2 Chronicles 23

Chinese TTVR (現代台語譯本羅馬字版)

← Chapter 22 Jump to: Chapter 24 →

1Tē-chhit nî, Iâ-hô-iâ-tāi ióng-kám chhái-chhú hêng-tōng; tiàu-chi̍p chhōa chi̍t-pah ê peng ê kun-koaⁿ Iâ-lô-hán ê kiáⁿ A-sat-lī-ngá, Iok-hap-lân ê kiáⁿ Í-si̍t-má-lī, Gô-pī-tek ê kiáⁿ A-sat-lī-ngá, A-tāi-ngá ê kiáⁿ Má-se-ngá, Sè-ki-lī ê kiáⁿ Í-lī-sa-hoat, lâi kap i li̍p-iok.

2In kiâⁿ-thàu Iû-tāi, tùi Iû-tāi hiah-ê siâⁿ chū-chi̍p Lī-bī -lâng kap Í-sek-lia̍t ta̍k chong-cho̍k ê cho̍k-tiúⁿ lâi Iâ-lō͘-sat-léng.

3Só͘-ū ê hōe-chiòng tī Siōng-tè ê tiān kap ông li̍p-iok. Iâ-hô-iâ-tāi tùi in kóng, “Lín khòaⁿ, ông ê kiáⁿ tī chia! Chiàu Siōng Chú tùi Tāi-pi̍t hō͘-tāi ê èng-ún, i it-tēng tio̍h choh-ông.

4Taⁿ, lín tio̍h án-ni chòe: Lín chiah-ê chè-si kap Lī-bī -lâng, tī An-hioh-ji̍t ti̍t-pan ê sî, tio̍h saⁿ-hūn-chi̍t kò͘-siú sèng-tiān só͘-ū ê mn̂g,

5saⁿ-hūn-chi̍t kò͘-siú ông-kiong, saⁿ-hūn-chi̍t kò͘-siú Kun-ki-mn̂g; hōe-chiòng lóng tio̍h tī Siōng Chú sèng-tiān ê tiâⁿ.

6Só͘-ū ê jîn-bîn lóng m̄-thang chìn-ji̍p Siōng Chú ê tiān; chí-ū chè-si kap teh ho̍k-sāi ê Lī-bī -lâng thang ji̍p--khì, in-ūi in ū sèng-hòa kui Siōng Chú. Só͘-ū ê jîn-bîn tio̍h chun-siú Siōng Chú ê bēng-lēng.

7Lī-bī -lâng tio̍h tòa kun-khì, tī ông ê sì-ûi pó-hō͘; só͘-ū chìn-ji̍p sèng-tiān ê lâng tio̍h hō͘ i sí; ông bô-lūn tī tó-ūi, lín lóng tio̍h kun-sûi pó-hō͘ i.”

8Lī-bī -lâng kap Iû-tāi chèng-lâng, lóng chiàu chè-si Iâ-hô-iâ-tāi ê bēng-lēng khì chòe; ta̍k-ê lâng tòa in ê pō͘-hā, bô-lūn An-hioh-ji̍t ti̍t-pan á-sī bô ti̍t-pan ê lâng lóng lâi; in-ūi chè-si Iâ-hô-iâ-tāi m̄-chún in lī-khui.

9Chè-si Iâ-hô-iâ-tāi chiū chiong khǹg tī Siōng-tè sèng-tiān lāi-bīn Tāi-pi̍t -ông ê chhiuⁿ kap tōa sòe tún-pâi, kau hō͘ hiah-ê koán chi̍t-pah ê peng ê kun-koaⁿ.

10Iâ-hô-iâ-tāi koh chiong kun-khì pun hō͘ jîn-bîn; in tī chè-tôaⁿ kap sèng-tiān hia, tùi tiān ê lâm-pêng kàu pak-pêng, khiā tī ông ê sì-ûi pó-hō͘.

11In chiū chhōa Iok-a-si chhut--lâi, kā i tì ông-koan, chiong iú-koan ông-koân ê iok-su kau hō͘ i; Iâ-hô-iâ-tāi kap i hiah-ê kiáⁿ kā i boah-iû, siat-li̍p i choh-ông; in hoah kóng, “Goān ông bān-sòe!”

12A-tha-lī-ngá thiaⁿ-tio̍h jîn-bîn ná cháu ná o-ló ông ê siaⁿ, chiū khì kàu chū-chi̍p tī Siōng Chú sèng-tiān ê jîn-bîn hia,

13khòaⁿ-tio̍h ông khiā tī sèng-tiān ji̍p-kháu ê thiāu-piⁿ, koaⁿ-tiúⁿ kap pûn lat-pah ê lâng khiā tī ông ê piⁿ--á; kok-lāi ê jîn-bîn lóng hoaⁿ-hí, pûn lat-pah; koh ū chhiùⁿ-koa--ê, ēng ta̍k-khoán ê ga̍k-khì chhōa jîn-bîn chhiùⁿ-koa o-ló. A-tha-lī-ngá chiū thiah-li̍h i ê saⁿ, hoah kóng, “Chō-hoán lah, chō-hoán lah!”

14Chè-si Iâ-hô-iâ-tāi chhōa hiah-ê koán chi̍t-pah ê peng ê kun-koaⁿ chhut--lâi, in-ūi i m̄-ài ū lâng tī Siōng Chú ê sèng-tiān hō͘ lâng thâi-sí, chiū tùi in kóng, “Kā i tùi tūi-ngó͘ ê tiong-kan kóaⁿ--chhut-khì; beh tè--i-ê, tio̍h hō͘ i sí.”

15In siám-khui siang-pêng hō͘ A-tha-lī-ngá kè--khì; i kàu chìn-ji̍p ông-kiong ê Bé-mn̂g, chiū tī hia hō͘ lâng thâi-sí.

16Iâ-hô-iâ-tāi kap ông í-ki̍p jîn-bîn chòe-hé li̍p-iok, beh chòe Siōng Chú ê chú-bîn.

17Tùi án-ni, choân-kok ê jîn-bîn lóng kā Pa-le̍k ê biō thiah-húi, phah-chhùi chè-tôaⁿ kap ngó͘-siōng, koh tī tôaⁿ-chêng phah-sí Pa-le̍k ê chè-si Má-thán.

18Iâ-hô-iâ-tāi phài Lī-bī -lâng chòe chè-si--ê hū-chek kò͘-siú Siōng Chú ê sèng-tiān. Chiah-ê chè-si sī chiàu Tāi-pi̍t í-chêng ê kui-tēng, teh hū-chek Siōng Chú sèng-tiān ê chit-bū; chiàu Mô͘-se ê lu̍t-hoat, hoaⁿ-hí chheng-chàn, ǹg Siōng Chú hiàn sio-hòa-chè.

19I mā phài lâng kò͘-siú Siōng Chú sèng-tiān ta̍k-ê mn̂g; bô-lūn sím-mi̍h iân-kò͘, lé-gî-siōng bô chheng-khì ê lâng lóng bōe-ēng-tit ji̍p--khì.

20Iâ-hô-iâ-tāi koh chhōa kun-koaⁿ kap kùi-cho̍k, bîn-kan ê siú-léng kap choân-kok jîn-bîn, chhiáⁿ ông tùi Siōng Chú ê sèng-tiān lo̍h--lâi; tùi chiàⁿ-mn̂g chìn-ji̍p ông-kiong, hō͘ i chē ông-ūi.

21Choân-kok jîn-bîn lóng hoaⁿ-hí khoài-lo̍k, choân-siâⁿ lóng pêng-chēng; A-tha-lī-ngá í-keng hō͘ lâng thâi-sí.

← Chapter 22 Jump to: Chapter 24 →