2 Chronicles 9

Chinese TTVR (現代台語譯本羅馬字版)

← Chapter 8 Jump to: Chapter 10 →

1Sī-pa ê lú-ông thiaⁿ-kìⁿ Só͘-lô-bûn ê miâ-siaⁿ, chiū lâi Iâ-lō͘-sat-léng beh ēng lân-tôe khó-giām Só͘-lô-bûn. I chhōa chin chōe kun-sûi lâi, koh ū lo̍k-tô chài hiuⁿ-liāu, chin chōe n̂g-kim kap pó-chio̍h. I kìⁿ Só͘-lô-bûn ê sî, chiū chiong sim-lāi só͘-ū ê lân-tôe kā i mn̄g.

2Só͘-lô-bûn chiàu i só͘ mn̄g--ê it-it kā i hôe-tap, bô chi̍t hāng khùn-lân kah Só͘-lô-bûn bōe-hiáu ìn.

3Sī-pa lú-ông kiàn-sek-tio̍h Só͘-lô-bûn ê tì-hūi, khòaⁿ-tio̍h i khí ê kiong-tiān,

4toh-téng ê chia̍h-mi̍h, pâi-lia̍t chē--teh ê jîn-sîn, kun-sûi ho̍k-sāi ê lô͘-po̍k kap in ê i-ho̍k, thîn-chiú ê lô͘-po̍k kap in chhēng ê saⁿ, koh khòaⁿ-tio̍h i tī Siōng Chú ê sèng-tiān só͘ hiàn ê sio-hòa-chè, chiū kui-ê lâng lóng gāng--khì.

5Sī-pa lú-ông chiū tùi ông kóng, “Góa tī goán pún-kok só͘ thiaⁿ--tio̍h lí ê sū-chek kap lí ê tì-hūi lóng sī chin--ê!

6Pún-lâi góa m̄ sìn in ê ōe, kàu góa chhin-ba̍k khòaⁿ--tio̍h chiah siong-sìn. Lâng kā góa kóng--ê iáu bô sū-si̍t ê chi̍t-pòaⁿ; lí ê tì-hūi kap lí ê hù-chiok chhiau-kè góa só͘ thiaⁿ--tio̍h-ê.

7Lí ê pō͘-sio̍k chin ū hok-khì! Lí ê jîn-sîn chin ū hok-khì! In put-sî tī lí ê bīn-chêng thiaⁿ lí tì-hūi ê ōe.

8Siōng Chú — lí ê Siōng-tè eng-kai siū chheng-chàn! I ì-ài lí, hō͘ lí tī Siōng Chú — lí ê Siōng-tè bīn-chêng chē-ūi choh-ông; in-ūi lí ê Siōng-tè thiàⁿ Í-sek-lia̍t, ài i éng-oán kian-li̍p, só͘-í soán-li̍p lí chòe in ê ông, hō͘ lí thang péng-kong-hêng-gī.”

9Sī-pa lú-ông chiong tāi-iok sì-chheng kong-kun ê kim, chin chōe hiuⁿ-liāu, kap pó-chio̍h sàng hō͘ ông; chêng-kàu-taⁿ m̄-bat ū lâng chhin-chhiūⁿ Sī-pa lú-ông sàng hiah chōe hiuⁿ-liāu hō͘ Só͘-lô-bûn -ông.

10Hi-lân ê chûn-oân kap Só͘-lô-bûn ê chûn-oân tùi Gô-hui ūn kim lâi, koh tòa tôaⁿ-hiuⁿ-chhâ kap pó-chio̍h lâi.

11Ông ēng chiah-ê tôaⁿ-hiuⁿ-chhâ ūi Siōng Chú ê tiān kap ông-kiong chòe gîm-á, mā ūi chhiùⁿ-koa ê lâng chòe khîm kap sek. Tī Iû-tāi -tōe, chêng-kàu-taⁿ m̄-bat ū lâng khòaⁿ-kìⁿ án-ni.

12Só͘-lô-bûn -ông sàng hō͘ Sī-pa lú-ông ê hôe-lé, chhiau-kè lú-ông tòa--lâi ê lé-mi̍h, koh chiàu i só͘ ì-ài, só͘ iau-kiû--ê lóng sàng hō͘ i. Lú-ông kap i ê jîn-sîn chiū tò-khì in pún-kok.

13Só͘-lô-bûn ta̍k-nî siu--tio̍h ê kim kiōng nn̄g-bān saⁿ-chheng kong-kun.

14Í-gōa, i ū tùi seng-lí-lâng kap bō͘-e̍k-siong siu sè-kim; kok-lāi ê séng-tiúⁿ kap A-la-pek chiah-ê ông, lóng chìn-kòng kim-gûn hō͘ Só͘-lô-bûn.

15Só͘-lô-bûn -ông phah tōa tún-pâi nn̄g-pah bīn, múi chi̍t bīn ēng kim chhit kong-kun;

16koh phah sió tún-pâi saⁿ-pah bīn, múi chi̍t bīn ēng kim saⁿ kong-kun. Ông chiong chiah-ê tún-pâi hē tī Lê-pa-lūn Lîm-kiong.

17Ông koh ēng chhiūⁿ-gê chòe chi̍t ê tōa pó-chō, ēng sûn-kim tah--teh.

18Pó-chō chêng ū la̍k chàn kiā-á, koh ū kim ê kha-tiam, kap pó-chō saⁿ-liân; siang-pêng ū chhiú-hōaⁿ, chhiú-hōaⁿ ê piⁿ--á kok ū chi̍t chō sai khiā--teh;

19koh ū cha̍p-jī chō sai khiā tī la̍k chàn kiā-á ta̍k-chàn ê siang-pêng-piⁿ; pa̍t-ê ông-kok lóng m̄-bat án-ni chòe.

20Só͘-lô-bûn -ông só͘-ū lim ê khì-khū lóng sī kim--ê; Lê-pa-lūn Lîm-kiong it-chhè ê khì-khū mā-sī sûn-kim--ê; tī Só͘-lô-bûn ê sî-tāi, gûn bô hō͘ lâng khòaⁿ-chòe chin ū kè-ta̍t.

21Ông ê chûn-tūi kap Hi-lân ê chûn-oân chòe-hé khì Tha-si; chiah-ê Tha-si ê chûn-tūi ūn kim, gûn, chhiūⁿ-gê, kâu, khóng-chhiok, múi saⁿ nî tò-lâi chi̍t piàn.

22Só͘-lô-bûn -ông ê châi-hù kap tì-hūi iâⁿ-kè thian-hā chu-ông.

23Thian-hā chu-ông lóng siūⁿ-beh lâi kìⁿ Só͘-lô-bûn ê bīn, thiaⁿ Siōng-tè sù hō͘ i ê tì-hūi.

24In ta̍k-ê tòa chìn-kòng ê lé-mi̍h, chiū-sī kim-khì, gûn-khì, i-ho̍k, kun-khì, hiuⁿ-liāu, bé, kap lô; ta̍k-nî lóng ū it-tēng ê sò͘-liōng.

25Só͘-lô-bûn ū bé-tiâu sì-chheng keng, koh ū bé-peng chi̍t-bān nn̄g-chheng miâ, koh an-tì chiàn-chhia tī hiah-ê tún chiàn-chhia ê siâⁿ, kap Iâ-lō͘-sat-léng ông hia.

26Só͘-lô-bûn koán-hat só͘-ū ê ông, tùi Iù-hoat-la-tí-hô, kàu Hui-lī-sū -lâng ê tōe, ti̍t-kàu Ai-ki̍p pian-kài.

27Ông thóng-tī ê kî-kan, Iâ-lō͘-sat-léng ê gûn chhin-chhiūⁿ chio̍h-thâu hiah chōe, pek-hiuⁿ-chhâ chhin-chhiūⁿ soaⁿ-po͘ ê sng-châi-chhiū hiah chōe.

28Ū lâng tùi Ai-ki̍p, tùi ta̍k só͘-chāi, chìn-kháu bé hō͘ Só͘-lô-bûn.

29Só͘-lô-bûn kî-tha ê sū-chek, tùi thâu kàu bé lóng kì-chài tī Sian-ti Ná-tan-sú, Sī-lô -lâng A-hi-ngá ê Ū-giân-su, kap sian-kiàn E̍k-to lūn Nî-pat ê kiáⁿ Iâ-lô-pho-an ê Īⁿ-siōng-su.

30Só͘-lô-bûn tī Iâ-lō͘-sat-léng chòe Í-sek-lia̍t choân-kok ê ông, kiōng sì-cha̍p nî.

31Só͘-lô-bûn tńg-khì i ê lia̍t-chó͘ hia liáu-āu, bâi-chòng tī i ê lāu-pē Tāi-pi̍t ê siâⁿ. I ê kiáⁿ Lô-pho-an sòa-chiap i choh-ông.

← Chapter 8 Jump to: Chapter 10 →