Isaiah 21

Dagbani Bible (Naawuni Kundi Kasi)

← Chapter 20 Jump to: Chapter 22 →

1Babilɔn yɛla yɛtɔɣa m-bɔŋɔ: Kaman pɔhimʒiɛpiliŋga ni ʒiɛri tiŋgban’ nɛli ni shɛm, lala ka mbusim pɔhim yɛn yi tiŋgban’ shɛli din mali dabiɛm ni na.

2N nyala putɔɣu yɛl’ shɛŋa din niŋdi ʒii. Di nyɛla nyaanyira ni ŋun tumdi saɣiŋgu tuma ʒii. Ɛlam tɔbbihi, lirimiya ba. Miidia tɔbbihi, dɔnimiya gili tinsi gu. Naawuni ni chɛ ka Babilɔnnim’ ni tahi wahala shɛli na maa zan’ tariga.

3Dinzuɣu ka biɛrim yiɣisi n niŋgbuna ni m-be kaman paɣa ni yi wolisiri ni o dɔɣi ka biɛrim shɛli mal’ o la, ka n ni daa wum ka nya ʒii shɛli maa puuni maa chɛ ka dabiɛm gbaai ma.

4M birimmi zaa ka dabiɛm kpe ma. N suhu kul yɛla yuŋ zibbu zuɣu, amaa ka di tahiri ma la dabiɛm na.

5Bɛ malila bindirigu dibu shili, ka yɛrigi kpahisi sɔŋ nimaani, ka bɛ ʒini di ka nyu. Ka sapashin’ kpamba yiɣisi niŋ kpam mali bɛ nyɔtaɣirisi.

6Di saha ka ti Duuma daa yɛli ma, “Cham’ ti bo tiŋgul’ zali, ka yɛl’ o ni o nini yi nya shɛlikam, ŋun’ yɛlima.

7O yi ti nya wɔribariba ayiyi bee bumbariba bee laakumbariba ka bɛ kanna, ŋun’ gbilisim’ o tibili wum viɛnyɛliŋga.”

8Ka tiŋgul’ maa daa kuhi yɛli, “N Duuma, n kul ʒiɛla n zaashee wuntaŋ’ ni ni yuŋ zaa.”

9Di daa bi yuui, ka o kuhi yɛli, “Wɔribariba be chɛchɛbuŋ’ ni, ka yuri ayi vɔri li kanna!” Di saha ka o daa lan yɛli, “Babilɔn luya, di luya! Ka di wuna binnana zaa lu n-wurisiwurisi do tiŋa.”

10N niriba Izraɛlnima, yinim’ bɛn nyɛ bɛ ni niŋ shɛb’ kaman bɛ ni bu ka’ shɛli n-yɛl’ li ŋɔ, n ni wum shɛli Yawɛ ŋun nyɛ Tɔbbihi Naa, ka nyɛ Izraɛlnim’ Naawuni ŋɔ sani ka n zaŋ yɛri ya maa.

11Duma yɛla yɛtɔɣa m-bɔŋɔ: Ka so daa boli ma Siɛr yɛra, “Tiŋgula, bɔ saha ka biɛɣu yɛn neei? Yɛlim’ biɛɣu maa ni yɛn neei saha shɛli.”

12Ka tiŋgul’ maa garigi yɛli, “Biɛɣu ni neei, amaa yuŋ ni lan zibi yaha. A yi bɔri ni a bɔhi, nyin’ lan labimina ti bɔhi.”

13Areebia yɛla yɛtɔɣa m-bɔŋɔ: Yinim’ Dɛdannim’ sochandiba bɛn dooni Areebia mɔɣu ni ŋɔ,

14bomiya kom na ti ti kɔnyuri ni mali shɛba. Yinim’ Tɛma tiŋgbɔŋnima, bomiya bindira ti kuŋkɔɣinzɔriba.

15Niriba maa zɔrimi ni bɛ tiligi bɛ ni ŋooi takɔb’ shɛli mini bɛ ni vooi tɔb’ shɛli ni bɛ to barina ni.

16Di saha ka ti Duuma daa yɛli ma, “Zaŋ chaŋ yuun’ yini saha din nyɛ kaman bɛ ni bu tumtumda so paa tuma yuma tariga saha, Kɛdar jilima ni zan’ tariga.

17Kɛdar peentɔriba bɛn nyɛ tɔbutuhiriba la ni ti kpalimla biɛla.” Yawɛ ŋun nyɛ Izraɛl Naawuni ŋɔ n-yɛli lala maa.

← Chapter 20 Jump to: Chapter 22 →