2 Chronicles 20

Chinese TTVR (現代台語譯本羅馬字版)

← Chapter 19 Jump to: Chapter 21 →

1Kè bô jōa kú, Mô͘-ap -lâng kap A-bûn -lâng, koh ū chi̍t-kóa Bí-o͘-nî -lâng, chòe-hé lâi beh kong-kek Iok-sa-hoat.

2Ū lâng lâi pò-kò Iok-sa-hoat kóng, “Tùi hái hit-pêng Í-tong hia ū tōa kun-tūi lâi kong-kek. In hiān-chāi tī Hap-sé-sùn Tha-má (chiū-sī Ún Ki-tí).”

3Iok-sa-hoat hui-siông kiaⁿ, koat-tēng beh khún-kiû Siōng Chú, soan-pò͘ Iû-tāi choân-tōe kìm-chia̍h.

4Iû-tāi -lâng chiū chū-chi̍p, kiû Siōng Chú pang-chān; Iû-tāi ta̍k-ê siâⁿ lóng ū lâng chhut-lâi chhē-kiû Siōng Chú.

5Iok-sa-hoat chiū tī Iû-tāi kap Iâ-lō͘-sat-léng ê tāi-hōe tiong, khiā tī Siōng Chú sèng-tiān sin ê tiâⁿ ê thâu-chêng,

6kî-tó kóng, “Siōng Chú — goán lia̍t-chó͘ ê Siōng-tè, lí kiám m̄-sī tī thiⁿ--ni̍h ê Siōng-tè? Lí kiám m̄-sī bān-pang bān-kok ê chú-cháiⁿ? Tī lí ê chhiú ū koân-lêng ū khùi-la̍t, bô chi̍t ê ōe-tàng tùi-khòng lí.

7Goán ê Siōng-tè, lí bat tī lí chú-bîn Í-sek-lia̍t -lâng ê bīn-chêng kóaⁿ-chhut chit-ê tōe ê chū-bîn, chiong chit-ê tōe éng-oán sù hō͘ lí ê pêng-iú A-pek-la-hán ê hō͘-tāi.

8In chiū tòa tī chit-ê tōe, koh ūi-tio̍h êng-iāu lí ê miâ tī chia khí sèng-tiān, kóng,

9‘Nā ū chai-hō lîm-kàu goán, bô-lūn sī to-kiàm, chek-hoa̍t, un-e̍k, ki-hng, goán beh khiā tī chit-keng sèng-tiān ê thâu-chêng, tī lí ê bīn-chêng ūi-tio̍h goán ê hoān-lān kiû-kiò lí; lí beh thiaⁿ lâi kái-kiù, in-ūi lí lîm-chāi tī chit-keng tiān.’

10“Chá-chêng, goán ê chó͘-sian chhut Ai-ki̍p -tōe ê sî, lí put-chún in chhim-hoān A-bûn -lâng, Mô͘-ap -lâng, kap Í-tong -lâng ê thó͘-tōe, goán ê chó͘-sian chiū se̍h tùi pa̍t-tiâu lō͘, bô kā in siau-bia̍t.

11Hiān-chāi, in lâi beh kóaⁿ-tio̍k goán lī-khui lí siúⁿ-sù hō͘ goán chòe sán-gia̍p ê thó͘-tōe; in kèng-jiân án-ni hôe-pò goán.

12Goán ê Siōng-tè ah, lí bô beh chek-hoa̍t in sī--bô? Goán bô khùi-la̍t thang tùi-khòng chiah-ê lâi kong-kek goán ê tōa kun-tūi, mā m̄ chai tio̍h án-chóaⁿ chòe, m̄-kú goán beh gióng-bōng lí.”

13Iû-tāi chèng-lâng, kap in ê sòe-hàn gín-á, in ê bó͘, in ê kiáⁿ-jî, lóng khiā tī Siōng Chú ê bīn-chêng.

14Hit-sî, Siōng Chú ê sîn tī tāi-hōe tiong lîm-kàu Ngá-hap-sek; i sī Lī-bī -lâng A-sat ê hō͘-tāi, Má-tha-nî ê goân-sun, Iâ-lī ê cheng-sun, Pí-ná-ngá ê sun, Sat-ka-lī-a ê kiáⁿ.

15I kóng, “ Iû-tāi chèng-lâng, Iâ-lō͘-sat-léng ê chū-bîn, kap Iok-sa-hoat -ông, tio̍h chù-ì thiaⁿ! Siōng Chú tùi lín án-ni kóng, ‘M̄-bián in-ūi chit-ê tōa kun-tūi kiaⁿ-hiâⁿ sit-táⁿ, in-ūi chiàn-cheng ê sèng-pāi put chāi-tī lín, sī chāi-tī Siōng-tè.

16Bîn-á-chài lín tio̍h lo̍h-khì gêng-chiàn; in tùi Sé-su Soaⁿ-phiâⁿ chiūⁿ--lâi, lín ōe tī Iâ-ló͘-i-le̍k khòng-iá thâu-chêng ê soaⁿ-kok-kháu tú-tio̍h in.

17Iû-tāi kap Iâ-lō͘-sat-léng -lâng, chit-piàn lín m̄-bián chhut-chhiú kau-chiàn; lín chí-ū pâi-tīn khiā--teh, khòaⁿ Siōng Chú án-chóaⁿ kái-kiù lín. M̄-bián kiaⁿ-hiâⁿ, m̄-bián sit-táⁿ! Bîn-á-chài chhut-khì gêng-chiàn, Siōng Chú ōe kap lín tông-chāi.’”

18Iok-sa-hoat àⁿ-thâu phak tī thô͘-kha; Iû-tāi chèng-lâng kap Iâ-lō͘-sat-léng ê chū-bîn mā phak tī Siōng Chú ê bīn-chêng, kèng-pài Siōng Chú.

19Ko-hat chong-cho̍k kap Khó-la chong-cho̍k ê Lī-bī -lâng lóng khiā--khí-lâi, ēng ke̍k-tōa ê siaⁿ chheng-chàn Siōng Chú — Í-sek-lia̍t ê Siōng-tè.

20Keh-ji̍t in chá-chá khí--lâi, chhut-khì Thê-ko-a ê khòng-iá; chhut-khì ê sî, Iok-sa-hoat khiā--teh, kóng, “ Iû-tāi -lâng kap Iâ-lō͘-sat-léng ê chū-bîn, thiaⁿ góa kóng, lín tio̍h sìn Siōng Chú — lín ê Siōng-tè, chiū ōe khiā-chāi; sìn I ê sian-ti chiū ōe tek-sèng.”

21I kap jîn-bîn chham-siông liáu-āu, chiū siat-li̍p chhiùⁿ-koa chheng-chàn Siōng Chú ê lâng, hō͘ in kiâⁿ tī kun-tūi ê thâu-chêng chheng-chàn sèng-kiat chun-kùi ê Siōng Chú, kóng, “Tio̍h kám-siā Siōng Chú, in-ūi i ê chû-ài sòa kàu éng-oán.”

22In chi̍t-ē chhiùⁿ-koa hoan-ho͘ ê sî, Siōng Chú phài bâi-ho̍k ê peng kong-kek hiah-ê lâi kong-táⁿ Iû-tāi ê A-bûn, Mô͘-ap, kap Í-tong -lâng; chiah-ê tùi-te̍k chiū siū phah-pāi.

23A-bûn kap Mô͘-ap -lâng kong-kek Í-tong -lâng, chiong in choân-pō͘ châu-bia̍t; châu-bia̍t Í-tong -lâng liáu-āu, in nn̄g cho̍k koh hō͘-siōng chân-sat.

24Iû-tāi -lâng kàu khòng-iá ê siú-bōng-tâi, beh khòaⁿ hiah-ê tōa kun-tūi; chi̍t-ē khòaⁿ, khòaⁿ-tio̍h sin-si tó kah móa-sì-kòe, bô chi̍t ê tô-thoat.

25Iok-sa-hoat kap i ê kun-peng lâi chhiau chiàn-lī-phín, chhē-tio̍h chin chōe cheng-siⁿ, châi-bu̍t, i-ho̍k, pó-pòe, chōe kah tòa bōe khì. In chhiúⁿ saⁿ ji̍t, in-ūi mi̍h-kiāⁿ chin chōe.

26Tē-sì ji̍t, in chū-chi̍p tī Pí-la-ka ê soaⁿ-kok; in tī hia chheng-chàn Siōng Chú, só͘-í hit só͘-chāi kiò-chòe Pí-la-ka Soaⁿ-kok, kàu kin-á-ji̍t.

27Iok-sa-hoat chhōa Iû-tāi kap Iâ-lō͘-sat-léng ê lâng hoaⁿ-hoaⁿ-hí-hí tò-khì Iâ-lō͘-sat-léng, in-ūi Siōng Chú hō͘ in thâi-iâⁿ tùi-te̍k.

28In tôaⁿ-khîm, tôaⁿ-sek, pûn lat-pah, lâi kàu Iâ-lō͘-sat-léng, chìn-ji̍p Siōng Chú ê sèng-tiān.

29Chiu-ûi lia̍t-kok thiaⁿ-kìⁿ Siōng Chú thâi-iâⁿ Í-sek-lia̍t ê tùi-te̍k, chiū chin kiaⁿ Siōng-tè.

30Án-ni Iok-sa-hoat ê kok thài-pêng, in-ūi i ê Siōng-tè sù i sù-kéng-pêng-an.

31Iok-sa-hoat chē-ūi ê sî saⁿ-cha̍p-gō͘ hè, tī Iâ-lō͘-sat-léng chòe Iû-tāi -ông jī-cha̍p-gō͘ nî; i ê lāu-bú kiò-chòe A-so͘-pa, sī Sī-lī-hi ê cha-bó͘-kiáⁿ.

32Iok-sa-hoat kiâⁿ i lāu-pē A-sat ê lō͘, lóng bô phian-lī, chòe Siōng Chú khòaⁿ-chòe hó ê sū.

33M̄-kú soaⁿ-thâu-tôaⁿ iáu-bē hòe-tû, jîn-bîn mā iáu-bē kian-sim koat-ì kui-ǹg in lia̍t-chó͘ ê Siōng-tè.

34Iok-sa-hoat kî-tha ê sū-chek, tùi thâu kàu bé lóng kì-chài tī Hap-ná-nî ê kiáⁿ Iâ-hō͘ ê chheh; chit-pún chheh mā siu tī Í-sek-lia̍t Lia̍t-ông-sú.

35Āu-lâi, Iû-tāi -ông Iok-sa-hoat kap chok-ok-to-toan ê Í-sek-lia̍t -ông A-hap-siā kiat-bêng.

36Nn̄g ê ông chòe-hé tī Í-sûn Ka-pia̍t chō-chûn beh khì Tha-si.

37Hit-sî, Má-lī-sa -lâng To-tāi-óa ê kiáⁿ Í-lī-í-siā, kóng ū-giân kong-kek Iok-sa-hoat, “In-ūi lí kap A-hap-siā kiat-bêng, Siōng Chú beh phò-hoāi lí chō ê chûn.” Chûn kó-jiân sit-sū, bōe-tàng khì Tha-si.

← Chapter 19 Jump to: Chapter 21 →