2 Chronicles 35

Chinese TTVR (現代台語譯本羅馬字版)

← Chapter 34 Jump to: Chapter 36 →

1Iok-se-a tī Iâ-lō͘-sat-léng siú Pôaⁿ-kè-choeh ho̍k-sāi Siōng Chú. Chiaⁿ-ge̍h cha̍p-sì, jîn-bîn thâi pôaⁿ-kè-choeh ê iûⁿ-á.

2Ông phài chè-si chip-hêng in ê chit-bū, koh bián-lē in pān-lí Siōng Chú sèng-tiān ê kang-chok.

3Koh tùi hiah-ê sèng-hòa kui Siōng Chú, kàu-tō Í-sek-lia̍t -lâng ê Lī-bī -lâng kóng, “Lín tio̍h chiong sèng ê iok-kūi hē tī Tāi-pi̍t ê kiáⁿ Í-sek-lia̍t -ông Só͘-lô-bûn só͘ khí ê sèng-tiān lāi-bīn, m̄-bián koh kng-lâi-kng-khì. Taⁿ lín tio̍h ho̍k-sāi Siōng Chú — lín ê Siōng-tè, kap I ê chú-bîn Í-sek-lia̍t.

4Tio̍h chiàu Í-sek-lia̍t -ông Tāi-pi̍t kap i ê kiáⁿ Só͘-lô-bûn ê kui-tēng, chiàu lín ê chong-cho̍k, lín ê pan-chhù chún-pī hó-sè.

5Lín Lī-bī -lâng tio̍h chiàu chong-cho̍k ê pâng-thâu, hun cho͘ ê ka-têng, khiā tī sèng-tiān ho̍k-bū lín ê hiaⁿ-tī.

6Tio̍h chiàu Siōng Chú thong-kè Mô͘-se só͘ thoân ê ōe, thâi Pôaⁿ-kè-choeh ê iûⁿ-ko, kiat-chēng ka-kī, ūi-tio̍h lín ê chhin-cho̍k chún-pī hó-sè.”

7Iok-se-a -ông tùi i ê sán-gia̍p the̍h-chhut mî-iûⁿ-á kap soaⁿ-iûⁿ-á kiōng saⁿ-bān chiah, gû-káng saⁿ-chheng chiah, hō͘ só͘-ū chāi-tiûⁿ ê jîn-bîn chòe Pôaⁿ-kè-choeh ê chè-mi̍h.

8Ông ê tāi-sîn mā hoaⁿ-hí thê-kiong chè-mi̍h hō͘ jîn-bîn, chè-si kap Lī-bī -lâng. Koán-lí Siōng-tè sèng-tiān ê Hi-le̍k-ka, Sat-ka-lī-a, Iâ-hiat, ēng iûⁿ-á nn̄g-chheng la̍k-pah chiah, gû saⁿ-pah chiah, hō͘ chè-si chòe Pôaⁿ-kè-choeh ê chè-mi̍h.

9Lī-bī -lâng ê léng-siù Ko-lâm-ngá, kap i nn̄g ê hiaⁿ-tī Sī-má-ngá kap Ná-thán-gia̍p, í-ki̍p Hap-sa-pí-ngá, Iâ-lī, Iok-sat-poa̍t, ēng iûⁿ-á gō͘-chheng chiah, gû gō͘-pah chiah, hō͘ Lī-bī -lâng chòe Pôaⁿ-kè-choeh ê chè-mi̍h.

10Án-ni, ho̍k-sāi ê tāi-chì lóng chún-pī hó-sè, chiàu ông ê bēng-lēng, chè-si khiā tī in ê ūi, Lī-bī -lâng mā chiàu in ê pan-chhù khiā--teh.

11Lī-bī -lâng thâi Pôaⁿ-kè-choeh ê iûⁿ-á, chè-si tùi in ê chhiú chiap huih lâi hiù; Lī-bī -lâng kā iûⁿ-á pak-phê,

12chiong sio-hòa-chè ê chè-mi̍h chiàu chong-cho̍k ê pâng-thâu pun hō͘ jîn-bîn, hō͘ in chiàu Mô͘-se ê chheh só͘ siá--ê hiàn hō͘ Siōng Chú. Hiàn gû chòe chè-mi̍h mā-sī án-ni chòe.

13In chiàu kui-tēng, ēng hé hang Pôaⁿ-kè-choeh ê iûⁿ-á, kî-tha ê chè-mi̍h ēng e-á, tiáⁿ, phûn chú; chú liáu-āu, kóaⁿ-kín pun hō͘ jîn-bîn.

14Í-āu, Lī-bī -lâng chiah ūi ka-kī kap chè-si chún-pī bah, in-ūi A-lûn ê hō͘-tāi chòe chè-si--ê it-ti̍t teh hiàn sio-hòa-chè kap chè-mi̍h ê iû kàu àm-sî.

15A-sat ê hō͘-tāi hū-chek chhiùⁿ-koa ê lâng, chiàu Tāi-pi̍t, A-sat, Hi-bān, kap ông ê sian-kiàn Iâ-tō͘-tùn ê kui-tēng, chiàu in ê chit-ūi khiā--teh; kò͘-mn̂g ê siú-ōe khàn-siú ta̍k-ê mn̂g; in m̄-bián lī-khui in ê chit-bū, in-ūi in ê chhin-cho̍k Lī-bī -lâng thòe in chún-pī chè-mi̍h.

16Hit-ji̍t, ho̍k-sāi Siōng Chú ê tāi-chì lóng chún-pī hó-sè, chiàu Iok-se-a -ông ê bēng-lēng siú Pôaⁿ-kè-choeh, tī Siōng Chú ê tôaⁿ hiàn sio-hòa-chè.

17Hit-sî, chāi-tiûⁿ ê Í-sek-lia̍t -lâng chòe-hé siú Pôaⁿ-kè-choeh, koh siú Tû-kàⁿ-choeh chhit ji̍t.

18Tùi sian-ti Sat-bó-ní ê sî-tāi í-lâi, Í-sek-lia̍t m̄-bat chiah-ni̍h sēng-tāi siú Pôaⁿ-kè-choeh; Í-sek-lia̍t ê lia̍t-ông mā lóng m̄-bat án-ni siú Pôaⁿ-kè-choeh, chhin-chhiūⁿ Iok-se-a, chè-si kap Lī-bī -lâng, í-ki̍p chāi-tiûⁿ ê Iû-tāi kap Í-sek-lia̍t -lâng, kap Iâ-lō͘-sat-léng ê chū-bîn án-ni siú-choeh.

19Chit-piàn ê Pôaⁿ-kè-choeh tī Iok-se-a choh-ông tē-cha̍p-poeh nî kú-hêng.

20Iok-se-a chéng-siu sèng-tiān liáu-āu, Ai-ki̍p -ông Nî-ko chiūⁿ--lâi, beh kong-táⁿ Iù-hoat-la-tí-hô hô-piⁿ ê Ka-ki-bí-si. Iok-se-a -ông chhut-khì gêng-chiàn.

21Nî-ko phài sù-chiá lâi kìⁿ Iok-se-a, kóng, “ Iû-tāi -ông, góa kap lí ū sím-mi̍h koan-hē? Góa kin-á-ji̍t lâi m̄-sī beh kong-kek lí, sī beh kong-kek kap góa kau-chiàn ê kok-ka; Siōng-tè bēng-lēng góa tio̍h kóaⁿ-kín chòe chit-ê sū. Lí m̄-thang hoán-tùi kap góa tông-chāi ê Siōng-tè, chiah bián I kā lí húi-bia̍t.”

22M̄-kú Iok-se-a m̄ thiaⁿ Siōng-tè thong-kè Nî-ko só͘ kóng ê ōe, kian-chhî beh kap i kau-chiàn. Iok-se-a piàn-chong lâi kàu Bí-kiat-to pêng-goân, kap Nî-ko kau-chiàn.

23Siā-chìⁿ ê lâng siā-tio̍h Iok-se-a -ông; ông tùi i ê jîn-sîn kóng, “Góa siū tāng-siong lah! Chài góa lī-khui chiàn-tiûⁿ.”

24I ê jîn-sîn hû i chhut hit-tâi chhia, hō͘ i chē tē-jī tâi chhia, chài i tò-khì Iâ-lō͘-sat-léng; i chiū sí, lâng chiong i an-chòng tī i lia̍t-chó͘ ê bōng. Iû-tāi kap Iâ-lō͘-sat-léng ê lâng lóng ūi-tio̍h Iok-se-a ai-siong.

25Iâ-lī-bí ūi-tio̍h Iok-se-a choh ai-ko; só͘-ū chhiùⁿ-koa ê lâm-lú kàu kin-á-ji̍t iáu-teh chhiùⁿ chiah-ê ai-ko kì-liām Iok-se-a; chit-ê mā chiâⁿ-chòe Í-sek-lia̍t ê koàn-lē. Chiah-ê ai-ko lóng siu-chi̍p tī Ai-ko-chi̍p.

26Iok-se-a kî-tha ê sū-chek, pau-koat i tùi Siōng Chú lu̍t-hoat ê tiong-sêng,

27kap i it-seng só͘-chòe ê sū, lóng kì-chài tī Í-sek-lia̍t kap Iû-tāi Lia̍t-ông-sú.

← Chapter 34 Jump to: Chapter 36 →