bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Urdu
/
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
/
2 Samuel 6
2 Samuel 6
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
← Chapter 5
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 7 →
1
Aur Dáúd ne phir Isráílíoṉ ke sab chune húe tís hazár mardoṉ ko jama‘ kiyá.
2
Aur Dáúd uṭhá, aur sab logoṉ ko jo us ke sáth the lekar Ba‘lah Yahúdáh se chalá, táki Ḳhudá ke sandúq ko udhar se le áe, jo us nám ká ya‘ní Rabb u’l afwáj ke nám ká kahlátá hai jo do karúbíoṉ par baiṭhtá hai.
3
So unhoṉ ne Ḳhudá ke sandúq ko nayí gáṛí par rakkhá, aur use Abínadáb ke ghar se jo paháṛí par thá nikál láe; aur us nayí gáṛí ko Abínadáb ke beṭe ‘Uzzah aur Aḳhyo háṉkne lage.
4
Aur wuh use Abínadáb ke ghar se jo paháṛí par thá Ḳhudá ke sandúq ke sáth nikál láe; aur Aḳhyo sandúq ke áge áge chal rahá thá.
5
Aur Dáúd aur Isráíl ká sárá gharáná sanaubar kí lakṛí ke sab tarah ke sáz, aur sitár, barbat, aur daf, aur ḳhanjarí aur jháṉjh Ḳhudáwand ke áge áge bajáte chale.
6
Aur jab wuh Nakon ke khalíhán par pahuṉche, to ‘Uzzah ne Ḳhudá ke sandúq kí taraf háth baṛhákar use thám liyá, kyúṉki bailoṉ ne ṭhokar kháí thí.
7
Tab Ḳhudáwand ká g̣ussa ‘Uzzah par bhaṛká; aur Ḳhudá ne wahíṉ use us kí ḳhatá ke sabab se márá; aur wuh wahíṉ Ḳhudá ke sandúq ke pás mar gayá.
8
Aur Dáúd is sabab se, ki Ḳhudáwand ‘Uzzah par ṭúṭ paṛá náḳhush húá: aur us ne us jagah ká nám Paraz ‘Uzzah rakkhá jo áj ke din tak hai.
9
Aur Dáúd us din Ḳhudáwand se ḍar gayá, aur kahne lagá, ki Ḳhudáwand ká sandúq mere háṉ kyúṉkar áe?
10
Aur Dáúd ne Ḳhudáwand ke sandúq ko apne háṉ Dáúd ke shahr meṉ le jáná na cháhá, balki Dáúd use ek taraf Játí ‘Obed Adom ke ghar meṉ le gayá.
11
Aur Ḳhudáwand ká sandúq Játí ‘Obed Adom ke ghar meṉ tín mahíne tak rahá: aur Ḳhudáwand ne ‘Obed Adom ko aur us ke sáre gharáne ko barakat dí.
12
Aur Dáúd bádsháh ko ḳhabar milí, ki Ḳhudáwand ne ‘Obed Adom ke gharáne ko, aur us kí har chíz meṉ Ḳhudá ke sandúq ke sabab se barakat dí hai. Tab Dáúd gayá, aur Ḳhudá ke sandúq ko ‘Obed Adom ke ghar se Dáúd ke shahr meṉ ḳhushí ḳhushí le áyá.
13
Aur aisá húá, ki jab Ḳhudáwand ke sandúq ke uṭhánewále chha qadam chale, to Dáúd ne ek bail aur ek moṭá bachhṛá zabh kiyá.
14
Aur Dáúd Ḳhudáwand ke huzúr apne sáre zor se náchne lagá, aur Dáúd katán ká afod pahine thá.
15
So Dáúd aur Isráíl ká sárá gharáná Ḳhudáwand ke sandúq ko lalkárte aur narsingá phúṉkte húe láe.
16
Aur jab Ḳhudáwand ká sandúq Dáúd ke shahr ke andar á rahá thá, to Sáúl kí beṭí Míkal ne khiṛkí se nigáh kí, aur Dáúd bádsháh ko Ḳhudáwand ke huzúr uchhalte aur náchte dekhá; so us ne apne dil hí dil meṉ use haqír jáná.
17
Aur wuh Ḳhudáwand ke sandúq ko andar láe, aur use us kí jagah par, us ḳhaime ke bích meṉ jo Dáúd ne us ke liye khaṛá kiyá thá, rakkhá; aur Dáúd ne soḳhtaní qurbáníáṉ, aur salámatí kí qurbáníáṉ Ḳhudáwand ke áge chaṛháíṉ.
18
Aur jab Dáúd soḳhtaní qurbání, aur salámatí kí qurbáníáṉ, chaṛhá chuká, to us ne Rabb u’l afwáj ke nám se logoṉ ko barakat dí.
19
Aur us ne sab logoṉ ya‘ní Isráíl ke sáre amboh ke mardoṉ aur ‘auratoṉ donoṉ ko ek ek roṭí, aur ek ek ṭukṛá gosht, aur kishmish kí ek ek ṭikkyá báṉṭí. Phir sab log apne apne ghar chale gaye.
20
Tab Dáúd lauṭá, táki apne gharáne ko barakat de. Aur Sáúl kí beṭí Míkal Dáúd ke istiqbál ko niklí, aur kahne lagí, ki Isráíl ká bádsháh áj kaisá shándár ma‘lúm hotá thá, jis ne áj ke din apne mulázimoṉ kí lauṉḍiyoṉ ke sámne apne ko barahna kiyá, jaise koí baṉká behayáí se barahna ho játá hai.
21
Dáúd ne Míkal se kahá, Yih to Ḳhudáwand ke huzúr thá, jis ne tere báp aur us ke sáre gharáne ko chhoṛkar mujhe pasand kiyá, táki wuh mujhe Ḳhudáwand kí qaum Isráíl ká peshwá banáe; so maiṉ Ḳhudáwand ke áge náchúṉgá.
22
Balki maiṉ is se bhí ziyáda zalíl húṉgá, aur apní hí nazar meṉ ních húṉgá: aur jin lauṉḍiyoṉ ká zikr tú ne kiyá hai, wuhí merí ‘izzat kareṉgí.
23
So Sáúl kí beṭí Míkal marte dam tak beaulád rahí.
← Chapter 5
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 7 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24