jehofa, le tsa ntlo ya kgosi a di isa kwa kgosing ya Siria; ya itse go fularela Jerusalema.

19Ditiro tse dingwe tsa ga Joaše, le tsotlhe tse o ne a di dira, a ga di a kwalwa mo lokwalong lwa ditiralelo tsa dikgosi tsa Juta?

20Batlhanka ba gagwe ba tloga ba mo rera, mme ba bolaya Joaše a le mo ntlong ya Milo, mo tseleng e e yang kwa Sila.

21Gonne Josakare, morwa Shemeathe, le Josabate morwa Shomere, batlhanka ba gagwe, ba mo itaya, mme a swa. Ba mo fitlha le borraagwe mo motseng wa ga Dafite; mme Amasia morwawe a busa mo boemong jwa gagwe.

← Chapter 11 Jump to: Chapter 13 →