Isaiah 33

Dagbani Bible (Naawuni Kundi Kasi)

← Chapter 32 Jump to: Chapter 34 →

1Mbusim be a zuɣu, nyini ŋun kuri niriba, ka so na bi ku a ŋɔ; nyini yɛŋkiŋkabinalana, so ʒi n-tum’ a yɛŋkiŋkabina tuma. A yi ti chɛ yɛŋkiŋkabina tuma, bɛ ni tum a yɛŋkiŋkabina tuma; ka a yi ti chɛ niriba kubu, bɛ ni ku a.

2Yawɛ, Nyini ka ti niŋ naani, zom’ ti nambɔɣu. Guli ti dabisili kam. Tiligim’ ti ti muɣisigu nyabu saha.

3A yi zab’ ti zuɣu, ka niriba wum zabili maa damli, bɛ zɔrimi.

4Ka bɛ laɣim bɛ ni di neen’ shɛŋa sɔŋ kaman zunzuya ni laɣindi binyara shɛm la, ka yiɣiri luri di zuɣu kaman toli ni yiɣiri luri binyara zuɣu shɛm la.

5Yawɛ nyɛla ŋun galisi ka be zuɣusaa. O chɛ ka yɛlimaŋli mini wuntitali be Jɛrusalɛm.

6O chɛ ka tiŋgbɔŋ maa be viɛnyɛliŋga yi ʒiɛman’ ni. Tiliginsim mini yɛm ni baŋsim din galisi bela o sani. Yawɛ zɔbu n-nyɛ Ziɔn azichi.

7Nyama, ninvuɣ’ shɛb’ bɛn nyɛ suhukpeennim’ dolila soya kuhiri bɔri sɔŋsim, ka sandaantimdiba kuhiri pampam.

8Ka niriba chɛ solɔri dolibu, ka sochandiba chɛ so’ kara dolibu. Ka zɔtali saɣim, ka alikaulinim’ saɣim, ka so baɣa ka di yɛla ni.

9Ka tiŋgbani fabindi ka mali suhugarigu. Ka Lɛbanɔn nyɔŋ tihi suui; ka Sharɔn vinvamli niŋ kaman tiŋgban’ nɛl’ la; ka Bashan mini Kamɛl Zoli zuɣu tihi suura.

10Yawɛ yɛliya, “Pumpɔŋɔ n ni yiɣisi wuhi ni m mali yiko; bɛ ni tibigi ma pumpɔŋɔ.

11Yi lo nia shɛŋa din ka buchi, yimaŋmaŋ’ vuhim ni ŋmaligi din ya kaman buɣim la.

12Buɣim ni ti di n-kabi zuliya shɛba kaman bɛ ni nyɔri kɔba ka di leeri tampiligim shɛm la, ka lan be kaman bɛ ni ŋma go’ shɛŋa sɔŋ ka buɣim di li la.

13Chɛliya ka bɛnkam be yoma ni katiŋ’ zaa wum n ni niŋ shɛm ka baŋ ni m mali yiko.”

14Dabiɛm kpe Ziɔn alahichinim’ ka bɛ ni sɔhira. Ka bɛ yɛra, “Naawuni saria karibo ŋmanila buɣim din diri sahakam. Ka ti ni ŋuni n-lee ni tooi tiligi buɣim maa ni?”

15Ninvuɣ’ shɛb’ bɛn doli wuntia soli, ka tɔɣisiri din tuhi, ka bi zaŋdi bɛ kpiɔŋ fari niriba, ka bi diri birapu, ka je ni bɛ wum ninvuɣ’ kubo yɛla, ka ŋmaligi bɛ nina ka chɛ zaɣ’ biɛɣu;

16bɛna n-ni tiligi. Bɛ biɛhigu shee ni ti nyɛla zoya din du pam zuɣu, ka bɛ sɔɣibu shee ti nyɛ kuɣa birininim’ puuni, ka bɛ ti tiri ba bindirigu mini kom.

17Yi nini ni lan nya na’ so ŋun diri mali jilima su tiŋgbɔn’ shɛli din galisi pam.

18Yi ni ti teerila dabiɛm din daa yi mali ya la yɛla ka bɔhira, “Ka ŋun kaani liɣiri la lee be ya? Ka ŋun zahindi farigu binyara tibisim la lee be ya? Ka ŋun kaani pihi la lee be ya?”

19Yi mi ku lan nya karimbaannim’ bɛn tɔɣisiri tinzun’ yɛtɔɣa din nyɛ saani yi sani ka yi ʒi li, ka ku tooi baŋ di gbinni la.

20Lihimiya Ziɔn din nyɛ ti ni puhiri ti daadiini churi tin’ shɛli ni la. Lihimiya Jɛrusalɛm din nyɛ alaafee biɛhigu shee la. Di tanti suɣili bi vuura, ka di dasara kul ku vuɣi, ka di gabisi mi bi chihira.

21Yawɛ ni wuhi ti o jilima, ka chɛ ka ti ʒini baɣili mɔɣ’ kara mini kulibɔna, amaa ka ti dimnim’ ŋarima ku gari nimaani.

22Yawɛ n-nyɛ ti sariakarita, ŋuna n-su ti, ŋuna n-nyɛ ti naa. O ni tiligi ti.

23Yi ŋarima saɣimya, ka di mihi chihi, ka di tana chahi. Ti ni fa ti dimnim’ tɔbbihi nɛma zaa piri ti taba. Hal gbariti gba ni nya tarili di ni.

24Ninvuɣ’ shɛb’ bɛn be ti tiŋgbɔŋ ni so ti ku yɛli ni o biɛra. Ka Naawuni ni ti chɛ ninvuɣ’ shɛb’ bɛn be nimaani daalahichi zaa taali.

← Chapter 32 Jump to: Chapter 34 →