Isaiah 32

Dagbani Bible (Naawuni Kundi Kasi)

← Chapter 31 Jump to: Chapter 33 →

1Nyama, Na’ so ŋun doli yɛlimaŋli soli ni ti di nam, ka o kpambaliba nyɛ bɛn tumdi din tuhi.

2Bɛ zaa yinoyino ŋmanila luɣ’ shɛli nira ni ni zo nti sɔɣi tiligi pɔhim bee sanʒiɛɣu. Bɛ ŋmanila kɔzɔrim din zo n-tiɛli tiŋgban’ nɛli, ka ŋmani mahim din be tiŋgban’ nɛl’ ni tampin’ titali lɔŋni.

3Di saha bɛ ni ti neei bɛ nina, ka gbilisi bɛ tiba wum niriba yɛlimuɣisira.

4Ninvuɣ’ shɛb’ bɛn niŋdi yomyom bɛ tɛha ni ni ti leei baŋdiba, ka bɛn tɔri birilim ti tɔɣisi yɛtɔɣa din niŋ kamaata ni viɛnyɛliŋga.

5So ku lan zaŋ jɛrigu boli ninvuɣ’ titali bee n-zaŋ yɛmbimbiɛrilana boli ninvuɣ’ suŋ.

6Dama jɛrigu tɔɣisirila jɛrilim yɛtɔɣa, ka tɛhiri zaɣ’ biɛɣu tumbu yɛla. O ni tumdi shɛm min’ o ni yɛri shɛm nyɛla biriginsim zaŋ chaŋ Yawɛ sani. O mi na ʒi n-ti kum ni mali shɛb’ bindirigu bee n-niŋ kom ti kɔnyuri ni mali ninvuɣ’ shɛba.

7Ninvuɣ’ biɛɣu tuma nyɛla tuumbiɛri. O nyɛla ŋun zaŋ ʒiri ni o tum faranim’ barina, ka niŋdi din ni chɛ ka nandaamba kɔŋ yɛlimaŋli.

8Amaa ninvuɣ’ titali nyɛla ŋun tumdi din doli yɛlimaŋli soli, ka ʒe din tuhi nyaaŋa.

9Yinim’ paɣ’ shɛb’ bɛn nya vuhim, ka tɛhi ni shɛli bi mali ya la, yiɣisimiya wum n ni yɛn yɛli shɛm.

10Di ku paai yuuni ka yinim’ bɛn nya vuhim ŋɔ ni’ sɔhigi. Wain tihi ku wali, ka di daatam kpuɣibu ku beni.

11Yinim’ paɣ’ shɛb’ bɛn nya vuhim ŋɔ, chɛliya ka yi ni’ sɔhira. Tɛhi’ shɛli ni bi mali yinim’ shɛb’ ŋɔ, chɛliya ka dabiɛm mali ya. Pirigimiya yi situra sɔŋ, ka zaŋ buri so yi shɛhi ni.

12Bumiya yi nyɔri ni suhusaɣiŋgu yi tiŋgbani din vuhiri mini yi tiwala tihi din saɣim la zuɣu.

13Dama gɔhi mini suligunyinyari bilila n niriba tiŋgban’ ni. Iin, kummiya suhupiɛlli ni daa be yil’ shɛŋa ni mini tin’ shɛl’ ni la zuɣu.

14Dama hal so ku lan be nayili, bɛ ni ti zo zaa ka chɛ tiŋ’ maa. Ka tiŋgula biɛhigu shee mini yiya lu n-dahim zaa n-kul doya sahakam. Ka nimaani leei mɔɣu ni bunsi gɔrim shee ni piɛri mɔri ŋubbu shee.

15Amaa Naawuni ni lan chɛ ka o shia siɣi ti zuɣu na, ka chɛ ka tiŋgban’ shɛli din kpi la leei tiŋgban’ shɛli din vuhira; ka puri atam niŋ pam.

16Di saha yɛlimaŋtali ni ti be tiŋgban’ nɛli ni, ka wuntitali mi ti be tiŋgban’ shɛli din vuhir’ ni.

17Ka wuntia tuma maa tahi suhudoo mini biɛri baalimtali ni naani niŋbu na sahakam.

18N niriba ni ti be suhudoo mini alaafee ni vuhim ni be luɣ’ shɛli,

19hal sakuɣa yi ti luna saɣim tibɔŋ la zaa, ka tiŋ’ maa lu n-dahim zaa.

20Ninvuɣ’ shɛb’ bɛn ko n-dolisi kulibɔŋ bindira ni niŋ pam, ka bɛ suhiri paligi, ka niɣi mini bunsi gba nya mɔ’ suma ŋubi.

← Chapter 31 Jump to: Chapter 33 →