2 Chronicles 26

Chinese TTVR (現代台語譯本羅馬字版)

← Chapter 25 Jump to: Chapter 27 →

1Iû-tāi ê jîn-bîn siat-li̍p O͘-se-a sòa-chiap i ê lāu-pē A-má-siā choh-ông, hit-sî i cha̍p-la̍k hè.

2A-má-siā -ông tńg-khì i ê lia̍t-chó͘ hia liáu-āu, O͘-se-a siu-hôe Í-lo̍k kui-sio̍k Iû-tāi -kok, koh kā i siu-kiàn.

3O͘-se-a chē-ūi ê sî cha̍p-la̍k hè, tī Iâ-lō͘-sat-léng choh-ông gō͘-cha̍p-jī nî; i ê lāu-bú kiò-chòe Iâ-khó-lī-ngá, sī Iâ-lō͘-sat-léng -lâng.

4O͘-se-a chòe Siōng Chú khòaⁿ-chòe hó ê sū, chiàu i ê lāu-pē A-má-siā ê só͘-chòe khì chòe.

5Kàu-tō lâng kèng-ùi Siōng-tè ê Sat-ka-lī-a chāi-sè ê sî, O͘-se-a -ông chhē-kiû Siōng Chú. I chhē-kiû Siōng Chú ê nî-ji̍t, Siōng-tè hō͘ i heng-thong hoân-êng.

6I chhut-khì kong-kek Hui-lī-sū -lâng, thiah-húi Ka-te̍k, Ngá-pí-nî, kap A-si̍t-tu̍t ê siâⁿ-chhiûⁿ, tī A-si̍t-tu̍t tōe-khu kap tī Hui-lī-sū -lâng ê tiong-kan khí kúi-nā ê siâⁿ.

7Siōng-tè pang-chān i phah-pāi Hui-lī-sū -lâng, kap tòa tī Ko͘-ní Pa-le̍k ê A-la-pek -lâng, í-ki̍p Bí-o͘-nî -lâng.

8A-bûn -lâng kā O͘-se-a chìn-kòng; O͘-se-a ê miâ-siaⁿ thàu kàu Ai-ki̍p, in-ūi i hui-siông kiông-sēng.

9O͘-se-a tī Iâ-lō͘-sat-léng ê Kak-mn̂g, Soaⁿ-kok-mn̂g, kap siâⁿ-chhiûⁿ oat-kak ê só͘-chāi, khí kian-kò͘ ê siâⁿ-lâu.

10I tī khòng-iá khí siú-bōng-tâi, koh ó͘ chin chōe chúi-tî, in-ūi i tī soaⁿ-po͘ kap pêng-goân ū chin chōe cheng-siⁿ; koh tī soaⁿ-khu kap pûi ê thó͘-tōe chhiàⁿ lâng chèng-choh kap chéng-lí phû-tô-hn̂g, in-ūi i chin ài chèng-choh.

11O͘-se-a ū chin chōe hùn-liān-iú-sò͘ ê kun-tūi; in lóng keng-kè su-kì Iâ-lī kap hù-koaⁿ Má-se-ngá tiám-sǹg, siū ông ê chiong-kun Hap-ná-nî-ngá chí-hui, ōe-tàng sûi-sî hun-tūi chhut-khì chok-chiàn.

12Chiah-ê ióng-béng chiàn-sū ê cho̍k-tiúⁿ ū nn̄g-chheng la̍k-pah lâng.

13Tī in ê chhiú-ē ū kun-peng saⁿ-cha̍p-bān chhit-chheng gō͘-pah lâng, lóng sī ióng-béng ê chiàn-sū, gâu sio-chiàn, pang-chān ông kong-kek tùi-te̍k.

14O͘-se-a ūi-tio̍h choân-kun chún-pī tún-pâi, chhiuⁿ, thâu-khoe, chiàn-kah, kap keng, í-ki̍p beh hìⁿ ê chio̍h.

15I koh tī Iâ-lō͘-sat-léng chhiáⁿ gâu ê sai-hū siat-kè ki-khì, an tī siâⁿ-lâu kap siâⁿ-chhiûⁿ ê oat-kak, ēng lâi siā-chìⁿ, hìⁿ tōa tè chio̍h. O͘-se-a ê miâ-siaⁿ thoân kàu chin hn̄g, kok-ka chin kiông-sēng, in-ūi Siōng-tè pang-chān i.

16O͘-se-a kiông-sēng liáu-āu sim chiū kiau-ngō͘, tì-kàu soe-pāi, tek-chōe Siōng Chú — i ê Siōng-tè. I ji̍p-khì Siōng Chú ê sèng-tiān, beh tī hiuⁿ-tôaⁿ sio-hiuⁿ.

17Chè-si A-sat-lī-ngá chhōa Siōng Chú ióng-kám ê chè-si poeh-cha̍p lâng tè O͘-se-a ji̍p--khì,

18chó͘-tòng ông, kā i kóng, “ O͘-se-a, sio-hiuⁿ hō͘ Siōng Chú m̄-sī lí eng-kai chòe ê tāi-chì, sī chè-si A-lûn ê hō͘-tāi siū hun-pia̍t lâi chòe ê chit-bū. Lí tio̍h tùi sèng-tiān chhut--khì, in-ūi lí í-keng hoān-chōe, lí bōe-tàng tit-tio̍h Chú Siōng-tè hō͘ lí ê chun-êng.”

19O͘-se-a chhiú the̍h hiuⁿ-lô͘ beh sio-hiuⁿ, chi̍t-ē thiaⁿ--tio̍h, chiū tùi khiā tī Siōng Chú tiān-lāi hiuⁿ-tôaⁿ piⁿ hiah-ê chè-si hoat siū-khì; hit-sî i ê thâu-hia̍h hut-jiân khí bâ-hong.

20Tōa-chè-si A-sat-lī-ngá kap só͘-ū ê chè-si khòaⁿ-tio̍h i thâu-hia̍h khí bâ-hong, chiū kā i kóaⁿ-chhut sèng-tiān, i ka-kī mā kóaⁿ-kín lī-khui, in-ūi Siōng Chú kàng chai-hō hō͘ i.

21O͘-se-a -ông tì-tio̍h bâ-hong kàu i sí ê ji̍t, i in-ūi bâ-hong siū keh-lī, bōe-tàng koh chìn-ji̍p Siōng Chú ê tiān. I ê kiáⁿ Iok-thán koán-lí ông-ka ê sū, tī-lí kok-chèng.

22O͘-se-a kî-tha ê sū-chek, tùi thâu kàu bé ū kì-chài tī A-mô͘-su ê kiáⁿ sian-ti Í-sài-a ê chheh.

23O͘-se-a tńg-khì i ê lia̍t-chó͘ hia; lâng kóng “I tì-tio̍h bâ-hong”, chiū chiong i an-chòng tī lia̍t-ông bōng-hn̂g piⁿ--á ê bōng-tōe. I ê kiáⁿ Iok-thán sòa-chiap i choh-ông.

← Chapter 25 Jump to: Chapter 27 →