2 Chronicles 13

Chinese TTVR (現代台語譯本羅馬字版)

← Chapter 12 Jump to: Chapter 14 →

1Í-sek-lia̍t -ông Iâ-lô-pho-an tē-cha̍p-poeh nî, A-pí-ngá chòe Iû-tāi -ông,

2tī Iâ-lō͘-sat-léng choh-ông saⁿ nî; i ê lāu-bú kiò-chòe Bí-kai-a, sī Ki-pí-a -lâng O͘-lia̍t ê cha-bó͘-kiáⁿ. A-pí-ngá kap Iâ-lô-pho-an siông-siông kau-chiàn.

3A-pí-ngá chhōa sì-cha̍p-bān cheng-peng chhut-chiàn. Iâ-lô-pho-an mā chhōa poeh-cha̍p-bān te̍k-soán ê peng gêng-chiàn.

4A-pí-ngá khiā tī Í-hoat-liân soaⁿ-khu ê Sé-má-lián-soaⁿ, kóng, “ Iâ-lô-pho-an kap Í-sek-lia̍t jîn-bîn, tio̍h thiaⁿ góa kóng!

5Lín eng-kai chai, Siōng Chú — Í-sek-lia̍t ê Siōng-tè ū kap Tāi-pi̍t li̍p bōe hòe-tû ê iok, chiong Í-sek-lia̍t -kok éng-oán sù hō͘ Tāi-pi̍t kap i ê kiáⁿ-sun.

6M̄-kú Tāi-pi̍t ê kiáⁿ Só͘-lô-bûn ê jîn-sîn, Nî-pat ê kiáⁿ Iâ-lô-pho-an, khí-lâi pōe-poān i ê chú-lâng.

7I chio-chi̍p chi̍t-kóa bô lō͘-ēng ê húi-lūi, kong-jiân tùi-khòng Só͘-lô-bûn ê kiáⁿ Lô-pho-an; hit-sî Lô-pho-an iáu siàu-liân bô keng-giām, bōe-tàng tí-khòng in.

8Taⁿ lín khò lín lâng chōe, siaⁿ-sè tōa, koh ū Iâ-lô-pho-an ūi lín chō ê kim-gû-á chòe sîn-bêng, beh hoán-khòng Tāi-pi̍t ê kiáⁿ-sun só͘ tī-lí Siōng Chú ê kok.

9Lín kiám m̄-sī chiong Siōng Chú ê chè-si, A-lûn ê kiáⁿ-sun, kap Lī-bī -lâng kóaⁿ-cháu, chiàu gōa-kok-lâng ê choh-hoat ka-kī siat-li̍p chè-si? Sīm-chì bô-lūn sím-mi̍h-lâng khan chi̍t chiah gû-káng-á kap chhit chiah mî-iûⁿ-káng lâi, lín chiū kā i siat-li̍p chòe só͘-ūi sîn-bêng ê chè-si.

10“M̄-kú goán leh, Siōng Chú sī goán ê Siōng-tè, goán bô khì-sak I; goán ū chè-si, A-lûn ê kiáⁿ-sun, kap Lī-bī -lâng teh chip-hêng ho̍k-sāi Siōng Chú ê chit-bū.

11Ta̍k-ji̍t chá-àm, goán hiàn sio-hòa-chè, sio phang-hiuⁿ, tī sûn-kim ê toh pâi hiàn-chè ê piáⁿ hō͘ Siōng Chú; ta̍k ē-hng koh tiám kim teng-tâi ê teng; in-ūi goán chun-siú Siōng Chú — goán ê Siōng-tè ê bēng-lēng, m̄-kú lín khì-sak I.

12Khòaⁿ leh, Siōng-tè kap goán tông-chāi, koh léng-tō goán; I ê chè-si mā tōa-siaⁿ pûn lat-pah beh kong-kek lín. Í-sek-lia̍t -lâng ah, m̄-thang kap Siōng Chú — lín lia̍t-chó͘ ê Siōng-tè kau-chiàn, in-ūi lín it-tēng bōe iâⁿ.”

13Iâ-lô-pho-an tiàu chi̍t-pō͘-hūn ê peng tī Iû-tāi -lâng ê āu-bīn bâi-ho̍k, i ê kun-tūi tùi chiàⁿ-bīn chìn-kong.

14Iû-tāi -lâng oa̍t-thâu khòaⁿ, khòaⁿ-tio̍h in chêng-āu siū pau-ûi, chiū kiû-kiò Siōng Chú; chè-si mā pûn lat-pah.

15Iû-tāi -lâng chiū tōa-siaⁿ hoah chìn-kong. In tōa-siaⁿ hoah ê sî, Siōng-tè chiū tī A-pí-ngá kap Iû-tāi -lâng ê bīn-chêng phah-pāi Iâ-lô-pho-an kap Í-sek-lia̍t ê kun-tūi.

16Í-sek-lia̍t -lâng tī Iû-tāi -lâng ê bīn-chêng tô-cháu; Siōng-tè chiong in kau tī Iû-tāi -lâng ê chhiú.

17A-pí-ngá kap i ê kun-peng tōa sèng-lī; Í-sek-lia̍t -lâng te̍k-soán ê peng siū thâi-sí--ê ū gō͘-cha̍p-bān.

18Í-sek-lia̍t -lâng siū chè-ho̍k; Iû-tāi -lâng tek-sèng, in-ūi in óa-khò Siōng Chú — in lia̍t-chó͘ ê Siōng-tè.

19A-pí-ngá tui-jip Iâ-lô-pho-an, kong-chhú i kúi-nā ê siâⁿ, chiū-sī Pek-te̍k-lī, Iâ-sa-ná, Í-hut-lûn, í-ki̍p chiah-ê siâⁿ hù-kūn ê chng-siā.

20A-pí-ngá chāi-ūi ê sî, Iâ-lô-pho-an bô koh-chài kiông-sēng; Siōng Chú phah Iâ-lô-pho-an, i chiū sí.

21A-pí-ngá chiām-chiām kiông-sēng. I ū bó͘ cha̍p-sì ê, kiáⁿ jī-cha̍p-jī ê, cha-bó͘-kiáⁿ cha̍p-la̍k ê.

22A-pí-ngá kî-tha ê sū-chek kap i ê só͘-kiâⁿ-só͘-chòe, lóng kì-chài tī sian-ti E̍k-to ê Phêng-lūn-chi̍p.

← Chapter 12 Jump to: Chapter 14 →