bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Urdu
/
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
/
2 Samuel 10
2 Samuel 10
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
← Chapter 9
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 11 →
1
Is ke ba‘d aisá húá, ki baní ‘Ammon ká bádsháh mar gayá, aur us ká beṭá Hanún us ká jánishín húá.
2
Tab Dáúd ne kahá, ki Maiṉ Náhas ke beṭe Hanún ke sáth mihrbání karúṉgá, jaise us ke báp ne mere sáth mihrbání kí. So Dáúd ne apne ḳhádim bheje, táki un kí ma‘rifat us ke báp ke báre meṉ use tasallí de. Chunáṉchi Dáúd ke ḳhádim baní ‘Ammon kí sarzamín meṉ áe.
3
Aur baní ‘Ammon ke sardároṉ ne apne málik Hanún se kahá, Tujhe kyá yih gumán hai, ki Dáúd tere báp kí ta‘zím kartá hai, ki us ne tasallí denewále tere pás bheje haiṉ? kyá Dáúd ne apne ḳhádim tere pás is liye nahíṉ bheje haiṉ, ki shahr ká hál daryáft karke aur us ká bhed lekar wuh is ko g̣árat kare?
4
Tab Hanún ne Dáúd ke ḳhádimoṉ ko pakaṛkar un kí ádhí ádhí dáṛhí munḍwáí, aur un kí poshák bích se surín tak kaṭwákar un ko ruḳhsat kar diyá.
5
Jab Dáúd ko ḳhabar pahuṉchí, to us ne un se milne ko log bheje; is liye ki yih ádmí niháyat sharminda the: so bádsháh ne farmáyá, ki Jab tak tumhárí dáṛhí na baṛhe, Yaríhú meṉ raho; us ke ba‘d chale áná.
6
Jab baní ‘Ammon ne dekhá, ki wuh Dáúd ke áge nafratangez ho gaye, to baní ‘Ammon ne log bheje, aur Bait Rahob ke Arámíoṉ, aur Zobáh ke Arámíoṉ meṉ se bís hazár piyádoṉ ko, aur Ma‘kah ke bádsháh ko ek hazár sipáhíoṉ samet, aur Tob ke bárah hazár ádmíoṉ ko ujrat par bulá liyá.
7
Aur Dáúd ne yih sunkar Yoáb aur baháduroṉ ke sáre lashkar ko bhejá.
8
Tab baní ‘Ammon nikle, aur unhoṉ ne pháṭak ke pás hí laṛáí ke liye saff báṉdhí: aur Zobáh aur Rahob ke Arámí, aur Tob aur Ma‘kah ke log maidán meṉ alag the.
9
Jab Yoáb ne dekhá, ki us ke áge aur píchhe donoṉ taraf laṛáí ke liye saff baṉdhí hai, to us ne baní Isráíl ke ḳháss logoṉ ko chun liyá, aur Arámíoṉ ke muqábil un kí saff báṉdhí.
10
Aur báqí logoṉ ko apne bháí Abíshai ke háth sauṉp diyá, aur us ne baní ‘Ammon ke muqábil saff báṉdhí.
11
Phir us ne kahá, Agar Arámí mujh par g̣álib hone lageṉ, to tú merí kumak karná; aur agar baní ‘Ammon tujh par g̣álib hone lageṉ to maiṉ ákar terí kumak karúṉgá.
12
So ḳhúb hausala rakh, aur ham sab apní qaum, aur apne Ḳhudá ke shahroṉ ki ḳhátir mardánagí kareṉ: aur Ḳhudáwand jo bihtar jáne so kare.
13
Pas Yoáb aur wuh log jo us ke sáth the Arámíoṉ par hamla karne ko áge baṛhe: aur wuh us ke áge se bháge.
14
Tab baní ‘Ammon ne dekhá ki Arámí bhág gaye, to wuh bhí Abíshai ke sámne se bhágkar shahr ke andar ghus gaye. Tab Yoáb baní ‘Ammon ke pás se lauṭkar Yarúshalem meṉ áyá.
15
Jab Arámíoṉ ne dekhá, ki unhoṉ ne Isráílíoṉ se shikast kháí, to wuh sab jama‘ húe.
16
Aur Hadara‘zar ne log bheje, aur un Arámíoṉ ko jo daryá e Furát ke pár the le áyá, aur wuh Hilám meṉ áe; aur Hadara‘zar kí fauj ká sipahsálár Sobak un ká sardár thá.
17
Aur Dáúd ko ḳhabar milí, so us ne sab Isráílíoṉ ko ikaṭṭhá kiyá, aur Yardan ke pár hokar Hilám meṉ áyá. Aur Arámíoṉ ne Dáúd ke muqábil saffáráí kí, aur us se laṛe.
18
Aur Arámí Isráílíoṉ ke sámne se bháge; aur Dáúd ne Arámíoṉ ke sát sau rathoṉ ke ádmí, aur chálís hazár sawár qatl kar ḍále, aur un kí fauj ke sardár Sobak ko aisá márá, ki wuh wahíṉ mar gayá.
19
Aur jab un bádsháhoṉ ne jo Hadara‘zar ke ḳhádim the dekhá, ki wuh Isráílíoṉ se hár gaye, to unhoṉ ne Isráílíoṉ se sulh kar lí, aur un kí ḳhidmat karne lage. G̣araz, Arámí baní ‘Ammon kí phir kumak karne se ḍare
← Chapter 9
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 11 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24