2 Chronicles 14

Chinese TTVR (現代台語譯本羅馬字版)

← Chapter 13 Jump to: Chapter 15 →

1A-pí-ngá tńg-khì i ê lia̍t-chó͘ hia, lâng kā i an-chòng tī Tāi-pi̍t -siâⁿ; i ê kiáⁿ A-sat sòa-chiap i choh-ông. A-sat chāi-ūi ê sî, choân-kok thài-pêng cha̍p nî kú.

2A-sat chòe Siōng Chú — i ê Siōng-tè khòaⁿ-chòe hó, khòaⁿ-chòe chèng-ti̍t ê sū.

3I hòe-tû gōa-pang sîn-bêng ê tôaⁿ kap soaⁿ-thâu-tôaⁿ, húi-hoāi chio̍h-thiāu, chhò A-sià-la lú-sîn ê thiāu-siōng,

4koh bēng-lēng Iû-tāi -lâng chhē-kiû Siōng Chú — in lia̍t-chó͘ ê Siōng-tè, chun-thàn I ê lu̍t-hoat kài-bēng;

5koh tī Iû-tāi ta̍k-ê siâⁿ hòe-tû soaⁿ-thâu-tôaⁿ kap hiuⁿ-tâi. Tī A-sat tī-lí ê sî, Iû-tāi -kok tit-tio̍h thài-pêng.

6I tī Iû-tāi khí kúi-nā chō kian-kò͘ ê siâⁿ, in-ūi kok-ka thài-pêng. Tī hit kúi nî lóng bô chiàn-cheng, in-ūi Siōng Chú sù i pêng-an.

7I tùi Iû-tāi -lâng kóng, “Lán tio̍h lâi kiông-hòa chiah-ê siâⁿ, sì-ûi khí chhiûⁿ kap siâⁿ-lâu, an siâⁿ-mn̂g kap mn̂g-chhòaⁿ. In-ūi lán ū chhē-kiû Siōng Chú — lán ê Siōng-tè, chit-tè thó͘-tōe iáu-sī lán ê; lán ū kiû-kiò Siōng Chú, I chiū sù lán sù-kéng-pêng-an.” In chiū siu-chō chiah-ê siâⁿ, sū-sū lóng sūn-lī.

8A-sat ê kun-peng, giâ tún-pâi kap chhiuⁿ ê Iû-tāi -lâng ū saⁿ-cha̍p-bān, giâ tún-pâi khui-keng ê Piān-ngá-bín -lâng jī-cha̍p-poeh-bān; in lóng sī kiông-béng ê ióng-sū.

9Kó͘-si̍t -ông Siā-la chhōa kun-peng chi̍t-pah-bān, chiàn-chhia saⁿ-pah tâi, lâi kong-kek Iû-tāi; in lâi kàu Má-lī-sa.

10A-sat chhut-khì gêng-chiàn, siang-hong tī Má-lī-sa ê Sé-hoat Soaⁿ-kok pâi-tīn.

11A-sat kiû-kiò Siōng Chú — i ê Siōng-tè kóng, “Siōng Chú ah, lí ōe-tàng pang-chān jio̍k-siáu--ê, mā ōe-tàng pang-chān kiông-tāi--ê. Siōng Chú — goán ê Siōng-tè ah, kiû lí pang-chān goán, in-ūi goán óa-khò lí, koh hōng lí ê miâ beh kap hiah-ê kiông-tāi ê kun-tūi kau-chiàn. Siōng Chú, lí sī goán ê Siōng-tè, m̄-thang hō͘ lâng khah iâⁿ lí.”

12Siōng Chú chiū phah Kó͘-si̍t -lâng, hō͘ in tùi A-sat kap Iû-tāi -lâng ê bīn-chêng tô-cháu.

13A-sat kap i ê kun-peng tui-jip in, ti̍t-kàu Ki-la-ní; Kó͘-si̍t -lâng sí-siong chin chōe, kun-le̍k bōe-tàng koh ho̍k-goân, in-ūi in hō͘ Siōng Chú kap I ê kun-tūi oân-choân phah-pāi. Iû-tāi -lâng tit-tio̍h chin chōe chiàn-lī-phín.

14In koh kong-táⁿ Ki-la-ní chiu-ûi ê siâⁿ, in-ūi hiah-ê siâⁿ ê lâng lóng chin kiaⁿ Siōng Chú. Iû-tāi ê kun-tūi chhiúⁿ hia só͘-ū ê siâⁿ, in-ūi siâⁿ-lāi châi-bu̍t chin chōe.

15In phò-hoāi cheng-siⁿ ê tiâu, chhiúⁿ chin chōe iûⁿ kap lo̍k-tô, chiū tò-khì Iâ-lō͘-sat-léng.

← Chapter 13 Jump to: Chapter 15 →