2 Samuel 3

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 2 Jump to: Chapter 4 →

1Alg̣araz Sáúl ke gharáne aur Dáúd ke gharáne meṉ muddat tak jang rahí: aur Dáúd roz ba roz zoráwar hotá gayá, aur Sáúl ká ḳhándán kamzor hotá gayá.

2Aur Habrún meṉ Dáúd ke háṉ beṭe paidá húe: Amnon us ká pahlauṭhá thá jo Yazra‘elí Aḳhinú‘am ke peṭ se thá;

3aur dúsrá Kilíáb thá jo Karmilí Nábál kí bíwí Abíjel se húá, tísrá Abísalom thá jo Jasor ke bádsháh Talmí kí beṭí Ma‘akah se húá;

4chauthá Adúniyáh thá jo Hajjít ká beṭá thá; aur páṉchwáṉ Safatiyáh jo Abítál ká beṭá thá;

5aur chhaṭá Itri‘ám thá jo Dáúd kí bíwí ‘Ijláh se húá. Yih Dáúd ke háṉ Habrún meṉ paidá húe.

6Aur jab Sáúl ke gharáne aur Dáúd ke gharáne meṉ jang ho rahí thí, to Abinaiyir ne Sáúl ke gharáne meṉ ḳhúb zor paidá kar liyá.

7Aur Sáúl kí ek haram thí, jis ká nám Risfáh thá: wuh Aiyáh kí beṭí thí: so Ishbosat ne Abinaiyir se kahá, Tú mere báp kí haram ke pás kyúṉ gayá?

8Abinaiyir Ishbosat kí in bátoṉ se bahut g̣usse hokar kahne lagá, Kyá maiṉ Yahúdáh ke kisí kutte ká sir húṉ? áj tak maiṉ tere báp Sáúl ke gharáne, aur us ke bháiyoṉ aur dostoṉ se mihrbání se pesh átá rahá húṉ, aur tujhe Dáúd ke hawále nahíṉ kiyá, taubhí tú áj is ‘aurat ke sáth mujh par ‘aib lagátá hai?

9Ḳhudáwand Abinaiyir se waisá hí, balki us se ziyáda kare, agar maiṉ Dáúd se wuhí sulúk na karúṉ, jis kí qasam Ḳhudáwand ne us ke sáth kháí thí;

10táki saltanat ko Sáúl ke gharáne se muntaqil karke Dáúd ke taḳht ko Isráíl aur Yahúdáh donoṉ par, Dán se Baírsaba‘ tak, qáim karúṉ.

11Aur wuh Abinaiyir ko ek lafz jawáb na de saká, is liye ki us se ḍartá thá.

12Aur Abinaiyir ne apní taraf se Dáúd ke pás qásid rawána kiye, aur kahlá bhejá, ki Mulk kis ká hai? Tú mere sáth apná ‘ahd báṉdh, aur dekh, merá háth tere sáth hogá, táki sáre Isráíl ko terí taraf máil karúṉ.

13Us ne kahá, Achchhá, maiṉ tere sáth ‘ahd báṉdhúṉgá, par maiṉ tujh se ek bát cháhtá húṉ, aur wuh yih hai, ki jab tú mujh se milne ko áe, to jab tak Sáúl kí beṭí Míkal ko pahle apne sáth na láe, tú merá muṉh dekhne nahíṉ páegá.

14Aur Dáúd ne Sáúl ke bete Ishbosat ko qásidoṉ kí ma‘rifat kahlá bhejá, ki Merí bíwí Míkal ko jis ko maiṉ ne Filistíoṉ kí sau khalṛiyáṉ dekar biyáhá thá mere hawále kar.

15So Ishbosat ne log bhejkar use us ke shauhar Láís ke beṭe Faltíel se chhín liya.

16Aur us ká shauhar us ke sáth chalá, aur us ke píchhe píchhe Bahúrím tak rotá húá chalá áyá. Tab Abinaiyir ne us se kahá, Lauṭ já; so wuh lauṭ gayá.

17Aur Abinaiyir ne Isráílí buzurgoṉ ke pás ḳhabar bhejí, ki Guzre dinoṉ meṉ tum yih cháhte the, ki Dáúd tum par bádsháh ho:

18pas, ab aisá kar lo, kyúṉki Ḳhudáwand ne Dáúd ke haqq meṉ farmáyá hai, ki Maiṉ apne bande Dáúd kí ma‘rifat apní qaum Isráíl ko Filistíoṉ, aur un ke sab dushmanoṉ ke háth se riháí dúṉgá.

19Aur Abinaiyir ne baní Binyamín se bhí báteṉ kíṉ: aur Abinaiyir chalá, ki jo kuchh Isráílíoṉ, aur Binyamín ke sáre gharáne ko achchhá lagá, use Habrún meṉ Dáúd ko kah sunáe.

20So Abinaiyir Habrún meṉ Dáúd ke pás áyá, aur bís ádmí us ke sáth the. Tab Dáúd ne Abinaiyir aur un logoṉ kí jo us ke sáth the ziyáfat kí.

21Aur Abinaiyir ne Dáúd se kahá, Ab maiṉ uṭhkar jáúṉgá, aur sáre Isráíl ko apne málik bádsháh ke pás ikaṭṭhá karúṉgá, táki wuh tujh se ‘ahd báṉdheṉ, aur tú, jis jis par terá jí cháhe, saltanat kare. So Dáúd ne Abinaiyir ko ruḳhsat kiyá; aur wuh salámat chalá gayá.

22Dáúd ke log aur Yoáb kisí dháwe se lúṭ ká bahut sá mál apne sáth lekar áe; lekin Abinaiyir Habrún meṉ Dáúd ke pás nahíṉ thá; kyúṉki us ne use ruḳhsat kar diyá thá, aur wuh salámat chalá gayá thá.

23Aur jab Yoáb aur lashkar ke sab log jo us ke sáth the áe, to unhoṉ ne Yoáb ko batáyá, ki Naiyir ká beṭá Abinaiyir bádsháh ke pás áyá thá, aur us ne use ruḳhsat kar diyá, aur wuh salámat chalá gayá.

24Tab Yoáb bádsháh ke pás ákar kahne lagá, Yih tú ne kyá kiyá? dekh, Abinaiyir tere pás áyá thá, so tú ne use kyúṉ ruḳhsat kar diyá, ki wuh nikal gayá?

25Tú Naiyir ke beṭe Abinaiyir ko jántá hai, ki wuh tujh ko dhoká dene aur tere áne jáne aur tere sáre kám ká bhed lene áyá thá.

26Jab Yoáb Dáúd ke pás se báhar niklá, to us ne Abinaiyir ke píchhe qásid bheje, aur wuh us ko Sírah ke kúeṉ se lauṭá le áe, par yih Dáúd ko ma‘lúm nahíṉ thá.

27Jab Abinaiyir Habrún meṉ lauṭ áyá, to Yoáb use alag pháṭak ke andar le gayá, táki us ke sáth chupke chupke bát kare; aur waháṉ apne bháí ‘Asáhel ke ḳhún ke badle meṉ us ke peṭ meṉ aisá márá, ki wuh mar gayá.

28Ba‘d meṉ jab Dáúd ne yih suná, to kahá, ki Maiṉ aur merí saltanat donoṉ hamesha tak Ḳhudáwand ke áge Naiyir ke beṭe Abinaiyir ke ḳhún kí taraf se begunáh haiṉ.

29Wuh Yoáb aur us ke báp ke sáre gharáne ke sir lage, aur Yoáb ke gharáne meṉ koí na koí aisá hotá rahe jise jiryán ho, yá jo koṛhí ho, yá baisákhí par chale, yá talwár se mare, yá ṭukṛe ṭukṛe ko muhtáj ho.

30So Yoáb aur us ke bháí Abíshai ne Abinaiyir ko már diyá; is liye ki us ne Jiba‘ún meṉ un ke bháí ‘Asáhel ko laṛáí meṉ qatl kiyá thá.

31Aur Dáúd ne Yoáb se aur un sab logoṉ se jo us ke sáth the kahá, ki Apne kapṛe pháṛo, aur ṭáṭ pahino, aur Abinaiyir ke áge áge mátam karo. Aur Dáúd bádsháh áp janáze ke píchhe píchhe chalá.

32Aur unhoṉ ne Abinaiyir ko Habrún meṉ dafn kiyá; aur bádsháh Abinaiyir kí qabr par chillá chillákar royá; aur sab log bhí roe.

33Aur bádsháh ne Abinaiyir par yih marsiya kahá, Kyá Abinaiyir ko aisá hí marná thá, jaise ahmaq martá hai?

34Tere háth baṉdhe na the; aur na tere páṉw beṛiyoṉ meṉ the; Jaise koí badkároṉ ke háth se martá hai, waise hí tú márá gayá. Tab us par sab log dobára roe.

35Aur sab log kuchh din rahte Dáúd ko roṭí khiláne áe, lekin Dáúd ne qasam khákar kahá, Agar maiṉ áftáb ke g̣urúb hone se peshtar roṭí yá âur kuchh chakkhúṉ, to Ḳhudá mujh se aisá, balki is se ziyáda kare.

36Aur sab logoṉ ne is par g̣aur kiyá, aur is se ḳhush húe; kyúṉki jo kuchh bádsháh kartá thá, log us se ḳhush hote the.

37So sab logoṉ ne, aur tamám Isráíl ne, usí din ján liyá, kí Naiyir ke beṭe Abinaiyir ká qatl honá bádsháh kí taraf se na thá.

38Aur bádsháh ne apne mulázimoṉ se kahá, Kyá tum nahíṉ jánte ho, ki áj ke din ek sardár, balki ek bahut baṛá ádmí, Isráíl meṉ mará hi?

39Aur agarchi maiṉ mamsúh bádsháh húṉ taubhí áj ke din ‘ájiz húṉ, aur yih log, baní Zarúyáh, mujh se zabardast haiṉ; Ḳhudáwand badkár ko us kí badí ke muwáfiq badla de.

← Chapter 2 Jump to: Chapter 4 →