Judges 19

Chuvash (CHB) (БИБЛИ) 2009

← Chapter 18 Jump to: Chapter 20 →

1Ҫавӑн чухне, Израилӗн патша пулман вӑхӑтра, Ефрем тӑвайккийӗнче пӗр левит пурӑннӑ. Вӑл Иудея ҫӗрӗнчи Вифлеем хулинчен хӑй валли ҫум-арӑм илнӗ.

2Ҫав ҫум-арӑм унпа хирӗҫнӗ те ашшӗ килне Иудея ҫӗрӗнчи Вифлеем хулине пӑрахса кайнӑ, унта тӑватӑ уйӑх пурӑннӑ.

3Упӑшки вара, ӑна кӑмӑлне ҫавӑрса каялла илсе килес тесе, ун патне кайнӑ. Унпа пӗрле пӗр тарҫӑ тата икӗ ашак пынӑ. Ҫум-арӑмӗ ӑна ашшӗ килне илсе кӗнӗ.

4Ҫав ҫамрӑк хӗрарӑм ашшӗ, кӗрӳшне курсассӑн, ӑна питӗ хапӑл йышӑннӑ, ӑна килне кайма памасӑр хӑналанӑ. Вӑл вара ун патӗнче виҫӗ кун пурӑннӑ; вӗсем ӗҫнӗ-ҫинӗ, ҫавӑнтах ҫӗр выртса тӑнӑ.

5Тӑваттӑмӗш кунне вӗсем ир-ирех тӑнӑ, ҫынни ӗнтӗ кайма пуҫтарӑннӑ. Ҫамрӑк хӗрарӑм ашшӗ кӗрӳшне каланӑ: чӗре сурилӗх те пулин ҫырткаласа илсем, кайран кайӑр вара, тенӗ.

6Вӗсем ҫавӑнта юлнӑ, иккӗшӗ пӗрле ӗҫнӗ, ҫинӗ. Ҫамрӑк хӗрарӑм ашшӗ ҫав ҫынна каланӑ: тепӗр каҫа юл-ха, савӑн-ха, тенӗ.

7Ҫынни каймах тапраннӑ, анчах хунӗ ӳкӗте кӗртнӗ те ӑна, вӑл вара каллех унта ҫӗр каҫма юлнӑ.

8Пиллӗкӗмӗш кунӗнче вӑл кайма тесе ир-ирех тӑнӑ. Ҫамрӑк хӗрарӑм ашшӗ каланӑ ӑна: ҫимесӗр ан кай, чӗре сурилӗх те пулин ҫырткаласа илсем, ан васкӑр, каҫ енне сулӑнсан кайӑр, тенӗ. Вара вӗсем иккӗшӗ ҫинӗ [те ӗҫнӗ].

9Ҫын ӗнтӗ каймах тӑнӑ, хӑй те, ҫум-арӑмӗ те, тарҫи те пуҫтарӑннӑ. Хунӗ, ҫамрӑк хӗрарӑм ашшӗ, каланӑ ӑна: каҫ енне сулӑнчӗ, кунтах ҫӗр каҫӑр; часах тӗттӗмленет акӑ, кунтах ҫӗр каҫ, савӑн-ха; ыран иртерех тӑрӑр та ҫула тухӑр, килне кайӑн вара, тенӗ.

10Анчах кӗрӳшӗ ҫӗр каҫма килӗшмен, ҫула тухнӑ; вӑл Иевус хули, хальхи Иерусалим, патне ҫитнӗ; унпа пӗрле тиевлӗ икӗ ашак тата ҫум-арӑмӗ пынӑ.

11Иевус патнелле ҫывӑхарнӑ чухне тӗттӗмленех пуҫланӑ. Вара тарҫи хуҫине каланӑ: ҫак иевусейсен хулине кӗрер те унта ҫӗр каҫар, тенӗ.

12Хуҫи каланӑ ӑна: ҫук, вӗсем Израиль ывӑлӗсем мар, ют йӑх ҫыннисем, ҫавӑнпа вӗсен хулине кӗместпӗр, Гива хулине ҫитиччен каятпӑр, тенӗ.

13Хӑйӗн чурине каланӑ вӑл: Гивӑна е Рамӑна ҫитӗпӗр те ҫавӑнта ҫӗр каҫӑпӑр, тенӗ.

14Вара малалла кайнӑ, Вениаминсен хулине Гивӑна ҫитнӗ тӗле хӗвел те анса ларнӑ.

15Вӗсем Гивӑра ҫӗр каҫма шут тытнӑ та ҫавӑнта пӑрӑнса кӗнӗ. Левит пӗр урам варрине ларнӑ; анчах вӗсене никам та хӑй килне ҫӗр каҫма чӗнмен.

16Акӑ ӗнтӗ пӗр ватӑ ҫын хиртен ӗҫрен таврӑнать; вӑл, Ефрем тӑвӗ ҫинче ҫуралнӑскер, Гивӑра пурӑннӑ. Ку вырӑнта пурӑнакансем вара Вениамин ывӑлӗсем пулнӑ.

17Ватӑ ҫын пуҫне ҫӗклесе пӑхнӑ та урам варринче ларакан ҫулҫӳрен ҫынна асӑрханӑ. Вара ыйтнӑ вӑл: ӑҫта каятӑн? ӑҫтан килнӗ эсӗ? тенӗ.

18Левит каланӑ ӑна: эпир Иудея ҫӗрӗнчи Вифлеем хулинчен килетпӗр, Ефрем тӑвӗ патне каятпӑр, эпӗ хам ҫавӑнти ҫын; эпӗ Иудея ҫӗрӗнчи Вифлеема кайнӑччӗ, халӗ Ҫӳлхуҫа ҫурчӗ еннелле ҫул тытатӑп; мана никам та хӑй килне чӗнмест;

19пирӗн хамӑр ашакӑмӑрсем валли улӑм та, апат та пур; хамӑр валли санӑн чурусен — манӑн, ҫак хӑрхӑмӑн, ҫак тарҫӑн — ҫӑкӑр та, эрех те пур; пирӗн пурте ҫителӗклӗ, тенӗ.

20Ватӑ ҫын каланӑ ӑна: ан пӑшӑрхан — сана ҫитменнине эпӗ ҫитерӗп, анчах урамра ҫӗр ан каҫ, тенӗ.

21Ватӑ ҫын ӑна хӑй килне ертсе кайнӑ, унӑн ашакӗсене апат панӑ, хӑйсем вӗсем урисене ҫунӑ та ӗҫме-ҫиме ларнӑ.

22Вӗсем чунран-чӗререн савӑнса ларнӑ вӑхӑтра акӑ ҫав хула ҫыннисем, аскӑнчӑксем, вӗсен килне ҫавӑрса илнӗ, алӑкран шакканӑ, ватӑ кил хуҫине каланӑ: ху патна илсе кӗнӗ ҫынна илсе тух-ха, эпир унпа хутшӑнасшӑн, тенӗ.

23Кил хуҫи вӗсем патне тухнӑ та каланӑ: ҫук, тӑванӑмсем, ку ҫын ман килӗме кӗчӗ пулсан, ман хӑна вӑл, усал ӗҫ ан тӑвӑр, ӑссӑрла ан хӑтланӑр эсир;

24акӑ манӑн качча кайман хӗр пур, унӑн ҫум-арӑмӗ пур, эпӗ сире ҫавсене илсе тухса парӑп, пусахлӑр вӗсене, мӗн тӑвас тетӗр вӗсене — ҫавна тӑвӑр; анчах ку ҫынпа ӑссӑрла ан хӑтланӑр, тенӗ.

25Анчах вӗсем ӑна итлесшӗн те пулман. Вара левит хӑйӗн ҫум-арӑмне вӗсем патне урама илсе тухнӑ. Лешӗсем ӗнтӗ ӑна пусмӑрланӑ, ҫӗрӗпе, ирччен мӑшкӑлланӑ. Ӑна шуҫӑм килеспе тин ирӗке янӑ.

26Шуҫӑм килеспе хӗрарӑм, хӑйӗн хуҫи чарӑнса тӑнӑ кил патне ҫитейсе, алӑк умне ӳкнӗ, мӗн ҫутӑличченех ҫавӑнта выртнӑ.

27Ун хуҫи ирех тӑнӑ та, ҫула тухма хатӗрленсе, алӑка уҫса тухнӑ: акӑ ҫум-арӑмӗ алӑк умӗнче выртать, аллисене алӑк урати ҫине тӑсса хунӑ.

28Хуҫи ӑна: тӑр, каятпӑр, тенӗ. Анчах хирӗҫ чӗнни пулман, [мӗншӗн тесессӗн хӗрарӑмӗ вилнӗ пулнӑ]. Хуҫи вара ӑна ашак ҫине йӑтса хунӑ та ҫула тухнӑ.

29Килне ҫитсен, вӑл ҫӗҫӗ илнӗ те ҫум-арӑмне вуникӗ пая касса вакланӑ, кайран вӗсене пӗтӗм Израиль ҫӗрне салатнӑ.

30Ҫакна куракансем кашнийӗ: Израиль ывӑлӗсем Египет ҫӗрӗнчен тухнӑранпа паян куна ҫитиччен кун пекки пулман та, курман та, тенӗ. [Тӗрлӗ ҫӗре ӑсатнӑ хӑйӗн ҫыннисене левит ҫапла калама хушса янӑ: Израиль халӑхне ҫапла калӑр: халиччен ҫакӑн пекки пулнӑ-и? тейӗр, тенӗ.] Асӑрхӑр-ха ҫакна, канаш тӑвӑр та калӑр, тенӗ.

← Chapter 18 Jump to: Chapter 20 →