Judges 14

Chuvash (CHB) (БИБЛИ) 2009

← Chapter 13 Jump to: Chapter 15 →

1Самсон Фимнафа хулине кайнӑ, Фимнафӑра вӑл филистимсен пӗр ҫамрӑк хӗрарӑмне курнӑ; [лешӗ ӑна килӗшнӗ].

2Килне таврӑнсан вӑл ашшӗпе амӑшне хӑйӗн шухӑшне пӗлтернӗ, каланӑ вӗсене: Фимнафӑра эпӗ филистимсен пӗр ҫамрӑк хӗрарӑмне куртӑм; мана ҫавна качча илсе парӑр, тенӗ.

3Ашшӗпе амӑшӗ каланӑ ӑна: ара, хӑвӑн тӑванусен хӗрӗсем хушшинче, хамӑрӑн халӑх хушшинче хӗр ҫук-им, мӗншӗн-ха санӑн ӳт кастарман филистимсен хӗрне илмелле? тенӗ. Самсон хӑйӗн ашшӗне каланӑ: ҫавнах илсе пар, мӗншӗн тесессӗн вӑл мана килӗшрӗ, тенӗ.

4Ашшӗпе амӑшӗ ку вӑл Ҫӳлхуҫаран килнине, ывӑлӗ филистимсене тавӑрма май шыранине пӗлмен. Ун чухне филистимсем Израиле пусмӑрласа тӑнӑ.

5Вара ашшӗ-амӑшӗпе пӗрле Самсон Фимнафа хулине кайнӑ, Фимнафӑри иҫӗм пахчисем патне ҫывӑхарса пынӑ чухне акӑ ӑна хирӗҫ ҫамрӑк арӑслан ӳхӗрсе тухнӑ.

6Ҫавӑн чухне Самсон ҫине Турӑ Сывлӑшӗ аннӑ та, вӑл вара арӑслана качака путеккине тӑлпаланӑ пек ҫурса пӑрахнӑ; аллинче унӑн нимӗн те пулман. Хӑй мӗн тунине вӑл ашшӗне те, амӑшне те каламан.

7Вӑл хайхи хӗрарӑм патне ҫитнӗ, унпа калаҫнӑ, хӗрарӑмӗ Самсона килӗшнӗ.

8Темиҫе кунран вӑл ҫав хӗрарӑма илсе килес шутпа тепре кайнӑ; ҫула май арӑслан виллине курма пӑрӑнса кӗнӗ — акӑ ӗнтӗ арӑслан кӑшкарӗ ӑшне ҫӑвӑр хурт сӑрӑннӑ, пыл пухнӑ.

9Самсон пыл карасне илнӗ те малалла кайнӑ, ҫул тӑрӑх ҫисе пынӑ; ашшӗпе амӑшӗ патне таврӑнсассӑн, вӗсене те панӑ, вара вӗсем те ҫинӗ; анчах та вӑл ҫак пыла арӑслан кӑшкарӗнчен илнине каламан.

10Ӗнтӗ ашшӗ хӗрарӑм килне пынӑ, Самсон вара унта, кӗрӳ каччӑ йӑлипе, [ҫичӗ кунлӑх] ӗҫкӗ тунӑ.

11Самсона курсанах ӑна вӑтӑр пуса каччи суйласа панӑ, вӗсен ӗнтӗ Самсонпа пӗрлех пулмалла пулнӑ.

12Самсон вӗсене каланӑ: эпӗ сире тупмалли юмах калатӑп; эсир ун тупсӑмне ҫичӗ кун хушшинче, ӗҫкӗ пынӑ хушӑра, тупсассӑн, тӗрӗс тупсассӑн, сире вӑтӑр синдон тата улӑштарса тӑхӑнмалӑх вӑтӑр тум парӑп;

13тупсӑмне тупаймасан, сирӗн мана вӑтӑр синдон тата улӑштарса тӑхӑнмалӑх вӑтӑр тум памалла, тенӗ. Вӗсем ӑна: кала юмахна, итлесе пӑхӑпӑр, тенӗ.

14Самсон вӗсене каланӑ: ҫиекентен — ҫимелли, вӑйлинчен пылакки тухнӑ, тенӗ. Юмах тупсӑмне виҫӗ кун хушшинче тупайман.

15Ҫиччӗмӗш кунӗнче вӗсем Самсон арӑмне каланӑ: упӑшкуна ӳкӗте кӳрт-ха, унран юмах тупсӑмне ыйтса пӗл; унсӑрӑн хӑвна та, аҫун килне те вутпа ҫунтарса яратпӑр; ара, эсир пире ҫаратса юлма чӗннӗ-им?

16Самсон арӑмӗ ӗнтӗ упӑшки умӗнче йӗре-йӗре каланӑ: эсӗ мана кураймастӑн, мана юратмастӑн; эсӗ ман халӑхӑм ывӑлӗсене тупмалли юмах каларӑн, мана вара ун тупсӑмне пӗлтересшӗн мар, тенӗ. Вӑл арӑмне каланӑ: ун тупсӑмне аттемпе аннеме те каламарӑм; сана калӑп-и ара? тенӗ.

17Ӗҫкӗ-ҫикӗ ҫичӗ кун тӑсӑлнӑ, Самсон арӑмӗ ҫичӗ кун упӑшки умӗнче макӑрнӑ. Вӑл йӑлӑна-йӑлӑна ыйтнӑ, юлашкинчен, ҫиччӗмӗш кунӗнче, Самсон ӑна юмах тупсӑмне каланӑ. Арӑмӗ ҫакна хӑй халӑхӗн ывӑлӗсене пӗлтернӗ.

18Ҫиччӗмӗш кунӗнче хӗвел анас умӗн туй каччисем Самсона каланӑ: пылран мӗн пылакрах? арӑсланран мӗн вӑйлӑрах? тенӗ. Вӑл вӗсене каланӑ: эсир ман пушмак пӑрупа сухаламан пулсан, ман юмах тупсӑмне тупаймастӑрччӗ, тенӗ.

19Ун ҫине Турӑ Сывлӑшӗ аннӑ, вӑл вара Аскалон хулине кайнӑ та унта вӑтӑр ҫын вӗлерсе тумтирӗсене хывса илнӗ, ҫавна юмах тупсӑмне тупнисене кӗпе улӑштарса тӑхӑнма панӑ. Ӗнтӗ унӑн ҫилли тулса ҫитнӗ, вӑл вара ашшӗ килне таврӑннӑ.

20Самсон арӑмӗ туйра пуса каччи пулнӑ йӗкӗте качча тухнӑ.

← Chapter 13 Jump to: Chapter 15 →