2 Chronicles 29

Chinese TTVR (現代台語譯本羅馬字版)

← Chapter 28 Jump to: Chapter 30 →

1Hi-se-ka chē-ūi ê sî jī-cha̍p-gō͘ hè, tī Iâ-lō͘-sat-léng choh-ông jī-cha̍p-káu nî; i ê lāu-bú kiò-chòe A-pí-ngá, sī Sat-ka-lī-a ê cha-bó͘-kiáⁿ.

2Hi-se-ka chòe Siōng Chú khòaⁿ-chòe hó ê sū, chiàu i ê chó͘-sian Tāi-pi̍t it-chhè ê só͘-chòe.

3Hi-se-ka choh-ông hit-nî ê chiaⁿ--ge̍h, i khui Siōng Chú sèng-tiān ê mn̂g, chìn-hêng chéng-siu ê kang-chok.

4I tiàu-chi̍p hiah-ê chè-si kap Lī-bī -lâng lâi sèng-tiān tang-pêng ê kóng-tiûⁿ,

5tùi in kóng, “ Lī-bī -lâng, thiaⁿ góa kóng. Lín tio̍h ka-kī sèng-hòa kui Siōng Chú, mā tio̍h chiong Siōng Chú — lín lia̍t-chó͘ ê Siōng-tè ê tiān hun-pia̍t-choh-sèng, chiong sèng-tiān só͘-ū ê ù-òe piàⁿ chheng-khì.

6In-ūi lán ê chó͘-sian ū hoān-chōe, chòe Siōng Chú — lán ê Siōng-tè khòaⁿ-chòe pháiⁿ ê sū, khì-sak I, bô tì-ì Siōng Chú khiā-khí ê só͘-chāi.

7In koh koaiⁿ sèng-tiān cháu-lông ê mn̂g, bô tiám teng-hé, bô tī sèng-só͘ sio-hiuⁿ, bô hiàn sio-hòa-chè hō͘ Siōng Chú — Í-sek-lia̍t ê Siōng-tè.

8Só͘-í Siōng Chú ê tōa siū-khì lîm-kàu Iû-tāi kap Iâ-lō͘-sat-léng, hō͘ in siū lâng thí-chhiò, hō͘ lâng kiaⁿ-hiâⁿ, kám-kak khióng-pò͘, chhin-chhiūⁿ lín chhin-ba̍k khòaⁿ--tio̍h-ê án-ni.

9Só͘-í, lán ê chó͘-sian hō͘ lâng thâi-sí, lán ê bó͘-kiáⁿ mā hō͘ lâng lia̍h--khì.

10Hiān-chāi, góa koat-tēng beh kap Siōng Chú — Í-sek-lia̍t ê Siōng-tè li̍p-iok, hō͘ I bô koh tùi lán hoat tōa siū-khì.

11Góa ê kiáⁿ ah, m̄-thang koh pàng-gōa-gōa, in-ūi Siōng Chú ū kéng-soán lín khiā tī I ê bīn-chêng ho̍k-sāi, tùi I sio-hiuⁿ hiàn-chè.”

12Tùi án-ni, ē-bīn chiah-ê Lī-bī -lâng lóng khí--lâi: Ko-hat chong-cho̍k: A-má-sài ê kiáⁿ Má-hap kap A-sat-lī-ngá ê kiáⁿ Iok-ní Bí-la-lī chong-cho̍k: A-pek-tí ê kiáⁿ Ki-sū kap Iâ-hap-lī-le̍k ê kiáⁿ A-sat-lī-ngá Kek-sūn chong-cho̍k: Sin-má ê kiáⁿ Iok-a kap Iok-a ê kiáⁿ I-tiân

13Í-lī-sat-hoán chong-cho̍k: Sin-lī kap Iâ-lī A-sat chong-cho̍k: Sat-ka-lī-a kap Má-tha-nî

14Hi-bān chong-cho̍k: Iâ-hiat kap Sī-múi Iâ-tō͘-tùn chong-cho̍k: Sī-má-ngá kap O͘-siat

15In chio-chi̍p in ê chhin-cho̍k kiat-chēng ka-kī, chiàu ông ê bēng-lēng, kun-kù Siōng Chú ê ōe, ji̍p-khì kiat-chēng Siōng Chú ê tiān.

16Chè-si chiū ji̍p-khì kiat-chēng Siōng Chú ê sèng-tiān, chiong tiān-lāi só͘-ū ù-òe ê mi̍h tòa chhut-khì Siōng Chú sèng-tiān ê tiâⁿ; Lī-bī -lâng poaⁿ chiah-ê mi̍h khì hiat tī Khip-lûn Khoe-kok.

17Kiat-chēng sèng-tiān ê kang-chok tùi chiaⁿ-ge̍h chhoe-it khai-sí, chhoe-poeh chheng kàu Siōng Chú sèng-tiān ê cháu-lông. In koh ēng poeh ji̍t kè-sio̍k kiat-chēng Siōng Chú ê tiān, kàu chiaⁿ-ge̍h cha̍p-la̍k chiū oân-sêng.

18Tùi án-ni, Lī-bī -lâng chiū khì pò-kò Hi-se-ka -ông, kóng, “Goán í-keng chiong Siōng Chú kui-keng sèng-tiān, hiàn sio-hòa-chè ê chè-tôaⁿ kap tôaⁿ só͘-ū ê khì-khū, khǹg hiàn-chè ê piáⁿ ê toh kap só͘-ū ê khì-khū, lóng kiat-chēng oân-sêng.

19A-hap-su choh-ông hoān-chōe ê sî só͘ khì-sak ê khì-khū, goán lóng têng-sin khoán hó-sè, sèng-hòa kui Siōng Chú. Hiān-chāi lóng pâi tī Siōng Chú chè-tôaⁿ ê thâu-chêng.”

20Hi-se-ka -ông thàu-chá khí--lâi, tiàu-chi̍p siâⁿ-lāi ê léng-siù lóng lâi Siōng Chú ê tiān.

21In khan chhit chiah gû-káng, chhit chiah mî-iûⁿ-káng, chhit chiah iûⁿ-ko, chhit chiah soaⁿ-iûⁿ-káng, beh ūi-tio̍h kok-ka, sèng-tiān, kap Iû-tāi jîn-bîn hiàn chòe sio̍k-chōe-chè. Ông bēng-lēng A-lûn ê hō͘-tāi hiah-ê chè-si, chiong chiah-ê cheng-siⁿ hiàn tī Siōng Chú ê chè-tôaⁿ.

22Chè-si seng thâi gû-káng, chiah thâi mî-iûⁿ-káng, koh thâi iûⁿ-ko, chiong múi chi̍t chiah ê huih hiù tī tôaⁿ--ni̍h.

23Chòe-āu, in chiong beh hiàn-chòe sio̍k-chōe-chè ê soaⁿ-iûⁿ-káng, khan-lâi ông kap hōe-chiòng ê bīn-chêng; ông kap hōe-chiòng chiū hōaⁿ-chhiú tī hit téng-bīn.

24Chè-si thâi hiah-ê soaⁿ-iûⁿ-káng, ēng in ê huih chòe sio̍k-chōe-chè hiàn tī tôaⁿ--ni̍h, ūi Í-sek-lia̍t chèng-lâng sio̍k-chōe; án-ni in chiàu ông ê bēng-lēng ūi Í-sek-lia̍t chèng-lâng hiàn sio-hòa-chè kap sio̍k-chōe-chè.

25Hi-se-ka chiàu Siōng Chú thong-kè Tāi-pi̍t -ông, ông ê sian-kiàn Ka-tek, kap sian-ti Ná-tan ê chí-sī, chiū-sī chiàu Siōng Chú thong-kè chèng sian-ti só͘ hoan-hù--ê, phài Lī-bī -lâng the̍h poa̍h, khîm, sek tī Siōng Chú ê tiān.

26Lī-bī -lâng the̍h Tāi-pi̍t ê ga̍k-khì, chè-si gia̍h lat-pah, chòe-hé khiā--teh.

27Hi-se-ka bēng-lēng tī chè-tôaⁿ hiàn sio-hòa-chè. Sio-hòa-chè chi̍t-ē hiàn, in chiū chhiùⁿ chheng-chàn Siōng Chú ê koa, ēng lat-pah, ēng Í-sek-lia̍t -ông Tāi-pi̍t ê ga̍k-khì phōaⁿ-chàu.

28Hōe-chiòng lóng kèng-pài, chhiùⁿ-koa--ê gîm-si, pûn lat-pah--ê phōaⁿ-chàu, it-ti̍t kàu hiàn sio-hòa-chè kiat-sok.

29Hiàn-chè kiat-sok, ông kap só͘-ū chāi-tiûⁿ ê lâng lóng ǹg Siōng Chú phak-pài.

30Hi-se-ka -ông kap hiah-ê léng-siù koh bēng-lēng Lī-bī -lâng, ēng Tāi-pi̍t kap sian-kiàn A-sat ê si chheng-chàn Siōng Chú; in chiū hoaⁿ-hoaⁿ-hí-hí siōng-chàn, àⁿ-thâu kèng-pài Siōng Chú.

31Hi-se-ka tùi hōe-chiòng kóng, “Lín í-keng sèng-hòa kui Siōng Chú, tio̍h chìn-chêng lâi, tòa chè-mi̍h kap siā-un-chè kàu Siōng Chú ê tiān.” Hōe-chiòng chiū tòa chè-mi̍h kap siā-un-chè lâi; mā ū lâng kam-sim lo̍k-ì tòa sio-hòa-chè lâi.

32Hōe-chiòng só͘ hiàn ê sio-hòa-chè ū gû-káng chhit-cha̍p chiah, mî-iûⁿ-káng chi̍t-pah chiah, iûⁿ-ko nn̄g-pah chiah, chiah-ê lóng chòe sio-hòa-chè hiàn hō͘ Siōng Chú.

33Koh ū hun-pia̍t-choh-sèng ê mi̍h, gû-káng la̍k-pah chiah, mî-iûⁿ saⁿ-chheng chiah.

34M̄-kú chè-si siuⁿ chió, bōe-tàng pak só͘-ū sio-hòa-chè cheng-siⁿ ê phê, só͘-í in ê chhin-cho̍k Lī-bī -lâng pang-chān in kàu hiàn-chè ê sū kiat-sok, koh thèng-hāu hiah-ê chè-si kiat-chēng ka-kī. (Tùi kiat-chēng ka-kī ê sū, Lī-bī -lâng pí chè-si khah téng-chin.)

35Sio-hòa-chè kap pêng-an-chè ê iû, í-ki̍p kap sio-hòa-chè chòe-hé hiàn ê tiān-chiú-chè chin chōe. Án-ni, Siōng Chú tiān-lāi kèng-pài ê sū koh-chài hôe-ho̍k.

36Hi-se-ka kap choân-thé jîn-bîn lóng chin hoaⁿ-hí, in-ūi Siōng-tè pang-chān in, hō͘ in chin kín oân-sêng chit-ê sū.

← Chapter 28 Jump to: Chapter 30 →