2 Chronicles 12

Chinese TTVR (現代台語譯本羅馬字版)

← Chapter 11 Jump to: Chapter 13 →

1Lô-pho-an ê ông-kok chi̍t-ē ún-kò͘ kiông-sēng, i chiū khì-sak Siōng Chú ê lu̍t-hoat, só͘-ū ê Í-sek-lia̍t -lâng mā lóng tè i.

2Lô-pho-an -ông tē-gō͘ nî, Ai-ki̍p -ông Sī-sat chiūⁿ-lâi kong-kek Iâ-lō͘-sat-léng, in-ūi Í-sek-lia̍t -lâng tek-chōe Siōng Chú.

3Sī-sat ū chiàn-chhia chi̍t-chheng nn̄g-pah tâi, bé-peng la̍k-bān; koh chhōa Lī-pí-a -lâng, So͘-ki -lâng, Kó͘-si̍t -lâng, tùi Ai-ki̍p chiūⁿ--lâi, lâng chōe kah sǹg bōe liáu.

4I kong-chhú Iû-tāi kian-kò͘ ê siâⁿ, lâi kàu Iâ-lō͘-sat-léng.

5Hit-sî, Iû-tāi ê léng-siù in-ūi Sī-sat ê iân-kò͘, tī Iâ-lō͘-sat-léng chū-chi̍p; sian-ti Sī-má-ngá lâi kìⁿ Lô-pho-an kap hiah-ê léng-siù, tùi in kóng, “Siōng Chú án-ni kóng, ‘Lín khì-sak góa, só͘-í góa khì-sak lín, chiong lín kau tī Sī-sat ê chhiú.’”

6Í-sek-lia̍t hiah-ê léng-siù kap ông chiū khiam-pi jīn-chōe, kóng, “Siōng Chú sī kong-gī.”

7Siōng Chú khòaⁿ-kìⁿ in ka-kī khiam-pi, Siōng Chú ê ōe lîm-kàu Sī-má-ngá kóng, “In kì-jiân khiam-pi jīn-chōe, góa bô beh châu-bia̍t in, beh hō͘ in chiām-sî tit-tio̍h kái-kiù; góa bô beh thong-kè Sī-sat ê chhiú chiong góa ê siū-khì piàⁿ-lo̍h tī Iâ-lō͘-sat-léng.

8M̄-kú in ōe chòe Sī-sat ê lô͘-po̍k, hō͘ in chai, ho̍k-sāi góa kap ho̍k-sāi tōe-chiūⁿ lia̍t-kok ū sím-mi̍h bô sio-siâng.”

9Tùi án-ni, Ai-ki̍p -ông Sī-sat chiūⁿ-lâi kong-kek Iâ-lō͘-sat-léng, chiong Siōng Chú sèng-tiān kap ông-kiong ê pó-mi̍h lóng chhiúⁿ--khì, koh chhiúⁿ Só͘-lô-bûn só͘ chòe hiah-ê kim ê tún-pâi.

10Lô-pho-an -ông chòe tâng ê tún-pâi tāi-thòe hiah-ê kim ê tún-pâi, kau hō͘ kò͘ ông-kiong tōa-mn̂g ê sī-ōe-tiúⁿ kò͘-siú.

11Ông ta̍k-piàn ji̍p Siōng Chú ê tiān, sī-ōe chiū giâ chiah-ê tún-pâi, āu-lâi koh tòa tò-tńg hē tī sī-ōe-sek.

12Ông ka-kī khiam-pi ê sî, Siōng Chú chiū bô koh siū-khì, bô oân-choân kā i châu-bia̍t; Iû-tāi ê chêng-hêng mā ū kái-siān.

13Lô-pho-an tī Iâ-lō͘-sat-léng choh-ông, ka-kiông i ê thóng-tī. Lô-pho-an chē-ūi ê sî sì-cha̍p-it hè. I tī Iâ-lō͘-sat-léng choh-ông cha̍p-chhit nî; Iâ-lō͘-sat-léng sī Siōng Chú tùi Í-sek-lia̍t chèng chi-cho̍k tiong kéng-soán hō͘ lâng lâi kèng-pài I ê siâⁿ. Lô-pho-an ê lāu-bú kiò-chòe Ná-má, sī A-bûn -lâng.

14Lô-pho-an chòe siâ-ok ê sū; i bô kian-koat chhē-kiû Siōng Chú.

15Lô-pho-an ê sū-chek, tùi thâu kàu bé lóng kì-chài tī sian-ti Sī-má-ngá kap sian-kiàn E̍k-to ê Giân-hêng-lio̍k. Lô-pho-an kap Iâ-lô-pho-an siông-siông kau-chiàn.

16Lô-pho-an tńg-khì i ê lia̍t-chó͘ hia, lâng kā i an-chòng tī Tāi-pi̍t -siâⁿ; i ê kiáⁿ A-pí-ngá sòa-chiap i choh-ông.

← Chapter 11 Jump to: Chapter 13 →