2 Chronicles 18

Chinese TTVR (現代台語譯本羅馬字版)

← Chapter 17 Jump to: Chapter 19 →

1Iok-sa-hoat ū chin chōe châi-hù koh chin siū chun-kèng; i kap Í-sek-lia̍t -ông A-hap kiat-chhin.

2Kè kúi-nā nî, i lo̍h-khì Sat-má-lī-a pài-hóng A-hap; A-hap ūi-tio̍h i kap i ê kun-sûi, thâi chin chōe gû, iûⁿ, sòe-ho̍k i chòe-hé khì kong-táⁿ Ki-lia̍t ê La-boa̍t.

3Í-sek-lia̍t -ông A-hap tùi Iû-tāi -ông Iok-sa-hoat kóng, “Lí beh kap góa chòe-hé khì kong-táⁿ Ki-lia̍t ê La-boa̍t --bô?” Iok-sa-hoat ìn kóng, “Góa ê chiū-sī lí ê, góa ê jîn-bîn chiū-sī lí ê jîn-bîn, goán beh kap lí chòe-hé khì kau-chiàn.”

4Iok-sa-hoat koh tùi Í-sek-lia̍t -ông kóng, “Chhiáⁿ lí seng mn̄g Siōng Chú ê ì-sù.”

5Í-sek-lia̍t -ông chiū tiàu-chi̍p sian-ti sì-pah lâng, mn̄g in kóng, “Goán thang khì kong-táⁿ Ki-lia̍t ê La-boa̍t, á-sī m̄-thang?” In ìn kóng, “Thang khì kong-táⁿ; Siōng-tè beh chiong chit-ê siâⁿ kau tī ông ê chhiú.”

6Iok-sa-hoat kóng, “Chia kiám bô koh ū Siōng Chú ê sian-ti hō͘ lán thang mn̄g?”

7Í-sek-lia̍t -ông kā Iok-sa-hoat kóng, “Iáu ū chi̍t ê lâng, sī Im-la ê kiáⁿ Bí-kai-ngá, lán thang tùi i chhéng-būn Siōng Chú; m̄-kú góa oàn-hūn i, in-ūi i tùi góa kóng ê ū-giân bô chi̍t hāng hó, siông-siông chí-ū kóng chai-hō.” Iok-sa-hoat kóng, “Chhiáⁿ ông m̄-thang án-ni kóng.”

8Í-sek-lia̍t -ông chiū tiàu chi̍t ê koaⁿ-oân lâi, kóng, “Lí kóaⁿ-kín khì kiò Im-la ê kiáⁿ Bí-kai-ngá lâi.”

9Í-sek-lia̍t -ông kap Iû-tāi -ông Iok-sa-hoat tī Sat-má-lī-a siâⁿ-mn̂g-kháu ê ngó͘-kok-tiûⁿ, chhēng lé-ho̍k, chē tī in ê pó-chō; só͘-ū ê sian-ti lóng tī in ê bīn-chêng kóng ū-giân.

10Ki-ná-ná ê kiáⁿ Se-tí-ka chòe thih ê kak, kóng, “Siōng Chú án-ni kóng, ‘Lí beh ēng chiah-ê thih-kak tak Sū-lī-a -lâng, tak kah in lóng siau-bia̍t.’”

11Só͘-ū ê sian-ti lóng án-ni ū-giân kóng, “Thang khì kong-táⁿ Ki-lia̍t ê La-boa̍t, it-tēng tek-sèng, Siōng Chú beh chiong chit-ê siâⁿ kau tī ông ê chhiú.”

12Hit-ê khì kiò Bí-kai-ngá ê sù-chiá kā i kóng, “Lí khòaⁿ, só͘-ū ê sian-ti lóng tùi ông kóng hó-ōe. Chhiáⁿ lí mā kap in siâng-khoán kóng hó-ōe.”

13Bí-kai-ngá kóng, “Góa kí éng-oa̍h ê Siōng Chú chiù-chōa, góa ê Siōng-tè kóng sím-mi̍h, góa chiū tùi ông kóng sím-mi̍h.”

14Bí-kai-ngá lâi kàu ông ê bīn-chêng, ông mn̄g i kóng, “ Bí-kai-ngá, goán thang khì kong-táⁿ Ki-lia̍t ê La-boa̍t, á-sī m̄-thang?” I ìn kóng, “Hó ah, chòe lí khì kong-táⁿ, it-tēng ōe sèng-lī; chit-ê siâⁿ ōe kau tī lín ê chhiú.”

15Ông tùi i kóng, “Góa tio̍h kiò lí chiù-chōa kúi piàn, lí chiah ōe hōng Siōng Chú ê miâ tùi góa kóng si̍t-chāi-ōe?”

16Bí-kai-ngá kóng, “Góa khòaⁿ-kìⁿ Í-sek-lia̍t chèng-lâng chhin-chhiūⁿ bô bo̍k-chiá ê iûⁿ sì-sòaⁿ tī soaⁿ--ni̍h; Siōng Chú án-ni kóng, ‘Chiah-ê lâng bô chú-lâng; ta̍k-ê lâng thang pêng-an tò-khì in tau.’”

17Í-sek-lia̍t -ông tùi Iok-sa-hoat kóng, “Góa kiám bô kā lí kóng, chit-ê lâng tùi góa kóng ê ū-giân lóng bô hó-ōe, chí-ū kóng chai-hō.”

18Bí-kai-ngá kè-sio̍k kóng, “Só͘-í, tio̍h thiaⁿ Siōng Chú ê ōe! Góa khòaⁿ-kìⁿ Siōng Chú chē tī pó-chō, thiⁿ-téng ê bān-kun khiā tī I ê chiàⁿ-pêng tò-pêng.

19Siōng Chú kóng, ‘Sím-mi̍h-lâng beh ín-iú Í-sek-lia̍t -ông A-hap, hō͘ i khì Ki-lia̍t ê La-boa̍t, sí tī hia?’ Chit-ê kóng án-ni, hit-ê kóng án-ni.

20Āu-lâi ū chi̍t ê sîn chhut--lâi, khiā tī Siōng Chú ê bīn-chêng, kóng, ‘Góa khì kā i ín-iú.’ Siōng Chú mn̄g i kóng, ‘Lí beh án-chóaⁿ kā ín-iú?’

21I ìn kóng, ‘Góa beh chhut-khì chòe pe̍h-chha̍t ê sîn, hō͘ hiah-ê sian-ti kóng pe̍h-chha̍t.’ Siōng Chú kóng, ‘Lí kā i ín-iú, it-tēng ōe sêng-kong. Lí khì, chiàu án-ni chòe.’

22Hiān-chāi Siōng Chú ū hō͘ pe̍h-chha̍t ê sîn ji̍p tī lí chiah-ê sian-ti ê chhùi; Siōng Chú soan-pò͘ beh kàng chai-hō hō͘ lí.”

23Ki-ná-ná ê kiáⁿ Se-tí-ka kiâⁿ chìn-chêng, siàn Bí-kai-ngá ê chhùi-phóe, kóng, “Siōng Chú ê sîn sím-mi̍h sî lī-khui góa lâi tùi lí kóng-ōe?”

24Bí-kai-ngá kóng, “Lí khì bih tī ba̍t-pâng hit-ji̍t chiū ōe chai.”

25Í-sek-lia̍t -ông kóng, “Chiong Bí-kai-ngá lia̍h--khí-lâi, kau hō͘ chhī-tiúⁿ A-bûn kap ông ê kiáⁿ Iok-a-si,

26kā in kóng, ‘Ông kau-tài: Chiong chit-ê lâng koaiⁿ-lo̍h kaⁿ, hō͘ i chi̍t-sut-á piáⁿ kap chúi chiū hó, thèng-hāu góa pêng-an tò--lâi.’”

27Bí-kai-ngá kóng, “Lí nā chin-chiàⁿ pêng-an tò--lâi, chiū-sī Siōng Chú bô thok góa kóng-ōe.” Koh kóng, “Lín tāi-ke, tio̍h ōe-kì-tit góa kóng ê ōe!”

28Í-sek-lia̍t -ông A-hap kap Iû-tāi -ông Iok-sa-hoat khì chìn-kong Ki-lia̍t ê La-boa̍t.

29Í-sek-lia̍t -ông tùi Iok-sa-hoat kóng, “Góa beh kái-chong chiūⁿ chiàn-tiûⁿ, lí thang chhēng lí ê ông-ho̍k.” Í-sek-lia̍t -ông chiū kái-chong, in chiū chiūⁿ-tīn.

30Sū-lī-a -ông ū hoan-hù i ê chiàn-chhia-tiúⁿ kóng, “M̄-thang kap in ê sū-peng á-sī koaⁿ-tiúⁿ kau-chiàn, chí-ū kap Í-sek-lia̍t -ông kau-chiàn.”

31Chiàn-chhia-tiúⁿ khòaⁿ-tio̍h Iok-sa-hoat chiū kóng, “Chit-ê it-tēng sī Í-sek-lia̍t -ông!” In chiū oat-khì beh kong-kek i. Iok-sa-hoat chi̍t-ē hoah kiù-miā, Siōng Chú chiū pang-chān i. Siōng-tè hō͘ in lī-khui bô koh jip i.

32Chiàn-chhia-tiúⁿ chi̍t-ē khòaⁿ-tio̍h i m̄-sī Í-sek-lia̍t -ông, chiū oa̍t-cháu bô koh tui i.

33Ū chi̍t ê Sū-lī-a ê peng-á khui keng, bô phah-sǹg siā-ji̍p Í-sek-lia̍t -ông chiàn-kah ê kap-chōa. Ông kā sái-chhia--ê kóng, “Góa tio̍h tāng-siong. Kín se̍h hoan-thâu, tòa góa lī-khui chiàn-tiûⁿ.”

34Hit-ji̍t, kau-chiàn hui-siông béng-lia̍t. Ū lâng hû Í-sek-lia̍t -ông, hō͘ i khiā tī chhia--ni̍h, bīn ǹg Sū-lī-a -lâng; kàu ē-hng, chha-put-to ji̍t lo̍h ê sî, i chiū sí.

← Chapter 17 Jump to: Chapter 19 →