Isaiah 6

Dagbani Bible (Naawuni Kundi Kasi)

← Chapter 5 Jump to: Chapter 7 →

1Naa Uzia ni daa kpi yuun’ shɛli ka n daa nya n Duuma ka o ʒi o nam ʒiishee din du pam ka mali jilima; ka o binyɛrigu pali Naawuni jɛmbu duu zaa.

2Ka Sɛrafinim’ daa ʒe o zuɣusaa polo. Bɛ zaa yinoyino daa malila kpiŋkpama ayɔbuyɔbu. Bɛ daa zaŋla diba ayiyi pɔb’ bɛ nina, ka zaŋ diba ayiyi pɔb’ bɛ napɔnvari, ka zaŋ diba ayiyi yiɣira.

3Ka bɛ daa kuhiri booni tab’ yɛra, “Kasi, kasi, kasi! N-nyɛ Yawɛ ŋun nyɛ Tɔbbihi Naa ŋɔ. O jilima palila dunia ŋɔ zaa.”

4Ka bɛ kukoya maa vuri daa chɛ ka Naawuni jɛmbu duu maa dunoli tanzaa sɔhigi, ka nyɔhi pali duu maa zaa.

5Ka n daa yɛli, “Mbusim be n zuɣu, n lan ka tahima, dama yɛtɔɣ’ biɛri n-yiri n nol’ ni na, ka m mini yɛtɔɣ’ biɛri ni yiri ninvuɣ’ shɛb’ noya ni na laɣim be; amaa ka n nini nya naa ŋun nyɛ Yawɛ ŋun nyɛ Tɔbbihi Naa ŋɔ.”

6Di saha ka Sɛrafinim’ maa ni yino ŋun daa gbib’ buɣim sal’ nɛɔŋ shɛli o ni daa zaŋ gbabo gbabi yihi sara maligu bimbini zuɣu daaŋa ni n-yiɣi ka n sanna

7nti zaŋ li shihi n noli ka yɛli, “Dimbɔŋɔ ni shihi a noli maa, di yih’ a galimi, ka kpihim’ a daalahichi.”

8Di saha ka n daa wum n Duuma kukoli ka di yɛra, “Ŋuni ka n lee yɛn tim, ka ŋuni n-lee yɛn chaŋ ti ti?” Ka n daa yɛli, “N-nyɛ ma; timmi ma.”

9Ka o daa yɛli ma, “Cham’ ti yɛli niriba maa, ‘Yi ni wum m-maan lab’ wum, amaa ka ku baŋ di gbinni. Yi ni lihi m-maan lab’ lihi, amaa ka ku baŋ yi ni nya shɛli.’

10Chɛ ka niriba ŋɔ niŋ suhutunanima, ka chɛ ka bɛ tiba kpiri, ka chɛ ka bɛ nina zom, ka di chɛ ka bɛ ku zaŋ bɛ nina lihi nya, ka zaŋ bɛ tiba wum, ka zaŋ bɛ suhuri baŋ shɛli gbinni, ka ŋmaligina nya tibbu.”

11Ka m bɔh’ o, “N Duuma, di yɛn be lala yuui hal ni bɔ saha?” Ka o yɛli ma, “Di ni be lala hal ka tinsi ti lu n-dahim, ka so ku lan be di yiya ni, ka tiŋgbani maa kpalim tiŋgban’ nɛli doya.

12Ka Yawɛ kari niriba maa tahi katiŋa, ka tiŋgbani maa kpalim zaɣ’ kuŋ.

13Hal ninvuɣ’ pia puuni ninvuɣ’ yino yi kpalim tiŋgbɔŋ maa ni, bɛ ni ku o gba. O ni bemi kaman oki ti’ shɛli bɛ ni ŋma n-luhi ka chɛ di tigbirigu. Tigbirigu maa nyɛla bimbirili din be kasi din ni lan zooi yaha.”

← Chapter 5 Jump to: Chapter 7 →