2 Samuel 16

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 15 Jump to: Chapter 17 →

1Aur jab Dáúd choṭí par se kuchh áge baṛhá, to Mifíbosat ká ḳhádim Zíbá do gadhe liye húe use milá, jin par zín kase the, aur un ke úpar do sau roṭiyáṉ, aur kishmish ke sau ḳhoshe, aur tábistání mewoṉ ke sau dáne, aur mai ká ek mashkíza thá.

2Aur bádsháh ne Zíbá se kahá, In se terá kyá matlab hai? Zíbá ne kahá, Yih gadhe bádsháh ke gharáne kí sawárí ke liye, aur roṭiyáṉ aur garmí ke phal jawánoṉ ke kháne ke liye haiṉ; aur yih mai is liye hai, ki jo biyábán meṉ thak jáeṉ, use píeṉ.

3Aur bádsháh ne púchhá, Tere áqá ká beṭá kaháṉ hai? Zíbá ne bádsháh se kahá, Dekh, wuh Yarúshalem meṉ rah gayá hai: kyúṉki us ne kahá, ki Áj Isráíl ká gharáná mere báp kí mamlukat mujhe pher degá.

4Tab bádsháh ne Zíbá se kahá, Dekh, jo kuchh Mifíbosat ká hai, wuh sab terá ho gayá. Tab Zíbá ne kahá, Maiṉ sijda kartá húṉ; ai mere málik bádsháh, tere karam kí nazar mujh par rahe.

5Jab Dáúd bádsháh Bahúrím pahuṉchá, to waháṉ se Sáúl ke ghar ke logoṉ meṉ se ek shaḳhs, jis ká nám Sima‘í bin Jirá thá, niklá, aur la‘nat kartá húá áyá.

6Aur us ne Dáúd par aur Dáúd bádsháh ke sab ḳhádimoṉ par patthar pheṉke: aur sab log aur sab súrmá us ke dahine aur báeṉ háth the.

7Aur Sima‘í la‘nat karte waqt yúṉ kahtá thá, Dúr ho, dúr ho, ai ḳhúní ádmí, ai ḳhabís.

8Ḳhudáwand ne Sáúl ke gharáne ke sab ḳhún ko, jis ke ‘iwaz tú bádsháh húá, tere hí úpar lauṭáyá, aur Ḳhudáwand ne saltanat tere beṭe Abísalom ke háth meṉ de dí hai; aur dekh, tú apní hí sharárat meṉ ḳhud áp phaṉs gayá hai, is liye ki tú ḳhúní ádmí hai

9Tab Zarúyáh ke beṭe Abíshai ne bádsháh se kahá, Yih mará húá kuttá mere málik bádsháh par kyúṉ la‘nat kare? mujh ko zará udhar jáne de, ki us ká sir uṛá dúṉ.

10Bádsháh ne kahá, Ai Zarúyáh ke beṭo, mujhe tum se kyá kám? Wuh jo la‘nat kar rahá hai, aur Ḳhudáwand ne us se kahá hai, ki Dáúd par la‘nat kar, so kaun kah saktá hai, ki Tú ne kyúṉ aisá kiyá?

11Aur Dáúd ne Abíshai se aur apne sab ḳhádimoṉ se kahá, Dekho, merá beṭá hí jo merí sulb se paidá húá, merí ján ká tálib hai: pas ab yih Binyamíní kitná ziyáda aisá na kare? use chhoṛ do, aur la‘nat karne do, kyúṉki Ḳhudáwand ne use hukm diyá hai.

12Sháyad Ḳhudáwand us zulm par jo mere úpar húá hai nazar kare, aur Ḳhudáwand áj ke din us kí la‘nat ke badle mujh nek badla de.

13So Dáúd aur us ke log ráste chalte rahe, aur Sima‘í us ke sámne ke paháṛ ke pahlú par chaltá rahá, aur chalte chalte la‘nat kartá aur us kí taraf patthar pheṉktá aur ḳhák ḍáltá rahá.

14Aur bádsháh aur us ke sab hamráhí thake húe áe, aur waháṉ us ne dam liyá.

15Aur Abísalom aur sab Isráílí mard Yarúshalem meṉ áe, aur Aḳhítuffal us ke sáth thá.

16Aur aisá húá, ki jab Dáúd ká dost, Arkí Húsí Abísalom ke pás áyá, to Húsí ne Abísalom se kahá, Bádsháh jítá rahe, bádsháh jítá rahe.

17Aur Abísalom ne Húsí se kahá, Kyá tú ne apne dost par yihí mihrbání kí? tú apne dost ke sáth kyúṉ na gayá?

18Húsí ne Abísalom se kahá, Nahíṉ; balki jis ko Ḳhudáwand ne aur is qaum ne aur Isráíl ke sab ádmíoṉ ne chun liyá hai, maiṉ usí ká húṉgá, aur usí ke sáth rahúṉgá.

19Aur phir maiṉ kis kí ḳhidmat karúṉ? kyá maiṉ us ke beṭe ke sámne rahkar ḳhidmat na karúṉ? jaise maiṉ ne tere báp ke sámne rahkar ḳhidmat kí, waise hí tere sámne rahúṉgá.

20Tab Abísalom ne Aḳhítuffal se kahá, Tum saláh do, ki ham kyá kareṉ.

21So Aḳhítuffal ne Abísalom se kahá, ki Apne báp kí haramoṉ ke pás já jin ko wuh ghar kí nigahbání ko chhoṛ gayá hai; is liye ki jab sab Isráílí suneṉge ki tere báp ko tujh se nafrat hai, to un sab ke háth jo tere sáth haiṉ qawí ho jáeṉge.

22So unhoṉ ne mahall kí chhat par Abísalom ke liye ek tambú khaṛá kar diyá, aur Abísalom sab baní Isráíl ke sámne apne báp kí haramoṉ ke pás gayá.

23Aur Aḳhítuffal kí mashwarat jo in dinoṉ hotí wuh aisí samjhí játí thí, ki goyá Ḳhudá ke kalám se ádmí ne bát púchh lí: yúṉ Aḳhítuffal kí mashwarat Dáúd aur Abísalom kí ḳhidmat meṉ aisí hí hotí thí.

← Chapter 15 Jump to: Chapter 17 →