Isaiah 59

Dagbani Bible (Naawuni Kundi Kasi)

← Chapter 58 Jump to: Chapter 60 →

1Nyamiya, Yawɛ pala ŋun ka yiko din ni tooi tiligi ya bee ŋun nyɛ tikpiralana, ka ku tooi wum yi suhigu.

2Amaa yi daalahichi n-leei kuɣituurili be yi mini yi Naawuni maa sunsuuni. Yi daalahichi maa zuɣu ka o lɛb’ o nyaaŋa biri ya, ka ku wum yi suhigu.

3Dama yi nyɛla ninvuɣ’ kuriba bɛn nuhi tum taali; ka yi lan ŋmari ʒiri ka zaŋ yi zilima tɔɣisiri yɛtɔɣ’ biɛri.

4Yi tahiri tab’ ʒiishɛhi, amaa ka yɛlimaŋli ka yi polo. Yi dolila naŋgbankpeeni mini ʒiri soli ni yi di nasara, ka chɛ ka yɛlibiɛri tiɣi pua n-dɔɣi zaɣ’ biɛɣu.

5Yi ni lɔri nia biɛ’ shɛŋa bemi kaman gariŋga gala la. Nir’ yi ŋma di gal’ yini wahu n-yiri di ni na. Amaa yi nia biɛri maa ku kun ya buchi. Di nyɛla din ka buchi kaman kpatinari’ zana chinchini la, di bi galisi ka bɛmaŋmaŋ’ ni tooi zaŋ li pili.

7Yi kul lɔrila nia biɛri sahakam, ka jiɣiri zaɣ’ biɛɣu tumbu zuɣu; ka niŋdi yomyom chani ti kuri ninvuɣ’ shɛb’ bɛn ka taali. Yi yi kul gari luɣ’ shɛlikam, yi saɣindimi bahi.

8Yi bi doli yɛlimaŋli soli. Yi soya nyɛla sɔgolima, ka ŋunkam zaa dol’ li ka suhudoo, dama yi ʒi suhudoo soli.

9Dinzuɣu yɛlimaŋli soli be ti katiŋa, ka din tuhi gba bi paari ti. Ti bɔrila firila, amaa ka zibisim n-gil’ ti, ti bɔri neesim, amaa ka bela bumbɔn’ ni.

10Ti ŋmanila zoomba bɛn chani baɣisiri dukpini ka tuuri wuntaŋ’ zuɣusaa kaman di nyɛla yuŋ la. Bɛn mali yaa sunsuuni, ti ŋmanila kpiimba.

11Dabiɛm chɛmi ka ti ŋumdi kaman biŋkɔb’ so bɛ ni booni bee la, ka nandahima mi chɛ ka ti kumdi kaman ŋmana la. Ti kul guhirila yɛlimaŋli, ka bi nyari li; ka bɔri ŋun ni fa ti bahi, ka bi nyara.

12“Ti daalahichi galisiya pam ka diri ti shɛhira biɛɣu a sani; ti tumdi tuumbiɛri, ka mi ti daalahichi ni nyɛ shɛli.

13Ti tum tuumbiɛri, ka yi Yawɛ nyaaŋa, ka zaɣisi ti Naawuni jɛmbu. Ti nahindi ti taba, ka taari duŋ. Ti nyɛla bɛn ŋmari ʒiri din yiri ti suhuri ni na.

14Yɛlimaŋli soli be katiŋa ka chɛ ti, ka din tuhi mi ku tooi miri ti. Yɛlimaŋli tuui niriba laɣiŋgu shee soli zuɣu, ka biɛhigu din tuhi kɔŋ kpɛhili shee nimaani.

15Yɛlimaŋli kul ka ti sani hal biɛla gba, ka ninvuɣ’ so ŋun je zaɣ’ biɛɣu tumbu nyɛla ŋun be barina ni.” Ka Yawɛ daa nya yɛlimaŋli biɛhigu ni kani maa, ka di bi niŋ o nyaɣisim.

16O daa nyaya ka so kani, ka di daa gar’ o pam o ni daa nya ka so kani ŋun ni mali yɛlli maa zuɣu, ka o daa zaŋ omaŋmaŋ’ yiko tiligi ba, ka di nasara.

17O ni zaŋ wuntia kaman nyɔtaɣirigu la ye, ka zaŋ tiliginsim kaman zuɣupiligu la pili. O ni zaŋ o suhu ni lo ni o mali binshɛɣukam zali dɛde shɛm, ka bɔhi biɛri ti ninvuɣ’ shɛb’ bɛn diri wahala la kaman binyɛrigu la ye.

18O ni darigi bɛ tibili kaman bɛ tuma ni simdi shɛm. O suhu ni yiɣisi bah’ o dimnim’ zuɣu pam, ka o bɔhi ba biɛri. Hal o ni bɔhi bɛn be tiŋgban’ shɛŋa din be katiŋ’ gba biɛri kaman bɛ tuma ni nyɛ shɛm.

19Wulinluhili polɔnim’ ni lu Yawɛ yuli sizuura, ka wulimpuhili polɔnim’ mi lu o sizuura o jilima zuɣu; dama dimnim’ maa yi ti kana kaman kokpɛɣu mini sanʒiɛɣu la, Yawɛ Shia ni ti yiɣisi tuhi ba.

20Yawɛ yɛliya, “Tiligira ni ka Jɛrusalɛm na nti tiligi Yaakubu zuliya bɛn niŋ tuuba bɛ daalahichi zuɣu.”

21Yawɛ yɛliya, “N ni lɔri ya alikauli shɛli m-bɔŋɔ: N zaŋ n Shia mini n wuhibu tin ya ni di be yi suhuri ni sahakam, ka yi zaŋ li wuhi yi bihi mini yi yaansi ka di be bɛ gba suhuri ni pumpɔŋɔ zaŋ chana.” Man’ Yawɛ n-yɛli lala maa.

← Chapter 58 Jump to: Chapter 60 →