Isaiah 58

Dagbani Bible (Naawuni Kundi Kasi)

← Chapter 57 Jump to: Chapter 59 →

1Tahimi pam, ka di shini! Duhim’ a kukoli kaman kikaa kumsi la n-yɛli n niriba Izraɛlnima bɛ tipawumli mini bɛ daalahichi yɛla.

2Bɛ jɛmdi ma sahakam. Bɛ ŋmanila ninvuɣ’ shɛb’ bɛn tumdi din tuhi, ka nyɛ bɛn suhuri ye n soli baŋbu zuɣu; ka bi tam bɛ Naawuni zaligu yɛla. Bɛ bɔri ni bɛ baŋ n saria karibu soli din tuhi yɛla. Bɛ nyɛla bɛn bɔri ni Naawuni miri ba.

3Bɛ bɔhira, “Bɔ n-niŋ ka ti lɔri noli ka a bi nyara? Bee bɔ n-niŋ ka ti nahim timaŋa, ka a baɣa kani.” Nyama, yi ni lɔri noli dahin’ shɛli maa yi niŋdila din ni sɔŋ yimaŋa, ka nahindi yi tumtumdiba.

4Nyama, yi yi lo noli yi ŋmɛrila tab’ naŋgbankpeeni ka zabiri buri taba buri biɛɣu. Yi ni lɔri noli maa shɛm pumpɔŋɔ ŋɔ ku chɛ ka Naawuni deei yi suhigu.

5Yi yi ti lo noli n-nahim yimaŋa, lala nolɔbo ka n zali? Di nyɛla yi silim yi zuɣuri tiŋa kaman gbiŋgbama la, ka pili buri n-teei do tampiligim ni? Dina ka yi booni nolɔbo? Yi tɛhiya ni Yawɛ ni saɣi deei di dabisili maa?

6N ni bɔri nolɔbo shɛli n-nyɛ: Yi lɔrigi yi ni nahindi shɛb’ la mihi, ka suui yi ni mɔŋ shɛb’ yɛlimaŋli ka ʒili ba ʒi’ tibisa la ʒiya; ka bahi yi ni nahindi shɛb’ la.

7Niŋmiya bindira tiri kum ni kuri shɛba, ka deemiya nandaamba bɛn ka kpɛhili shee niŋmi yi yinsi; ka timiya bɛn chani gbinfini situra; ka di zaɣisiya yi dɔɣiriba sɔŋbu.

8Di saha yi neesim ni neei kaman biɛkaali neesim la, ka yi nya alaafee yomyom, ka ŋun yɛn zabi yi zuɣu ni be yi tooni; ka Yawɛ jilima ni nyɛ yi gula m-be yi nyaaŋa polo.

9Di saha yi yi ti suh’ o, o ni deei yi suhigu, ka yi yi ti ŋme kuŋa m-bɔri sɔŋsim, o ni yɛli, “ M be kpe ni n sɔŋ ya.” Yi yi ni ti yi ni nahindi shɛb’ la vuhim, ka chɛ niriba ansarisi malibu ni yɛtɔɣ’ biɛri tɔɣisibu;

10ka tiri kum ni kuri shɛb’ bindira, ka tiri nandaamba bɛ ni kɔŋ shɛli, dindina yi neesim ni neei zibisim ni m-be kaman wuntaŋ’ zuɣusaa saha neesim la.

11Ka man’ Yawɛ kul ni wuhiri ya soli sahakam, ka tiri ya binshɛŋa din simdi ya wuntaŋ’ tulim pam tiŋgbani ŋɔ ni, ka tin ya yaa; ka chɛ ka yi be kaman pu’ shɛli din puuni mali kom; ka lan chɛ ka yi be kaman kɔbil’ nini din kom bi ŋmaara.

12N ni chɛ ka yi lab’ me goon’ shɛli din daa lu n-dahim la zali. Yi ni me li tam di tanza’ kura zuɣu. Ka niriba ti wuhi ni yinima n-nyɛ bɛn lab’ me goma maa mini yiya shɛŋa din daa lu n-dahim la.

13Yi yi bi birigi Vuhim Dabisili dali zaligu, ka bi tumdi yi suhuyubu dindali maa, ka tiri li jilima, ka bi chani soya, ka bi tumdi tuma bee n-tɔɣisiri yɛtɔɣ’ yoya dindali maa,

14dindina yi ni nya suhupiɛlli man’ Yawɛ sani, ka n chɛ ka yi nya jilima dunia ŋɔ luɣ’ shɛlikam zaa; ka chɛ ka yi di n ni daa zaŋ tiŋgban’ shɛli ti yi yab’ Yaakubu la daanfaani. Man’ Yawɛ n-yɛli lala maa.

← Chapter 57 Jump to: Chapter 59 →