2 Chronicles 31

Chinese TTVR (現代台語譯本羅馬字版)

← Chapter 30 Jump to: Chapter 32 →

1Chiah-ê tāi-chì kiat-sok liáu, tī hia ê Í-sek-lia̍t chèng-lâng chiū chhut--khì, khì Iû-tāi ta̍k-ê siâⁿ phah-chhùi chio̍h-thiāu-siōng, kòng-tn̄g A-sià-la lú-sîn ê thiāu-siōng; koh tī Iû-tāi, Piān-ngá-bín, Í-hoat-liân, kap Má-ná-se tōe-khu, thiah-húi só͘-ū ê soaⁿ-thâu-tôaⁿ kap chè-tôaⁿ. Liáu-āu, Í-sek-lia̍t chèng-lâng chiū tò-khì ka-kī ê só͘-chāi.

2Hi-se-ka chiàu ta̍k-ê chè-si kap Lī-bī -lâng ê chit-bū têng-sin cho͘-chit in ê pan-chhù, hō͘ in thang hiàn sio-hòa-chè kap pêng-an-chè, koh tī Siōng Chú sèng-tiān ê mn̂g-lāi ho̍k-sāi, kám-siā, siōng-chàn.

3Ông koh tùi i ê sán-gia̍p hōng-hiàn gû iûⁿ chòe sio-hòa-chè; chiū-sī tī ta̍k-ji̍t chá-àm, An-hioh-ji̍t, múi ge̍h chhoe-it, kap choeh-kî, chiàu Siōng Chú lu̍t-hoat ê kui-tēng hiàn sio-hòa-chè.

4Hi-se-ka bēng-lēng Iâ-lō͘-sat-léng ê chū-bîn kiong-kip chè-si kap Lī-bī -lâng eng-kai tit--tio̍h ê hūn-gia̍h, hō͘ in choan-sim chip-hêng Siōng Chú lu̍t-hoat ê kui-tēng.

5Bēng-lēng chi̍t-ē chhut, Í-sek-lia̍t -lâng chiū tòa chin chōe thâu-chúi ê ngó͘-kok, chiú, iû, bi̍t, kap hn̂g--ni̍h ê chhut-sán lâi; koh tòa ta̍k-hāng mi̍h ê cha̍p-hūn-chi̍t lâi, sò͘-liōng chin chōe.

6Tòa tī Iû-tāi ê siâⁿ ê Í-sek-lia̍t -lâng kap Iû-tāi -lâng, mā khan gû iûⁿ ê cha̍p-hūn-chi̍t lâi; koh tùi sèng-hòa kui Siōng Chú — in ê Siōng-tè ê mi̍h the̍h cha̍p-hūn-chi̍t, thia̍p chi̍t-tui chi̍t-tui.

7Tùi saⁿ--ge̍h khí, in chiong hiah-ê mi̍h-kiāⁿ thia̍p chòe-tui, kàu chhit--ge̍h chiah kiat-sok.

8Hi-se-ka kap chèng siú-léng khòaⁿ-tio̍h hiah-ê tún-chek ê mi̍h-kiāⁿ, chiū chheng-chàn Siōng Chú, chiok-hok I ê chú-bîn Í-sek-lia̍t.

9Hi-se-ka tùi chè-si kap Lī-bī -lâng chhâ-mn̄g koan-hē hiah-ê tún-chek ê mi̍h-kiāⁿ ê tāi-chì.

10Sat-tok ê hō͘-tāi tōa-chè-si A-sat-lī-ngá ìn kóng, “Tùi jîn-bîn tòa lé-mi̍h kàu Siōng Chú ê tiān í-lâi, goán lóng ū-kàu thang chia̍h, koh chhun chin chōe, in-ūi Siōng Chú sù-hok I ê chú-bîn, só͘-í chhun chiah chōe.”

11Hi-se-ka bēng-lēng tio̍h tī Siōng Chú ê tiān-lāi chún-pī chhng-khò͘, in chiū chún-pī.

12In sêng-si̍t chiong lé-mi̍h kap cha̍p-hūn-chi̍t ê hōng-hiàn, í-ki̍p sèng-hòa kui Siōng Chú ê mi̍h, lóng poaⁿ--ji̍p-lâi. Lī-bī -lâng Ko-lâm-ngá hū-chek chit-ê sū; i ê sió-tī Sī-múi chòe hù-chú-koán.

13Hi-se-ka -ông kap koán-lí Siōng-tè sèng-tiān ê A-sat-lī-ngá phài Iâ-hiat, A-sat-se-ngá, Ná-hap, A-sat-hek, Iâ-lī-mô͘, Iok-sat-poa̍t, Í-lī-gia̍p, I-su-má-ki-ngá, Má-hap, kap Pí-ná-ngá, hia̍p-chō͘ Ko-lâm-ngá kap i ê sió-tī Sī-múi.

14Sèng-tiān Tang-mn̂g ê siú-ōe Lī-bī -lâng Im-ná ê kiáⁿ Khó-lī, hū-chek koán-lí kam-sim hiàn hō͘ Siōng-tè ê mi̍h, koh hun-hoat hiàn hō͘ Siōng Chú ê lé-mi̍h kap hiah-ê chì-sèng ê mi̍h.

15Tī chè-si ê siâⁿ, ū I-tiân, Bí-ná-bîn, Iâ-su-a, Sī-má-ngá, A-má-lī-ngá, Sī-ka-nî chiah-ê lâng chòe i ê chō͘-chhiú, tiong-si̍t chiong jîn-bîn ê hōng-hiàn, chiàu in ê pan-chhù, bô-lūn tōa-sòe, hun-hoat hō͘ in ê chhin-cho̍k.

16Ū teng-lio̍k tī ka-phó͘ saⁿ-cha̍p hè í-siōng ê ta-po͘-lâng, í-ki̍p ta̍k-ji̍t tī Siōng Chú ê tiān, chiàu in ê chit-bū kap pan-chhù teh ho̍k-sāi ê lâng, mā pun hō͘ in.

17In koh pun hō͘ chiàu chong-cho̍k teng-lio̍k tī ka-phó͘ ê chè-si, í-ki̍p jī-cha̍p hè í-siōng, chiàu pan-chhù chip-hêng chit-bū ê Lī-bī -lâng.

18In koh pun hō͘ choân-thé hōe-chiòng tiong-kan teng-lio̍k tī ka-phó͘, ū su-iàu hû-ióng ê ka-sio̍k — in ê bó͘, jî-lú; in-ūi in tiong-si̍t hun-pia̍t ka-kī chòe sèng.

19Koh ūi-tio̍h tòa tī siâⁿ-gōa chháu-po͘ ê A-lûn hō͘-tāi ê chè-si, tī ta̍k-ê siâⁿ ū chí-phài lâng, chiong mi̍h-kiāⁿ pun hō͘ chè-si ka-cho̍k ê ta-po͘-lâng, í-ki̍p ū teng-lio̍k tī ka-phó͘ ê Lī-bī -lâng.

20Hi-se-ka tī Iû-tāi choân-tōe lóng án-ni pān-lí; i chòe Siōng Chú — i ê Siōng-tè khòaⁿ-chòe hó, chèng-ti̍t, tiong-si̍t ê sū.

21I só͘ chòe--ê, bô-lūn pān-lí Siōng-tè sèng-tiān ê sū, chun-hêng lu̍t-hoat kap kài-bēng, lóng chhē-kiû i ê Siōng-tè, choan-sim khì chòe, chiū sū-sū heng-thong.

← Chapter 30 Jump to: Chapter 32 →