2 Chronicles 32

Chinese TTVR (現代台語譯本羅馬字版)

← Chapter 31 Jump to: Chapter 33 →

1Hi-se-ka tiong-sêng chòe chiah-ê tāi-chì í-āu, A-su̍t -ông Se-ná-ki-li̍p chiūⁿ-lâi chhim-lio̍k Iû-tāi, ûi-khùn kian-kò͘ ê siâⁿ, siūⁿ-beh kong-chhú chiah-ê siâⁿ.

2Hi-se-ka khòaⁿ-kìⁿ Se-ná-ki-li̍p í-keng lâi, chai-iáⁿ i it-tēng beh kong-táⁿ Iâ-lō͘-sat-léng,

3chiū kap hiah-ê siú-léng í-ki̍p ióng-sū chham-siông, beh that-ba̍t siâⁿ-gōa ê chúi-goân; in lóng chi-chhî i.

4Chin chōe jîn-bîn chū-chi̍p, that-ba̍t só͘-ū ê chúi-goân kap lâu-kè hit tōe-khu ê khoe, kóng, “Ná tio̍h hō͘ A-su̍t hiah-ê ông ū chin chōe chúi thang lim?”

5Hi-se-ka hùn-hoat, siu-kiàn sún-hoāi ê siâⁿ-chhiûⁿ, khí-chō siâⁿ-lâu, tī siâⁿ-gōa koh khí chi̍t chō chhiûⁿ, ka-kiông Tāi-pi̍t -siâⁿ ê Bí-lô, koh chè-chō chin chōe kun-khì kap tún-pâi.

6Hi-se-ka ū siat-li̍p kun-sū chiòng-léng koán-lí jîn-bîn; i tiàu-chi̍p in lâi siâⁿ-mn̂g ê kóng-tiûⁿ, kek-lē in, kóng,

7“Tio̍h kian-kiông ióng-kám, m̄-thang in-ūi A-su̍t -ông kap i ê tōa kun-tūi kiaⁿ-hiâⁿ sit-táⁿ; in-ūi kap lán tông-chāi--ê, pí kap in tông-chāi--ê khah kiông;

8kap in tông-chāi--ê sī jio̍k-thé ê chhiú-kut, kap lán tông-chāi--ê sī Siōng Chú — lán ê Siōng-tè, I beh pang-chān lán, thòe lán kau-chiàn.” Jîn-bîn in-ūi Iû-tāi -ông Hi-se-ka ê ōe tit-tio̍h chin tōa ê kó͘-lē.

9Āu-lâi, A-su̍t -ông Se-ná-ki-li̍p kap i ê choân-kun kong-táⁿ La-kiat ê sî, phài i ê jîn-sîn khì Iâ-lō͘-sat-léng kìⁿ Iû-tāi -ông Hi-se-ka kap só͘-ū Iâ-lō͘-sat-léng ê Iû-tāi -lâng, kóng,

10“ A-su̍t -ông Se-ná-ki-li̍p án-ni kóng, ‘Lín teh khò sím-mi̍h, Iâ-lō͘-sat-léng siū ûi-khùn, lín iáu-teh siú?

11Hi-se-ka kóng, Siōng Chú — lín ê Siōng-tè ōe kiù lín thoat-lī A-su̍t -ông ê chhiú. I án-ni sī teh phiàn lín, kiat-kio̍k ōe hāi lín iau--sí, chhùi-ta--sí.

12Chit-ê Hi-se-ka kiám m̄-sī ū hòe-tû Siōng-tè ê soaⁿ-thâu-tôaⁿ kap chè-tôaⁿ, koh kā Iû-tāi kap Iâ-lō͘-sat-léng ê lâng kóng: Lín it-tēng tio̍h tī Iâ-lō͘-sat-léng chit-ê chè-tôaⁿ kèng-pài sio-hiuⁿ?

13Lín kiám m̄ chai góa kap góa ê lia̍t-chó͘ án-chóaⁿ tùi-hù lia̍t-kok ê jîn-bîn? Bān-kok ê chèng sîn-bêng kiám bat kiù ka-kī ê kok thoat-lī góa ê chhiú?

14Góa ê lia̍t-chó͘ siau-bia̍t ê kok-ka, in ê sîn-bêng tó chi̍t ê ū kiù i ê jîn-bîn thoat-lī góa ê chhiú? Án-ni, lín ê Siōng-tè ná ōe-tàng kiù lín thoat-lī góa ê chhiú-thâu?

15Só͘-í, m̄-thang hō͘ Hi-se-ka phiàn--khì, kā lín bê-he̍k, mā m̄-thang siong-sìn i; in-ūi bô jīm-hô chi̍t ê kok-ka ê sîn-bêng ōe kiù i ê jîn-bîn thoat-lī góa kap góa ê lia̍t-chó͘ ê chhiú; lín ê Siōng-tè, I mā it-tēng bōe-tàng kiù lín thoat-lī góa ê chhiú!’”

16Se-ná-ki-li̍p ê jîn-sîn kóng chin chōe siat-to̍k Chú Siōng-tè kap I ê po̍k-jîn Hi-se-ka ê ōe.

17Se-ná-ki-li̍p koh siá-phoe pòng-to̍k Siōng Chú — Í-sek-lia̍t ê Siōng-tè, ki-chhì I kóng, “Lia̍t-pang ê sîn-bêng kì-jiân bōe-tàng kiù in ê jîn-bîn thoat-lī góa ê chhiú, Hi-se-ka ê Siōng-tè mā bōe-tàng kiù I ê jîn-bîn thoat-lī góa ê chhiú.”

18Se-ná-ki-li̍p ê jîn-sîn ēng Iû-tāi-ōe, tōa-siaⁿ tùi siâⁿ-chhiûⁿ téng ê Iâ-lō͘-sat-léng -lâng kóng-ōe, kā in khióng-hat, jiáu-loān in ê sim, thang kong-chhú chit-ê siâⁿ.

19In tâm-lūn Iâ-lō͘-sat-léng ê Siōng-tè, chhin-chhiūⁿ teh kóng sè-kan-lâng ê chhiú só͘ chō ê sîn-bêng kâng-khoán.

20Hi-se-ka -ông kap A-mô͘-su ê kiáⁿ sian-ti Í-sài-a ūi-tio̍h chit-ê sū kî-tó, ǹg Siōng-tè kiû-kiò.

21Siōng Chú chiū chhe chi̍t ê sù-chiá ji̍p A-su̍t -ông ê iâⁿ-tiong, siau-bia̍t hiah-ê kiông-béng ê chiàn-sū, koaⁿ-tiúⁿ, kap chiòng-léng. A-su̍t -ông móa-bīn kiàn-siàu tò-khì i ê pún-kok. Ū chi̍t ji̍t, i ji̍p-khì i ê sîn-bêng ê biō, hō͘ i kúi ê chhin-siⁿ-kiáⁿ ēng to kā i thâi-sí.

22Án-ni, Siōng Chú kái-kiù Hi-se-ka kap Iâ-lō͘-sat-léng ê chū-bîn thoat-lī A-su̍t -ông Se-ná-ki-li̍p kap só͘-ū tùi-te̍k ê chhiú, koh hō͘ in sù-kéng-pêng-an.

23Chit-ê tāi-chì liáu-āu, Hi-se-ka tit-tio̍h lia̍t-kok ê chun-kèng. Ū chin chōe lâng tòa lé-mi̍h lâi Iâ-lō͘-sat-léng, hiàn hō͘ Siōng Chú, koh tòa pó-pòe sàng Iû-tāi -ông Hi-se-ka.

24Hit-ê sî-chūn, Hi-se-ka pīⁿ kah teh-beh sí, chiū tùi Siōng Chú kî-tó; Siōng Chú kā i èng-ún, koh hō͘ i chi̍t ê tiāu-thâu.

25M̄-kú Hi-se-ka in-ūi kiau-ngō͘, bô chiàu i só͘ tit--tio̍h ê un-tián pò-tap Siōng Chú; só͘-í Siōng Chú ê sím-phòaⁿ lîm-kàu i, Iû-tāi, kap Iâ-lō͘-sat-léng.

26Āu-lâi, Hi-se-ka kap Iâ-lō͘-sat-léng ê chū-bîn ūi-tio̍h in ê kiau-ngō͘ khiam-pi jīn-chōe, Siōng Chú chiū bô tī Hi-se-ka oa̍h--teh ê ji̍t kā in sím-phòaⁿ.

27Hi-se-ka ū chin chōe châi-hù, koh chin siū lâng chun-kèng. I ūi-tio̍h ka-kī khí hú-khò͘, siu-khǹg kim-gûn, pó-chio̍h, hiuⁿ-liāu, tún-pâi, kap ta̍k-khoán kùi-tiōng ê mi̍h-kiāⁿ;

28i koh khí chhng-khò͘ siu-khǹg ngó͘-kok, sin-chiú, kap iû, mā ūi-tio̍h cheng-siⁿ tah gû-tiâu kap iûⁿ-tiâu.

29I koh khí kúi-nā ê siâⁿ, mā ū chin chōe gû-kûn, iûⁿ-kûn, in-ūi Siōng-tè ū siúⁿ-sù i chin chōe châi-hù.

30Hi-se-ka tī Ki-hùn-chôaⁿ ê chhut-kháu cha̍h-chúi, kā chúi ín lo̍h-lâi kàu Tāi-pi̍t -siâⁿ ê sai-pêng. Hi-se-ka só͘ chòe--ê ta̍k-hāng lóng sūn-lī.

31M̄-kú, Pa-pí-lûn hiah-ê léng-siù chhe sù-chiá lâi i hia, beh liáu-kái Iû-tāi -kok só͘ hoat-seng ê kî-sū; tī chit-ê sū, Siōng-tè lī-khui i, beh khó-giām i, ài chai i ê sim-su ì-liām.

32Hi-se-ka kî-tha ê sū-chek, kap i tùi Siōng Chú ê tiong-sêng, lóng kì-chài tī Iû-tāi kap Í-sek-lia̍t Lia̍t-ông-sú kap A-mô͘-su ê kiáⁿ sian-ti Í-sài-a ê Be̍k-sī-su.

33Hi-se-ka tńg-khì i ê lia̍t-chó͘ hia, an-chòng tī Tāi-pi̍t kiáⁿ-sun ê bōng-tōe khah-koân ê só͘-chāi. I sí ê sî, Iû-tāi -lâng kap Iâ-lō͘-sat-léng ê chū-bîn lóng ūi-tio̍h i ai-siong, kā i tì-kèng. I ê kiáⁿ Má-ná-se sòa-chiap i choh-ông.

← Chapter 31 Jump to: Chapter 33 →

推荐阅读

注释 2 Chronicles 注释书 → 灵修 2 Chronicles 灵修指南 → 购买此圣经 TTVR (現代台語譯本羅馬字版) 研读本圣经 →