2 Samuel 4

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 3 Jump to: Chapter 5 →

1Jab Sáúl ke beṭe Ishbosat ne suná, ki Abinaiyir Habrún meṉ mar gayá, to us ke háth ḍhíle paṛ gaye, aur sáre Isráílí ghabrá gaye.

2Aur Sáúl ke beṭe Ishbosat ke do ádmí the jo faujoṉ ke sardar the; ek ká nám Ba‘nah, aur dúsre ká Raikáb thá; yih donoṉ baní Binyamín kí nasl ke Baírotí Rimmon ke beṭe the: (kyuṉki Baírot bhí baní Binyamín ká giná játá hai:

3aur Baírotí Jittím ko bhág gaye the: chunáṉchi áj ke din tak wuh wahíṉ rahte haiṉ.)

4Aur Sáúl ke beṭe Yúnatan ká ek laṉgṛá beṭá thá. Jab Sáúl aur Yúnatan kí ḳhabar Yazra‘el se pahuṉchí, to wuh páṉch baras ká thá; so us kí dáya us ko uṭhákar bhágí, aur us ne jo bhágne meṉ jaldí kí, to aisá húá, ki wuh gir paṛá, aur laṉgṛá ho gayá. Us ká nám Mifíbosat thá.

5Aur Baírotí Rimmon ke beṭe Raikáb aur Ba‘nah chale, aur kaṛí dhúp ke waqt Ishbosat ke ghar áe, jab wuh do pahar ko árám kar rahá thá.

6So wuh waháṉ ghar ke andar gehúṉ lene ke baháne se ghuse, aur us ke peṭ meṉ márá: aur Raikáb aur us ká bháí Ba‘nah bhág nikle.

7Jab wuh ghar meṉ ghuse, to wuh apní ḳhwábgáh meṉ apne bistar par sotá thá; so unhoṉ ne use márá, aur qatl kiyá, aur us ká sir káṭ diyá, aur us ká sir lekar tamám rát maidán kí ráh chale.

8Aur Ishbosat ká sir Habrún meṉ Dáúd ke pás le áe, aur bádsháh se kahá, Terá dushman Sáúl jo terí ján ká tálib thá, yih us ke beṭe Ishbosat ká sir hai; so Ḳhudáwand ne áj ke din mere málik bádsháh ká intiqám Sáúl aur us kí nasl se liyá.

9Tab Dáúd ne Raikáb aur us ke bháí Ba‘nah ko jo Baírotí Rimmon ke beṭe the, jawáb diyá, ki Ḳhudáwand kí hayát kí qasam jis ne merí ján ko har musíbat se riháí dí hai;

10jab ek shaḳhs ne mujh se kahá, ki Dekh, Sáúl mar gayá, aur samjhá, ki ḳhushḳhabarí detá hai, to maiṉ ne use pakṛá, aur Siqláj meṉ use qatl kiyá; yihí jazá maiṉ ne use us kí ḳhabar ke badle dí.

11Pas jab sharíroṉ ne ek rástkár insán ko, usí ke ghar meṉ, us ke bistar par qatl kiyá hai, to kyá maiṉ ab us ke ḳhún ká badla tum se zarúr hí na lúṉ, aur tum ko zamín par se nábúd na kar ḍálúṉ?

12Tab Dáúd ne apne jawánoṉ ko hukm diyá, aur unhoṉ ne un ko qatl kiyá, aur un ke háth aur páṉw káṭ ḍále, aur un ko Habrún meṉ táláb ke pás ṭáṉg diyá. Aur Ishbosat ke sir ko lekar unhoṉ ne Habrún meṉ Abinaiyir kí qabr meṉ dafn kiyá.

← Chapter 3 Jump to: Chapter 5 →