2 Kings 13

Tswana (BAEBELE e e Boitshepo) 1992

← Chapter 12 Jump to: Chapter 14 →

1E rile ka ngwaga wa 23 wa ga Joaše morwa Ahasia kgosi ya Juta, Jehoahase morwa Jehu a simolola go busa Baiseraele mo Samaria, a busa ka dinyaga di le 17.

2Mme a dira se se bosula mo ponong ya ga Jehofa, a ineela mo maleong a ga Jeroboame morwa Nebate, a o ne a leofisa Baiseraele ka one; ga a ka a fapoga mo go one.

3Bogale jwa ga Jehofa jwa tukela Baiseraele, mme a nna a ba tsenya mo seatleng sa ga Hasaele kgosi ya Siria, le mo seatleng sa ga Benehatate morwa Hasaele, ka metlha yotlhe.

4Jehoahase a rapela Jehofa, mme Jehofa a mo reetsa; gonne a bona patikego ya Baiseraele, jaaka kgosi ya Siria e ba patika.

5Jehofa a naya Baiseraele mogolodi, mme ba tswa fa tlase ga seatla sa Basiria; bana ba Iseraele ba nna mo megopeng ya bone, jaaka gale.

6Mme le fa go ntse jalo ga ba a ka ba tlogela maleo a ba ntlo ya ga Jeroboame, a o ne a leofisa Baiseraele ka one, mme ba sepela mo go one; mme ga sala le yone Medimako mo Samaria.

7Gonne ga a ka a tlogelela Jehoahase batho, fa e se bapalama dipitse ba le 50, le dikara di le some, le batho ba dinao ba le 10 000; gonne kgosi ya Siria e ne ya ba senye, ya ba dira jaaka lorole fa go phothowa mabele.

8Jaana ditiro tse dingwe tsa ga Jehoahase, le tsotlhe tse o ne a di dira, le bonatla jwa gagwe, a ga di a kwalwa mo lokwalong lwa ditirafalo tsa dikgosi tsa Iseraele?

9Mme Jehoahase a robala le borraagwe; ba mo fitlha mo Samaria; mme Joaše morwawe a busa mo boemong jwa gagwe.

10E rile ka ngwaga wa 37 wa ga Joaše kgosi ya Juta, Joaše morwa Jehoahase a simolola go busa Baiseraele mo Samaria, mme a busa ka dinyaga di le 16.

11A dira se se bosula mo ponong ya ga Jehofa; ga a ka a fapoga mo maleong otlhe a ga Jeroboame morwa Nebate a o ne a leofisa Baiseraele ka one; a sepela fela mo go one.

12Ditiro tse dingwe tsa ga Joaše le tsotlhe tse o ne a di dira, le bonatla jwa gagwe jo o ne a tlhabana ka jone le Amasia kgosi ya Juta, a ga di a kwalwa mo lokwalong lwa ditirafalo tsa dikgosi tsa Iseraele?

13Joaše a robala le borraagwe; mme Jeroboame a dula mo setulong sa gagwe sa bogosi; Joaše a fitlhwa mo Samaria le dikgosi tsa Iseraele.

14Jaana Eliša o ne a tsogetswe ke bolwetse, e bong bolwetse jo o suleng ka jone; Joaše kgosi ya Iseraele a ya kwa go ene, a mo lelela a re: “Rra we! Rra we! Dikara tsa Iseraele le bapalami ba tsone!”

15Eliša a mo raya a re: “Tsaya bora le metswi;” mme a itseela bora le metswi.

16A raya kgosi ya Iseraele a re: “Baya letsogo la gago mo boreng.” Ya baya letsogo la yone mo go jone. Eliša a baya mabogo a gagwe mo mabogong a kgosi.

17Mme a re: “Bula fensetere e e lebileng ntlheng ya botlhabatsatsi,” mme a bula. Foo Eliša a re: “Fula.” Mme a fula. Mme a re: “Motswi wa ga Jehofa wa phenyo, e bong motswi o o fenyang Basiria; gonne o tlaa kgemetha Basiria; gonne o tlaa kgemetha Basiria mo Afeke, go tsamaya o ba nyeletsa.”

18Mme a re: “Tsaya metswi.” A e tsaya. A raya kgosi ya Iseraele a re: “Seola lefatshe.” A seola gararo, a khutla.

19Monna wa Modimo a nna bogale nae a re: “O ne o tshwanetse go seola gatlhano, le fa e le garataro; jalo o ka bo o kgemethile Basiria wa ba wa tla wa ba nyeletsa; jaanong o tla kgemetha Basiria gararo fela.”

20Eliša a swa, mme ba mo fitlha. Manokwane a Bamoabe a tlhasela lefatshe mo tshimologong ya ngwaga.

21Ga dirala ya re ba fitlha monna mongwe, bonang, ba kwaya setlhopha sengwe; ba latlhela monna yoo mo phupung ya ga Eliša; ya re monna yoo a ama marapo a ga Eliša, a rulwa, a ema ka dinao.

22Mme Hasaele kgosi ya Siria a patika Baiseraele ka metlha yotlhe ya ga Jehoahase.

23Jehofa a nna kutlwelo botlhoko kwa go bone, a ba tlhomogela pelo, a ba ngoka ka ntlha ya kgolagano ya gagwe le Aberahame, Isake le Jakobe. A gana go ba senya, mme o ne a ise a ba latlhe fa pele ga gagwe ka lobaka loo.

24Hasaele kgosi ya Siria a swa; mme Benehatate morwawe a busa mo boemong jwa gagwe.

25Joaše morwa Jehoahase a ba a gapela Benehatate Morwa Hasaele metse e o ne a e gapetse Jehoahase rraagwe ka ntwa. Joaše a mo kgemetha gararo, a ba a inaya metse ya Iseraele.

← Chapter 12 Jump to: Chapter 14 →