2 Chronicles 10

Chinese TTVR (現代台語譯本羅馬字版)

← Chapter 9 Jump to: Chapter 11 →

1Lô-pho-an khì Sī-kiàm, in-ūi Í-sek-lia̍t jîn-bîn beh tī hia siat-li̍p i choh-ông.

2Í-chêng Nî-pat ê kiáⁿ Iâ-lô-pho-an ūi-tio̍h siám-pī Só͘-lô-bûn -ông, cháu-khì tòa tī Ai-ki̍p; Iâ-lô-pho-an thiaⁿ-tio̍h chit-ê tāi-chì, chiū tùi Ai-ki̍p tò--lâi.

3Í-sek-lia̍t -lâng chhe lâng khì chhiáⁿ i lâi; Iâ-lô-pho-an chiū kap Í-sek-lia̍t hōe-chiòng lâi kìⁿ Lô-pho-an, tùi i kóng,

4“Lí ê lāu-pē hō͘ goán pē tāng ê tàⁿ; kiû lí kiám-khin lí ê lāu-pē hē tī goán keng-thâu téng ê tāng-tàⁿ, kiám-chió goán ê khó͘-kang, goán chiū ho̍k-sāi lí.”

5Lô-pho-an kā in kóng, “Saⁿ ji̍t āu chiah koh lâi.” Jîn-bîn chiū tò--khì.

6Lô-pho-an ê lāu-pē Só͘-lô-bûn iáu oa̍h--teh ê sî, ū goân-ló ho̍k-sāi i; Lô-pho-an -ông chhéng-kàu in, kóng, “Lín ū sím-mi̍h kè-chhek, góa thang hôe-ho̍k chiah-ê jîn-bîn?”

7In ìn i kóng, “Lí nā hó khoán-thāi chiah-ê jîn-bîn, hō͘ in hoaⁿ-hí, ēng hó-ōe hôe-tap in, in chiū ōe éng-oán chòe lí ê po̍k-jîn.”

8M̄-kú Lô-pho-an kū-choa̍t chiah-ê goân-ló hō͘ i ê kè-chhek, khì kap hiah-ê kap i chòe-hé tōa-hàn, ho̍k-sāi i ê siàu-liân-lâng chham-siông;

9i kā in kóng, “Chiah-ê jîn-bîn ū tùi góa kóng, ‘Kiû lí kiám-khin lí ê lāu-pē hē tī goán keng-thâu téng ê tāng-tàⁿ.’ Taⁿ lín ū sím-mi̍h ì-kiàn hō͘ lán thang kā in hôe-ho̍k?”

10Hiah-ê kap i chòe-hé tōa-hàn ê siàu-liân-lâng kā i kóng, “Chiah-ê jîn-bîn tùi ông kóng, ‘Kiû lí kiám-khin lí ê lāu-pē hē tī goán keng-thâu téng ê tāng-tàⁿ.’ Ông tio̍h án-ni ìn in kóng, ‘Góa ê bé-cháiⁿ pí góa ê lāu-pē ê io khah chho͘.

11Góa ê lāu-pē hō͘ lín pē tāng ê tàⁿ, góa beh hō͘ lín koh-khah tāng ê tàⁿ; góa ê lāu-pē ēng piⁿ hêng-hoa̍t lín, góa beh ēng thih-chhì ê piⁿ hêng-hoa̍t lín.’”

12Iâ-lô-pho-an kap chèng jîn-bîn chiàu Lô-pho-an -ông ê ōe, tī tē-saⁿ ji̍t tò-lâi kìⁿ i.

13Ông ēng pháiⁿ siaⁿ-sàu ìn jîn-bîn; i m̄ thiaⁿ goân-ló hō͘ i ê kiàn-gī,

14tian-tò chiàu siàu-liân-lâng ê ì-kiàn tùi jîn-bîn kóng, “Góa ê lāu-pē hō͘ lín pē tāng ê tàⁿ, góa beh hō͘ lín koh-khah tāng ê tàⁿ; góa ê lāu-pē ēng piⁿ hêng-hoa̍t lín, góa beh ēng thih-chhì ê piⁿ hêng-hoa̍t lín.”

15Ông m̄-khéng thiaⁿ jîn-bîn ê chhéng-kiû, in-ūi chit-ê tāi-chì sī chhut tī Siōng-tè, beh si̍t-hiān Siōng Chú thong-kè Sī-lô -lâng A-hi-ngá tùi Nî-pat ê kiáⁿ Iâ-lô-pho-an só͘ kóng ê ōe.

16Í-sek-lia̍t chèng jîn-bîn chi̍t-ē chai ông m̄-khéng thiaⁿ in ê chhéng-kiû, chiū tùi ông kóng: Tāi-pi̍t ê ông-kok goán bô hūn; Iâ-se ê kiáⁿ kap goán bô koan-hē. Í-sek-lia̍t -lâng ah, lín lóng tò-khì lín tau! Taⁿ, Tāi-pi̍t -ke, lín ka-kī kò͘ hō͘ hó! Tùi án-ni, Í-sek-lia̍t -lâng lóng tò-khì in tau.

17M̄-kú Lô-pho-an iû-goân chòe tòa tī lâm-pō͘ Iû-tāi tōe-khu ê Í-sek-lia̍t -lâng ê ông.

18Lô-pho-an -ông phài kàm-tok kiông-chè-lô-kang ê A-to-lân khì Í-sek-lia̍t -lâng hia; Í-sek-lia̍t jîn-bîn ēng chio̍h-thâu kā i tìm-sí. Lô-pho-an -ông chiū kóaⁿ-kín chiūⁿ chiàn-chhia cháu tò-khì Iâ-lō͘-sat-léng.

19Tùi án-ni, pak-pō͘ ê Í-sek-lia̍t -lâng hoán-poān Tāi-pi̍t -ke, kàu kin-á-ji̍t.

← Chapter 9 Jump to: Chapter 11 →