Isaiah 19

Dagbani Bible (Naawuni Kundi Kasi)

← Chapter 18 Jump to: Chapter 20 →

1Ijiptinim’ yɛla yɛtɔɣa m-bɔŋɔ: Nyama, Yawɛ ni ʒini sagbani din zɔri yomyom zuɣu n-ka Ijipti na; ka Ijipti wuna nya o ka bɛ ni’ sɔhira, ka Ijiptinim’ yɛma ŋma.

2Yawɛ yɛliya, “N ni tuɣili Ijiptinima, ka bɛ tuhi taba. Nir’ min’ o ʒiʒiinikpee ni tuhi taba, ka tins’ ayinim’ tuhi taba, ka nanim’ tuhi taba.

3N ni chɛ ka Ijiptinim’ birim, ka saɣim bɛ ni lo ni bɛ niŋ shɛm. Bɛ ni bɔhi bɛ wuna mini bɛ kpiimba ni bukpahinima ni bɛ wuhi ba bɛ ni yɛn niŋ shɛm.

4N ni zaŋ Ijiptinim’ niŋ na’ biɛɣu ŋun mali putɔɣu nuu ni ka o su ba. Man’ yi Duuma Yawɛ ŋun nyɛ Tɔbbihi Naa ŋɔ n-yɛli lala maa.”

5Nail Mɔɣili kom ni filim, ka mali lala hal ti nyuui zaa.

6Ka mɔɣili maa kɔsoya ni kom ni nyɔni, ka mali lala hal ti nyuui; ka kaɣili mini kulimɔri ti kuui zaa.

7Binshɛɣukam din be Nail Mɔɣili maa duli ni ti kuui, ka bɛ ni biri binshɛlikam dolisi mɔɣili maa ti kuui zaa, ka pɔhim ʒe li chaŋ,

8Ninvuɣ’ shɛb’ bɛn zaa nyɛ kulipalinima bɛn labiri ziŋgɔhi mini bɛn mali yilima bee nɛri gbahiri zahim Nail Mɔɣili maa ni ni ti fabili.

9Ninvuɣ’ shɛb’ bɛn wuɣiri situr’ piɛla ni ti yihi tahima, ka bɛn ʒi kpalu’ dari ni ninni biɛhigu ti taɣi.

10Di ni ti niŋ kpaluhi alahiziba, ka bɛnkam zaa tumdi tuma deeri yɔri ni ti mali suhusaɣiŋgu.

11Zɔan zuɣulaannim’ nyɛla jɛra. Ijipti yɛnnim’ nyɛla jɛra bɛn wuhi niriba din bi viɛla. Bɛ ku tooi yɛli Firawuna ni bɛ nyɛla yɛnnim’ mini na’ kura zuliya.

12Ijipti naa, a yɛnnim’ la lee be ya? Chɛ ka bɛ yɛl’ a Yawɛ ŋun nyɛ Tɔbbihi Naa ŋɔ ni yɛn niŋ Ijiptinim’ shɛm.

13Zɔan zuɣulaannim’ nyɛla jɛra, ka Mɛmfisi nabihi nyɛ bɛn yɔhindi niriba. Ninvuɣ’ shɛb’ bɛn nyɛ bɛ zuliya ni ninvuɣ’ zuɣuri birigi Ijiptinima.

14Yawɛ zaŋla chirachira biɛhigu ti ba, ka bɛ chɛ ka Ijiptinim’ laani gindi bɛ ni niŋdi shɛlikam ni kaman danyura m-be o tiri ni laani gindi la.

15Bundana bee nandana bee nabia bee tarima ka Ijipti tiŋgbɔŋ ni n-nyɛ ŋun ni tooi niŋ shɛli sɔŋ Ijiptinima.

16Dindali maa Ijiptinim’ ni ti ŋmanila paɣiba, dabiɛm ni ti kpe ba ka bɛ ni’ sɔhira, Yawɛ ŋun nyɛ Tɔbbihi Naa ŋɔ ni ti yɛn doli so’ shɛli liri ba zuɣu.

17Ka Ijiptinim’ ni zɔri Juda tiŋgbɔŋnima, ka bɛ yi ti boli Juda yuli bɛ ni so sani, dabiɛm ni gbaag’ o, Yawɛ ŋun nyɛ Tɔbbihi Naa ŋɔ ni lɔri nia shɛli zaŋ chaŋ bɛ polo zuɣu.

18Dindali maa Ijipti tiŋgbɔŋ ni fɔntins’ anu nim’ ni ti tɔɣisi Keenannim’ yɛtɔɣa, ka po pɔri ni bɛ ni jɛm Yawɛ ŋun nyɛ Tɔbbihi Naa ŋɔ. Ka tinsi maa ni zaɣ’ yini yuli ni ti boonila Wuntaŋ’ tiŋa.

19Di saha bɛ ni ti me sara maligu bimbini zali Yawɛ Ijipti tiŋgbɔŋ sunsuuni, ka lan me binwɔɣinli zali bɛ tintariga ka di teeri ba Yawɛ yɛla.

20Di yɛn nyɛla shihirili ni shɛhira Yawɛ ŋun nyɛ Tɔbbihi Naa ŋɔ sani Ijipti tiŋgbɔŋ ni. Bɛ yi ti fabili niŋ Yawɛ niriba bɛn nahindi ba la, o ni tim ŋun ni fa ba bahi bɛ sani ka o ti fa ba bahi.

21Yawɛ ni ti kahig’ omaŋ’ wuhi Ijiptinima, ka bɛ baŋ o dindali maa ka jɛm’ o, ka bo pina mini sara shɛli bɛ ni zaŋdi nyɔri buɣim la ti o. Bɛ ni ti pɔri pɔri Yawɛ sani, ka niŋ bɛ ni po ni bɛ ni niŋ shɛm.

22Yawɛ ni ti Ijiptinim’ daŋ’ pam, ka lan tib’ ba. Bɛ ni ti lab’ Yawɛ sanna, ka o deei bɛ suhigu ka tib’ ba.

23Di saha bɛ ni ti ŋme solɔɣu yi Ijipti tiŋgbɔŋ ni kuli Asiria tiŋgbɔŋ ni. Ka Asirianim’ ti kani Ijipti na, ka Ijiptinim’ gba kani Asiria na; ka Ijiptinim’ mini Asirianim’ ti laɣim jɛm Yawɛ.

24Di saha Izraɛlnim’ ni ti pahi Ijiptinim’ mini Asirianim’ zuɣu, ka bɛ niŋ zuliya ata niriba; ka bɛ zuɣu chɛ ka dunia zaa nya alibarika.

25Yawɛ ŋun nyɛ Tɔbbihi Naa ŋun pun niŋ alibarika niŋ bɛ ni ŋɔ ni ti yɛli, “N ni niŋ alibarika niŋ Ijiptinim’ bɛn nyɛ n niriba ŋɔ ni, ka niŋ alibarika niŋ Asirianim’ bɛn nyɛ n ni nam shɛb’ ŋɔ ni, ka niŋ alibarika niŋ Izraɛlnim’ bɛn nyɛ n ninvuɣ’ gahinda ŋɔ ni.”

← Chapter 18 Jump to: Chapter 20 →