2 Chronicles 36

Chinese TTVR (現代台語譯本羅馬字版)

← Chapter 35 Jump to:

1Iû-tāi jîn-bîn tī Iâ-lō͘-sat-léng siat-li̍p Iok-se-a ê kiáⁿ Iok-hap-su choh-ông, sòa-chiap i ê lāu-pē.

2Iok-hap-su chē-ūi ê sî jī-cha̍p-saⁿ hè, tī Iâ-lō͘-sat-léng choh-ông saⁿ ge̍h-ji̍t kú.

3Ai-ki̍p -ông tī Iâ-lō͘-sat-léng hòe-tû i ê ông-ūi, koh hoa̍t Iû-tāi -kok kim saⁿ-cha̍p-sì kong-kun, gûn saⁿ-chheng sì-pah kong-kun.

4Ai-ki̍p -ông siat-li̍p Iok-hap-su ê hiaⁿ-ko Í-lī-a-kèng chòe Iû-tāi kap Iâ-lō͘-sat-léng ê ông, kā i kái-miâ chòe Iok-ngá-kèng. Nî-ko kā Iok-hap-su lia̍h-khì Ai-ki̍p.

5Iok-ngá-kèng chē-ūi ê sî jī-cha̍p-gō͘ hè, tī Iâ-lō͘-sat-léng choh-ông cha̍p-it nî; i chòe Siōng Chú — i ê Siōng-tè khòaⁿ-chòe pháiⁿ ê sū.

6Pa-pí-lûn -ông Nî-pò͘-kah-nî-sat chiūⁿ-lâi kong-táⁿ i, ēng tâng-liān kā i liān--teh, kā i lia̍h-khì Pa-pí-lûn.

7Nî-pò͘-kah-nî-sat koh chiong Siōng Chú tiān-lāi ê khì-khū ūn-khì Pa-pí-lûn, hē tī Pa-pí-lûn i ê kiong-lāi.

8Iok-ngá-kèng kî-tha ê sū-chek, kap i só͘ chòe khó-ò͘ⁿ ê sū, í-ki̍p lâng tùi i ê chí-chek, lóng kì-chài tī Í-sek-lia̍t kap Iû-tāi Lia̍t-ông-sú. I ê kiáⁿ Iok-ngá-kun sòa-chiap i choh-ông.

9Iok-ngá-kun chē-ūi ê sî cha̍p-poeh hè, tī Iâ-lō͘-sat-léng choh-ông saⁿ kò-ge̍h koh cha̍p ji̍t; i chòe Siōng Chú khòaⁿ-chòe pháiⁿ ê sū.

10Keh-tńg-nî, Nî-pò͘-kah-nî-sat phài lâng chiong i kap Siōng Chú tiān-lāi hiah-ê pó-pòe ê khì-khū tòa kàu Pa-pí-lûn, jiân-āu siat-li̍p i ê a-chek Se-tí-ka chòe Iû-tāi kap Iâ-lō͘-sat-léng ê ông.

11Se-tí-ka chē-ūi ê sî jī-cha̍p-it hè, tī Iâ-lō͘-sat-léng choh-ông cha̍p-it nî.

12I chòe Siōng Chú — i ê Siōng-tè khòaⁿ-chòe pháiⁿ ê sū; i bô khiam-pi thiaⁿ-thàn sian-ti Iâ-lī-bí só͘ thoân-ta̍t Siōng Chú ê ōe.

13Nî-pò͘-kah-nî-sat -ông bat kiông-pek Se-tí-ka kí Siōng-tè chiù-chōa tùi i tiong-sêng, m̄-kú Se-tí-ka pōe-poān i. Se-tí-ka kò͘-chip ngī-sim, m̄-khéng kui-ǹg Siōng Chú — Í-sek-lia̍t ê Siōng-tè.

14Koh hiah-ê chè-si-tiúⁿ kap jîn-bîn mā hoān tōa-chōe, o̍h gōa-pang khó-ò͘ⁿ ê sū, phah lâ-sâm Siōng Chú tī Iâ-lō͘-sat-léng hun-pia̍t-choh-sèng ê sèng-tiān.

15Siōng Chú — in lia̍t-chó͘ ê Siōng-tè lîn-bín I ê chú-bîn kap I khiā-khí ê só͘-chāi, put-toān phài sù-chiá khì I ê chú-bîn hia,

16m̄-kú in thí-chhiò Siōng-tè ê sù-chiá, biáu-sī I ê ōe, ki-chhì I ê sian-ti, tì-kàu Siōng Chú tùi I ê chú-bîn hoat tōa siū-khì, hō͘ in bô hoat-tō͘ tit-tio̍h kái-kiù.

17Só͘-í, Siōng-tè chhōa Pa-pí-lûn -ông lâi kong-kek in, tī sèng-tiān ēng to thâi-sí siàu-liân-lâng, bô lîn-bín in ê siàu-lâm kap siàu-lú, lāu-lâng kap soe-jio̍k--ê; Siōng-tè chiong in lóng kau tī Pa-pí-lûn -ông ê chhiú.

18Pa-pí-lûn -ông koh chiong Siōng-tè tiān-lāi tōa-sòe ê khì-khū kap châi-pó, í-ki̍p ông kap hiah-ê siú-léng ê châi-pó, lóng tòa-khì Pa-pí-lûn.

19In koh sio Siōng-tè ê sèng-tiān, thiah-húi Iâ-lō͘-sat-léng ê siâⁿ-chhiûⁿ, ēng hé sio siâⁿ-lāi só͘-ū ê kiong-tiān, húi-hoāi pó-pòe ê khì-khū.

20Só͘-ū bô hō͘ lâng thâi--sí-ê, lóng siū-lia̍h khì Pa-pí-lûn, chòe Pa-pí-lûn -ông kap i ê kiáⁿ-sun ê lô͘-lē, ti̍t-kàu Pho-su -kok heng-khí.

21Chit-ê sū teh si̍t-hiān Siōng Chú thong-kè Iâ-lī-bí só͘ kóng ê ōe, thó͘-tōe beh hong-hòe tit-tio̍h an-hioh, kàu móa chhit-cha̍p nî.

22Pho-su hông-tè Sài-ló͘-sū goân-nî, Siōng Chú ūi-tio̍h beh si̍t-hiān I thong-kè Iâ-lī-bí ê chhùi só͘ kóng ê ōe, kám-tōng Pho-su hông-tè Sài-ló͘-sū, hō͘ i tùi choân-kok pan-pò͘ kóng,

23“ Pho-su hông-tè Sài-ló͘-sū án-ni kóng, ‘Siōng Chú — Thiⁿ-téng ê Siōng-tè chiong thian-hā bān-kok siúⁿ-sù góa, koh chí-phài góa tī Iû-tāi ê Iâ-lō͘-sat-léng ūi-tio̍h I khí sèng-tiān. Lín tiong-kan só͘-ū chòe I chú-bîn--ê thang tńg--khì. Goān Siōng Chú — in ê Siōng-tè kap in tông-chāi.’”

← Chapter 35 Jump to: