Isaiah 39

Dagbani Bible (Naawuni Kundi Kasi)

← Chapter 38 Jump to: Chapter 40 →

1Di saha ka Babilɔn naa Baladan bia Mɛrɔdakibaladan daa wum ni Hɛzɛkia daa biɛra, amaa ka nya alaafee, ka o daa sab’ gbaŋ m-bo pini pahi tim tuumba ni bɛ zaŋ li na ti ti Hɛzɛkia.

2Ka Hɛzɛkia daa deei ba ni suhupiɛlli, ka zaŋ o nɛma min’ o daanzinfa ni o salima ni o tulaale ni o kpa’ viɛla ni o tɔb’ nɛma ni binshɛɣukam zaa din be o nɛma duri puuni wuhi ba. Hɛzɛkia daa zaŋ binshɛɣukam zaa din be o nam sulinsi maa ni ni o nam yili puuni wuhi ba.

3Di nyaaŋa ka anabi Aizaia daa ka Naa Hɛzɛkia sanna nti bɔh’ o, “Ya polo ka niriba maa lee yina, ka wula ka bɛ lee yɛl’ a?” Ka Hɛzɛkia daa garigi yɛli, “Bɛ yila Babilɔn din nyɛ tin’ shɛli din be katiŋ’ la n-ka n sanna.”

4Ka o bɔh’ o, “ Bɔ ka bɛ lee nya a yili ŋɔ?” Ka Hɛzɛkia daa garigi yɛli, “Bɛ nya binshɛɣukam zaa din be n yili ŋɔ. Ka n zaŋ binshɛɣukam zaa din be n nɛma duri puuni wuhi ba.”

5Di saha ka Aizaia daa yɛli Hɛzɛkia, “Wummi Yawɛ ŋun nyɛ Tɔbbihi Naa ŋɔ ni yɛli shɛm:

6Dahin shɛli kanna, ka bɛ ni ti kana ti zaŋ binshɛɣukam din be a yiŋ’ puuni min’ a yaannim’ ni daa bo binshɛɣukam zali hal ni zuŋɔ la n-kuli Babilɔn, ka di shɛli ku kpalim. Man’ Yawɛ n-yɛli lala maa.

7Bɛ ni ti gbahi amaŋmaŋ’ bidib’ dɔɣirisi shɛb’ chaŋ ka bɛ ti leei namɔɣilisi be Babilɔn naa yiŋa.”

8Di saha ka Hɛzɛkia daa yɛli Aizaia “A ni zaŋ Yawɛ yɛtɔɣ’ shɛli yɛli maa viɛla.” O daa tɛhimi ni suhudoo ni alaafee ni be o ʒiɛman’ ni.

← Chapter 38 Jump to: Chapter 40 →